| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. பட²மஅனாக³தப⁴யஸுத்தவண்ணனா
7. Paṭhamaanāgatabhayasuttavaṇṇanā
77. ஸத்தமே ஆரஞ்ஞகேனாதி அரஞ்ஞவாஸினா. அப்பத்தஸ்ஸாதி அஸம்பத்தஸ்ஸ ஜா²னவிபஸ்ஸனாமக்³க³ப²லப்பபே⁴த³ஸ்ஸ விஸேஸஸ்ஸ பத்தியா. ஸேஸபதே³ஸுபி ஏஸேவ நயோ. ஸோ மமஸ்ஸ அந்தராயோதி ஸோ மம ஜீவிதந்தராயோ ச ப்³ரஹ்மசரியந்தராயோ ச, புது²ஜ்ஜனகாலகிரியங் கரொந்தஸ்ஸ ஸக்³க³ந்தராயோ ச மக்³க³ந்தராயோ ச ப⁴வெய்ய. ஹந்தா³தி வவஸ்ஸக்³க³த்தே² நிபாதோ. வீரியங் ஆரபா⁴மீதி து³வித⁴ம்பி வீரியங் கரோமி. ஸத்த²காதி ஸத்த²ங் விய ஸந்தி⁴ப³ந்த⁴னச்சே²த³கவாதா. வாளேஹீதி கக்க²ளேஹி. மாணவேஹீதி சோரேஹி. கதகம்மேஹி வா அகதகம்மேஹி வாதி எத்த² சோரிகங் கத்வா நிக்க²ந்தா கதகம்மா நாம, சோரிகங் காதுங் க³ச்ச²ந்தா அகதகம்மா நாம. தத்த² கதகம்மா கம்மஸ்ஸ நிப்ப²ன்னத்தா ஸத்தானங் க³லலோஹிதங் க³ஹெத்வா தே³வதானங் ப³லிங் கரொந்தி, அகதகம்மா ‘‘ஏவங் நோ கம்மங் நிப்ப²ஜ்ஜிஸ்ஸதீ’’தி பட²மதரங் கரொந்தி. இத³ங் ஸந்தா⁴ய தே மங் ஜீவிதா வோரோபெய்யுந்தி வுத்தங். வாளா அமனுஸ்ஸாதி கக்க²ளா து³ட்டா² யக்கா²த³யோ அமனுஸ்ஸா.
77. Sattame āraññakenāti araññavāsinā. Appattassāti asampattassa jhānavipassanāmaggaphalappabhedassa visesassa pattiyā. Sesapadesupi eseva nayo. So mamassa antarāyoti so mama jīvitantarāyo ca brahmacariyantarāyo ca, puthujjanakālakiriyaṃ karontassa saggantarāyo ca maggantarāyo ca bhaveyya. Handāti vavassaggatthe nipāto. Vīriyaṃ ārabhāmīti duvidhampi vīriyaṃ karomi. Satthakāti satthaṃ viya sandhibandhanacchedakavātā. Vāḷehīti kakkhaḷehi. Māṇavehīti corehi. Katakammehi vā akatakammehi vāti ettha corikaṃ katvā nikkhantā katakammā nāma, corikaṃ kātuṃ gacchantā akatakammā nāma. Tattha katakammā kammassa nipphannattā sattānaṃ galalohitaṃ gahetvā devatānaṃ baliṃ karonti, akatakammā ‘‘evaṃ no kammaṃ nipphajjissatī’’ti paṭhamataraṃ karonti. Idaṃ sandhāya te maṃ jīvitā voropeyyunti vuttaṃ. Vāḷā amanussāti kakkhaḷā duṭṭhā yakkhādayo amanussā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. பட²மஅனாக³தப⁴யஸுத்தங் • 7. Paṭhamaanāgatabhayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-8. பட²மஅனாக³தப⁴யஸுத்தாதி³வண்ணனா • 7-8. Paṭhamaanāgatabhayasuttādivaṇṇanā
