| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៧-៨. បឋមអនាគតភយសុត្តាទិវណ្ណនា
7-8. Paṭhamaanāgatabhayasuttādivaṇṇanā
៧៧-៧៨. សត្តមេ វិសេសស្ស បត្តិយា វិសេសស្ស បាបុណនត្ថំ។ វីរិយន្តិ បធានវីរិយំ។ តំ បន ចង្កមនវសេន ករណេ ‘‘កាយិក’’ន្តិបិ វត្តព្ពតំ លភតីតិ អាហ – ‘‘ទុវិធម្បី’’តិ។ សត្ថកវាតាតិ សន្ធិពន្ធនានិ កត្តរិយា ឆិន្ទន្តា វិយ បវត្តវាតា។ តេនាហ – ‘‘សត្ថំ វិយា’’តិអាទិ។ កតកម្មេហីតិ កតចោរកម្មេហិ។ តេ កិរ កតកម្មា យំ នេសំ ទេវតំ អាយាចិត្វា កម្មំ និប្ផន្នំ, តស្ស ឧបការត្ថាយ មនុស្សេ មារេត្វា គលលោហិតានិ គណ្ហន្តិ។ តេ ‘‘អញ្ញេសុ មនុស្សេសុ មារិយមានេសុ កោលាហលំ ឧប្បជ្ជិស្សតិ, បព្ពជិតំ បរិយេសន្តោ នាម នត្ថី’’តិ មញ្ញមានា ភិក្ខូ គហេត្វា មារេន្តិ។ តំ សន្ធាយេតំ វុត្តំ។ អកតកម្មេហីតិ អដវិតោ គាមំ អាគមនកាលេ កម្មនិប្ផត្តត្ថំ បុរេតរំ ពលិកម្មំ កាតុកាមេហិ។ តេនេវាហ – ‘‘ចោរិកំ កត្វា និក្ខន្តា កតកម្មា នាមា’’តិអាទិ។ អដ្ឋមេ នត្ថិ វត្តព្ពំ។
77-78. Sattame visesassa pattiyā visesassa pāpuṇanatthaṃ. Vīriyanti padhānavīriyaṃ. Taṃ pana caṅkamanavasena karaṇe ‘‘kāyika’’ntipi vattabbataṃ labhatīti āha – ‘‘duvidhampī’’ti. Satthakavātāti sandhibandhanāni kattariyā chindantā viya pavattavātā. Tenāha – ‘‘satthaṃ viyā’’tiādi. Katakammehīti katacorakammehi. Te kira katakammā yaṃ nesaṃ devataṃ āyācitvā kammaṃ nipphannaṃ, tassa upakāratthāya manusse māretvā galalohitāni gaṇhanti. Te ‘‘aññesu manussesu māriyamānesu kolāhalaṃ uppajjissati, pabbajitaṃ pariyesanto nāma natthī’’ti maññamānā bhikkhū gahetvā mārenti. Taṃ sandhāyetaṃ vuttaṃ. Akatakammehīti aṭavito gāmaṃ āgamanakāle kammanipphattatthaṃ puretaraṃ balikammaṃ kātukāmehi. Tenevāha – ‘‘corikaṃ katvā nikkhantā katakammā nāmā’’tiādi. Aṭṭhame natthi vattabbaṃ.
បឋមអនាគតភយសុត្តាទិវណ្ណនា និដ្ឋិតា។
Paṭhamaanāgatabhayasuttādivaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya
៧. បឋមអនាគតភយសុត្តំ • 7. Paṭhamaanāgatabhayasuttaṃ
៨. ទុតិយអនាគតភយសុត្តំ • 8. Dutiyaanāgatabhayasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā)
៧. បឋមអនាគតភយសុត្តវណ្ណនា • 7. Paṭhamaanāgatabhayasuttavaṇṇanā
៨. ទុតិយអនាគតភយសុត្តវណ្ណនា • 8. Dutiyaanāgatabhayasuttavaṇṇanā
