| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೭. ಪಠಮಅನಾಗತಭಯಸುತ್ತವಣ್ಣನಾ
7. Paṭhamaanāgatabhayasuttavaṇṇanā
೭೭. ಸತ್ತಮೇ ಆರಞ್ಞಕೇನಾತಿ ಅರಞ್ಞವಾಸಿನಾ। ಅಪ್ಪತ್ತಸ್ಸಾತಿ ಅಸಮ್ಪತ್ತಸ್ಸ ಝಾನವಿಪಸ್ಸನಾಮಗ್ಗಫಲಪ್ಪಭೇದಸ್ಸ ವಿಸೇಸಸ್ಸ ಪತ್ತಿಯಾ। ಸೇಸಪದೇಸುಪಿ ಏಸೇವ ನಯೋ। ಸೋ ಮಮಸ್ಸ ಅನ್ತರಾಯೋತಿ ಸೋ ಮಮ ಜೀವಿತನ್ತರಾಯೋ ಚ ಬ್ರಹ್ಮಚರಿಯನ್ತರಾಯೋ ಚ, ಪುಥುಜ್ಜನಕಾಲಕಿರಿಯಂ ಕರೋನ್ತಸ್ಸ ಸಗ್ಗನ್ತರಾಯೋ ಚ ಮಗ್ಗನ್ತರಾಯೋ ಚ ಭವೇಯ್ಯ। ಹನ್ದಾತಿ ವವಸ್ಸಗ್ಗತ್ಥೇ ನಿಪಾತೋ। ವೀರಿಯಂ ಆರಭಾಮೀತಿ ದುವಿಧಮ್ಪಿ ವೀರಿಯಂ ಕರೋಮಿ। ಸತ್ಥಕಾತಿ ಸತ್ಥಂ ವಿಯ ಸನ್ಧಿಬನ್ಧನಚ್ಛೇದಕವಾತಾ। ವಾಳೇಹೀತಿ ಕಕ್ಖಳೇಹಿ। ಮಾಣವೇಹೀತಿ ಚೋರೇಹಿ। ಕತಕಮ್ಮೇಹಿ ವಾ ಅಕತಕಮ್ಮೇಹಿ ವಾತಿ ಏತ್ಥ ಚೋರಿಕಂ ಕತ್ವಾ ನಿಕ್ಖನ್ತಾ ಕತಕಮ್ಮಾ ನಾಮ, ಚೋರಿಕಂ ಕಾತುಂ ಗಚ್ಛನ್ತಾ ಅಕತಕಮ್ಮಾ ನಾಮ। ತತ್ಥ ಕತಕಮ್ಮಾ ಕಮ್ಮಸ್ಸ ನಿಪ್ಫನ್ನತ್ತಾ ಸತ್ತಾನಂ ಗಲಲೋಹಿತಂ ಗಹೇತ್ವಾ ದೇವತಾನಂ ಬಲಿಂ ಕರೋನ್ತಿ, ಅಕತಕಮ್ಮಾ ‘‘ಏವಂ ನೋ ಕಮ್ಮಂ ನಿಪ್ಫಜ್ಜಿಸ್ಸತೀ’’ತಿ ಪಠಮತರಂ ಕರೋನ್ತಿ। ಇದಂ ಸನ್ಧಾಯ ತೇ ಮಂ ಜೀವಿತಾ ವೋರೋಪೇಯ್ಯುನ್ತಿ ವುತ್ತಂ। ವಾಳಾ ಅಮನುಸ್ಸಾತಿ ಕಕ್ಖಳಾ ದುಟ್ಠಾ ಯಕ್ಖಾದಯೋ ಅಮನುಸ್ಸಾ।
77. Sattame āraññakenāti araññavāsinā. Appattassāti asampattassa jhānavipassanāmaggaphalappabhedassa visesassa pattiyā. Sesapadesupi eseva nayo. So mamassa antarāyoti so mama jīvitantarāyo ca brahmacariyantarāyo ca, puthujjanakālakiriyaṃ karontassa saggantarāyo ca maggantarāyo ca bhaveyya. Handāti vavassaggatthe nipāto. Vīriyaṃ ārabhāmīti duvidhampi vīriyaṃ karomi. Satthakāti satthaṃ viya sandhibandhanacchedakavātā. Vāḷehīti kakkhaḷehi. Māṇavehīti corehi. Katakammehi vā akatakammehi vāti ettha corikaṃ katvā nikkhantā katakammā nāma, corikaṃ kātuṃ gacchantā akatakammā nāma. Tattha katakammā kammassa nipphannattā sattānaṃ galalohitaṃ gahetvā devatānaṃ baliṃ karonti, akatakammā ‘‘evaṃ no kammaṃ nipphajjissatī’’ti paṭhamataraṃ karonti. Idaṃ sandhāya te maṃ jīvitā voropeyyunti vuttaṃ. Vāḷā amanussāti kakkhaḷā duṭṭhā yakkhādayo amanussā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೭. ಪಠಮಅನಾಗತಭಯಸುತ್ತಂ • 7. Paṭhamaanāgatabhayasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೭-೮. ಪಠಮಅನಾಗತಭಯಸುತ್ತಾದಿವಣ್ಣನಾ • 7-8. Paṭhamaanāgatabhayasuttādivaṇṇanā
