| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. পঠমঅপুত্তকসুত্তং
9. Paṭhamaaputtakasuttaṃ
১৩০. সাৰত্থিনিদানং। অথ খো রাজা পসেনদি কোসলো দিৰা দিৰস্স যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো রাজানং পসেনদিং কোসলং ভগৰা এতদৰোচ – ‘‘হন্দ, কুতো নু ত্ৰং, মহারাজ, আগচ্ছসি দিৰা দিৰস্সা’’তি?
130. Sāvatthinidānaṃ. Atha kho rājā pasenadi kosalo divā divassa yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho rājānaṃ pasenadiṃ kosalaṃ bhagavā etadavoca – ‘‘handa, kuto nu tvaṃ, mahārāja, āgacchasi divā divassā’’ti?
‘‘ইধ, ভন্তে, সাৰত্থিযং সেট্ঠি গহপতি কালঙ্কতো। তমহং অপুত্তকং সাপতেয্যং রাজন্তেপুরং অতিহরিত্ৰা আগচ্ছামি। অসীতি, ভন্তে, সতসহস্সানি হিরঞ্ঞস্সেৰ, কো পন ৰাদো রূপিযস্স ! তস্স খো পন, ভন্তে, সেট্ঠিস্স গহপতিস্স এৰরূপো ভত্তভোগো অহোসি – কণাজকং ভুঞ্জতি বিলঙ্গদুতিযং। এৰরূপো ৰত্থভোগো অহোসি – সাণং ধারেতি তিপক্খৰসনং। এৰরূপো যানভোগো অহোসি – জজ্জররথকেন যাতি পণ্ণছত্তকেন ধারিযমানেনা’’তি।
‘‘Idha, bhante, sāvatthiyaṃ seṭṭhi gahapati kālaṅkato. Tamahaṃ aputtakaṃ sāpateyyaṃ rājantepuraṃ atiharitvā āgacchāmi. Asīti, bhante, satasahassāni hiraññasseva, ko pana vādo rūpiyassa ! Tassa kho pana, bhante, seṭṭhissa gahapatissa evarūpo bhattabhogo ahosi – kaṇājakaṃ bhuñjati bilaṅgadutiyaṃ. Evarūpo vatthabhogo ahosi – sāṇaṃ dhāreti tipakkhavasanaṃ. Evarūpo yānabhogo ahosi – jajjararathakena yāti paṇṇachattakena dhāriyamānenā’’ti.
‘‘এৰমেতং, মহারাজ, এৰমেতং, মহারাজ! অসপ্পুরিসো খো, মহারাজ, উল়ারে ভোগে লভিত্ৰা নেৰত্তানং সুখেতি পীণেতি, ন মাতাপিতরো সুখেতি পীণেতি, ন পুত্তদারং সুখেতি পীণেতি, ন দাসকম্মকরপোরিসে সুখেতি পীণেতি, ন মিত্তামচ্চে সুখেতি পীণেতি, ন সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং। তস্স তে ভোগে এৰং সম্মা অপরিভুঞ্জিযমানে 1 রাজানো ৰা হরন্তি চোরা ৰা হরন্তি অগ্গি ৰা ডহতি উদকং ৰা ৰহতি অপ্পিযা ৰা দাযাদা হরন্তি। এৰংস তে 2, মহারাজ, ভোগা সম্মা অপরিভুঞ্জিযমানা পরিক্খযং গচ্ছন্তি, নো পরিভোগং।
‘‘Evametaṃ, mahārāja, evametaṃ, mahārāja! Asappuriso kho, mahārāja, uḷāre bhoge labhitvā nevattānaṃ sukheti pīṇeti, na mātāpitaro sukheti pīṇeti, na puttadāraṃ sukheti pīṇeti, na dāsakammakaraporise sukheti pīṇeti, na mittāmacce sukheti pīṇeti, na samaṇabrāhmaṇesu uddhaggikaṃ dakkhiṇaṃ patiṭṭhāpeti sovaggikaṃ sukhavipākaṃ saggasaṃvattanikaṃ. Tassa te bhoge evaṃ sammā aparibhuñjiyamāne 3 rājāno vā haranti corā vā haranti aggi vā ḍahati udakaṃ vā vahati appiyā vā dāyādā haranti. Evaṃsa te 4, mahārāja, bhogā sammā aparibhuñjiyamānā parikkhayaṃ gacchanti, no paribhogaṃ.
‘‘সেয্যথাপি, মহারাজ, অমনুস্সট্ঠানে পোক্খরণী অচ্ছোদকা সীতোদকা সাতোদকা সেতোদকা সুপতিত্থা রমণীযা। তং জনো নেৰ হরেয্য ন পিৰেয্য ন নহাযেয্য ন যথাপচ্চযং ৰা করেয্য। এৰঞ্হি তং, মহারাজ, উদকং সম্মা অপরিভুঞ্জিযমানং 5 পরিক্খযং গচ্ছেয্য , নো পরিভোগং। এৰমেৰ খো, মহারাজ, অসপ্পুরিসো উল়ারে ভোগে লভিত্ৰা নেৰত্তানং সুখেতি পীণেতি, ন মাতাপিতরো সুখেতি পীণেতি, ন পুত্তদারং সুখেতি পীণেতি, ন দাসকম্মকরপোরিসে সুখেতি পীণেতি, ন মিত্তামচ্চে সুখেতি পীণেতি, ন সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং। তস্স তে ভোগে এৰং সম্মা অপরিভুঞ্জিযমানে রাজানো ৰা হরন্তি চোরা ৰা হরন্তি অগ্গি ৰা ডহতি উদকং ৰা ৰহতি অপ্পিযা ৰা দাযাদা হরন্তি। এৰংস তে 6, মহারাজ, ভোগা সম্মা অপরিভুঞ্জিযমানা পরিক্খযং গচ্ছন্তি, নো পরিভোগং।
‘‘Seyyathāpi, mahārāja, amanussaṭṭhāne pokkharaṇī acchodakā sītodakā sātodakā setodakā supatitthā ramaṇīyā. Taṃ jano neva hareyya na piveyya na nahāyeyya na yathāpaccayaṃ vā kareyya. Evañhi taṃ, mahārāja, udakaṃ sammā aparibhuñjiyamānaṃ 7 parikkhayaṃ gaccheyya , no paribhogaṃ. Evameva kho, mahārāja, asappuriso uḷāre bhoge labhitvā nevattānaṃ sukheti pīṇeti, na mātāpitaro sukheti pīṇeti, na puttadāraṃ sukheti pīṇeti, na dāsakammakaraporise sukheti pīṇeti, na mittāmacce sukheti pīṇeti, na samaṇabrāhmaṇesu uddhaggikaṃ dakkhiṇaṃ patiṭṭhāpeti sovaggikaṃ sukhavipākaṃ saggasaṃvattanikaṃ. Tassa te bhoge evaṃ sammā aparibhuñjiyamāne rājāno vā haranti corā vā haranti aggi vā ḍahati udakaṃ vā vahati appiyā vā dāyādā haranti. Evaṃsa te 8, mahārāja, bhogā sammā aparibhuñjiyamānā parikkhayaṃ gacchanti, no paribhogaṃ.
‘‘সপ্পুরিসো চ খো, মহারাজ, উল়ারে ভোগে লভিত্ৰা অত্তানং সুখেতি পীণেতি, মাতাপিতরো সুখেতি পীণেতি, পুত্তদারং সুখেতি পীণেতি, দাসকম্মকরপোরিসে সুখেতি পীণেতি, মিত্তামচ্চে সুখেতি পীণেতি, সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং। তস্স তে ভোগে এৰং সম্মা পরিভুঞ্জিযমানে নেৰ রাজানো হরন্তি , ন চোরা হরন্তি, ন অগ্গি ডহতি, ন উদকং ৰহতি, ন অপ্পিযা দাযাদা হরন্তি। এৰংস তে, মহারাজ, ভোগা সম্মা পরিভুঞ্জিযমানা পরিভোগং গচ্ছন্তি, নো পরিক্খযং।
‘‘Sappuriso ca kho, mahārāja, uḷāre bhoge labhitvā attānaṃ sukheti pīṇeti, mātāpitaro sukheti pīṇeti, puttadāraṃ sukheti pīṇeti, dāsakammakaraporise sukheti pīṇeti, mittāmacce sukheti pīṇeti, samaṇabrāhmaṇesu uddhaggikaṃ dakkhiṇaṃ patiṭṭhāpeti sovaggikaṃ sukhavipākaṃ saggasaṃvattanikaṃ. Tassa te bhoge evaṃ sammā paribhuñjiyamāne neva rājāno haranti , na corā haranti, na aggi ḍahati, na udakaṃ vahati, na appiyā dāyādā haranti. Evaṃsa te, mahārāja, bhogā sammā paribhuñjiyamānā paribhogaṃ gacchanti, no parikkhayaṃ.
‘‘সেয্যথাপি, মহারাজ, গামস্স ৰা নিগমস্স ৰা অৰিদূরে পোক্খরণী অচ্ছোদকা সীতোদকা সাতোদকা সেতোদকা সুপতিত্থা রমণীযা। তঞ্চ উদকং জনো হরেয্যপি পিৰেয্যপি নহাযেয্যপি যথাপচ্চযম্পি করেয্য। এৰঞ্হি তং, মহারাজ, উদকং সম্মা পরিভুঞ্জিযমানং পরিভোগং গচ্ছেয্য, নো পরিক্খযং। এৰমেৰ খো, মহারাজ, সপ্পুরিসো উল়ারে ভোগে লভিত্ৰা অত্তানং সুখেতি পীণেতি, মাতাপিতরো সুখেতি পীণেতি, পুত্তদারং সুখেতি পীণেতি, দাসকম্মকরপোরিসে সুখেতি পীণেতি, মিত্তামচ্চে সুখেতি পীণেতি, সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং। তস্স তে ভোগে এৰং সম্মা পরিভুঞ্জিযমানে নেৰ রাজানো হরন্তি, ন চোরা হরন্তি, ন অগ্গি ডহতি, ন উদকং ৰহতি, ন অপ্পিযা দাযাদা হরন্তি। এৰংস তে, মহারাজ, ভোগা সম্মা পরিভুঞ্জিযমানা পরিভোগং গচ্ছন্তি, নো পরিক্খয’’ন্তি।
‘‘Seyyathāpi, mahārāja, gāmassa vā nigamassa vā avidūre pokkharaṇī acchodakā sītodakā sātodakā setodakā supatitthā ramaṇīyā. Tañca udakaṃ jano hareyyapi piveyyapi nahāyeyyapi yathāpaccayampi kareyya. Evañhi taṃ, mahārāja, udakaṃ sammā paribhuñjiyamānaṃ paribhogaṃ gaccheyya, no parikkhayaṃ. Evameva kho, mahārāja, sappuriso uḷāre bhoge labhitvā attānaṃ sukheti pīṇeti, mātāpitaro sukheti pīṇeti, puttadāraṃ sukheti pīṇeti, dāsakammakaraporise sukheti pīṇeti, mittāmacce sukheti pīṇeti, samaṇabrāhmaṇesu uddhaggikaṃ dakkhiṇaṃ patiṭṭhāpeti sovaggikaṃ sukhavipākaṃ saggasaṃvattanikaṃ. Tassa te bhoge evaṃ sammā paribhuñjiyamāne neva rājāno haranti, na corā haranti, na aggi ḍahati, na udakaṃ vahati, na appiyā dāyādā haranti. Evaṃsa te, mahārāja, bhogā sammā paribhuñjiyamānā paribhogaṃ gacchanti, no parikkhaya’’nti.
‘‘অমনুস্সট্ঠানে উদকংৰ সীতং,
‘‘Amanussaṭṭhāne udakaṃva sītaṃ,
তদপেয্যমানং পরিসোসমেতি।
Tadapeyyamānaṃ parisosameti;
এৰং ধনং কাপুরিসো লভিত্ৰা,
Evaṃ dhanaṃ kāpuriso labhitvā,
নেৰত্তনা ভুঞ্জতি নো দদাতি॥
Nevattanā bhuñjati no dadāti.
ধীরো চ ৰিঞ্ঞূ অধিগম্ম ভোগে,
Dhīro ca viññū adhigamma bhoge,
সো ভুঞ্জতি কিচ্চকরো চ হোতি।
So bhuñjati kiccakaro ca hoti;
সো ঞাতিসঙ্ঘং নিসভো ভরিত্ৰা,
So ñātisaṅghaṃ nisabho bharitvā,
অনিন্দিতো সগ্গমুপেতি ঠান’’ন্তি॥
Anindito saggamupeti ṭhāna’’nti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. পঠমঅপুত্তকসুত্তৰণ্ণনা • 9. Paṭhamaaputtakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. পঠমঅপুত্তকসুত্তৰণ্ণনা • 9. Paṭhamaaputtakasuttavaṇṇanā
