| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
அனியதகண்ட³ங்
Aniyatakaṇḍaṃ
1. பட²மஅனியதஸிக்கா²பத³வண்ணனா
1. Paṭhamaaniyatasikkhāpadavaṇṇanā
‘‘மாதுகா³மேனா’’தி வத்வா புன ‘‘ஏகாயா’’தி வுத்தத்தா ‘‘மாதுகா³மஸங்கா²தாய ஏகாய இத்தி²யா’’தி வுத்தங். ரஹோதி அப்பகாஸங். அப்பகாஸதா ச யோ அனாபத்திங் கரோதி, தஸ்ஸ அபச்சக்க²பா⁴வதோதி ஆஹ ‘‘சக்கு²ஸ்ஸ ரஹோ’’தி. நனு ‘‘ரஹோ நாம சக்கு²ஸ்ஸ ரஹோ, ஸோதஸ்ஸ ரஹோ. சக்கு²ஸ்ஸ ரஹோ நாம ந ஸக்கா ஹோதி அக்கி²ங் வா நிக²ணியமானே, ப⁴முகங் வா உக்கி²பியமானே, ஸீஸங் வா உக்கி²பியமானே பஸ்ஸிதுங். ஸோதஸ்ஸ ரஹோ நாம ந ஸக்கா ஹோதி பகதிகதா² ஸோது’’ந்தி பத³பா⁴ஜனபாளியங் ஸோதஸ்ஸ ரஹோதி ஆக³தங், அத² கஸ்மா தங் அவத்வா ‘‘சக்கு²ஸ்ஸ ரஹோ’’தி எத்தகமேவ வுத்தந்தி ஆஹ ‘‘கிஞ்சாபீ’’திஆதி³. இமினா பாளியங் ‘‘ஸோதஸ்ஸ ரஹோ’’தி இத³ங் அத்து²த்³தா⁴ரவஸேன வுத்தந்தி த³ஸ்ஸேதி. அத² கத²மேதங் விஞ்ஞாயதி ‘‘சக்கு²ஸ்ஸேவ ரஹோ இத⁴ அதி⁴ப்பேதோ’’தி? ‘‘படிச்ச²ன்னே ஆஸனே’’தி வசனதோ ‘‘ஸக்கா ஹோதி மேது²னங் த⁴ம்மங் படிஸேவிது’’ந்தி (பாரா॰ 445) ச வுத்தத்தா. தேனேவாஹ ‘‘ஸசேபீ’’திஆதி³. ‘‘பிஹிதகவாடஸ்ஸா’’தி (ஸாரத்த²॰ டீ॰ 2.444-445) இமினா படிச்ச²ன்னபா⁴வதோ சக்கு²ஸ்ஸ ரஹோஸப்³பா⁴வங் த³ஸ்ஸேதி. அபிஹிதகவாடஸ்ஸ (பாரா॰ அட்ட²॰ 2.444-445) பன த்³வாரே நிஸின்னோ அனாபத்திங் கரோதி, ந கேவலங் அபிஹிதகவாடஸ்ஸ க³ப்³ப⁴ஸ்ஸ த்³வாரே நிஸின்னோவ அனாபத்திங் கரோதி, அந்தொத்³வாத³ஸஹத்தே² ஓகாஸே நிஸின்னோபீதி வேதி³தப்³போ³. தேனாஹ ‘‘யத்த² பன ஸக்கா த³ட்டு²’’ந்திஆதி³. யஸ்மா நிஸீதி³த்வா நித்³தா³யந்தோ கபிமித்³த⁴பரேதோ கஞ்சி காலங் சக்கூ²னி உம்மீலேதி, கஞ்சி காலங் நிமீலேதி, ந ச மஹானித்³த³ங் ஓக்கமதி, தஸ்மா ‘‘நித்³தா³யந்தோபி அனாபத்திங் கரோதீ’’தி வுத்தங். நிபஜ்ஜித்வா நித்³தா³யந்தோ பன தாதி³ஸோ ந ஹோதீதி ஆஹ ‘‘நிபஜ்ஜித்வா நித்³தா³யந்தோபி ந கரோதீ’’தி, அனாபத்திங் ந கரோதீதி அத்தோ². மேது²னஸ்ஸ மாதுகா³மோ து³தியோ ந ஹோதி. இத்தி²யோ ஹி அஞ்ஞமஞ்ஞிஸ்ஸா வஜ்ஜங் படிச்சா²தெ³ந்தி. தேனேவ வேஸாலியங் (பாரா॰ 76-77) மஹாவனே த்³வாரங் விவரித்வா நிபன்னே பி⁴க்கு²ம்ஹி ஸம்ப³ஹுலா இத்தி²யோ யாவத³த்த²ங் கத்வா பக்கமிங்ஸு. தேனாஹ ‘‘இத்தீ²னங் பன ஸதம்பி ந கரோதீ’’தி. தங் கம்மந்தி அஜ்ஜா²சாரகம்மங். யஸ்மா நிஸீதி³த்வாவ நிபஜ்ஜதி, தஸ்மா நிபஜ்ஜனம்பி அந்தோகத்வா ‘‘நிஸஜ்ஜங் கப்பெய்யா’’தி வுத்தந்தி த³ஸ்ஸேதுங் ‘‘எத்த² சா’’திஆதி³மாஹ. திண்ணங் த⁴ம்மானங் அஞ்ஞதரேன காரேதப்³போ³தி நிஸஜ்ஜங் படிஜானமானஸ்ஸ திண்ணங் த⁴ம்மானங் அஞ்ஞதரஸமாயோகோ³ ஹோதியேவாதி வுத்தங். பாராஜிகேன, பன ஸங்கா⁴தி³ஸேஸேன ச பாசித்தியேன ச தேனாகாரேன நிஸஜ்ஜங் படிஜானமானோவ காரேதப்³போ³. ந அப்படிஜானமானோதி நிஸஜ்ஜங் அப்படிஜானமானோ திண்ணங் த⁴ம்மானங் அஞ்ஞதரேன ந காரேதப்³போ³தி. அலஜ்ஜீபி ஹி படிஜானமானோவ ஆபத்தியா காரேதப்³போ³. யாவ ந படிஜானாதி, தாவ ‘‘நேவ ஸுத்³தோ⁴’’தி வா ‘‘ந அஸுத்³தோ⁴’’தி வா வத்தப்³போ³, வத்தானுஸந்தி⁴னா பன காரேதப்³போ³தி. வுத்தஞ்ஹேதங் –
‘‘Mātugāmenā’’ti vatvā puna ‘‘ekāyā’’ti vuttattā ‘‘mātugāmasaṅkhātāya ekāya itthiyā’’ti vuttaṃ. Rahoti appakāsaṃ. Appakāsatā ca yo anāpattiṃ karoti, tassa apaccakkhabhāvatoti āha ‘‘cakkhussa raho’’ti. Nanu ‘‘raho nāma cakkhussa raho, sotassa raho. Cakkhussa raho nāma na sakkā hoti akkhiṃ vā nikhaṇiyamāne, bhamukaṃ vā ukkhipiyamāne, sīsaṃ vā ukkhipiyamāne passituṃ. Sotassa raho nāma na sakkā hoti pakatikathā sotu’’nti padabhājanapāḷiyaṃ sotassa rahoti āgataṃ, atha kasmā taṃ avatvā ‘‘cakkhussa raho’’ti ettakameva vuttanti āha ‘‘kiñcāpī’’tiādi. Iminā pāḷiyaṃ ‘‘sotassa raho’’ti idaṃ atthuddhāravasena vuttanti dasseti. Atha kathametaṃ viññāyati ‘‘cakkhusseva raho idha adhippeto’’ti? ‘‘Paṭicchanne āsane’’ti vacanato ‘‘sakkā hoti methunaṃ dhammaṃ paṭisevitu’’nti (pārā. 445) ca vuttattā. Tenevāha ‘‘sacepī’’tiādi. ‘‘Pihitakavāṭassā’’ti (sārattha. ṭī. 2.444-445) iminā paṭicchannabhāvato cakkhussa rahosabbhāvaṃ dasseti. Apihitakavāṭassa (pārā. aṭṭha. 2.444-445) pana dvāre nisinno anāpattiṃ karoti, na kevalaṃ apihitakavāṭassa gabbhassa dvāre nisinnova anāpattiṃ karoti, antodvādasahatthe okāse nisinnopīti veditabbo. Tenāha ‘‘yattha pana sakkā daṭṭhu’’ntiādi. Yasmā nisīditvā niddāyanto kapimiddhapareto kañci kālaṃ cakkhūni ummīleti, kañci kālaṃ nimīleti, na ca mahāniddaṃ okkamati, tasmā ‘‘niddāyantopi anāpattiṃ karotī’’ti vuttaṃ. Nipajjitvā niddāyanto pana tādiso na hotīti āha ‘‘nipajjitvā niddāyantopi na karotī’’ti, anāpattiṃ na karotīti attho. Methunassa mātugāmo dutiyo na hoti. Itthiyo hi aññamaññissā vajjaṃ paṭicchādenti. Teneva vesāliyaṃ (pārā. 76-77) mahāvane dvāraṃ vivaritvā nipanne bhikkhumhi sambahulā itthiyo yāvadatthaṃ katvā pakkamiṃsu. Tenāha ‘‘itthīnaṃ pana satampi na karotī’’ti. Taṃ kammanti ajjhācārakammaṃ. Yasmā nisīditvāva nipajjati, tasmā nipajjanampi antokatvā ‘‘nisajjaṃ kappeyyā’’ti vuttanti dassetuṃ ‘‘ettha cā’’tiādimāha. Tiṇṇaṃ dhammānaṃ aññatarena kāretabboti nisajjaṃ paṭijānamānassa tiṇṇaṃ dhammānaṃ aññatarasamāyogo hotiyevāti vuttaṃ. Pārājikena, pana saṅghādisesena ca pācittiyena ca tenākārena nisajjaṃ paṭijānamānova kāretabbo. Na appaṭijānamānoti nisajjaṃ appaṭijānamāno tiṇṇaṃ dhammānaṃ aññatarena na kāretabboti. Alajjīpi hi paṭijānamānova āpattiyā kāretabbo. Yāva na paṭijānāti, tāva ‘‘neva suddho’’ti vā ‘‘na asuddho’’ti vā vattabbo, vattānusandhinā pana kāretabboti. Vuttañhetaṃ –
‘‘படிஞ்ஞா லஜ்ஜீஸு கதா, அலஜ்ஜீஸு ஏவங் ந விஜ்ஜதி;
‘‘Paṭiññā lajjīsu katā, alajjīsu evaṃ na vijjati;
ப³ஹும்பி அலஜ்ஜீ பா⁴ஸெய்ய, வத்தானுஸந்தி⁴தேன காரயே’’தி. (பரி॰ 359);
Bahumpi alajjī bhāseyya, vattānusandhitena kāraye’’ti. (pari. 359);
ந கேவலங் திண்ணங் த⁴ம்மானங் அஞ்ஞதரேன சோத³னாயமேவ ஏவங் படிஞ்ஞாய காரேதப்³போ³, அத² கோ² நிஸஜ்ஜாதி³னா ஆகாரேன ஸத்³தி⁴ங் சோத³னாயபீதி த³ஸ்ஸேதுங் ‘‘யேன வா ஸா ஸத்³தெ⁴ய்யவசஸா உபாஸிகா வதெ³ய்ய, தேன ஸோ பி⁴க்கு² காரேதப்³போ³’’தி வுத்தங். தேனேவாஹ ‘‘நிஸஜ்ஜாதீ³ஸு ஆகாரேஸூ’’திஆதி³. எத்த² ச ‘‘படிஜானமானோ’’தி அவுத்தேபி அதி⁴காரத்தா ‘‘படிஜானமானோவ தேன ஸோ பி⁴க்கு² காரேதப்³போ³’’தி வுத்தங். ததா²ரூபாய (ஸாரத்த²॰ டீ॰ 2.444-445) உபாஸிகாய வசனே அஞ்ஞத²த்தாபா⁴வதோ தி³ட்ட²ங் நாம ததா²பி ஹோதி, அஞ்ஞதா²பி ஹோதீதி த³ஸ்ஸனே அஞ்ஞத²த்தஸம்ப⁴வங் த³ஸ்ஸேதி. அனேகங்ஸிகதாய ந நியதோதி அனியதோ. தேனாஹ ‘‘திண்ணங் ஆபத்தீன’’ந்திஆதி³.
Na kevalaṃ tiṇṇaṃ dhammānaṃ aññatarena codanāyameva evaṃ paṭiññāya kāretabbo, atha kho nisajjādinā ākārena saddhiṃ codanāyapīti dassetuṃ ‘‘yena vā sā saddheyyavacasā upāsikā vadeyya, tena so bhikkhu kāretabbo’’ti vuttaṃ. Tenevāha ‘‘nisajjādīsu ākāresū’’tiādi. Ettha ca ‘‘paṭijānamāno’’ti avuttepi adhikārattā ‘‘paṭijānamānova tena so bhikkhu kāretabbo’’ti vuttaṃ. Tathārūpāya (sārattha. ṭī. 2.444-445) upāsikāya vacane aññathattābhāvato diṭṭhaṃ nāma tathāpi hoti, aññathāpi hotīti dassane aññathattasambhavaṃ dasseti. Anekaṃsikatāya na niyatoti aniyato. Tenāha ‘‘tiṇṇaṃ āpattīna’’ntiādi.
ரஹோனிஸஜ்ஜஸ்ஸாதே³ன மாதுகா³மஸ்ஸ ஸந்திகங் க³ந்துகாமோ அக்கி²ங் அஞ்ஜேதி, து³க்கடங். நிவாஸனங் நிவாஸேதி, காயப³ந்த⁴னங் ப³ந்த⁴தி, சீவரங் பாருபதி, ஸப்³ப³த்த² பயோகே³ பயோகே³ து³க்கடங். க³ச்ச²தி, பத³வாரே பத³வாரே து³க்கடங். க³ந்த்வான நிஸீத³தி, து³க்கடமேவ. தேனாஹ ‘‘மேது²னத⁴ம்மஸன்னிஸ்ஸிதகிலேஸஸங்கா²தேனா’’திஆதி³. எத்த² ச ரஹோனிஸஜ்ஜஸ்ஸாத³ஸ்ஸ அஸதிபி மேது²னராக³பா⁴வே தப்படிப³த்³த⁴கிலேஸத்தா வுத்தங் ‘‘மேது²னத⁴ம்மஸன்னிஸ்ஸிதகிலேஸஸங்கா²தேனா’’தி. தேனேவ ஸன்னிஸ்ஸிதக்³க³ஹணங் கதங். ரஹஸ்ஸாதே³னாதி ‘‘இத்த²ன்னாமாய ஸத்³தி⁴ங் ரஹோ நிஸீதி³த்வா ஹஸிதலபிதாதி³கங் கரெய்ய’’ந்தி உப்பன்னஅஸ்ஸாத³ஹேது . நிஸஜ்ஜாய பாசித்தியங் அஸதி உபசாரக³தே நிபஜ்ஜித்வா அனித்³தா³யந்தே அனந்தே⁴ விஞ்ஞுபுரிஸேதி அதி⁴ப்பாயோ. ஸசே ஸா இத்தீ² கேனசி கரணீயேன உட்டா²யுட்டா²ய புனப்புனங் நிஸீத³தி, நிஸஜ்ஜாய நிஸஜ்ஜாய பாசித்தியங். யங் ஸந்தா⁴ய க³தோ, ஸா ந தி³ட்டா², அஞ்ஞா ஆக³ந்த்வா நிஸீத³தி, அஸ்ஸாதே³ உப்பன்னே பாசித்தியங். ஸசே ஸம்ப³ஹுலா ஆக³ச்ச²ந்தி, மாதுகா³மக³ணனாய பாசித்தியங். ஸசே உட்டா²யுட்டா²ய புனப்புனங் நிஸீத³ந்தி, நிஸஜ்ஜாக³ணனாயபி பாசித்தியானி. அனியமெத்வா ‘‘தி³ட்ட²தி³ட்டா²ய ஸத்³தி⁴ங் ரஹஸ்ஸாத³ங் கப்பிஸ்ஸாமீ’’தி க³ந்த்வா நிஸின்னஸ்ஸாபி ஆக³தாக³தானங் வஸேன, புனப்புனங் நிஸஜ்ஜாய வஸேன ச வுத்தனயேனேவ ஆபத்தியோ வேதி³தப்³பா³. வுத்தப்பகாரே புரிஸேதி அனந்தே⁴ விஞ்ஞுபுரிஸே. உபசாரக³தே ஸதீதி த்³வாத³ஸஹத்த²ப்³ப⁴ந்தரக³தே ஸதி. ஸசே ஸுத்³த⁴சித்தேன க³ந்த்வா நிஸின்னஸ்ஸ ஸந்திகங் ஆக³ந்த்வா நிஸின்னாய இத்தி²யா ரஹஸ்ஸாதோ³ உப்பஜ்ஜதி, ஏவம்பி அனாபத்தி.
Rahonisajjassādena mātugāmassa santikaṃ gantukāmo akkhiṃ añjeti, dukkaṭaṃ. Nivāsanaṃ nivāseti, kāyabandhanaṃ bandhati, cīvaraṃ pārupati, sabbattha payoge payoge dukkaṭaṃ. Gacchati, padavāre padavāre dukkaṭaṃ. Gantvāna nisīdati, dukkaṭameva. Tenāha ‘‘methunadhammasannissitakilesasaṅkhātenā’’tiādi. Ettha ca rahonisajjassādassa asatipi methunarāgabhāve tappaṭibaddhakilesattā vuttaṃ ‘‘methunadhammasannissitakilesasaṅkhātenā’’ti. Teneva sannissitaggahaṇaṃ kataṃ. Rahassādenāti ‘‘itthannāmāya saddhiṃ raho nisīditvā hasitalapitādikaṃ kareyya’’nti uppannaassādahetu . Nisajjāya pācittiyaṃ asati upacāragate nipajjitvā aniddāyante anandhe viññupuriseti adhippāyo. Sace sā itthī kenaci karaṇīyena uṭṭhāyuṭṭhāya punappunaṃ nisīdati, nisajjāya nisajjāya pācittiyaṃ. Yaṃ sandhāya gato, sā na diṭṭhā, aññā āgantvā nisīdati, assāde uppanne pācittiyaṃ. Sace sambahulā āgacchanti, mātugāmagaṇanāya pācittiyaṃ. Sace uṭṭhāyuṭṭhāya punappunaṃ nisīdanti, nisajjāgaṇanāyapi pācittiyāni. Aniyametvā ‘‘diṭṭhadiṭṭhāya saddhiṃ rahassādaṃ kappissāmī’’ti gantvā nisinnassāpi āgatāgatānaṃ vasena, punappunaṃ nisajjāya vasena ca vuttanayeneva āpattiyo veditabbā. Vuttappakāre puriseti anandhe viññupurise. Upacāragate satīti dvādasahatthabbhantaragate sati. Sace suddhacittena gantvā nisinnassa santikaṃ āgantvā nisinnāya itthiyā rahassādo uppajjati, evampi anāpatti.
பட²மஅனியதஸிக்கா²பத³வண்ணனா நிட்டி²தா.
Paṭhamaaniyatasikkhāpadavaṇṇanā niṭṭhitā.
