| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
९. पठमआयुसुत्तं
9. Paṭhamaāyusuttaṃ
१४५. एवं मे सुतं – एकं समयं भगवा राजगहे विहरति वेळुवने कलन्दकनिवापे। तत्र खो भगवा भिक्खू आमन्तेसि – ‘‘भिक्खवो’’ति। ‘‘भदन्ते’’ति ते भिक्खू भगवतो पच्चस्सोसुं। भगवा एतदवोच –
145. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘अप्पमिदं, भिक्खवे, मनुस्सानं आयु। गमनीयो सम्परायो, कत्तब्बं कुसलं, चरितब्बं ब्रह्मचरियं। नत्थि जातस्स अमरणं। यो, भिक्खवे, चिरं जीवति, सो वस्ससतं अप्पं वा भिय्यो’’ति।
‘‘Appamidaṃ, bhikkhave, manussānaṃ āyu. Gamanīyo samparāyo, kattabbaṃ kusalaṃ, caritabbaṃ brahmacariyaṃ. Natthi jātassa amaraṇaṃ. Yo, bhikkhave, ciraṃ jīvati, so vassasataṃ appaṃ vā bhiyyo’’ti.
अथ खो मारो पापिमा येन भगवा तेनुपसङ्कमि; उपसङ्कमित्वा भगवन्तं गाथाय अज्झभासि –
Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘दीघमायु मनुस्सानं, न नं हीळे सुपोरिसो।
‘‘Dīghamāyu manussānaṃ, na naṃ hīḷe suporiso;
चरेय्य खीरमत्तोव, नत्थि मच्चुस्स आगमो’’ति॥
Careyya khīramattova, natthi maccussa āgamo’’ti.
‘‘अप्पमायु मनुस्सानं, हीळेय्य नं सुपोरिसो।
‘‘Appamāyu manussānaṃ, hīḷeyya naṃ suporiso;
चरेय्यादित्तसीसोव, नत्थि मच्चुस्स नागमो’’ति॥
Careyyādittasīsova, natthi maccussa nāgamo’’ti.
अथ खो मारो…पे॰… तत्थेवन्तरधायीति।
Atha kho māro…pe… tatthevantaradhāyīti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ९. पठमआयुसुत्तवण्णना • 9. Paṭhamaāyusuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ९. पठमआयुसुत्तवण्णना • 9. Paṭhamaāyusuttavaṇṇanā
