| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၃. အနိယတကဏ္ဍံ
3. Aniyatakaṇḍaṃ
၁. ပဌမအနိယတသိက္ခာပဒဝဏ္ဏနာ
1. Paṭhamaaniyatasikkhāpadavaṇṇanā
၄၄၃. တေန သမယေန ဗုဒ္ဓော ဘဂဝာတိ ပဌမအနိယတသိက္ခာပဒံ။ တတ္ထ ကာလယုတ္တံ သမုလ္လပန္တောတိ ကာလံ သလ္လက္ခေတ္ဝာ ယဒာ န အညော ကောစိ သမီပေန ဂစ္ဆတိ ဝာ အာဂစ္ဆတိ ဝာ တဒာ တဒနုရူပံ ‘‘ကစ္စိ န ဥက္ကဏ္ဌသိ, န ကိလမသိ, န ဆာတာသီ’’တိအာဒိကံ ဂေဟသ္သိတံ ကထံ ကထေန္တော။ ကာလယုတ္တံ ဓမ္မံ ဘဏန္တောတိ ကာလံ သလ္လက္ခေတ္ဝာ ယဒာ အညော ကောစိ သမီပေန ဂစ္ဆတိ ဝာ အာဂစ္ဆတိ ဝာ တဒာ တဒနုရူပံ ‘‘ဥပောသထံ ကရေယ္ယာသိ, သလာကဘတ္တံ ဒဒေယ္ယာသီ’’တိအာဒိကံ ဓမ္မကထံ ကထေန္တော။
443.Tenasamayena buddho bhagavāti paṭhamaaniyatasikkhāpadaṃ. Tattha kālayuttaṃ samullapantoti kālaṃ sallakkhetvā yadā na añño koci samīpena gacchati vā āgacchati vā tadā tadanurūpaṃ ‘‘kacci na ukkaṇṭhasi, na kilamasi, na chātāsī’’tiādikaṃ gehassitaṃ kathaṃ kathento. Kālayuttaṃ dhammaṃ bhaṇantoti kālaṃ sallakkhetvā yadā añño koci samīpena gacchati vā āgacchati vā tadā tadanurūpaṃ ‘‘uposathaṃ kareyyāsi, salākabhattaṃ dadeyyāsī’’tiādikaṃ dhammakathaṃ kathento.
ဗဟူ ဓီတရော စ ပုတ္တာ စ အသ္သာတိ ဗဟုပုတ္တာ။ တသ္သာ ကိရ ဒသ ပုတ္တာ ဒသ ဓီတရော အဟေသုံ, ဗဟူ နတ္တာရော အသ္သာတိ ဗဟုနတ္တာ။ ယထေဝ ဟိ တသ္သာ ဧဝမသ္သာ ပုတ္တဓီတာနမ္ပိ ဝီသတိ ဝီသတိ ဒာရကာ အဟေသုံ, ဣတိ သာ ဝီသုတ္တရစတုသတပုတ္တနတ္တပရိဝာရာ အဟောသိ။ အဘိမင္ဂလသမ္မတာတိ ဥတ္တမမင္ဂလသမ္မတာ။ ယညေသူတိ ဒာနပ္ပဒာနေသု။ ဆဏေသူတိ အာဝာဟဝိဝာဟမင္ဂလာဒီသု အန္တရုသ္သဝေသု။ ဥသ္သဝေသူတိ အာသာဠ္ဟီပဝာရဏနက္ခတ္တာဒီသု မဟုသ္သဝေသု။ ပဌမံ ဘောဇေန္တီတိ ‘‘ဣမေပိ ဒာရကာ တယာ သမာနာယုကာ နိရောဂာ ဟောန္တူ’’တိ အာယာစန္တာ ပဌမံယေဝ ဘောဇေန္တိ, ယေပိ သဒ္ဓာ ဟောန္တိ ပသန္နာ, တေပိ ဘိက္ခူ ဘောဇေတ္ဝာ တဒနန္တရံ သဗ္ဗပဌမံ တံယေဝ ဘောဇေန္တိ။ နာဒိယီတိ တသ္သာ ဝစနံ န အာဒိယိ, န ဂဏ္ဟိ, န ဝာ အာဒရမကာသီတိ အတ္ထော။
Bahū dhītaro ca puttā ca assāti bahuputtā. Tassā kira dasa puttā dasa dhītaro ahesuṃ, bahū nattāro assāti bahunattā. Yatheva hi tassā evamassā puttadhītānampi vīsati vīsati dārakā ahesuṃ, iti sā vīsuttaracatusataputtanattaparivārā ahosi. Abhimaṅgalasammatāti uttamamaṅgalasammatā. Yaññesūti dānappadānesu. Chaṇesūti āvāhavivāhamaṅgalādīsu antarussavesu. Ussavesūti āsāḷhīpavāraṇanakkhattādīsu mahussavesu. Paṭhamaṃ bhojentīti ‘‘imepi dārakā tayā samānāyukā nirogā hontū’’ti āyācantā paṭhamaṃyeva bhojenti, yepi saddhā honti pasannā, tepi bhikkhū bhojetvā tadanantaraṃ sabbapaṭhamaṃ taṃyeva bhojenti. Nādiyīti tassā vacanaṃ na ādiyi, na gaṇhi, na vā ādaramakāsīti attho.
၄၄၄-၅. အလံကမ္မနိယေတိ ကမ္မက္ခမံ ကမ္မယောဂ္ဂန္တိ ကမ္မနိယံ, အလံ ပရိယတ္တံ ကမ္မနိယဘာဝာယာတိ အလံကမ္မနိယံ, တသ္မိံ အလံကမ္မနိယေ, ယတ္ထ အဇ္ဈာစာရံ ကရောန္တာ သက္ကောန္တိ, တံ ကမ္မံ ကာတုံ တာဒိသေတိ အတ္ထော။ တေနေဝသ္သ ပဒဘာဇနေ ဝုတ္တံ – ‘‘သက္ကာ ဟောတိ မေထုနံ ဓမ္မံ ပဋိသေဝိတု’’န္တိ, ယတ္ထ မေထုနံ ဓမ္မံ သက္ကာ ဟောတိ ပဋိသေဝိတုန္တိ ဝုတ္တံ ဟောတိ။ နိသဇ္ဇံ ကပ္ပေယ္ယာတိ နိသဇ္ဇံ ကရေယ္ယ, နိသီဒေယ္ယာတိ အတ္ထော။ ယသ္မာ ပန နိသီဒိတ္ဝာဝ နိပဇ္ဇတိ, တေနသ္သ ပဒဘာဇနေ ဥဘယမ္ပိ ဝုတ္တံ။ တတ္ထ ဥပနိသိန္နောတိ ဥပဂန္တ္ဝာ နိသိန္နော။ ဧဝံ ဥပနိပန္နောပိ ဝေဒိတဗ္ဗော။ ဘိက္ခု နိသိန္နေတိ ဘိက္ခုမ္ဟိ နိသိန္နေတိ အတ္ထော။ ဥဘော ဝာ နိသိန္နာတိ ဒ္ဝေပိ အပစ္ဆာ အပုရိမံ နိသိန္နာ။ ဧတ္ထ စ ကိဉ္စာပိ ပာဠိယံ ‘‘သောတသ္သ ရဟော’’တိ အာဂတံ, စက္ခုသ္သ ရဟေနေဝ ပန ပရိစ္ဆေဒော ဝေဒိတဗ္ဗော။ သစေပိ ဟိ ပိဟိတကဝာဋသ္သ ဂဗ္ဘသ္သ ဒ္ဝာရေ နိသိန္နော ဝိညူ ပုရိသော ဟောတိ, နေဝ အနာပတ္တိံ ကရောတိ။ အပိဟိတကဝာဋသ္သ ပန ဒ္ဝာရေ နိသိန္နော အနာပတ္တိံ ကရောတိ။ န ကေဝလဉ္စ ဒ္ဝာရေ အန္တောဒ္ဝာဒသဟတ္ထေပိ ဩကာသေ နိသိန္နော, သစေ သစက္ခုကော ဝိက္ခိတ္တောပိ နိဒ္ဒာယန္တောပိ အနာပတ္တိံ ကရောတိ။ သမီပေ ဌိတောပိ အန္ဓော န ကရောတိ, စက္ခုမာပိ နိပဇ္ဇိတ္ဝာ နိဒ္ဒာယန္တော န ကရောတိ။ ဣတ္ထီနံ ပန သတမ္ပိ အနာပတ္တိံ န ကရောတိယေဝ။
444-5.Alaṃkammaniyeti kammakkhamaṃ kammayogganti kammaniyaṃ, alaṃ pariyattaṃ kammaniyabhāvāyāti alaṃkammaniyaṃ, tasmiṃ alaṃkammaniye, yattha ajjhācāraṃ karontā sakkonti, taṃ kammaṃ kātuṃ tādiseti attho. Tenevassa padabhājane vuttaṃ – ‘‘sakkā hoti methunaṃ dhammaṃ paṭisevitu’’nti, yattha methunaṃ dhammaṃ sakkā hoti paṭisevitunti vuttaṃ hoti. Nisajjaṃkappeyyāti nisajjaṃ kareyya, nisīdeyyāti attho. Yasmā pana nisīditvāva nipajjati, tenassa padabhājane ubhayampi vuttaṃ. Tattha upanisinnoti upagantvā nisinno. Evaṃ upanipannopi veditabbo. Bhikkhu nisinneti bhikkhumhi nisinneti attho. Ubho vā nisinnāti dvepi apacchā apurimaṃ nisinnā. Ettha ca kiñcāpi pāḷiyaṃ ‘‘sotassa raho’’ti āgataṃ, cakkhussa raheneva pana paricchedo veditabbo. Sacepi hi pihitakavāṭassa gabbhassa dvāre nisinno viññū puriso hoti, neva anāpattiṃ karoti. Apihitakavāṭassa pana dvāre nisinno anāpattiṃ karoti. Na kevalañca dvāre antodvādasahatthepi okāse nisinno, sace sacakkhuko vikkhittopi niddāyantopi anāpattiṃ karoti. Samīpe ṭhitopi andho na karoti, cakkhumāpi nipajjitvā niddāyanto na karoti. Itthīnaṃ pana satampi anāpattiṃ na karotiyeva.
သဒ္ဓေယ္ယဝစသာတိ သဒ္ဓာတဗ္ဗဝစနာ။ သာ ပန ယသ္မာ အရိယသာဝိကာဝ ဟောတိ, တေနသ္သ ပဒဘာဇနေ ‘‘အာဂတဖလာ’’တိအာဒိ ဝုတ္တံ။ တတ္ထ အာဂတံ ဖလံ အသ္သာတိ အာဂတဖလာ ပဋိလဒ္ဓသောတာပတ္တိဖလာတိ အတ္ထော။ အဘိသမေတာဝိနီတိ ပဋိဝိဒ္ဓစတုသစ္စာ။ ဝိညာတံ သိက္ခတ္တယသာသနံ ဧတာယာတိ ဝိညာတသာသနာ။ နိသဇ္ဇံ ဘိက္ခု ပဋိဇာနမာနောတိ ကိဉ္စာပိ ဧဝရူပာ ဥပာသိကာ ဒိသ္ဝာ ဝဒတိ, အထ ခော ဘိက္ခု နိသဇ္ဇံ ပဋိဇာနမာနောယေဝ တိဏ္ဏံ ဓမ္မာနံ အညတရေန ကာရေတဗ္ဗော, န အပ္ပဋိဇာနမာနောတိ အတ္ထော။
Saddheyyavacasāti saddhātabbavacanā. Sā pana yasmā ariyasāvikāva hoti, tenassa padabhājane ‘‘āgataphalā’’tiādi vuttaṃ. Tattha āgataṃ phalaṃ assāti āgataphalā paṭiladdhasotāpattiphalāti attho. Abhisametāvinīti paṭividdhacatusaccā. Viññātaṃ sikkhattayasāsanaṃ etāyāti viññātasāsanā. Nisajjaṃ bhikkhu paṭijānamānoti kiñcāpi evarūpā upāsikā disvā vadati, atha kho bhikkhu nisajjaṃ paṭijānamānoyeva tiṇṇaṃ dhammānaṃ aññatarena kāretabbo, na appaṭijānamānoti attho.
ယေန ဝာ သာ သဒ္ဓေယ္ယဝစသာ ဥပာသိကာ ဝဒေယ္ယ တေန သော ဘိက္ခု ကာရေတဗ္ဗောတိ နိသဇ္ဇာဒီသု အာကာရေသု ယေန ဝာ အာကာရေန သဒ္ဓိံ မေထုနဓမ္မာဒီနိ အာရောပေတ္ဝာ သာ ဥပာသိကာ ဝဒေယ္ယ, ပဋိဇာနမာနောဝ တေန သော ဘိက္ခု ကာရေတဗ္ဗော။ ဧဝရူပာယပိ ဥပာသိကာယ ဝစနမတ္တေန န ကာရေတဗ္ဗောတိ အတ္ထော။ ကသ္မာ? ယသ္မာ ဒိဋ္ဌံ နာမ တထာပိ ဟောတိ, အညထာပိ ဟောတိ။
Yena vā sā saddheyyavacasā upāsikā vadeyya tena so bhikkhu kāretabboti nisajjādīsu ākāresu yena vā ākārena saddhiṃ methunadhammādīni āropetvā sā upāsikā vadeyya, paṭijānamānova tena so bhikkhu kāretabbo. Evarūpāyapi upāsikāya vacanamattena na kāretabboti attho. Kasmā? Yasmā diṭṭhaṃ nāma tathāpi hoti, aññathāpi hoti.
တဒတ္ထဇောတနတ္ထဉ္စ ဣဒံ ဝတ္ထုံ ဥဒာဟရန္တိ – မလ္လာရာမဝိဟာရေ ကိရ ဧကော ခီဏာသဝတ္ထေရော ဧကဒိဝသံ ဥပဋ္ဌာကကုလံ ဂန္တ္ဝာ အန္တောဂေဟေ နိသီဒိ, ဥပာသိကာပိ သယနပလ္လင္ကံ နိသ္သာယ ဌိတာ ဟောတိ။ အထေကော ပိဏ္ဍစာရိကော ဒ္ဝာရေ ဌိတော ဒိသ္ဝာ ‘‘ထေရော ဥပာသိကာယ သဒ္ဓိံ ဧကာသနေ နိသိန္နော’’တိ သညံ ပဋိလဘိတ္ဝာ ပုနပ္ပုနံ ဩလောကေသိ။ ထေရောပိ ‘‘အယံ မယိ အသုဒ္ဓလဒ္ဓိကော ဇာတော’’တိ သလ္လက္ခေတ္ဝာ ကတဘတ္တကိစ္စော ဝိဟာရံ ဂန္တ္ဝာ အတ္တနော ဝသနဋ္ဌာနံ ပဝိသိတ္ဝာ အန္တောဝ နိသီဒိ။ သောပိ ဘိက္ခု ‘‘ထေရံ စောဒေသ္သာမီ’’တိ အာဂန္တ္ဝာ ဥက္ကာသိတ္ဝာ ဒ္ဝာရံ ဝိဝရိ။ ထေရော တသ္သ စိတ္တံ ဉတ္ဝာ အာကာသေ ဥပ္ပတိတ္ဝာ ကူဋာဂာရကဏ္ဏိကံ နိသ္သာယ ပလ္လင္ကေန နိသီဒိ။ သောပိ ဘိက္ခု အန္တော ပဝိသိတ္ဝာ မဉ္စဉ္စ ဟေဋ္ဌာမဉ္စဉ္စ ဩလောကေတ္ဝာ ထေရံ အပသ္သန္တော ဥဒ္ဓံ ဥလ္လောကေသိ, အထ အာကာသေ နိသိန္နံ ထေရံ ဒိသ္ဝာ ‘‘ဘန္တေ, ဧဝံ မဟိဒ္ဓိကာ နာမ တုမ္ဟေ မာတုဂာမေန သဒ္ဓိံ ဧကာသနေ နိသိန္နဘာဝံ ဝဒာပေထ ဧဝာ’’တိ အာဟ။ ထေရော ‘‘အန္တရဃရသ္သေဝေသော အာဝုသော ဒောသော, အဟံ ပန တံ သဒ္ဓာပေတုံ အသက္ကောန္တော ဧဝမကာသိံ, ရက္ခေယ္ယာသိ မ’’န္တိ ဝတ္ဝာ ဩတရီတိ။
Tadatthajotanatthañca idaṃ vatthuṃ udāharanti – mallārāmavihāre kira eko khīṇāsavatthero ekadivasaṃ upaṭṭhākakulaṃ gantvā antogehe nisīdi, upāsikāpi sayanapallaṅkaṃ nissāya ṭhitā hoti. Atheko piṇḍacāriko dvāre ṭhito disvā ‘‘thero upāsikāya saddhiṃ ekāsane nisinno’’ti saññaṃ paṭilabhitvā punappunaṃ olokesi. Theropi ‘‘ayaṃ mayi asuddhaladdhiko jāto’’ti sallakkhetvā katabhattakicco vihāraṃ gantvā attano vasanaṭṭhānaṃ pavisitvā antova nisīdi. Sopi bhikkhu ‘‘theraṃ codessāmī’’ti āgantvā ukkāsitvā dvāraṃ vivari. Thero tassa cittaṃ ñatvā ākāse uppatitvā kūṭāgārakaṇṇikaṃ nissāya pallaṅkena nisīdi. Sopi bhikkhu anto pavisitvā mañcañca heṭṭhāmañcañca oloketvā theraṃ apassanto uddhaṃ ullokesi, atha ākāse nisinnaṃ theraṃ disvā ‘‘bhante, evaṃ mahiddhikā nāma tumhe mātugāmena saddhiṃ ekāsane nisinnabhāvaṃ vadāpetha evā’’ti āha. Thero ‘‘antaragharasseveso āvuso doso, ahaṃ pana taṃ saddhāpetuṃ asakkonto evamakāsiṃ, rakkheyyāsi ma’’nti vatvā otarīti.
၄၄၆. ဣတော ပရံ သာ စေ ဧဝံ ဝဒေယ္ယာတိအာဒိ သဗ္ဗံ ပဋိညာယ ကာရဏာကာရဒသ္သနတ္ထံ ဝုတ္တံ, တတ္ထ မာတုဂာမသ္သ မေထုနံ ဓမ္မံ ပဋိသေဝန္တောတိ မာတုဂာမသ္သ မဂ္ဂေ မေထုနံ ဓမ္မံ ပဋိသေဝန္တောတိ အတ္ထော။ နိသဇ္ဇာယ ကာရေတဗ္ဗောတိ နိသဇ္ဇံ ပဋိဇာနိတ္ဝာ မေထုနဓမ္မပဋိသေဝနံ အပ္ပဋိဇာနန္တော မေထုနဓမ္မပာရာဇိကာပတ္တိယာ အကာရေတ္ဝာ နိသဇ္ဇာမတ္တေန ယံ အာပတ္တိံ အာပဇ္ဇတိ တာယ ကာရေတဗ္ဗော, ပာစိတ္တိယာပတ္တိယာ ကာရေတဗ္ဗောတိ အတ္ထော။ ဧတေန နယေန သဗ္ဗစတုက္ကေသု ဝိနိစ္ဆယော ဝေဒိတဗ္ဗော။
446. Ito paraṃ sā ce evaṃ vadeyyātiādi sabbaṃ paṭiññāya kāraṇākāradassanatthaṃ vuttaṃ, tattha mātugāmassa methunaṃ dhammaṃ paṭisevantoti mātugāmassa magge methunaṃ dhammaṃ paṭisevantoti attho. Nisajjāya kāretabboti nisajjaṃ paṭijānitvā methunadhammapaṭisevanaṃ appaṭijānanto methunadhammapārājikāpattiyā akāretvā nisajjāmattena yaṃ āpattiṃ āpajjati tāya kāretabbo, pācittiyāpattiyā kāretabboti attho. Etena nayena sabbacatukkesu vinicchayo veditabbo.
၄၅၁. သိက္ခာပဒပရိယောသာနေ ပန အာပတ္တာနာပတ္တိပရိစ္ဆေဒဒသ္သနတ္ထံ ဝုတ္တေသု ဂမနံ ပဋိဇာနာတီတိအာဒီသု ဂမနံ ပဋိဇာနာတီတိ ‘‘ရဟောနိသဇ္ဇသ္သာဒတ္ထံ ဂတောမ္ဟီ’’တိ ဧဝံ ဂမနံ ပဋိဇာနာတိ, နိသဇ္ဇန္တိ နိသဇ္ဇသ္သာဒေနေဝ နိသဇ္ဇံ ပဋိဇာနာတိ။ အာပတ္တိန္တိ တီသု အညတရံ အာပတ္တိံ။ အာပတ္တိယာ ကာရေတဗ္ဗောတိ တီသု ယံ ပဋိဇာနာတိ, တာယ ကာရေတဗ္ဗော။ သေသမေတ္ထ စတုက္ကေ ဥတ္တာနာဓိပ္ပာယမေဝ။ ဒုတိယစတုက္ကေ ပန ဂမနံ န ပဋိဇာနာတီတိ ရဟော နိသဇ္ဇသ္သာဒဝသေန န ပဋိဇာနာတိ , ‘‘သလာကဘတ္တာဒိနာ အတ္တနော ကမ္မေန ဂတောမ္ဟိ, သာ ပန မယ္ဟံ နိသိန္နဋ္ဌာနံ အာဂတာ’’တိ ဝဒတိ။ သေသမေတ္ထာပိ ဥတ္တာနာဓိပ္ပာယမေဝ။
451. Sikkhāpadapariyosāne pana āpattānāpattiparicchedadassanatthaṃ vuttesu gamanaṃ paṭijānātītiādīsu gamanaṃ paṭijānātīti ‘‘rahonisajjassādatthaṃ gatomhī’’ti evaṃ gamanaṃ paṭijānāti, nisajjanti nisajjassādeneva nisajjaṃ paṭijānāti. Āpattinti tīsu aññataraṃ āpattiṃ. Āpattiyā kāretabboti tīsu yaṃ paṭijānāti, tāya kāretabbo. Sesamettha catukke uttānādhippāyameva. Dutiyacatukke pana gamanaṃ na paṭijānātīti raho nisajjassādavasena na paṭijānāti , ‘‘salākabhattādinā attano kammena gatomhi, sā pana mayhaṃ nisinnaṭṭhānaṃ āgatā’’ti vadati. Sesametthāpi uttānādhippāyameva.
အယံ ပန သဗ္ဗတ္ထ ဝိနိစ္ဆယော – ရဟော နိသဇ္ဇသ္သာဒောတိ မေထုနဓမ္မသန္နိသ္သိတကိလေသော ဝုစ္စတိ။ ယော ဘိက္ခု တေနသ္သာဒေန မာတုဂာမသ္သ သန္တိကံ ဂန္တုကာမော အက္ခိံ အဉ္ဇေတိ, ဒုက္ကဋံ။ နိဝာသနံ နိဝာသေတိ, ကာယဗန္ဓနံ ဗန္ဓတိ, စီဝရံ ပာရုပတိ, သဗ္ဗတ္ထ ပယောဂေ ပယောဂေ ဒုက္ကဋံ။ ဂစ္ဆတိ, ပဒဝာရေ ပဒဝာရေ ဒုက္ကဋံ။ ဂန္တ္ဝာ နိသီဒတိ, ဒုက္ကဋမေဝ။ မာတုဂာမေ အာဂန္တ္ဝာ နိသိန္နမတ္တေ ပာစိတ္တိယံ။ သစေ သာ ဣတ္ထီ ကေနစိ ကရဏီယေန ဥဋ္ဌာယုဋ္ဌာယ ပုနပ္ပုနံ နိသီဒတိ, နိသဇ္ဇာယ နိသဇ္ဇာယ ပာစိတ္တိယံ။ ယံ သန္ဓာယ ဂတော, သာ န ဒိဋ္ဌာ, အညာ အာဂန္တ္ဝာ နိသီဒတိ, အသ္သာဒေ ဥပ္ပန္နေ ပာစိတ္တိယံ။ မဟာပစ္စရိယံ ပန ‘‘ဂမနကာလတော ပဋ္ဌာယ အသုဒ္ဓစိတ္တတ္တာ အာပတ္တိယေဝာ’’တိ ဝုတ္တံ။ သစေ သမ္ဗဟုလာ အာဂစ္ဆန္တိ, မာတုဂာမဂဏနာယ ပာစိတ္တိယာနိ။ သစေ ဥဋ္ဌာယုဋ္ဌာယ ပုနပ္ပုနံ နိသီဒန္တိ, နိသဇ္ဇာဂဏနာယ ပာစိတ္တိယာနိ။ အနိယမေတ္ဝာ ဒိဋ္ဌဒိဋ္ဌာယ သဒ္ဓိံ ရဟသ္သာဒံ ကပ္ပေသ္သာမီတိ ဂန္တ္ဝာ နိသိန္နသ္သာပိ အာဂတာဂတာနံ ဝသေန ပုနပ္ပုနံ နိသဇ္ဇာဝသေန စ ဝုတ္တနယေနေဝ အာပတ္တိယော ဝေဒိတဗ္ဗာ။ သစေ သုဒ္ဓစိတ္တေန ဂန္တ္ဝာ နိသိန္နသ္သ သန္တိကံ အာဂန္တ္ဝာ နိသိန္နာယ ဣတ္ထိယာ ရဟသ္သာဒော ဥပ္ပဇ္ဇတိ အနာပတ္တိ။
Ayaṃ pana sabbattha vinicchayo – raho nisajjassādoti methunadhammasannissitakileso vuccati. Yo bhikkhu tenassādena mātugāmassa santikaṃ gantukāmo akkhiṃ añjeti, dukkaṭaṃ. Nivāsanaṃ nivāseti, kāyabandhanaṃ bandhati, cīvaraṃ pārupati, sabbattha payoge payoge dukkaṭaṃ. Gacchati, padavāre padavāre dukkaṭaṃ. Gantvā nisīdati, dukkaṭameva. Mātugāme āgantvā nisinnamatte pācittiyaṃ. Sace sā itthī kenaci karaṇīyena uṭṭhāyuṭṭhāya punappunaṃ nisīdati, nisajjāya nisajjāya pācittiyaṃ. Yaṃ sandhāya gato, sā na diṭṭhā, aññā āgantvā nisīdati, assāde uppanne pācittiyaṃ. Mahāpaccariyaṃ pana ‘‘gamanakālato paṭṭhāya asuddhacittattā āpattiyevā’’ti vuttaṃ. Sace sambahulā āgacchanti, mātugāmagaṇanāya pācittiyāni. Sace uṭṭhāyuṭṭhāya punappunaṃ nisīdanti, nisajjāgaṇanāya pācittiyāni. Aniyametvā diṭṭhadiṭṭhāya saddhiṃ rahassādaṃ kappessāmīti gantvā nisinnassāpi āgatāgatānaṃ vasena punappunaṃ nisajjāvasena ca vuttanayeneva āpattiyo veditabbā. Sace suddhacittena gantvā nisinnassa santikaṃ āgantvā nisinnāya itthiyā rahassādo uppajjati anāpatti.
သမုဋ္ဌာနာဒီနိ ပဌမပာရာဇိကသဒိသာနေဝာတိ။
Samuṭṭhānādīni paṭhamapārājikasadisānevāti.
ပဌမအနိယတသိက္ခာပဒဝဏ္ဏနာ နိဋ္ဌိတာ။
Paṭhamaaniyatasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၁. ပဌမအနိယတသိက္ခာပဒံ • 1. Paṭhamaaniyatasikkhāpadaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၁. ပဌမအနိယတသိက္ခာပဒဝဏ္ဏနာ • 1. Paṭhamaaniyatasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၁. ပဌမအနိယတသိက္ခာပဒဝဏ္ဏနာ • 1. Paṭhamaaniyatasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ပဌမအနိယတသိက္ခာပဒဝဏ္ဏနာ • 1. Paṭhamaaniyatasikkhāpadavaṇṇanā
