| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
৩. অনিযতকণ্ডং
3. Aniyatakaṇḍaṃ
১. পঠমঅনিযতসিক্খাপদং
1. Paṭhamaaniyatasikkhāpadaṃ
ইমে খো পনাযস্মন্তো দ্ৰে অনিযতা ধম্মা
Ime kho panāyasmanto dve aniyatā dhammā
উদ্দেসং আগচ্ছন্তি।
Uddesaṃ āgacchanti.
৪৪৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উদাযী সাৰত্থিযং কুলূপকো হোতি, বহুকানি কুলানি উপসঙ্কমতি। তেন খো পন সমযেন আযস্মতো উদাযিস্স উপট্ঠাককুলস্স কুমারিকা অঞ্ঞতরস্স কুলস্স কুমারকস্স দিন্না হোতি। অথ খো আযস্মা উদাযী পুব্বণ্হসমযং নিৰাসেত্ৰা পত্তচীৰরমাদায যেন তং কুলং তেনুপসঙ্কমি; উপসঙ্কমিত্ৰা মনুস্সে পুচ্ছি – ‘‘কহং ইত্থন্নামা’’তি? তে এৰমাহংসু – ‘‘দিন্না, ভন্তে, অমুকস্স কুলস্স কুমারকস্সা’’তি। তম্পি খো কুলং আযস্মতো উদাযিস্স উপট্ঠাকং হোতি। অথ খো আযস্মা উদাযী যেন তং কুলং তেনুপসঙ্কমি; উপসঙ্কমিত্ৰা মনুস্সে পুচ্ছি – ‘‘কহং ইত্থন্নামা’’তি? তে এৰমাহংসু – ‘‘এসায্য, ওৰরকে নিসিন্না’’তি। অথ খো আযস্মা উদাযী যেন সা কুমারিকা তেনুপসঙ্কমি; উপসঙ্কমিত্ৰা তস্সা কুমারিকায সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেসি কালযুত্তং সমুল্লপন্তো কালযুত্তং ধম্মং ভণন্তো।
443. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā udāyī sāvatthiyaṃ kulūpako hoti, bahukāni kulāni upasaṅkamati. Tena kho pana samayena āyasmato udāyissa upaṭṭhākakulassa kumārikā aññatarassa kulassa kumārakassa dinnā hoti. Atha kho āyasmā udāyī pubbaṇhasamayaṃ nivāsetvā pattacīvaramādāya yena taṃ kulaṃ tenupasaṅkami; upasaṅkamitvā manusse pucchi – ‘‘kahaṃ itthannāmā’’ti? Te evamāhaṃsu – ‘‘dinnā, bhante, amukassa kulassa kumārakassā’’ti. Tampi kho kulaṃ āyasmato udāyissa upaṭṭhākaṃ hoti. Atha kho āyasmā udāyī yena taṃ kulaṃ tenupasaṅkami; upasaṅkamitvā manusse pucchi – ‘‘kahaṃ itthannāmā’’ti? Te evamāhaṃsu – ‘‘esāyya, ovarake nisinnā’’ti. Atha kho āyasmā udāyī yena sā kumārikā tenupasaṅkami; upasaṅkamitvā tassā kumārikāya saddhiṃ eko ekāya raho paṭicchanne āsane alaṃkammaniye nisajjaṃ kappesi kālayuttaṃ samullapanto kālayuttaṃ dhammaṃ bhaṇanto.
তেন খো পন সমযেন ৰিসাখা মিগারমাতা বহুপুত্তা হোতি বহুনত্তা অরোগপুত্তা অরোগনত্তা অভিমঙ্গলসম্মতা। মনুস্সা যঞ্ঞেসু ছণেসু উস্সৰেসু ৰিসাখং মিগারমাতরং পঠমং ভোজেন্তি। অথ খো ৰিসাখা মিগারমাতা নিমন্তিতা তং কুলং অগমাসি। অদ্দসা খো ৰিসাখা মিগারমাতা আযস্মন্তং উদাযিং তস্সা কুমারিকায সদ্ধিং একং একায রহো পটিচ্ছন্নে আসনে অলংকম্মনিযে নিসিন্নং। দিস্ৰান আযস্মন্তং উদাযিং এতদৰোচ – ‘‘ইদং, ভন্তে, নচ্ছন্নং নপ্পতিরূপং যং অয্যো মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেতি। কিঞ্চাপি, ভন্তে, অয্যো অনত্থিকো তেন ধম্মেন, অপিচ দুস্সদ্ধাপযা অপ্পসন্না মনুস্সা’’তি। এৰম্পি খো আযস্মা উদাযী ৰিসাখায মিগারমাতুযা ৰুচ্চমানো নাদিযি। অথ খো ৰিসাখা মিগারমাতা নিক্খমিত্ৰা ভিক্খূনং এতমত্থং আরোচেসি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে॰… ‘‘সচ্চং কির ত্ৰং, উদাযি, মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেসী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে , ইমং সিক্খাপদং উদ্দিসেয্যাথ –
Tena kho pana samayena visākhā migāramātā bahuputtā hoti bahunattā arogaputtā aroganattā abhimaṅgalasammatā. Manussā yaññesu chaṇesu ussavesu visākhaṃ migāramātaraṃ paṭhamaṃ bhojenti. Atha kho visākhā migāramātā nimantitā taṃ kulaṃ agamāsi. Addasā kho visākhā migāramātā āyasmantaṃ udāyiṃ tassā kumārikāya saddhiṃ ekaṃ ekāya raho paṭicchanne āsane alaṃkammaniye nisinnaṃ. Disvāna āyasmantaṃ udāyiṃ etadavoca – ‘‘idaṃ, bhante, nacchannaṃ nappatirūpaṃ yaṃ ayyo mātugāmena saddhiṃ eko ekāya raho paṭicchanne āsane alaṃkammaniye nisajjaṃ kappeti. Kiñcāpi, bhante, ayyo anatthiko tena dhammena, apica dussaddhāpayā appasannā manussā’’ti. Evampi kho āyasmā udāyī visākhāya migāramātuyā vuccamāno nādiyi. Atha kho visākhā migāramātā nikkhamitvā bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī mātugāmena saddhiṃ eko ekāya raho paṭicchanne āsane alaṃkammaniye nisajjaṃ kappessatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, udāyi, mātugāmena saddhiṃ eko ekāya raho paṭicchanne āsane alaṃkammaniye nisajjaṃ kappesī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, mātugāmena saddhiṃ eko ekāya raho paṭicchanne āsane alaṃkammaniye nisajjaṃ kappessasi! Netaṃ, moghapurisa, appasannānaṃ vā pasādāya…pe… evañca pana, bhikkhave , imaṃ sikkhāpadaṃ uddiseyyātha –
৪৪৪. ‘‘যো পন ভিক্খু মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেয্য, তমেনং সদ্ধেয্যৰচসা উপাসিকা দিস্ৰা তিণ্ণং ধম্মানং অঞ্ঞতরেন ৰদেয্য – পারাজিকেন ৰা সঙ্ঘাদিসেসেন ৰা পাচিত্তিযেন ৰা, নিসজ্জং ভিক্খু পটিজানমানো তিণ্ণং ধম্মানং অঞ্ঞতরেন কারেতব্বো – পারাজিকেন ৰা সঙ্ঘাদিসেসেন ৰা পাচিত্তিযেন ৰা যেন ৰা সা সদ্ধেয্যৰচসা উপাসিকা ৰদেয্য, তেন সো ভিক্খু কারেতব্বো। অযং ধম্মো অনিযতো’’তি।
444.‘‘Yo pana bhikkhu mātugāmena saddhiṃ eko ekāya raho paṭicchanne āsane alaṃkammaniye nisajjaṃ kappeyya, tamenaṃ saddheyyavacasā upāsikā disvā tiṇṇaṃ dhammānaṃ aññatarena vadeyya – pārājikena vā saṅghādisesena vā pācittiyena vā, nisajjaṃ bhikkhu paṭijānamāno tiṇṇaṃ dhammānaṃ aññatarena kāretabbo – pārājikena vā saṅghādisesena vā pācittiyena vā yena vā sā saddheyyavacasā upāsikā vadeyya, tena so bhikkhu kāretabbo. Ayaṃ dhammo aniyato’’ti.
৪৪৫. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
445.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
মাতুগামো নাম মনুস্সিত্থী, ন যক্খী ন পেতী ন তিরচ্ছানগতা। অন্তমসো তদহুজাতাপি দারিকা, পগেৰ মহত্তরী।
Mātugāmo nāma manussitthī, na yakkhī na petī na tiracchānagatā. Antamaso tadahujātāpi dārikā, pageva mahattarī.
সদ্ধিন্তি একতো।
Saddhinti ekato.
একো একাযাতি ভিক্খু চেৰ হোতি মাতুগামো চ।
Eko ekāyāti bhikkhu ceva hoti mātugāmo ca.
রহো নাম চক্খুস্স রহো, সোতস্স রহো। চক্খুস্স রহোনাম ন সক্কা হোতি অক্খিং ৰা নিখণীযমানে ভমুকং ৰা উক্খিপীযমানে সীসং ৰা উক্খিপীযমানে পস্সিতুং। সোতস্স রহোনাম ন সক্কা হোতি পকতিকথা সোতুং।
Raho nāma cakkhussa raho, sotassa raho. Cakkhussa rahonāma na sakkā hoti akkhiṃ vā nikhaṇīyamāne bhamukaṃ vā ukkhipīyamāne sīsaṃ vā ukkhipīyamāne passituṃ. Sotassa rahonāma na sakkā hoti pakatikathā sotuṃ.
পটিচ্ছন্নং নাম আসনং কুট্টেন ৰা 1 কৰাটেন ৰা কিলঞ্জেন ৰা সাণিপাকারেন ৰা রুক্খেন ৰা থম্ভেন ৰা কোত্থল়িযা ৰা যেন কেনচি পটিচ্ছন্নং হোতি।
Paṭicchannaṃ nāma āsanaṃ kuṭṭena vā 2 kavāṭena vā kilañjena vā sāṇipākārena vā rukkhena vā thambhena vā kotthaḷiyā vā yena kenaci paṭicchannaṃ hoti.
অলংকম্মনিযেতি সক্কা হোতি মেথুনং ধম্মং পটিসেৰিতুং।
Alaṃkammaniyeti sakkā hoti methunaṃ dhammaṃ paṭisevituṃ.
নিসজ্জং কপ্পেয্যাতি মাতুগামে নিসিন্নে ভিক্খু উপনিসিন্নো ৰা হোতি উপনিপন্নো ৰা। ভিক্খু নিসিন্নে মাতুগামো উপনিসিন্নো ৰা হোতি উপনিপন্নো ৰা। উভো ৰা নিসিন্না হোন্তি উভো ৰা নিপন্না।
Nisajjaṃkappeyyāti mātugāme nisinne bhikkhu upanisinno vā hoti upanipanno vā. Bhikkhu nisinne mātugāmo upanisinno vā hoti upanipanno vā. Ubho vā nisinnā honti ubho vā nipannā.
সদ্ধেয্যৰচসা নাম আগতফলা অভিসমেতাৰিনী ৰিঞ্ঞাতসাসনা।
Saddheyyavacasā nāma āgataphalā abhisametāvinī viññātasāsanā.
উপাসিকা নাম বুদ্ধং সরণং গতা, ধম্মং সরণং গতা, সঙ্ঘং সরণং গতা।
Upāsikā nāma buddhaṃ saraṇaṃ gatā, dhammaṃ saraṇaṃ gatā, saṅghaṃ saraṇaṃ gatā.
দিস্ৰাতি পস্সিত্ৰা।
Disvāti passitvā.
তিণ্ণং ধম্মানং অঞ্ঞতরেন ৰদেয্য – পারাজিকেন ৰা সঙ্ঘাদিসেসেন ৰা পাচিত্তিযেন ৰা। নিসজ্জং ভিক্খু পটিজানমানো তিণ্ণং ধম্মানং অঞ্ঞতরেন কারেতব্বো – পারাজিকেন ৰা সঙ্ঘাদিসেসেন ৰা পাচিত্তিযেন ৰা। যেন ৰা সা সদ্ধেয্যৰচসা উপাসিকা ৰদেয্য তেন সো ভিক্খু কারেতব্বো।
Tiṇṇaṃ dhammānaṃ aññatarena vadeyya – pārājikena vā saṅghādisesena vā pācittiyena vā. Nisajjaṃ bhikkhu paṭijānamāno tiṇṇaṃ dhammānaṃ aññatarena kāretabbo – pārājikena vā saṅghādisesena vā pācittiyena vā. Yena vā sā saddheyyavacasā upāsikā vadeyya tena so bhikkhu kāretabbo.
৪৪৬. সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৰন্তো’’তি, সো চ তং পটিজানাতি, আপত্তিযা কারেতব্বো। সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘সচ্চাহং নিসিন্নো, নো চ খো মেথুনং ধম্মং পটিসেৰি’’ন্তি, নিসজ্জায কারেতব্বো। সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘নাহং নিসিন্নো, অপিচ খো নিপন্নো’’তি, নিপজ্জায কারেতব্বো । সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘নাহং নিসিন্নো অপিচ খো ঠিতো’’তি, ন কারেতব্বো।
446. Sā ce evaṃ vadeyya – ‘‘ayyo mayā diṭṭho nisinno mātugāmassa methunaṃ dhammaṃ paṭisevanto’’ti, so ca taṃ paṭijānāti, āpattiyā kāretabbo. Sā ce evaṃ vadeyya – ‘‘ayyo mayā diṭṭho nisinno mātugāmassa methunaṃ dhammaṃ paṭisevanto’’ti, so ce evaṃ vadeyya – ‘‘saccāhaṃ nisinno, no ca kho methunaṃ dhammaṃ paṭisevi’’nti, nisajjāya kāretabbo. Sā ce evaṃ vadeyya – ‘‘ayyo mayā diṭṭho nisinno mātugāmassa methunaṃ dhammaṃ paṭisevanto’’ti, so ce evaṃ vadeyya – ‘‘nāhaṃ nisinno, apica kho nipanno’’ti, nipajjāya kāretabbo . Sā ce evaṃ vadeyya – ‘‘ayyo mayā diṭṭho nisinno mātugāmassa methunaṃ dhammaṃ paṭisevanto’’ti, so ce evaṃ vadeyya – ‘‘nāhaṃ nisinno apica kho ṭhito’’ti, na kāretabbo.
৪৪৭. সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৰন্তো’’তি, সো চ তং পটিজানাতি, আপত্তিযা কারেতব্বো। সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘সচ্চাহং নিপন্নো, নো চ খো মেথুনং ধম্মং পটিসেৰি’’ন্তি, নিপজ্জায কারেতব্বো। সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘নাহং নিপন্নো, অপিচ খো নিসিন্নো’’তি, নিসজ্জায কারেতব্বো। সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৰন্তো’’তি , সো চে এৰং ৰদেয্য – ‘‘নাহং নিপন্নো অপিচ খো ঠিতো’’তি, ন কারেতব্বো।
447. Sā ce evaṃ vadeyya – ‘‘ayyo mayā diṭṭho nipanno mātugāmassa methunaṃ dhammaṃ paṭisevanto’’ti, so ca taṃ paṭijānāti, āpattiyā kāretabbo. Sā ce evaṃ vadeyya – ‘‘ayyo mayā diṭṭho nipanno mātugāmassa methunaṃ dhammaṃ paṭisevanto’’ti, so ce evaṃ vadeyya – ‘‘saccāhaṃ nipanno, no ca kho methunaṃ dhammaṃ paṭisevi’’nti, nipajjāya kāretabbo. Sā ce evaṃ vadeyya – ‘‘ayyo mayā diṭṭho nipanno mātugāmassa methunaṃ dhammaṃ paṭisevanto’’ti, so ce evaṃ vadeyya – ‘‘nāhaṃ nipanno, apica kho nisinno’’ti, nisajjāya kāretabbo. Sā ce evaṃ vadeyya – ‘‘ayyo mayā diṭṭho nipanno mātugāmassa methunaṃ dhammaṃ paṭisevanto’’ti , so ce evaṃ vadeyya – ‘‘nāhaṃ nipanno apica kho ṭhito’’ti, na kāretabbo.
৪৪৮. সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চ তং পটিজানাতি, আপত্তিযা কারেতব্বো…পে॰… সচ্চাহং নিসিন্নো নো চ খো কাযসংসগ্গং সমাপজ্জিন্তি, নিসজ্জায কারেতব্বো…পে॰… নাহং নিসিন্নো অপিচ খো নিপন্নোতি, নিপজ্জায কারেতব্বো…পে॰… নাহং নিসিন্নো অপিচ খো ঠিতোতি, ন কারেতব্বো।
448. Sā ce evaṃ vadeyya – ‘‘ayyo mayā diṭṭho nisinno mātugāmena saddhiṃ kāyasaṃsaggaṃ samāpajjanto’’ti, so ca taṃ paṭijānāti, āpattiyā kāretabbo…pe… saccāhaṃ nisinno no ca kho kāyasaṃsaggaṃ samāpajjinti, nisajjāya kāretabbo…pe… nāhaṃ nisinno apica kho nipannoti, nipajjāya kāretabbo…pe… nāhaṃ nisinno apica kho ṭhitoti, na kāretabbo.
সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চ তং পটিজানাতি, আপত্তিযা কারেতব্বো…পে॰… সচ্চাহং নিপন্নো, নো চ খো কাযসংসগ্গং সমাপজ্জিন্তি, নিপজ্জায কারেতব্বো…পে॰… নাহং নিপন্নো, অপিচ খো নিসিন্নোতি, নিসজ্জায কারেতব্বো…পে॰… নাহং নিপন্নো, অপিচ খো ঠিতোতি, ন কারেতব্বো।
Sā ce evaṃ vadeyya – ‘‘ayyo mayā diṭṭho nipanno mātugāmena saddhiṃ kāyasaṃsaggaṃ samāpajjanto’’ti, so ca taṃ paṭijānāti, āpattiyā kāretabbo…pe… saccāhaṃ nipanno, no ca kho kāyasaṃsaggaṃ samāpajjinti, nipajjāya kāretabbo…pe… nāhaṃ nipanno, apica kho nisinnoti, nisajjāya kāretabbo…pe… nāhaṃ nipanno, apica kho ṭhitoti, na kāretabbo.
৪৪৯. সা চে এৰং ৰদেয্য – ‘‘অয্যো মযা দিট্ঠো মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসিন্নো’’তি , সো চ তং পটিজানাতি, নিসজ্জায কারেতব্বো…পে॰… নাহং নিসিন্নো অপিচ খো নিপন্নোতি, নিপজ্জায কারেতব্বো…পে॰… নাহং নিসিন্নো, অপিচ খো ঠিতোতি, ন কারেতব্বো।
449. Sā ce evaṃ vadeyya – ‘‘ayyo mayā diṭṭho mātugāmena saddhiṃ eko ekāya raho paṭicchanne āsane alaṃkammaniye nisinno’’ti , so ca taṃ paṭijānāti, nisajjāya kāretabbo…pe… nāhaṃ nisinno apica kho nipannoti, nipajjāya kāretabbo…pe… nāhaṃ nisinno, apica kho ṭhitoti, na kāretabbo.
৪৫০. সা চে এৰং ৰদেয্য – ‘‘অয্যো মযা দিট্ঠো মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিপন্নো’’তি, সো চ তং পটিজানাতি, নিপজ্জায কারেতব্বো…পে॰… নাহং নিপন্নো, অপিচ খো নিসিন্নোতি, নিসজ্জায কারেতব্বো…পে॰… নাহং নিপন্নো, অপিচ খো ঠিতোতি, ন কারেতব্বো।
450. Sā ce evaṃ vadeyya – ‘‘ayyo mayā diṭṭho mātugāmena saddhiṃ eko ekāya raho paṭicchanne āsane alaṃkammaniye nipanno’’ti, so ca taṃ paṭijānāti, nipajjāya kāretabbo…pe… nāhaṃ nipanno, apica kho nisinnoti, nisajjāya kāretabbo…pe… nāhaṃ nipanno, apica kho ṭhitoti, na kāretabbo.
অনিযতোতি ন নিযতো, পারাজিকং ৰা সঙ্ঘাদিসেসো ৰা পাচিত্তিযং ৰা।
Aniyatoti na niyato, pārājikaṃ vā saṅghādiseso vā pācittiyaṃ vā.
৪৫১. গমনং পটিজানাতি, নিসজ্জং পটিজানাতি, আপত্তিং পটিজানাতি, আপত্তিযা কারেতব্বো। গমনং পটিজানাতি, নিসজ্জং ন পটিজানাতি, আপত্তিং পটিজানাতি, আপত্তিযা কারেতব্বো। গমনং পটিজানাতি, নিসজ্জং পটিজানাতি, আপত্তিং ন পটিজানাতি, নিসজ্জায কারেতব্বো। গমনং পটিজানাতি, নিসজ্জং ন পটিজানাতি, আপত্তিং ন পটিজানাতি, ন কারেতব্বো।
451. Gamanaṃ paṭijānāti, nisajjaṃ paṭijānāti, āpattiṃ paṭijānāti, āpattiyā kāretabbo. Gamanaṃ paṭijānāti, nisajjaṃ na paṭijānāti, āpattiṃ paṭijānāti, āpattiyā kāretabbo. Gamanaṃ paṭijānāti, nisajjaṃ paṭijānāti, āpattiṃ na paṭijānāti, nisajjāya kāretabbo. Gamanaṃ paṭijānāti, nisajjaṃ na paṭijānāti, āpattiṃ na paṭijānāti, na kāretabbo.
গমনং ন পটিজানাতি, নিসজ্জং পটিজানাতি, আপত্তিং পটিজানাতি, আপত্তিযা
Gamanaṃ na paṭijānāti, nisajjaṃ paṭijānāti, āpattiṃ paṭijānāti, āpattiyā
কারেতব্বো। গমনং ন পটিজানাতি, নিসজ্জং ন পটিজানাতি, আপত্তিং পটিজানাতি, আপত্তিযা কারেতব্বো। গমনং ন পটিজানাতি, নিসজ্জং পটিজানাতি, আপত্তিং ন পটিজানাতি, নিসজ্জায কারেতব্বো। গমনং ন পটিজানাতি, নিসজ্জং ন পটিজানাতি, আপত্তিং ন পটিজানাতি, ন কারেতব্বোতি।
Kāretabbo. Gamanaṃ na paṭijānāti, nisajjaṃ na paṭijānāti, āpattiṃ paṭijānāti, āpattiyā kāretabbo. Gamanaṃ na paṭijānāti, nisajjaṃ paṭijānāti, āpattiṃ na paṭijānāti, nisajjāya kāretabbo. Gamanaṃ na paṭijānāti, nisajjaṃ na paṭijānāti, āpattiṃ na paṭijānāti, na kāretabboti.
পঠমো অনিযতো নিট্ঠিতো।
Paṭhamo aniyato niṭṭhito.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১. পঠমঅনিযতসিক্খাপদৰণ্ণনা • 1. Paṭhamaaniyatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. পঠমঅনিযতসিক্খাপদৰণ্ণনা • 1. Paṭhamaaniyatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. পঠমঅনিযতসিক্খাপদৰণ্ণনা • 1. Paṭhamaaniyatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমঅনিযতসিক্খাপদৰণ্ণনা • 1. Paṭhamaaniyatasikkhāpadavaṇṇanā
