| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3-10. பட²மஆனந்த³ஸுத்தாதி³வண்ணனா
3-10. Paṭhamaānandasuttādivaṇṇanā
989-996. ததியே பவிசினதீதி அனிச்சாதி³வஸேன பவிசினதி. இதரங் பத³த்³வயங் ஏதஸ்ஸேவ வேவசனங். நிராமிஸாதி நிக்கிலேஸா காயிகசேதஸிகத³ரத²படிபஸ்ஸத்³தி⁴யா காயோபி சித்தம்பி பஸ்ஸம்ப⁴தி. ஸமாதி⁴யதீதி ஸம்மா ட²பியதி, அப்பனாசித்தங் விய ஹோதி. அஜ்ஜு²பெக்கி²தா ஹோதீதி ஸஹஜாதஅஜ்ஜு²பெக்க²னாய அஜ்ஜு²பெக்கி²தா ஹோதி.
989-996. Tatiye pavicinatīti aniccādivasena pavicinati. Itaraṃ padadvayaṃ etasseva vevacanaṃ. Nirāmisāti nikkilesā kāyikacetasikadarathapaṭipassaddhiyā kāyopi cittampi passambhati. Samādhiyatīti sammā ṭhapiyati, appanācittaṃ viya hoti. Ajjhupekkhitā hotīti sahajātaajjhupekkhanāya ajjhupekkhitā hoti.
ஏவங் சுத்³த³ஸவிதே⁴ன காயபரிக்³கா³ஹகஸ்ஸ பி⁴க்கு²னோ தஸ்மிங் காயே ஸதி ஸதிஸம்பொ³ஜ்ஜ²ங்கோ³, தாய ஸதியா ஸம்பயுத்தஞாணங் த⁴ம்மவிசயஸம்பொ³ஜ்ஜ²ங்கோ³, தங்ஸம்பயுத்தமேவ காயிகசேதஸிகவீரியங் வீரியஸம்பொ³ஜ்ஜ²ங்கோ³, பீதிபஸ்ஸத்³தி⁴சித்தேகக்³க³தா பீதிபஸ்ஸத்³தி⁴ஸமாதி⁴ஸம்பொ³ஜ்ஜ²ங்கா³, இமேஸங் ச²ன்னங் பொ³ஜ்ஜ²ங்கா³னங் அனோஸக்கனஅனதிவத்தனஸங்கா²தோ மஜ்ஜ²த்தாகாரோ உபெக்கா²ஸம்பொ³ஜ்ஜ²ங்கோ³. யதே²வ ஹி ஸமப்பவத்தேஸு அஸ்ஸேஸு ஸாரதி²னோ ‘‘அயங் ஓலீயதீ’’தி துத³னங் வா, ‘‘அயங் அதிதா⁴வதீ’’தி ஆகட்³ட⁴னங் வா நத்தி², கேவலங் ஏவங் பஸ்ஸமானஸ்ஸ டி²தாகாரோவ ஹோதி, ஏவமேவ இமேஸங் ச²ன்னங் பொ³ஜ்ஜ²ங்கா³னங் அனோஸக்கனஅனதிவத்தனஸங்கா²தோ மஜ்ஜ²த்தாகாரோ உபெக்கா²ஸம்பொ³ஜ்ஜ²ங்கோ³ நாம ஹோதி. எத்தாவதா கிங் கதி²தங்? ஏகசித்தக்க²ணிகா நானாஸரஸலக்க²ணா விபஸ்ஸனாபொ³ஜ்ஜ²ங்கா³ நாம கதி²தா.
Evaṃ cuddasavidhena kāyapariggāhakassa bhikkhuno tasmiṃ kāye sati satisambojjhaṅgo, tāya satiyā sampayuttañāṇaṃ dhammavicayasambojjhaṅgo, taṃsampayuttameva kāyikacetasikavīriyaṃ vīriyasambojjhaṅgo, pītipassaddhicittekaggatā pītipassaddhisamādhisambojjhaṅgā, imesaṃ channaṃ bojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo. Yatheva hi samappavattesu assesu sārathino ‘‘ayaṃ olīyatī’’ti tudanaṃ vā, ‘‘ayaṃ atidhāvatī’’ti ākaḍḍhanaṃ vā natthi, kevalaṃ evaṃ passamānassa ṭhitākārova hoti, evameva imesaṃ channaṃ bojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo nāma hoti. Ettāvatā kiṃ kathitaṃ? Ekacittakkhaṇikā nānāsarasalakkhaṇā vipassanābojjhaṅgā nāma kathitā.
விவேகனிஸ்ஸிதந்திஆதீ³னி வுத்தத்தா²னேவ. எத்த² பன ஸோளஸக்க²த்துகா ஆனாபானஸ்ஸதி மிஸ்ஸகா கதி²தா, ஆனாபானமூலகா ஸதிபட்டா²னா புப்³ப³பா⁴கா³ , தேஸங் மூலபூ⁴தா ஆனாபானஸ்ஸதி புப்³ப³பா⁴கா³. பொ³ஜ்ஜ²ங்க³மூலகா ஸதிபட்டா²னா புப்³ப³பா⁴கா³, தேபி பொ³ஜ்ஜ²ங்கா³ புப்³ப³பா⁴கா³வ. விஜ்ஜாவிமுத்திபூரகா பன பொ³ஜ்ஜ²ங்கா³ நிப்³ப³த்திதலோகுத்தரா, விஜ்ஜாவிமுத்தியோ அரியப²லஸம்பயுத்தா. விஜ்ஜா வா சதுத்த²மக்³க³ஸம்பயுத்தா, விமுத்தி ப²லஸம்பயுத்தாதி. சதுத்த²பஞ்சமச²ட்டா²னிபி இமினாவ ஸமானபரிச்சே²தா³னி. ஸேஸங் ஸப்³ப³த்த² உத்தானமேவாதி.
Vivekanissitantiādīni vuttatthāneva. Ettha pana soḷasakkhattukā ānāpānassati missakā kathitā, ānāpānamūlakā satipaṭṭhānā pubbabhāgā , tesaṃ mūlabhūtā ānāpānassati pubbabhāgā. Bojjhaṅgamūlakā satipaṭṭhānā pubbabhāgā, tepi bojjhaṅgā pubbabhāgāva. Vijjāvimuttipūrakā pana bojjhaṅgā nibbattitalokuttarā, vijjāvimuttiyo ariyaphalasampayuttā. Vijjā vā catutthamaggasampayuttā, vimutti phalasampayuttāti. Catutthapañcamachaṭṭhānipi imināva samānaparicchedāni. Sesaṃ sabbattha uttānamevāti.
ஆனாபானஸங்யுத்தவண்ணனா நிட்டி²தா.
Ānāpānasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
3. பட²மஆனந்த³ஸுத்தங் • 3. Paṭhamaānandasuttaṃ
4. து³தியஆனந்த³ஸுத்தங் • 4. Dutiyaānandasuttaṃ
5. பட²மபி⁴க்கு²ஸுத்தங் • 5. Paṭhamabhikkhusuttaṃ
6. து³தியபி⁴க்கு²ஸுத்தங் • 6. Dutiyabhikkhusuttaṃ
7. ஸங்யோஜனப்பஹானஸுத்தங் • 7. Saṃyojanappahānasuttaṃ
8. அனுஸயஸமுக்³கா⁴தஸுத்தங் • 8. Anusayasamugghātasuttaṃ
9. அத்³தா⁴னபரிஞ்ஞாஸுத்தங் • 9. Addhānapariññāsuttaṃ
10. ஆஸவக்க²யஸுத்தங் • 10. Āsavakkhayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3-10. பட²மஆனந்த³ஸுத்தாதி³வண்ணனா • 3-10. Paṭhamaānandasuttādivaṇṇanā
