| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၇. ပဌမအနာဂတဘယသုတ္တဝဏ္ဏနာ
7. Paṭhamaanāgatabhayasuttavaṇṇanā
၇၇. သတ္တမေ အာရညကေနာတိ အရညဝာသိနာ။ အပ္ပတ္တသ္သာတိ အသမ္ပတ္တသ္သ ဈာနဝိပသ္သနာမဂ္ဂဖလပ္ပဘေဒသ္သ ဝိသေသသ္သ ပတ္တိယာ။ သေသပဒေသုပိ ဧသေဝ နယော။ သော မမသ္သ အန္တရာယောတိ သော မမ ဇီဝိတန္တရာယော စ ဗ္ရဟ္မစရိယန္တရာယော စ, ပုထုဇ္ဇနကာလကိရိယံ ကရောန္တသ္သ သဂ္ဂန္တရာယော စ မဂ္ဂန္တရာယော စ ဘဝေယ္ယ။ ဟန္ဒာတိ ဝဝသ္သဂ္ဂတ္ထေ နိပာတော။ ဝီရိယံ အာရဘာမီတိ ဒုဝိဓမ္ပိ ဝီရိယံ ကရောမိ။ သတ္ထကာတိ သတ္ထံ ဝိယ သန္ဓိဗန္ဓနစ္ဆေဒကဝာတာ။ ဝာဠေဟီတိ ကက္ခဠေဟိ။ မာဏဝေဟီတိ စောရေဟိ။ ကတကမ္မေဟိ ဝာ အကတကမ္မေဟိ ဝာတိ ဧတ္ထ စောရိကံ ကတ္ဝာ နိက္ခန္တာ ကတကမ္မာ နာမ, စောရိကံ ကာတုံ ဂစ္ဆန္တာ အကတကမ္မာ နာမ။ တတ္ထ ကတကမ္မာ ကမ္မသ္သ နိပ္ဖန္နတ္တာ သတ္တာနံ ဂလလောဟိတံ ဂဟေတ္ဝာ ဒေဝတာနံ ဗလိံ ကရောန္တိ, အကတကမ္မာ ‘‘ဧဝံ နော ကမ္မံ နိပ္ဖဇ္ဇိသ္သတီ’’တိ ပဌမတရံ ကရောန္တိ။ ဣဒံ သန္ဓာယ တေ မံ ဇီဝိတာ ဝောရောပေယ္ယုန္တိ ဝုတ္တံ။ ဝာဠာ အမနုသ္သာတိ ကက္ခဠာ ဒုဋ္ဌာ ယက္ခာဒယော အမနုသ္သာ။
77. Sattame āraññakenāti araññavāsinā. Appattassāti asampattassa jhānavipassanāmaggaphalappabhedassa visesassa pattiyā. Sesapadesupi eseva nayo. So mamassa antarāyoti so mama jīvitantarāyo ca brahmacariyantarāyo ca, puthujjanakālakiriyaṃ karontassa saggantarāyo ca maggantarāyo ca bhaveyya. Handāti vavassaggatthe nipāto. Vīriyaṃ ārabhāmīti duvidhampi vīriyaṃ karomi. Satthakāti satthaṃ viya sandhibandhanacchedakavātā. Vāḷehīti kakkhaḷehi. Māṇavehīti corehi. Katakammehi vā akatakammehi vāti ettha corikaṃ katvā nikkhantā katakammā nāma, corikaṃ kātuṃ gacchantā akatakammā nāma. Tattha katakammā kammassa nipphannattā sattānaṃ galalohitaṃ gahetvā devatānaṃ baliṃ karonti, akatakammā ‘‘evaṃ no kammaṃ nipphajjissatī’’ti paṭhamataraṃ karonti. Idaṃ sandhāya te maṃ jīvitā voropeyyunti vuttaṃ. Vāḷā amanussāti kakkhaḷā duṭṭhā yakkhādayo amanussā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၇. ပဌမအနာဂတဘယသုတ္တံ • 7. Paṭhamaanāgatabhayasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၇-၈. ပဌမအနာဂတဘယသုတ္တာဒိဝဏ္ဏနာ • 7-8. Paṭhamaanāgatabhayasuttādivaṇṇanā
