| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. පඨමඅක්‌ඛන්‌තිසුත්‌තං
5. Paṭhamaakkhantisuttaṃ
215. ‘‘පඤ්‌චිමෙ, භික්‌ඛවෙ, ආදීනවා අක්‌ඛන්‌තියා. කතමෙ පඤ්‌ච? බහුනො ජනස්‌ස අප්‌පියො හොති අමනාපො, වෙරබහුලො ච හොති, වජ්‌ජබහුලො ච, සම්‌මූළ්‌හො කාලං කරොති, කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති. ඉමෙ ඛො, භික්‌ඛවෙ, පඤ්‌ච ආදීනවා අක්‌ඛන්‌තියා.
215. ‘‘Pañcime, bhikkhave, ādīnavā akkhantiyā. Katame pañca? Bahuno janassa appiyo hoti amanāpo, verabahulo ca hoti, vajjabahulo ca, sammūḷho kālaṃ karoti, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Ime kho, bhikkhave, pañca ādīnavā akkhantiyā.
‘‘පඤ්‌චිමෙ, භික්‌ඛවෙ, ආනිසංසා ඛන්‌තියා. කතමෙ පඤ්‌ච? බහුනො ජනස්‌ස පියො හොති මනාපො, න වෙරබහුලො හොති, න වජ්‌ජබහුලො, අසම්‌මූළ්‌හො කාලං කරොති, කායස්‌ස භෙදා පරං මරණා සුගතිං සග්‌ගං ලොකං උපපජ්‌ජති. ඉමෙ ඛො, භික්‌ඛවෙ, පඤ්‌ච ආනිසංසා ඛන්‌තියා’’ති. පඤ්‌චමං.
‘‘Pañcime, bhikkhave, ānisaṃsā khantiyā. Katame pañca? Bahuno janassa piyo hoti manāpo, na verabahulo hoti, na vajjabahulo, asammūḷho kālaṃ karoti, kāyassa bhedā paraṃ maraṇā sugatiṃ saggaṃ lokaṃ upapajjati. Ime kho, bhikkhave, pañca ānisaṃsā khantiyā’’ti. Pañcamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. පඨමඅක්‌ඛන්‌තිසුත්‌තවණ්‌ණනා • 5. Paṭhamaakkhantisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3-10. සීලසුත්‌තාදිවණ්‌ණනා • 3-10. Sīlasuttādivaṇṇanā
