| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. පඨමඅවිජ්‌ජාපහානසුත්‌තං
6. Paṭhamaavijjāpahānasuttaṃ
79. අථ ඛො අඤ්‌ඤතරො භික්‌ඛු යෙන භගවා තෙනුපසඞ්‌කමි…පෙ.… එකමන්‌තං නිසින්‌නො ඛො සො භික්‌ඛු භගවන්‌තං එතදවොච – ‘‘අත්‌ථි නු ඛො, භන්‌තෙ, එකො ධම්‌මො යස්‌ස පහානා භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති?
79. Atha kho aññataro bhikkhu yena bhagavā tenupasaṅkami…pe… ekamantaṃ nisinno kho so bhikkhu bhagavantaṃ etadavoca – ‘‘atthi nu kho, bhante, eko dhammo yassa pahānā bhikkhuno avijjā pahīyati, vijjā uppajjatī’’ti?
‘‘අත්‌ථි ඛො, භික්‌ඛු, එකො ධම්‌මො යස්‌ස පහානා භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති.
‘‘Atthi kho, bhikkhu, eko dhammo yassa pahānā bhikkhuno avijjā pahīyati, vijjā uppajjatī’’ti.
‘‘කතමො පන, භන්‌තෙ, එකො ධම්‌මො යස්‌ස පහානා භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති?
‘‘Katamo pana, bhante, eko dhammo yassa pahānā bhikkhuno avijjā pahīyati, vijjā uppajjatī’’ti?
‘‘අවිජ්‌ජා ඛො, භික්‌ඛු, එකො ධම්‌මො යස්‌ස පහානා භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති.
‘‘Avijjā kho, bhikkhu, eko dhammo yassa pahānā bhikkhuno avijjā pahīyati, vijjā uppajjatī’’ti.
‘‘කථං පන, භන්‌තෙ, ජානතො, කථං පස්‌සතො භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති?
‘‘Kathaṃ pana, bhante, jānato, kathaṃ passato bhikkhuno avijjā pahīyati, vijjā uppajjatī’’ti?
‘‘චක්‌ඛුං ඛො, භික්‌ඛු, අනිච්‌චතො ජානතො පස්‌සතො භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජති. රූපෙ… චක්‌ඛුවිඤ්‌ඤාණං… චක්‌ඛුසම්‌ඵස්‌සං… යම්‌පිදං, චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චතො ජානතො පස්‌සතො භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජති…පෙ.… මනං අනිච්‌චතො ජානතො පස්‌සතො භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජති. ධම්‌මෙ… මනොවිඤ්‌ඤාණං… මනොසම්‌ඵස්‌සං… යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චතො ජානතො පස්‌සතො භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජති. එවං ඛො, භික්‌ඛු, ජානතො එවං පස්‌සතො භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති. ඡට්‌ඨං.
‘‘Cakkhuṃ kho, bhikkhu, aniccato jānato passato bhikkhuno avijjā pahīyati, vijjā uppajjati. Rūpe… cakkhuviññāṇaṃ… cakkhusamphassaṃ… yampidaṃ, cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccato jānato passato bhikkhuno avijjā pahīyati, vijjā uppajjati…pe… manaṃ aniccato jānato passato bhikkhuno avijjā pahīyati, vijjā uppajjati. Dhamme… manoviññāṇaṃ… manosamphassaṃ… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccato jānato passato bhikkhuno avijjā pahīyati, vijjā uppajjati. Evaṃ kho, bhikkhu, jānato evaṃ passato bhikkhuno avijjā pahīyati, vijjā uppajjatī’’ti. Chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. පඨමඅවිජ්‌ජාපහානසුත්‌තවණ්‌ණනා • 6. Paṭhamaavijjāpahānasuttavaṇṇanā
