| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. පඨමආයුසුත්‌තං
9. Paṭhamaāyusuttaṃ
145. එවං මෙ සුතං – එකං සමයං භගවා රාජගහෙ විහරති වෙළුවනෙ කලන්‌දකනිවාපෙ. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච –
145. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘අප්‌පමිදං, භික්‌ඛවෙ, මනුස්‌සානං ආයු. ගමනීයො සම්‌පරායො, කත්‌තබ්‌බං කුසලං, චරිතබ්‌බං බ්‍රහ්‌මචරියං. නත්‌ථි ජාතස්‌ස අමරණං. යො, භික්‌ඛවෙ, චිරං ජීවති, සො වස්‌සසතං අප්‌පං වා භිය්‍යො’’ති.
‘‘Appamidaṃ, bhikkhave, manussānaṃ āyu. Gamanīyo samparāyo, kattabbaṃ kusalaṃ, caritabbaṃ brahmacariyaṃ. Natthi jātassa amaraṇaṃ. Yo, bhikkhave, ciraṃ jīvati, so vassasataṃ appaṃ vā bhiyyo’’ti.
අථ ඛො මාරො පාපිමා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං ගාථාය අජ්‌ඣභාසි –
Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘දීඝමායු මනුස්‌සානං, න නං හීළෙ සුපොරිසො;
‘‘Dīghamāyu manussānaṃ, na naṃ hīḷe suporiso;
චරෙය්‍ය ඛීරමත්‌තොව, නත්‌ථි මච්‌චුස්‌ස ආගමො’’ති.
Careyya khīramattova, natthi maccussa āgamo’’ti.
‘‘අප්‌පමායු මනුස්‌සානං, හීළෙය්‍ය නං සුපොරිසො;
‘‘Appamāyu manussānaṃ, hīḷeyya naṃ suporiso;
චරෙය්‍යාදිත්‌තසීසොව, නත්‌ථි මච්‌චුස්‌ස නාගමො’’ති.
Careyyādittasīsova, natthi maccussa nāgamo’’ti.
අථ ඛො මාරො…පෙ.… තත්‌ථෙවන්‌තරධායීති.
Atha kho māro…pe… tatthevantaradhāyīti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. පඨමආයුසුත්‌තවණ්‌ණනා • 9. Paṭhamaāyusuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. පඨමආයුසුත්‌තවණ්‌ණනා • 9. Paṭhamaāyusuttavaṇṇanā
