| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৩-১০. পঠমআনন্দসুত্তাদিৰণ্ণনা
3-10. Paṭhamaānandasuttādivaṇṇanā
৯৮৯-৯৯৬. ততিযে পৰিচিনতীতি অনিচ্চাদিৰসেন পৰিচিনতি। ইতরং পদদ্ৰযং এতস্সেৰ ৰেৰচনং। নিরামিসাতি নিক্কিলেসা কাযিকচেতসিকদরথপটিপস্সদ্ধিযা কাযোপি চিত্তম্পি পস্সম্ভতি। সমাধিযতীতি সম্মা ঠপিযতি, অপ্পনাচিত্তং ৰিয হোতি। অজ্ঝুপেক্খিতা হোতীতি সহজাতঅজ্ঝুপেক্খনায অজ্ঝুপেক্খিতা হোতি।
989-996. Tatiye pavicinatīti aniccādivasena pavicinati. Itaraṃ padadvayaṃ etasseva vevacanaṃ. Nirāmisāti nikkilesā kāyikacetasikadarathapaṭipassaddhiyā kāyopi cittampi passambhati. Samādhiyatīti sammā ṭhapiyati, appanācittaṃ viya hoti. Ajjhupekkhitā hotīti sahajātaajjhupekkhanāya ajjhupekkhitā hoti.
এৰং চুদ্দসৰিধেন কাযপরিগ্গাহকস্স ভিক্খুনো তস্মিং কাযে সতি সতিসম্বোজ্ঝঙ্গো, তায সতিযা সম্পযুত্তঞাণং ধম্মৰিচযসম্বোজ্ঝঙ্গো, তংসম্পযুত্তমেৰ কাযিকচেতসিকৰীরিযং ৰীরিযসম্বোজ্ঝঙ্গো, পীতিপস্সদ্ধিচিত্তেকগ্গতা পীতিপস্সদ্ধিসমাধিসম্বোজ্ঝঙ্গা, ইমেসং ছন্নং বোজ্ঝঙ্গানং অনোসক্কনঅনতিৰত্তনসঙ্খাতো মজ্ঝত্তাকারো উপেক্খাসম্বোজ্ঝঙ্গো। যথেৰ হি সমপ্পৰত্তেসু অস্সেসু সারথিনো ‘‘অযং ওলীযতী’’তি তুদনং ৰা, ‘‘অযং অতিধাৰতী’’তি আকড্ঢনং ৰা নত্থি, কেৰলং এৰং পস্সমানস্স ঠিতাকারোৰ হোতি, এৰমেৰ ইমেসং ছন্নং বোজ্ঝঙ্গানং অনোসক্কনঅনতিৰত্তনসঙ্খাতো মজ্ঝত্তাকারো উপেক্খাসম্বোজ্ঝঙ্গো নাম হোতি। এত্তাৰতা কিং কথিতং? একচিত্তক্খণিকা নানাসরসলক্খণা ৰিপস্সনাবোজ্ঝঙ্গা নাম কথিতা।
Evaṃ cuddasavidhena kāyapariggāhakassa bhikkhuno tasmiṃ kāye sati satisambojjhaṅgo, tāya satiyā sampayuttañāṇaṃ dhammavicayasambojjhaṅgo, taṃsampayuttameva kāyikacetasikavīriyaṃ vīriyasambojjhaṅgo, pītipassaddhicittekaggatā pītipassaddhisamādhisambojjhaṅgā, imesaṃ channaṃ bojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo. Yatheva hi samappavattesu assesu sārathino ‘‘ayaṃ olīyatī’’ti tudanaṃ vā, ‘‘ayaṃ atidhāvatī’’ti ākaḍḍhanaṃ vā natthi, kevalaṃ evaṃ passamānassa ṭhitākārova hoti, evameva imesaṃ channaṃ bojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo nāma hoti. Ettāvatā kiṃ kathitaṃ? Ekacittakkhaṇikā nānāsarasalakkhaṇā vipassanābojjhaṅgā nāma kathitā.
ৰিৰেকনিস্সিতন্তিআদীনি ৰুত্তত্থানেৰ। এত্থ পন সোল়সক্খত্তুকা আনাপানস্সতি মিস্সকা কথিতা, আনাপানমূলকা সতিপট্ঠানা পুব্বভাগা , তেসং মূলভূতা আনাপানস্সতি পুব্বভাগা। বোজ্ঝঙ্গমূলকা সতিপট্ঠানা পুব্বভাগা, তেপি বোজ্ঝঙ্গা পুব্বভাগাৰ। ৰিজ্জাৰিমুত্তিপূরকা পন বোজ্ঝঙ্গা নিব্বত্তিতলোকুত্তরা, ৰিজ্জাৰিমুত্তিযো অরিযফলসম্পযুত্তা। ৰিজ্জা ৰা চতুত্থমগ্গসম্পযুত্তা, ৰিমুত্তি ফলসম্পযুত্তাতি। চতুত্থপঞ্চমছট্ঠানিপি ইমিনাৰ সমানপরিচ্ছেদানি। সেসং সব্বত্থ উত্তানমেৰাতি।
Vivekanissitantiādīni vuttatthāneva. Ettha pana soḷasakkhattukā ānāpānassati missakā kathitā, ānāpānamūlakā satipaṭṭhānā pubbabhāgā , tesaṃ mūlabhūtā ānāpānassati pubbabhāgā. Bojjhaṅgamūlakā satipaṭṭhānā pubbabhāgā, tepi bojjhaṅgā pubbabhāgāva. Vijjāvimuttipūrakā pana bojjhaṅgā nibbattitalokuttarā, vijjāvimuttiyo ariyaphalasampayuttā. Vijjā vā catutthamaggasampayuttā, vimutti phalasampayuttāti. Catutthapañcamachaṭṭhānipi imināva samānaparicchedāni. Sesaṃ sabbattha uttānamevāti.
আনাপানসংযুত্তৰণ্ণনা নিট্ঠিতা।
Ānāpānasaṃyuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
৩. পঠমআনন্দসুত্তং • 3. Paṭhamaānandasuttaṃ
৪. দুতিযআনন্দসুত্তং • 4. Dutiyaānandasuttaṃ
৫. পঠমভিক্খুসুত্তং • 5. Paṭhamabhikkhusuttaṃ
৬. দুতিযভিক্খুসুত্তং • 6. Dutiyabhikkhusuttaṃ
৭. সংযোজনপ্পহানসুত্তং • 7. Saṃyojanappahānasuttaṃ
৮. অনুসযসমুগ্ঘাতসুত্তং • 8. Anusayasamugghātasuttaṃ
৯. অদ্ধানপরিঞ্ঞাসুত্তং • 9. Addhānapariññāsuttaṃ
১০. আসৰক্খযসুত্তং • 10. Āsavakkhayasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩-১০. পঠমআনন্দসুত্তাদিৰণ্ণনা • 3-10. Paṭhamaānandasuttādivaṇṇanā
