| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
3. அனியதகண்ட³ங்
3. Aniyatakaṇḍaṃ
1. பட²மஅனியதஸிக்கா²பத³வண்ணனா
1. Paṭhamaaniyatasikkhāpadavaṇṇanā
443. புத்தஸத்³தே³ன ஸாமஞ்ஞனித்³தே³ஸதோ ஏகஸேஸனயேன வா புத்தீபி க³ஹிதாதி ஆஹ ‘‘ப³ஹூ தீ⁴தரோ சா’’தி. தா³னப்பதா³னேஸூதி கு²த்³த³கேஸு சேவ மஹந்தேஸு ச தா³னேஸு. ச²ணங் நாம அத்தனோ கே³ஹே கத்தப்³ப³மங்க³லந்தி ஆஹ ‘‘ஆவாஹவிவாஹமங்க³லாதீ³ஸூ’’தி. எத்த² ஆதி³-ஸத்³தே³ன ப²க்³கு³ணமாஸாதீ³ஸு உத்தரப²க்³கு³ணாதி³அபி⁴லக்கி²ததி³வஸேஸு ஸபரிஜனானங் மனுஸ்ஸானங் மங்க³லகரணம்பி ஸங்க³ண்ஹாதி. அந்தருஸ்ஸவேஸூதி மஹுஸ்ஸவஸ்ஸ அந்தரந்தரா பவத்திதஉஸ்ஸவேஸு. ஆஸாள்ஹீபவாரணனக்க²த்தாதீ³ஸூதி எத்த² நக்க²த்தஸத்³தோ³ பச்சேகங் யோஜேதப்³போ³. தத்த² ஆஸாள்ஹீனக்க²த்தந்தி வஸ்ஸூபக³மனபூஜாதி³வஸங் ஸந்தா⁴ய வுத்தங், பவாரணனக்க²த்தந்தி பவாரணபூஜாதி³வஸங் ஸந்தா⁴ய. ஆதி³-ஸத்³தே³ன யஸ்மிங் நக்க²த்தே கா³மனிக³மவாஸினோ தயோ ஸத்த வா தி³வஸே நக்க²த்தகோ⁴ஸனங் கத்வா யதா²விப⁴வங் அலங்கதபடியத்தா போ⁴கே³ பரிபு⁴ஞ்ஜந்தா நக்க²த்தகீளங் கீளந்தி, தம்பி ஸங்க³ண்ஹாதி. இமேபி தா³ரகாதி அத்தனோ தா³ரகே ஸந்தா⁴ய வத³ந்தி. தத³னந்தரந்தி பி⁴க்கூ²னங் போ⁴ஜனானந்தரங்.
443. Puttasaddena sāmaññaniddesato ekasesanayena vā puttīpi gahitāti āha ‘‘bahū dhītaro cā’’ti. Dānappadānesūti khuddakesu ceva mahantesu ca dānesu. Chaṇaṃ nāma attano gehe kattabbamaṅgalanti āha ‘‘āvāhavivāhamaṅgalādīsū’’ti. Ettha ādi-saddena phagguṇamāsādīsu uttaraphagguṇādiabhilakkhitadivasesu saparijanānaṃ manussānaṃ maṅgalakaraṇampi saṅgaṇhāti. Antarussavesūti mahussavassa antarantarā pavattitaussavesu. Āsāḷhīpavāraṇanakkhattādīsūti ettha nakkhattasaddo paccekaṃ yojetabbo. Tattha āsāḷhīnakkhattanti vassūpagamanapūjādivasaṃ sandhāya vuttaṃ, pavāraṇanakkhattanti pavāraṇapūjādivasaṃ sandhāya. Ādi-saddena yasmiṃ nakkhatte gāmanigamavāsino tayo satta vā divase nakkhattaghosanaṃ katvā yathāvibhavaṃ alaṅkatapaṭiyattā bhoge paribhuñjantā nakkhattakīḷaṃ kīḷanti, tampi saṅgaṇhāti. Imepi dārakāti attano dārake sandhāya vadanti. Tadanantaranti bhikkhūnaṃ bhojanānantaraṃ.
444-445. தங் கம்மந்தி தங் அஜ்ஜா²சாரகம்மங். பி⁴க்கு² நிஸின்னேதி எத்த² பி⁴க்கூ²தி பு⁴ம்மத்தே² பச்சத்தவசனங், பு⁴ம்மவசனஸ்ஸ வா லோபங் கத்வா நித்³தே³ஸோதி ஆஹ ‘‘பி⁴க்கு²ம்ஹி நிஸின்னே’’தி. பாளியங் ‘‘ஸோதஸ்ஸ ரஹோ’’தி இத³ங் அத்து²த்³தா⁴ரவஸேன வுத்தங், ‘‘படிச்ச²ன்னே ஆஸனே’’தி பன வசனதோ ‘‘ஸக்கா ஹோதி மேது²னங் த⁴ம்மங் படிஸேவிது’’ந்தி ச வுத்தத்தா சக்கு²ஸ்ஸ ரஹோ இதா⁴தி⁴ப்பேதோதி த³ஸ்ஸேதுங் ‘‘கிஞ்சாபீ’’திஆதி³ வுத்தங். பரிச்சே²தோ³ வேதி³தப்³போ³தி ரஹோ நிஸஜ்ஜாபத்தியா பரிச்சே²தோ³ வவத்தா²னங் வேதி³தப்³ப³ங். இதா³னி சக்கு²ஸ்ஸ ரஹேனேவ ஆபத்திங் பரிச்சி²ந்தி³த்வா த³ஸ்ஸெந்தோ ‘‘ஸசேபி ஹீ’’திஆதி³மாஹ. பிஹிதகவாடஸ்ஸாதி இமினா படிச்ச²ன்னபா⁴வதோ சக்கு²ஸ்ஸ ரஹோஸப்³பா⁴வங் த³ஸ்ஸேதி. அபிஹிதகவாடஸ்ஸாதி இமினா அப்படிச்ச²ன்னபா⁴வங் த³ஸ்ஸேதி. அப்படிச்ச²ன்னே ச து³தியஸிக்கா²பதே³ ஆக³தனயேன ஸோதஸ்ஸ ரஹவஸேனபி பரிச்சே²தோ³ வேதி³தப்³போ³தி ஆஹ ‘‘அந்தொத்³வாத³ஸஹத்தே²பி ஓகாஸே’’தி . ‘‘அந்தொத்³வாத³ஸஹத்தே²’’தி ஹி இத³ங் ஸோதஸ்ஸ ரஹாபா⁴வங் ஸந்தா⁴ய வுத்தங். யதி³ ஹி சக்கு²ஸ்ஸேவ ரஹாபா⁴வங் ஸந்தா⁴ய வதெ³ய்ய , ‘‘அந்தொத்³வாத³ஸஹத்தே²’’தி ந வதெ³ய்ய அப்படிச்ச²ன்னே ததோ தூ³ரதரே நிஸின்னேபி சக்கு²ஸ்ஸ ரஹாஸம்ப⁴வதோ. யஸ்மா நிஸீதி³த்வா நித்³தா³யந்தோ கபிமித்³த⁴பரேதோ கஞ்சி காலங் சக்கூ²னி உம்மீலேதி, கஞ்சி காலங் நிமீலேதி, ந ச மஹானித்³த³ங் ஓக்கமதி, தஸ்மா ‘‘நித்³தா³யந்தோபி அனாபத்திங் கரோதீ’’தி வுத்தங். நிபஜ்ஜித்வா நித்³தா³யந்தோ பன தாதி³ஸோ ந ஹோதீதி ஆஹ ‘‘நிபஜ்ஜித்வா நித்³தா³யந்தோ ந கரோதீ’’தி, அனாபத்திங் ந கரோதீதி அத்தோ².
444-445.Taṃ kammanti taṃ ajjhācārakammaṃ. Bhikkhu nisinneti ettha bhikkhūti bhummatthe paccattavacanaṃ, bhummavacanassa vā lopaṃ katvā niddesoti āha ‘‘bhikkhumhi nisinne’’ti. Pāḷiyaṃ ‘‘sotassa raho’’ti idaṃ atthuddhāravasena vuttaṃ, ‘‘paṭicchanne āsane’’ti pana vacanato ‘‘sakkā hoti methunaṃ dhammaṃ paṭisevitu’’nti ca vuttattā cakkhussa raho idhādhippetoti dassetuṃ ‘‘kiñcāpī’’tiādi vuttaṃ. Paricchedo veditabboti raho nisajjāpattiyā paricchedo vavatthānaṃ veditabbaṃ. Idāni cakkhussa raheneva āpattiṃ paricchinditvā dassento ‘‘sacepi hī’’tiādimāha. Pihitakavāṭassāti iminā paṭicchannabhāvato cakkhussa rahosabbhāvaṃ dasseti. Apihitakavāṭassāti iminā appaṭicchannabhāvaṃ dasseti. Appaṭicchanne ca dutiyasikkhāpade āgatanayena sotassa rahavasenapi paricchedo veditabboti āha ‘‘antodvādasahatthepi okāse’’ti . ‘‘Antodvādasahatthe’’ti hi idaṃ sotassa rahābhāvaṃ sandhāya vuttaṃ. Yadi hi cakkhusseva rahābhāvaṃ sandhāya vadeyya , ‘‘antodvādasahatthe’’ti na vadeyya appaṭicchanne tato dūratare nisinnepi cakkhussa rahāsambhavato. Yasmā nisīditvā niddāyanto kapimiddhapareto kañci kālaṃ cakkhūni ummīleti, kañci kālaṃ nimīleti, na ca mahāniddaṃ okkamati, tasmā ‘‘niddāyantopi anāpattiṃ karotī’’ti vuttaṃ. Nipajjitvā niddāyanto pana tādiso na hotīti āha ‘‘nipajjitvā niddāyanto na karotī’’ti, anāpattiṃ na karotīti attho.
படிலத்³த⁴ஸோதாபத்திப²லாதி அந்திமபரிச்சே²த³தோ அரியஸாவிகங் த³ஸ்ஸேதி. படிவித்³த⁴சதுஸச்சாதி ஸோதாபத்திமக்³கே³ன படிவித்³த⁴சதுஸச்சா. திண்ணங் த⁴ம்மானங் அஞ்ஞதரேன காரேதப்³போ³தி நிஸஜ்ஜங் படிஜானமானஸ்ஸ திண்ணங் த⁴ம்மானங் அஞ்ஞதரஸமாயோகோ³ ஹோதியேவாதி வுத்தங். பாராஜிகேன பன ஸங்கா⁴தி³ஸேஸேன ச பாசித்தியேன ச தேனாகாரேன நிஸஜ்ஜங் படிஜானமானோவ காரேதப்³போ³. ந அப்படிஜானமானோதி அலஜ்ஜீபி அப்படிஜானமானோ ஆபத்தியா ந காரேதப்³போ³தி அவிஸேஸேன வுத்தங். ஸோ ஹி யாவ ந படிஜானாதி, தாவ நேவ ஸுத்³தோ⁴, ந அஸுத்³தோ⁴தி வா வத்தப்³போ³, வத்தானுஸந்தி⁴னா பன காரேதப்³போ³. வுத்தஞ்ஹேதங் –
Paṭiladdhasotāpattiphalāti antimaparicchedato ariyasāvikaṃ dasseti. Paṭividdhacatusaccāti sotāpattimaggena paṭividdhacatusaccā. Tiṇṇaṃ dhammānaṃ aññatarena kāretabboti nisajjaṃ paṭijānamānassa tiṇṇaṃ dhammānaṃ aññatarasamāyogo hotiyevāti vuttaṃ. Pārājikena pana saṅghādisesena ca pācittiyena ca tenākārena nisajjaṃ paṭijānamānova kāretabbo. Na appaṭijānamānoti alajjīpi appaṭijānamāno āpattiyā na kāretabboti avisesena vuttaṃ. So hi yāva na paṭijānāti, tāva neva suddho, na asuddhoti vā vattabbo, vattānusandhinā pana kāretabbo. Vuttañhetaṃ –
‘‘படிஞ்ஞா லஜ்ஜீஸு கதா, அலஜ்ஜீஸு ஏவங் ந விஜ்ஜதி;
‘‘Paṭiññā lajjīsu katā, alajjīsu evaṃ na vijjati;
ப³ஹும்பி அலஜ்ஜீ பா⁴ஸெய்ய, வத்தானுஸந்தி⁴தேன காரயே’’தி. (பரி॰ 359);
Bahumpi alajjī bhāseyya, vattānusandhitena kāraye’’ti. (pari. 359);
யேன வா ஸா ஸத்³தெ⁴ய்யவசஸா உபாஸிகா வதெ³ய்ய, தேன ஸோ பி⁴க்கு² காரேதப்³போ³தி எத்த² ‘‘படிஜானமானோ’’தி அவுத்தேபி அதி⁴காரத்தா ‘‘படிஜானமானோவ தேன ஸோ பி⁴க்கு² காரேதப்³போ³’’தி வுத்தங். ததா²ரூபாய உபாஸிகாய வசனேன அஞ்ஞத²த்தாபா⁴வதோ தி³ட்ட²ங் நாம ததா²பி ஹோதி, அஞ்ஞதா²பி ஹோதீதி த³ஸ்ஸனேன அஞ்ஞத²த்தஸம்ப⁴வங் த³ஸ்ஸேதி. ஏவங் மஹித்³தி⁴கா நாம…பே॰… வதா³பேதா²தி இத³ங் ‘‘ஏவங் மஹித்³தி⁴காபி தும்ஹே ஏவரூபே ஆஸங்கனீயே டா²னே கஸ்மா அனுபபரிக்கி²த்வா நிஸின்னத்த², தும்ஹாதி³ஸேஹி நாம அந்தரக⁴ரே நிஸீத³ந்தேஹி உபபரிக்கி²த்வா பதிரூபே டா²னே நிஸீதி³தப்³ப³’’ந்தி தே²ரங் ஓவத³ந்தோ ஆஹ, ந பன அஸத்³த³ஹந்தோ. தே²ரோ அத்தனோ அனுபபரிக்கி²த்வா அனிஸின்னபா⁴வங் த³ஸ்ஸெந்தோ ‘‘அந்தரக⁴ரஸ்ஸேவேஸோ ஆவுஸோ தோ³ஸோ’’தி ஆஹ. ஏவமகாஸிந்தி அத்தனோ நிகூ³ஹிதப்³ப³ம்பி கு³ணங் பகாஸெந்தோ ஏவங் விய இத்³தி⁴பாடிஹாரியங் அகாஸிங். ரக்கெ²ய்யாஸி மந்தி ‘‘மா மங் அஞ்ஞேபி ஏவங் ஜானந்தூ’’தி அத்தனோ கு³ணங் அஜானாபேதுகாமோ வத³தி.
Yena vā sā saddheyyavacasā upāsikā vadeyya, tena so bhikkhu kāretabboti ettha ‘‘paṭijānamāno’’ti avuttepi adhikārattā ‘‘paṭijānamānova tena so bhikkhu kāretabbo’’ti vuttaṃ. Tathārūpāya upāsikāya vacanena aññathattābhāvato diṭṭhaṃ nāma tathāpi hoti, aññathāpi hotīti dassanena aññathattasambhavaṃ dasseti. Evaṃ mahiddhikā nāma…pe… vadāpethāti idaṃ ‘‘evaṃ mahiddhikāpi tumhe evarūpe āsaṅkanīye ṭhāne kasmā anupaparikkhitvā nisinnattha, tumhādisehi nāma antaraghare nisīdantehi upaparikkhitvā patirūpe ṭhāne nisīditabba’’nti theraṃ ovadanto āha, na pana asaddahanto. Thero attano anupaparikkhitvā anisinnabhāvaṃ dassento ‘‘antaragharasseveso āvuso doso’’ti āha. Evamakāsinti attano nigūhitabbampi guṇaṃ pakāsento evaṃ viya iddhipāṭihāriyaṃ akāsiṃ. Rakkheyyāsi manti ‘‘mā maṃ aññepi evaṃ jānantū’’ti attano guṇaṃ ajānāpetukāmo vadati.
446-451. மாதுகா³மஸ்ஸ மேது²னங் த⁴ம்மங் படிஸேவந்தோதி எத்த² ‘‘மக்³கே³’’தி பாட²ஸேஸோ த³ட்ட²ப்³போ³தி ஆஹ ‘‘மாதுகா³மஸ்ஸ மக்³கே³’’தி. ரஹோ நிஸஜ்ஜஸ்ஸாத³ஸ்ஸ அஸதிபி மேது²னராக³பா⁴வே தப்படிப³த்³த⁴கிலேஸத்தா வுத்தங் ‘‘மேது²னத⁴ம்மஸன்னிஸ்ஸிதகிலேஸோ வுச்சதீ’’தி, தேனேவ ஸன்னிஸ்ஸிதக்³க³ஹணங் கதங். தங் ஸந்தா⁴ய அக³தேபி அஸுத்³த⁴சித்தேன க³தத்தா ‘‘அஸ்ஸாதே³ உப்பன்னே பாசித்திய’’ந்தி வுத்தங். ரஹஸ்ஸாதோ³ உப்பஜ்ஜதி அனாபத்தீதி ஸுத்³த⁴சித்தேன க³ந்த்வா நிஸின்னத்தா சித்துப்பாத³மத்தேனெத்த² ஆபத்தி ந ஹோதீதி வுத்தங். அயங் த⁴ம்மோ அனியதோதி எத்த² திண்ணங் ஆபத்தீனங் யங் ஆபத்திங் வா வத்து²ங் வா படிஜானாதி, தஸ்ஸ வஸேன காரேதப்³ப³தாய அனியதோதி அயமத்தோ² பாகடோயேவாதி ந வுத்தோ. யங் ஆபத்திங் படிஜானாதி, தஸ்ஸா வஸேனெத்த² அங்க³பே⁴தோ³ வேதி³தப்³போ³.
446-451.Mātugāmassa methunaṃ dhammaṃ paṭisevantoti ettha ‘‘magge’’ti pāṭhaseso daṭṭhabboti āha ‘‘mātugāmassa magge’’ti. Raho nisajjassādassa asatipi methunarāgabhāve tappaṭibaddhakilesattā vuttaṃ ‘‘methunadhammasannissitakileso vuccatī’’ti, teneva sannissitaggahaṇaṃ kataṃ. Taṃ sandhāya agatepi asuddhacittena gatattā ‘‘assāde uppanne pācittiya’’nti vuttaṃ. Rahassādo uppajjati anāpattīti suddhacittena gantvā nisinnattā cittuppādamattenettha āpatti na hotīti vuttaṃ. Ayaṃ dhammo aniyatoti ettha tiṇṇaṃ āpattīnaṃ yaṃ āpattiṃ vā vatthuṃ vā paṭijānāti, tassa vasena kāretabbatāya aniyatoti ayamattho pākaṭoyevāti na vutto. Yaṃ āpattiṃ paṭijānāti, tassā vasenettha aṅgabhedo veditabbo.
பட²மஅனியதஸிக்கா²பத³வண்ணனா நிட்டி²தா.
Paṭhamaaniyatasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மஅனியதஸிக்கா²பத³ங் • 1. Paṭhamaaniyatasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மஅனியதஸிக்கா²பத³வண்ணனா • 1. Paṭhamaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பட²மஅனியதஸிக்கா²பத³வண்ணனா • 1. Paṭhamaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மஅனியதஸிக்கா²பத³வண்ணனா • 1. Paṭhamaaniyatasikkhāpadavaṇṇanā
