| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৯. পঠমঅপুত্তকসুত্তৰণ্ণনা
9. Paṭhamaaputtakasuttavaṇṇanā
১৩০. নৰমে দিৰা দিৰস্সাতি দিৰসস্স দিৰা, মজ্ঝন্হিকসমযেতি অত্থো। সাপতেয্যন্তি ধনং। কো পন ৰাদো রূপিযস্সাতি সুৰণ্ণরজততম্বলোহকাল়লোহফালকচ্ছপকাদিভেদস্স ঘনকতস্স চেৰ পরিভোগভাজনাদিভেদস্স চ রূপিযভণ্ডস্স পন কো ৰাদো? ‘‘এত্তকং নামা’’তি কা পরিচ্ছেদকথাতি অত্থো। কণাজকন্তি সকুণ্ডকভত্তং। বিলঙ্গদুতিযন্তি কঞ্জিকদুতিযং। সাণন্তি সাণৰাকমযং । তিপক্খৰসনন্তি তীণি খণ্ডানি দ্ৰীসু ঠানেসু সিব্বিত্ৰা কতনিৰাসনং।
130. Navame divā divassāti divasassa divā, majjhanhikasamayeti attho. Sāpateyyanti dhanaṃ. Ko pana vādo rūpiyassāti suvaṇṇarajatatambalohakāḷalohaphālakacchapakādibhedassa ghanakatassa ceva paribhogabhājanādibhedassa ca rūpiyabhaṇḍassa pana ko vādo? ‘‘Ettakaṃ nāmā’’ti kā paricchedakathāti attho. Kaṇājakanti sakuṇḍakabhattaṃ. Bilaṅgadutiyanti kañjikadutiyaṃ. Sāṇanti sāṇavākamayaṃ . Tipakkhavasananti tīṇi khaṇḍāni dvīsu ṭhānesu sibbitvā katanivāsanaṃ.
অসপ্পুরিসোতি লামকপুরিসো। উদ্ধগ্গিকন্তিআদীসু উপরূপরিভূমীসু ফলদানৰসেন উদ্ধং অগ্গমস্সাতি উদ্ধগ্গিকা। সগ্গস্স হিতা তত্রুপপত্তিজননতোতি সোৰগ্গিকা। নিব্বত্তট্ঠানেসু সুখো ৰিপাকো অস্সাতি সুখৰিপাকা। সুট্ঠু অগ্গানং দিব্বৰণ্ণাদীনং ৰিসেসানং নিব্বত্তনতো সগ্গসংৰত্তনিকা। এৰরূপং দক্খিণদানং ন পতিট্ঠাপেতীতি।
Asappurisoti lāmakapuriso. Uddhaggikantiādīsu uparūparibhūmīsu phaladānavasena uddhaṃ aggamassāti uddhaggikā. Saggassa hitā tatrupapattijananatoti sovaggikā. Nibbattaṭṭhānesu sukho vipāko assāti sukhavipākā. Suṭṭhu aggānaṃ dibbavaṇṇādīnaṃ visesānaṃ nibbattanato saggasaṃvattanikā. Evarūpaṃ dakkhiṇadānaṃ na patiṭṭhāpetīti.
সাতোদকাতি মধুরোদকা। সেত্তোদকাতি ৰীচীনং ভিন্নট্ঠানে উদকস্স সেততায সেতোদকা। সুপতিত্থাতি সুন্দরতিত্থা। তং জনোতি যেন উদকেন সাতোদকা, তং উদকং জনো ভাজনানি পূরেত্ৰা নেৰ হরেয্য। ন যথাপচ্চযং ৰা করেয্যাতি, যং যং উদকেন উদককিচ্চং কাতব্বং, তং তং ন করেয্য। তদপেয্যমানন্তি তং অপেয্যমানং। কিচ্চকরো চ হোতীতি অত্তনা কত্তব্বকিচ্চকরো চেৰ কুসলকিচ্চকরো চ, ভুঞ্জতি চ, কম্মন্তে চ পযোজেতি, দানঞ্চ দেতীতি অত্থো। নৰমং।
Sātodakāti madhurodakā. Settodakāti vīcīnaṃ bhinnaṭṭhāne udakassa setatāya setodakā. Supatitthāti sundaratitthā. Taṃ janoti yena udakena sātodakā, taṃ udakaṃ jano bhājanāni pūretvā neva hareyya. Na yathāpaccayaṃ vā kareyyāti, yaṃ yaṃ udakena udakakiccaṃ kātabbaṃ, taṃ taṃ na kareyya. Tadapeyyamānanti taṃ apeyyamānaṃ. Kiccakaro ca hotīti attanā kattabbakiccakaro ceva kusalakiccakaro ca, bhuñjati ca, kammante ca payojeti, dānañca detīti attho. Navamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৯. পঠমঅপুত্তকসুত্তং • 9. Paṭhamaaputtakasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. পঠমঅপুত্তকসুত্তৰণ্ণনা • 9. Paṭhamaaputtakasuttavaṇṇanā
