| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
3. அனியதகண்ட³ங்
3. Aniyatakaṇḍaṃ
1. பட²மஅனியதஸிக்கா²பத³வண்ணனா
1. Paṭhamaaniyatasikkhāpadavaṇṇanā
443. தேன ஸமயேன பு³த்³தோ⁴ ப⁴க³வாதி பட²மஅனியதஸிக்கா²பத³ங். தத்த² காலயுத்தங் ஸமுல்லபந்தோதி காலங் ஸல்லக்கெ²த்வா யதா³ ந அஞ்ஞோ கோசி ஸமீபேன க³ச்ச²தி வா ஆக³ச்ச²தி வா ததா³ தத³னுரூபங் ‘‘கச்சி ந உக்கண்ட²ஸி, ந கிலமஸி, ந சா²தாஸீ’’திஆதி³கங் கே³ஹஸ்ஸிதங் கத²ங் கதெ²ந்தோ. காலயுத்தங் த⁴ம்மங் ப⁴ணந்தோதி காலங் ஸல்லக்கெ²த்வா யதா³ அஞ்ஞோ கோசி ஸமீபேன க³ச்ச²தி வா ஆக³ச்ச²தி வா ததா³ தத³னுரூபங் ‘‘உபோஸத²ங் கரெய்யாஸி, ஸலாகப⁴த்தங் த³தெ³ய்யாஸீ’’திஆதி³கங் த⁴ம்மகத²ங் கதெ²ந்தோ.
443.Tenasamayena buddho bhagavāti paṭhamaaniyatasikkhāpadaṃ. Tattha kālayuttaṃ samullapantoti kālaṃ sallakkhetvā yadā na añño koci samīpena gacchati vā āgacchati vā tadā tadanurūpaṃ ‘‘kacci na ukkaṇṭhasi, na kilamasi, na chātāsī’’tiādikaṃ gehassitaṃ kathaṃ kathento. Kālayuttaṃ dhammaṃ bhaṇantoti kālaṃ sallakkhetvā yadā añño koci samīpena gacchati vā āgacchati vā tadā tadanurūpaṃ ‘‘uposathaṃ kareyyāsi, salākabhattaṃ dadeyyāsī’’tiādikaṃ dhammakathaṃ kathento.
ப³ஹூ தீ⁴தரோ ச புத்தா ச அஸ்ஸாதி ப³ஹுபுத்தா. தஸ்ஸா கிர த³ஸ புத்தா த³ஸ தீ⁴தரோ அஹேஸுங், ப³ஹூ நத்தாரோ அஸ்ஸாதி ப³ஹுனத்தா. யதே²வ ஹி தஸ்ஸா ஏவமஸ்ஸா புத்ததீ⁴தானம்பி வீஸதி வீஸதி தா³ரகா அஹேஸுங், இதி ஸா வீஸுத்தரசதுஸதபுத்தனத்தபரிவாரா அஹோஸி. அபி⁴மங்க³லஸம்மதாதி உத்தமமங்க³லஸம்மதா. யஞ்ஞேஸூதி தா³னப்பதா³னேஸு. ச²ணேஸூதி ஆவாஹவிவாஹமங்க³லாதீ³ஸு அந்தருஸ்ஸவேஸு. உஸ்ஸவேஸூதி ஆஸாள்ஹீபவாரணனக்க²த்தாதீ³ஸு மஹுஸ்ஸவேஸு. பட²மங் போ⁴ஜெந்தீதி ‘‘இமேபி தா³ரகா தயா ஸமானாயுகா நிரோகா³ ஹொந்தூ’’தி ஆயாசந்தா பட²மங்யேவ போ⁴ஜெந்தி, யேபி ஸத்³தா⁴ ஹொந்தி பஸன்னா, தேபி பி⁴க்கூ² போ⁴ஜெத்வா தத³னந்தரங் ஸப்³ப³பட²மங் தங்யேவ போ⁴ஜெந்தி. நாதி³யீதி தஸ்ஸா வசனங் ந ஆதி³யி, ந க³ண்ஹி, ந வா ஆத³ரமகாஸீதி அத்தோ².
Bahū dhītaro ca puttā ca assāti bahuputtā. Tassā kira dasa puttā dasa dhītaro ahesuṃ, bahū nattāro assāti bahunattā. Yatheva hi tassā evamassā puttadhītānampi vīsati vīsati dārakā ahesuṃ, iti sā vīsuttaracatusataputtanattaparivārā ahosi. Abhimaṅgalasammatāti uttamamaṅgalasammatā. Yaññesūti dānappadānesu. Chaṇesūti āvāhavivāhamaṅgalādīsu antarussavesu. Ussavesūti āsāḷhīpavāraṇanakkhattādīsu mahussavesu. Paṭhamaṃ bhojentīti ‘‘imepi dārakā tayā samānāyukā nirogā hontū’’ti āyācantā paṭhamaṃyeva bhojenti, yepi saddhā honti pasannā, tepi bhikkhū bhojetvā tadanantaraṃ sabbapaṭhamaṃ taṃyeva bhojenti. Nādiyīti tassā vacanaṃ na ādiyi, na gaṇhi, na vā ādaramakāsīti attho.
444-5. அலங்கம்மனியேதி கம்மக்க²மங் கம்மயொக்³க³ந்தி கம்மனியங், அலங் பரியத்தங் கம்மனியபா⁴வாயாதி அலங்கம்மனியங், தஸ்மிங் அலங்கம்மனியே, யத்த² அஜ்ஜா²சாரங் கரொந்தா ஸக்கொந்தி, தங் கம்மங் காதுங் தாதி³ஸேதி அத்தோ². தேனேவஸ்ஸ பத³பா⁴ஜனே வுத்தங் – ‘‘ஸக்கா ஹோதி மேது²னங் த⁴ம்மங் படிஸேவிது’’ந்தி, யத்த² மேது²னங் த⁴ம்மங் ஸக்கா ஹோதி படிஸேவிதுந்தி வுத்தங் ஹோதி. நிஸஜ்ஜங் கப்பெய்யாதி நிஸஜ்ஜங் கரெய்ய, நிஸீதெ³ய்யாதி அத்தோ². யஸ்மா பன நிஸீதி³த்வாவ நிபஜ்ஜதி, தேனஸ்ஸ பத³பா⁴ஜனே உப⁴யம்பி வுத்தங். தத்த² உபனிஸின்னோதி உபக³ந்த்வா நிஸின்னோ. ஏவங் உபனிபன்னோபி வேதி³தப்³போ³. பி⁴க்கு² நிஸின்னேதி பி⁴க்கு²ம்ஹி நிஸின்னேதி அத்தோ². உபோ⁴ வா நிஸின்னாதி த்³வேபி அபச்சா² அபுரிமங் நிஸின்னா. எத்த² ச கிஞ்சாபி பாளியங் ‘‘ஸோதஸ்ஸ ரஹோ’’தி ஆக³தங், சக்கு²ஸ்ஸ ரஹேனேவ பன பரிச்சே²தோ³ வேதி³தப்³போ³. ஸசேபி ஹி பிஹிதகவாடஸ்ஸ க³ப்³ப⁴ஸ்ஸ த்³வாரே நிஸின்னோ விஞ்ஞூ புரிஸோ ஹோதி, நேவ அனாபத்திங் கரோதி. அபிஹிதகவாடஸ்ஸ பன த்³வாரே நிஸின்னோ அனாபத்திங் கரோதி. ந கேவலஞ்ச த்³வாரே அந்தொத்³வாத³ஸஹத்தே²பி ஓகாஸே நிஸின்னோ, ஸசே ஸசக்கு²கோ விக்கி²த்தோபி நித்³தா³யந்தோபி அனாபத்திங் கரோதி. ஸமீபே டி²தோபி அந்தோ⁴ ந கரோதி, சக்கு²மாபி நிபஜ்ஜித்வா நித்³தா³யந்தோ ந கரோதி. இத்தீ²னங் பன ஸதம்பி அனாபத்திங் ந கரோதியேவ.
444-5.Alaṃkammaniyeti kammakkhamaṃ kammayogganti kammaniyaṃ, alaṃ pariyattaṃ kammaniyabhāvāyāti alaṃkammaniyaṃ, tasmiṃ alaṃkammaniye, yattha ajjhācāraṃ karontā sakkonti, taṃ kammaṃ kātuṃ tādiseti attho. Tenevassa padabhājane vuttaṃ – ‘‘sakkā hoti methunaṃ dhammaṃ paṭisevitu’’nti, yattha methunaṃ dhammaṃ sakkā hoti paṭisevitunti vuttaṃ hoti. Nisajjaṃkappeyyāti nisajjaṃ kareyya, nisīdeyyāti attho. Yasmā pana nisīditvāva nipajjati, tenassa padabhājane ubhayampi vuttaṃ. Tattha upanisinnoti upagantvā nisinno. Evaṃ upanipannopi veditabbo. Bhikkhu nisinneti bhikkhumhi nisinneti attho. Ubho vā nisinnāti dvepi apacchā apurimaṃ nisinnā. Ettha ca kiñcāpi pāḷiyaṃ ‘‘sotassa raho’’ti āgataṃ, cakkhussa raheneva pana paricchedo veditabbo. Sacepi hi pihitakavāṭassa gabbhassa dvāre nisinno viññū puriso hoti, neva anāpattiṃ karoti. Apihitakavāṭassa pana dvāre nisinno anāpattiṃ karoti. Na kevalañca dvāre antodvādasahatthepi okāse nisinno, sace sacakkhuko vikkhittopi niddāyantopi anāpattiṃ karoti. Samīpe ṭhitopi andho na karoti, cakkhumāpi nipajjitvā niddāyanto na karoti. Itthīnaṃ pana satampi anāpattiṃ na karotiyeva.
ஸத்³தெ⁴ய்யவசஸாதி ஸத்³தா⁴தப்³ப³வசனா. ஸா பன யஸ்மா அரியஸாவிகாவ ஹோதி, தேனஸ்ஸ பத³பா⁴ஜனே ‘‘ஆக³தப²லா’’திஆதி³ வுத்தங். தத்த² ஆக³தங் ப²லங் அஸ்ஸாதி ஆக³தப²லா படிலத்³த⁴ஸோதாபத்திப²லாதி அத்தோ². அபி⁴ஸமேதாவினீதி படிவித்³த⁴சதுஸச்சா. விஞ்ஞாதங் ஸிக்க²த்தயஸாஸனங் ஏதாயாதி விஞ்ஞாதஸாஸனா. நிஸஜ்ஜங் பி⁴க்கு² படிஜானமானோதி கிஞ்சாபி ஏவரூபா உபாஸிகா தி³ஸ்வா வத³தி, அத² கோ² பி⁴க்கு² நிஸஜ்ஜங் படிஜானமானோயேவ திண்ணங் த⁴ம்மானங் அஞ்ஞதரேன காரேதப்³போ³, ந அப்படிஜானமானோதி அத்தோ².
Saddheyyavacasāti saddhātabbavacanā. Sā pana yasmā ariyasāvikāva hoti, tenassa padabhājane ‘‘āgataphalā’’tiādi vuttaṃ. Tattha āgataṃ phalaṃ assāti āgataphalā paṭiladdhasotāpattiphalāti attho. Abhisametāvinīti paṭividdhacatusaccā. Viññātaṃ sikkhattayasāsanaṃ etāyāti viññātasāsanā. Nisajjaṃ bhikkhu paṭijānamānoti kiñcāpi evarūpā upāsikā disvā vadati, atha kho bhikkhu nisajjaṃ paṭijānamānoyeva tiṇṇaṃ dhammānaṃ aññatarena kāretabbo, na appaṭijānamānoti attho.
யேன வா ஸா ஸத்³தெ⁴ய்யவசஸா உபாஸிகா வதெ³ய்ய தேன ஸோ பி⁴க்கு² காரேதப்³போ³தி நிஸஜ்ஜாதீ³ஸு ஆகாரேஸு யேன வா ஆகாரேன ஸத்³தி⁴ங் மேது²னத⁴ம்மாதீ³னி ஆரோபெத்வா ஸா உபாஸிகா வதெ³ய்ய, படிஜானமானோவ தேன ஸோ பி⁴க்கு² காரேதப்³போ³. ஏவரூபாயபி உபாஸிகாய வசனமத்தேன ந காரேதப்³போ³தி அத்தோ². கஸ்மா? யஸ்மா தி³ட்ட²ங் நாம ததா²பி ஹோதி, அஞ்ஞதா²பி ஹோதி.
Yena vā sā saddheyyavacasā upāsikā vadeyya tena so bhikkhu kāretabboti nisajjādīsu ākāresu yena vā ākārena saddhiṃ methunadhammādīni āropetvā sā upāsikā vadeyya, paṭijānamānova tena so bhikkhu kāretabbo. Evarūpāyapi upāsikāya vacanamattena na kāretabboti attho. Kasmā? Yasmā diṭṭhaṃ nāma tathāpi hoti, aññathāpi hoti.
தத³த்த²ஜோதனத்த²ஞ்ச இத³ங் வத்து²ங் உதா³ஹரந்தி – மல்லாராமவிஹாரே கிர ஏகோ கீ²ணாஸவத்தே²ரோ ஏகதி³வஸங் உபட்டா²ககுலங் க³ந்த்வா அந்தோகே³ஹே நிஸீதி³, உபாஸிகாபி ஸயனபல்லங்கங் நிஸ்ஸாய டி²தா ஹோதி. அதே²கோ பிண்ட³சாரிகோ த்³வாரே டி²தோ தி³ஸ்வா ‘‘தே²ரோ உபாஸிகாய ஸத்³தி⁴ங் ஏகாஸனே நிஸின்னோ’’தி ஸஞ்ஞங் படிலபி⁴த்வா புனப்புனங் ஓலோகேஸி. தே²ரோபி ‘‘அயங் மயி அஸுத்³த⁴லத்³தி⁴கோ ஜாதோ’’தி ஸல்லக்கெ²த்வா கதப⁴த்தகிச்சோ விஹாரங் க³ந்த்வா அத்தனோ வஸனட்டா²னங் பவிஸித்வா அந்தோவ நிஸீதி³. ஸோபி பி⁴க்கு² ‘‘தே²ரங் சோதெ³ஸ்ஸாமீ’’தி ஆக³ந்த்வா உக்காஸித்வா த்³வாரங் விவரி. தே²ரோ தஸ்ஸ சித்தங் ஞத்வா ஆகாஸே உப்பதித்வா கூடாகா³ரகண்ணிகங் நிஸ்ஸாய பல்லங்கேன நிஸீதி³. ஸோபி பி⁴க்கு² அந்தோ பவிஸித்வா மஞ்சஞ்ச ஹெட்டா²மஞ்சஞ்ச ஓலோகெத்வா தே²ரங் அபஸ்ஸந்தோ உத்³த⁴ங் உல்லோகேஸி, அத² ஆகாஸே நிஸின்னங் தே²ரங் தி³ஸ்வா ‘‘ப⁴ந்தே, ஏவங் மஹித்³தி⁴கா நாம தும்ஹே மாதுகா³மேன ஸத்³தி⁴ங் ஏகாஸனே நிஸின்னபா⁴வங் வதா³பேத² ஏவா’’தி ஆஹ. தே²ரோ ‘‘அந்தரக⁴ரஸ்ஸேவேஸோ ஆவுஸோ தோ³ஸோ, அஹங் பன தங் ஸத்³தா⁴பேதுங் அஸக்கொந்தோ ஏவமகாஸிங், ரக்கெ²ய்யாஸி ம’’ந்தி வத்வா ஓதரீதி.
Tadatthajotanatthañca idaṃ vatthuṃ udāharanti – mallārāmavihāre kira eko khīṇāsavatthero ekadivasaṃ upaṭṭhākakulaṃ gantvā antogehe nisīdi, upāsikāpi sayanapallaṅkaṃ nissāya ṭhitā hoti. Atheko piṇḍacāriko dvāre ṭhito disvā ‘‘thero upāsikāya saddhiṃ ekāsane nisinno’’ti saññaṃ paṭilabhitvā punappunaṃ olokesi. Theropi ‘‘ayaṃ mayi asuddhaladdhiko jāto’’ti sallakkhetvā katabhattakicco vihāraṃ gantvā attano vasanaṭṭhānaṃ pavisitvā antova nisīdi. Sopi bhikkhu ‘‘theraṃ codessāmī’’ti āgantvā ukkāsitvā dvāraṃ vivari. Thero tassa cittaṃ ñatvā ākāse uppatitvā kūṭāgārakaṇṇikaṃ nissāya pallaṅkena nisīdi. Sopi bhikkhu anto pavisitvā mañcañca heṭṭhāmañcañca oloketvā theraṃ apassanto uddhaṃ ullokesi, atha ākāse nisinnaṃ theraṃ disvā ‘‘bhante, evaṃ mahiddhikā nāma tumhe mātugāmena saddhiṃ ekāsane nisinnabhāvaṃ vadāpetha evā’’ti āha. Thero ‘‘antaragharasseveso āvuso doso, ahaṃ pana taṃ saddhāpetuṃ asakkonto evamakāsiṃ, rakkheyyāsi ma’’nti vatvā otarīti.
446. இதோ பரங் ஸா சே ஏவங் வதெ³ய்யாதிஆதி³ ஸப்³ப³ங் படிஞ்ஞாய காரணாகாரத³ஸ்ஸனத்த²ங் வுத்தங், தத்த² மாதுகா³மஸ்ஸ மேது²னங் த⁴ம்மங் படிஸேவந்தோதி மாதுகா³மஸ்ஸ மக்³கே³ மேது²னங் த⁴ம்மங் படிஸேவந்தோதி அத்தோ². நிஸஜ்ஜாய காரேதப்³போ³தி நிஸஜ்ஜங் படிஜானித்வா மேது²னத⁴ம்மபடிஸேவனங் அப்படிஜானந்தோ மேது²னத⁴ம்மபாராஜிகாபத்தியா அகாரெத்வா நிஸஜ்ஜாமத்தேன யங் ஆபத்திங் ஆபஜ்ஜதி தாய காரேதப்³போ³, பாசித்தியாபத்தியா காரேதப்³போ³தி அத்தோ². ஏதேன நயேன ஸப்³ப³சதுக்கேஸு வினிச்ச²யோ வேதி³தப்³போ³.
446. Ito paraṃ sā ce evaṃ vadeyyātiādi sabbaṃ paṭiññāya kāraṇākāradassanatthaṃ vuttaṃ, tattha mātugāmassa methunaṃ dhammaṃ paṭisevantoti mātugāmassa magge methunaṃ dhammaṃ paṭisevantoti attho. Nisajjāya kāretabboti nisajjaṃ paṭijānitvā methunadhammapaṭisevanaṃ appaṭijānanto methunadhammapārājikāpattiyā akāretvā nisajjāmattena yaṃ āpattiṃ āpajjati tāya kāretabbo, pācittiyāpattiyā kāretabboti attho. Etena nayena sabbacatukkesu vinicchayo veditabbo.
451. ஸிக்கா²பத³பரியோஸானே பன ஆபத்தானாபத்திபரிச்சே²த³த³ஸ்ஸனத்த²ங் வுத்தேஸு க³மனங் படிஜானாதீதிஆதீ³ஸு க³மனங் படிஜானாதீதி ‘‘ரஹோனிஸஜ்ஜஸ்ஸாத³த்த²ங் க³தொம்ஹீ’’தி ஏவங் க³மனங் படிஜானாதி, நிஸஜ்ஜந்தி நிஸஜ்ஜஸ்ஸாதே³னேவ நிஸஜ்ஜங் படிஜானாதி. ஆபத்திந்தி தீஸு அஞ்ஞதரங் ஆபத்திங். ஆபத்தியா காரேதப்³போ³தி தீஸு யங் படிஜானாதி, தாய காரேதப்³போ³. ஸேஸமெத்த² சதுக்கே உத்தானாதி⁴ப்பாயமேவ. து³தியசதுக்கே பன க³மனங் ந படிஜானாதீதி ரஹோ நிஸஜ்ஜஸ்ஸாத³வஸேன ந படிஜானாதி , ‘‘ஸலாகப⁴த்தாதி³னா அத்தனோ கம்மேன க³தொம்ஹி, ஸா பன மய்ஹங் நிஸின்னட்டா²னங் ஆக³தா’’தி வத³தி. ஸேஸமெத்தா²பி உத்தானாதி⁴ப்பாயமேவ.
451. Sikkhāpadapariyosāne pana āpattānāpattiparicchedadassanatthaṃ vuttesu gamanaṃ paṭijānātītiādīsu gamanaṃ paṭijānātīti ‘‘rahonisajjassādatthaṃ gatomhī’’ti evaṃ gamanaṃ paṭijānāti, nisajjanti nisajjassādeneva nisajjaṃ paṭijānāti. Āpattinti tīsu aññataraṃ āpattiṃ. Āpattiyā kāretabboti tīsu yaṃ paṭijānāti, tāya kāretabbo. Sesamettha catukke uttānādhippāyameva. Dutiyacatukke pana gamanaṃ na paṭijānātīti raho nisajjassādavasena na paṭijānāti , ‘‘salākabhattādinā attano kammena gatomhi, sā pana mayhaṃ nisinnaṭṭhānaṃ āgatā’’ti vadati. Sesametthāpi uttānādhippāyameva.
அயங் பன ஸப்³ப³த்த² வினிச்ச²யோ – ரஹோ நிஸஜ்ஜஸ்ஸாதோ³தி மேது²னத⁴ம்மஸன்னிஸ்ஸிதகிலேஸோ வுச்சதி. யோ பி⁴க்கு² தேனஸ்ஸாதே³ன மாதுகா³மஸ்ஸ ஸந்திகங் க³ந்துகாமோ அக்கி²ங் அஞ்ஜேதி, து³க்கடங். நிவாஸனங் நிவாஸேதி, காயப³ந்த⁴னங் ப³ந்த⁴தி, சீவரங் பாருபதி, ஸப்³ப³த்த² பயோகே³ பயோகே³ து³க்கடங். க³ச்ச²தி, பத³வாரே பத³வாரே து³க்கடங். க³ந்த்வா நிஸீத³தி, து³க்கடமேவ. மாதுகா³மே ஆக³ந்த்வா நிஸின்னமத்தே பாசித்தியங். ஸசே ஸா இத்தீ² கேனசி கரணீயேன உட்டா²யுட்டா²ய புனப்புனங் நிஸீத³தி, நிஸஜ்ஜாய நிஸஜ்ஜாய பாசித்தியங். யங் ஸந்தா⁴ய க³தோ, ஸா ந தி³ட்டா², அஞ்ஞா ஆக³ந்த்வா நிஸீத³தி, அஸ்ஸாதே³ உப்பன்னே பாசித்தியங். மஹாபச்சரியங் பன ‘‘க³மனகாலதோ பட்டா²ய அஸுத்³த⁴சித்தத்தா ஆபத்தியேவா’’தி வுத்தங். ஸசே ஸம்ப³ஹுலா ஆக³ச்ச²ந்தி, மாதுகா³மக³ணனாய பாசித்தியானி. ஸசே உட்டா²யுட்டா²ய புனப்புனங் நிஸீத³ந்தி, நிஸஜ்ஜாக³ணனாய பாசித்தியானி. அனியமெத்வா தி³ட்ட²தி³ட்டா²ய ஸத்³தி⁴ங் ரஹஸ்ஸாத³ங் கப்பெஸ்ஸாமீதி க³ந்த்வா நிஸின்னஸ்ஸாபி ஆக³தாக³தானங் வஸேன புனப்புனங் நிஸஜ்ஜாவஸேன ச வுத்தனயேனேவ ஆபத்தியோ வேதி³தப்³பா³. ஸசே ஸுத்³த⁴சித்தேன க³ந்த்வா நிஸின்னஸ்ஸ ஸந்திகங் ஆக³ந்த்வா நிஸின்னாய இத்தி²யா ரஹஸ்ஸாதோ³ உப்பஜ்ஜதி அனாபத்தி.
Ayaṃ pana sabbattha vinicchayo – raho nisajjassādoti methunadhammasannissitakileso vuccati. Yo bhikkhu tenassādena mātugāmassa santikaṃ gantukāmo akkhiṃ añjeti, dukkaṭaṃ. Nivāsanaṃ nivāseti, kāyabandhanaṃ bandhati, cīvaraṃ pārupati, sabbattha payoge payoge dukkaṭaṃ. Gacchati, padavāre padavāre dukkaṭaṃ. Gantvā nisīdati, dukkaṭameva. Mātugāme āgantvā nisinnamatte pācittiyaṃ. Sace sā itthī kenaci karaṇīyena uṭṭhāyuṭṭhāya punappunaṃ nisīdati, nisajjāya nisajjāya pācittiyaṃ. Yaṃ sandhāya gato, sā na diṭṭhā, aññā āgantvā nisīdati, assāde uppanne pācittiyaṃ. Mahāpaccariyaṃ pana ‘‘gamanakālato paṭṭhāya asuddhacittattā āpattiyevā’’ti vuttaṃ. Sace sambahulā āgacchanti, mātugāmagaṇanāya pācittiyāni. Sace uṭṭhāyuṭṭhāya punappunaṃ nisīdanti, nisajjāgaṇanāya pācittiyāni. Aniyametvā diṭṭhadiṭṭhāya saddhiṃ rahassādaṃ kappessāmīti gantvā nisinnassāpi āgatāgatānaṃ vasena punappunaṃ nisajjāvasena ca vuttanayeneva āpattiyo veditabbā. Sace suddhacittena gantvā nisinnassa santikaṃ āgantvā nisinnāya itthiyā rahassādo uppajjati anāpatti.
ஸமுட்டா²னாதீ³னி பட²மபாராஜிகஸதி³ஸானேவாதி.
Samuṭṭhānādīni paṭhamapārājikasadisānevāti.
பட²மஅனியதஸிக்கா²பத³வண்ணனா நிட்டி²தா.
Paṭhamaaniyatasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மஅனியதஸிக்கா²பத³ங் • 1. Paṭhamaaniyatasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. பட²மஅனியதஸிக்கா²பத³வண்ணனா • 1. Paṭhamaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பட²மஅனியதஸிக்கா²பத³வண்ணனா • 1. Paṭhamaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மஅனியதஸிக்கா²பத³வண்ணனா • 1. Paṭhamaaniyatasikkhāpadavaṇṇanā
