| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯. পঠমঅপুত্তকসুত্তৰণ্ণনা
9. Paṭhamaaputtakasuttavaṇṇanā
১৩০. দিৰ-সদ্দো দিৰা-সদ্দো ৰিয দিৰসপরিযাযো, তস্মা ৰিসেসনভাৰেন ৰুচ্চমানো দিৰসদ্দো অত্থৰিসেসং দীপেতীতি আহ ‘‘দিৰসস্স দিৰা’’তিআদি। সং ৰুচ্চতি ধনং, তস্স পতীতি সম্পতি, ধনসামিকো, তস্স হিতাৰহত্তা সাপতেয্যন্তি আহ ‘‘সাপতেয্যন্তি ধন’’ন্তি। তস্স গেহে কতাকতভণ্ডস্স অতিবহুভাৰতো ৰিম্হযপ্পত্তো রাজা ‘‘কো পন ৰাদো’’তি আহ। কাল়লোহং নাম অযোফলং। কচ্ছপাদিরূপেহিপি সোৰণ্ণাদীনি ঠপেন্তি। সকুণ্ডকভত্তন্তি সকুণ্ডেহি ৰা সথুসেহি ৰা পক্কভত্তং। বিলঙ্গং ৰুচ্চতি ধঞ্ঞবিলঙ্গং, আরনালন্তিপি ৰুচ্চতি, তং দুতিযং অস্সাতি বিলঙ্গদুতিযং। তঞ্হি কঞ্জিতো নিব্বত্তত্তা কঞ্জিকং নাম। তীহি পক্খেহি ৰত্থখণ্ডেহি কতনিৰাসনং তিপক্খৰসনং। তেনাহ ‘‘তীণি…পে॰… নিৰাসন’’ন্তি।
130. Diva-saddo divā-saddo viya divasapariyāyo, tasmā visesanabhāvena vuccamāno divasaddo atthavisesaṃ dīpetīti āha ‘‘divasassa divā’’tiādi. Saṃ vuccati dhanaṃ, tassa patīti sampati, dhanasāmiko, tassa hitāvahattā sāpateyyanti āha ‘‘sāpateyyanti dhana’’nti. Tassa gehe katākatabhaṇḍassa atibahubhāvato vimhayappatto rājā ‘‘ko pana vādo’’ti āha. Kāḷalohaṃ nāma ayophalaṃ. Kacchapādirūpehipi sovaṇṇādīni ṭhapenti. Sakuṇḍakabhattanti sakuṇḍehi vā sathusehi vā pakkabhattaṃ. Bilaṅgaṃ vuccati dhaññabilaṅgaṃ, āranālantipi vuccati, taṃ dutiyaṃ assāti bilaṅgadutiyaṃ. Tañhi kañjito nibbattattā kañjikaṃ nāma. Tīhi pakkhehi vatthakhaṇḍehi katanivāsanaṃ tipakkhavasanaṃ. Tenāha ‘‘tīṇi…pe… nivāsana’’nti.
অসন্তো নীচো পুরিসোতি অসপ্পুরিসোতি আহ ‘‘লামকপুরিসো’’তি। কম্মস্স নিব্বত্তভাৰেন ওতরণতায ফলং অগ্গং নাম, উপরিভূমিগতত্তা উদ্ধং অগ্গং অস্সাতি উদ্ধগ্গিকং। দক্খিণন্তি দানমাহ। সগ্গো নাম কামভৰূপপত্তিভৰো, তস্স নিব্বত্তনতো ‘‘সগ্গস্স হিতা’’তি ৰুত্তং। তত্রুপপত্তিজননতোতি তত্র উপপত্তিযা জননতো, উপ্পাদনতোতি অত্থো।
Asanto nīco purisoti asappurisoti āha ‘‘lāmakapuriso’’ti. Kammassa nibbattabhāvena otaraṇatāya phalaṃ aggaṃ nāma, uparibhūmigatattā uddhaṃ aggaṃ assāti uddhaggikaṃ. Dakkhiṇanti dānamāha. Saggo nāma kāmabhavūpapattibhavo, tassa nibbattanato ‘‘saggassa hitā’’ti vuttaṃ. Tatrupapattijananatoti tatra upapattiyā jananato, uppādanatoti attho.
সেতং উদকং এতিস্সাতি সেতোদকা। সো যেন ভাৰেন যত্থ পাকটতরো হুত্ৰা দিস্সতি, তং দস্সেতুং ‘‘ৰীচীনং ভিন্নট্ঠানে’’তি আহ। সুখোতরণট্ঠানতায কদ্দমাদিদোসৰিরহতো চ সুন্দরতিত্থা। তং অপেয্যমানন্তি তং উদকং কেনচি অপরিভুঞ্জিযমানং। অত্তনা কত্তব্বকিচ্চকরোতি অত্তনা কাতব্বকম্মসঙ্খাতকিচ্চকরো, পরিভোগৰসেন চেৰ সঙ্গহেতব্বসঙ্গণ্হনৰসেন চ নিযোজকোতি অত্থো। কুসলকিচ্চকরোতি অত্তনা কাতব্বপুঞ্ঞকরো।
Setaṃ udakaṃ etissāti setodakā. So yena bhāvena yattha pākaṭataro hutvā dissati, taṃ dassetuṃ ‘‘vīcīnaṃ bhinnaṭṭhāne’’ti āha. Sukhotaraṇaṭṭhānatāya kaddamādidosavirahato ca sundaratitthā. Taṃ apeyyamānanti taṃ udakaṃ kenaci aparibhuñjiyamānaṃ. Attanā kattabbakiccakaroti attanā kātabbakammasaṅkhātakiccakaro, paribhogavasena ceva saṅgahetabbasaṅgaṇhanavasena ca niyojakoti attho. Kusalakiccakaroti attanā kātabbapuññakaro.
পঠমঅপুত্তকসুত্তৰণ্ণনা নিট্ঠিতা।
Paṭhamaaputtakasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৯. পঠমঅপুত্তকসুত্তং • 9. Paṭhamaaputtakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. পঠমঅপুত্তকসুত্তৰণ্ণনা • 9. Paṭhamaaputtakasuttavaṇṇanā
