| Library / Tipiṭaka / д̇ибидага • Tipiṭaka / жуул̣аваг̇г̇абаал̣и • Cūḷavaggapāḷi |
12. сад̇д̇асад̇игагканд̇хагам̣
12. Sattasatikakkhandhakaṃ
1. батамабхаан̣авааро
1. Paṭhamabhāṇavāro
446. д̇зна ко бана самаязна вассасад̇абариниб̣б̣уд̇з бхаг̇авад̇и взсаалигаа важ̇ж̇ибуд̇д̇агаа бхигкуу взсаалияам̣ д̣̇аса вад̇т̇ууни д̣̇ийбзнд̇и – габбад̇и син̇г̇илон̣агаббо, габбад̇и д̣̇ван̇г̇улагаббо, габбад̇и г̇ааманд̇арагаббо, габбад̇и ааваасагаббо, габбад̇и анумад̇игаббо, габбад̇и аажин̣н̣агаббо, габбад̇и амат̇ид̇агаббо, габбад̇и ж̇ал̣ог̇им̣ баад̇ум̣, габбад̇и ад̣̇асагам̣ нисийд̣̇анам̣, габбад̇и ж̇аад̇аруубараж̇ад̇анд̇и.
446. Tena kho pana samayena vassasataparinibbute bhagavati vesālikā vajjiputtakā bhikkhū vesāliyaṃ dasa vatthūni dīpenti – kappati siṅgiloṇakappo, kappati dvaṅgulakappo, kappati gāmantarakappo, kappati āvāsakappo, kappati anumatikappo, kappati āciṇṇakappo, kappati amathitakappo, kappati jaḷogiṃ pātuṃ, kappati adasakaṃ nisīdanaṃ, kappati jātarūparajatanti.
д̇зна ко бана самаязна ааяасмаа яасо гааган̣д̣агабуд̇д̇о важ̇ж̇ийсу жааригам̣ жарамаано язна взсаалий д̇ад̣̇авасари. д̇ад̇ра суд̣̇ам̣ ааяасмаа яасо гааган̣д̣агабуд̇д̇о взсаалияам̣ вихарад̇и махааванз гуудааг̇аарасаалааяам̣. д̇зна ко бана самаязна взсаалигаа важ̇ж̇ибуд̇д̇агаа бхигкуу д̇ад̣̇ахубосат̇з гам̣сабаад̇им̣ 1 уд̣̇агзна буурзд̇ваа маж̇жхз бхигкусан̇гхасса табзд̇ваа ааг̇ад̇ааг̇ад̇з взсаалигз убаасагз звам̣ вад̣̇анд̇и – ‘‘д̣̇зт̇аавусо, сан̇гхасса гахаабан̣амби ад̣дхамби баад̣̇амби маасагаруубамби. бхависсад̇и сан̇гхасса баригкаарзна гаран̣ийяа’’нд̇и. звам̣ вуд̇д̇з ааяасмаа яасо гааган̣д̣агабуд̇д̇о взсаалигз убаасагз зд̇ад̣̇авожа – ‘‘маавусо, ад̣̇ад̇т̇а сан̇гхасса гахаабан̣амби ад̣дхамби баад̣̇амби маасагаруубамби. на габбад̇и саман̣аанам̣ сагяабуд̇д̇ияаанам̣ ж̇аад̇аруубараж̇ад̇ам̣; на саад̣̇ияанд̇и саман̣аа сагяабуд̇д̇ияаа ж̇аад̇аруубараж̇ад̇ам̣; на бадиг̇г̇ан̣ханд̇и саман̣аа сагяабуд̇д̇ияаа ж̇аад̇аруубараж̇ад̇ам̣; нигкид̇д̇аман̣исуван̣н̣аа саман̣аа сагяабуд̇д̇ияаа абзд̇аж̇аад̇аруубараж̇ад̇аа’’д̇и. звамби ко взсаалигаа убаасагаа ааяасмад̇аа яасзна гааган̣д̣агабуд̇д̇зна вужжамаанаа ад̣̇ам̣суязва сан̇гхасса гахаабан̣амби ад̣дхамби баад̣̇амби маасагаруубамби.
Tena kho pana samayena āyasmā yaso kākaṇḍakaputto vajjīsu cārikaṃ caramāno yena vesālī tadavasari. Tatra sudaṃ āyasmā yaso kākaṇḍakaputto vesāliyaṃ viharati mahāvane kūṭāgārasālāyaṃ. Tena kho pana samayena vesālikā vajjiputtakā bhikkhū tadahuposathe kaṃsapātiṃ 2 udakena pūretvā majjhe bhikkhusaṅghassa ṭhapetvā āgatāgate vesālike upāsake evaṃ vadanti – ‘‘dethāvuso, saṅghassa kahāpaṇampi aḍḍhampi pādampi māsakarūpampi. Bhavissati saṅghassa parikkhārena karaṇīya’’nti. Evaṃ vutte āyasmā yaso kākaṇḍakaputto vesālike upāsake etadavoca – ‘‘māvuso, adattha saṅghassa kahāpaṇampi aḍḍhampi pādampi māsakarūpampi. Na kappati samaṇānaṃ sakyaputtiyānaṃ jātarūparajataṃ; na sādiyanti samaṇā sakyaputtiyā jātarūparajataṃ; na paṭiggaṇhanti samaṇā sakyaputtiyā jātarūparajataṃ; nikkhittamaṇisuvaṇṇā samaṇā sakyaputtiyā apetajātarūparajatā’’ti. Evampi kho vesālikā upāsakā āyasmatā yasena kākaṇḍakaputtena vuccamānā adaṃsuyeva saṅghassa kahāpaṇampi aḍḍhampi pādampi māsakarūpampi.
ат̇а ко взсаалигаа важ̇ж̇ибуд̇д̇агаа бхигкуу д̇ассаа рад̇д̇ияаа ажжаязна д̇ам̣ хиран̃н̃ам̣ бхигкаг̇г̇зна 3 бадивийсам̣ 4 табзд̇ваа бхааж̇зсум̣. ат̇а ко взсаалигаа важ̇ж̇ибуд̇д̇агаа бхигкуу ааяасманд̇ам̣ яасам̣ гааган̣д̣агабуд̇д̇ам̣ зд̇ад̣̇авожум̣ – ‘‘зсо д̇з, аавусо яаса, хиран̃н̃асса бадивийсо’’д̇и. ‘‘над̇т̇и, мз аавусо, хиран̃н̃асса бадивийсо, наахам̣ хиран̃н̃ам̣ саад̣̇ияаамий’’д̇и. ат̇а ко взсаалигаа важ̇ж̇ибуд̇д̇агаа бхигкуу – ‘‘аяам̣ аавусо яасо гааган̣д̣агабуд̇д̇о убаасагз сад̣̇д̇хз басаннз аггосад̇и, барибхаасад̇и, аббасаад̣̇ам̣ гарод̇и; ханд̣̇асса маяам̣ бадисааран̣ийяагаммам̣ гаромаа’’д̇и д̇з. д̇асса бадисааран̣ийяагаммам̣ агам̣су. ат̇а ко ааяасмаа яасо гааган̣д̣агабуд̇д̇о взсаалигз важ̇ж̇ибуд̇д̇агз бхигкуу зд̇ад̣̇авожа – ‘‘бхаг̇авад̇аа, аавусо, бан̃н̃ад̇д̇ам̣ – ‘бадисааран̣ийяагаммагад̇асса бхигкуно ануд̣̇ууд̇о д̣̇аад̇аб̣б̣о’д̇и. д̣̇зт̇а мз, аавусо, ануд̣̇ууд̇ам̣ бхигку’’нд̇и.
Atha kho vesālikā vajjiputtakā bhikkhū tassā rattiyā accayena taṃ hiraññaṃ bhikkhaggena 5 paṭivīsaṃ 6 ṭhapetvā bhājesuṃ. Atha kho vesālikā vajjiputtakā bhikkhū āyasmantaṃ yasaṃ kākaṇḍakaputtaṃ etadavocuṃ – ‘‘eso te, āvuso yasa, hiraññassa paṭivīso’’ti. ‘‘Natthi, me āvuso, hiraññassa paṭivīso, nāhaṃ hiraññaṃ sādiyāmī’’ti. Atha kho vesālikā vajjiputtakā bhikkhū – ‘‘ayaṃ āvuso yaso kākaṇḍakaputto upāsake saddhe pasanne akkosati, paribhāsati, appasādaṃ karoti; handassa mayaṃ paṭisāraṇīyakammaṃ karomā’’ti te. Tassa paṭisāraṇīyakammaṃ akaṃsu. Atha kho āyasmā yaso kākaṇḍakaputto vesālike vajjiputtake bhikkhū etadavoca – ‘‘bhagavatā, āvuso, paññattaṃ – ‘paṭisāraṇīyakammakatassa bhikkhuno anudūto dātabbo’ti. Detha me, āvuso, anudūtaṃ bhikkhu’’nti.
ат̇а ко взсаалигаа важ̇ж̇ибуд̇д̇агаа бхигкуу згам̣ бхигкум̣ самманнид̇ваа ааяасмад̇о яасасса гааган̣д̣агабуд̇д̇асса ануд̣̇ууд̇ам̣ ад̣̇ам̣су. ат̇а ко ааяасмаа яасо гааган̣д̣агабуд̇д̇о ануд̣̇ууд̇зна бхигкунаа сад̣̇д̇хим̣ взсаалим̣ бависид̇ваа взсаалигз убаасагз зд̇ад̣̇авожа – ‘‘ахам̣ гирааяасманд̇з убаасагз сад̣̇д̇хз басаннз аггосаами, барибхаасаами, аббасаад̣̇ам̣ гароми; яохам̣ ад̇хаммам̣ ад̇хаммод̇и вад̣̇аами, д̇хаммам̣ д̇хаммод̇и вад̣̇аами, авинаяам̣ авинаяод̇и вад̣̇аами, винаяам̣ винаяод̇и вад̣̇аами.
Atha kho vesālikā vajjiputtakā bhikkhū ekaṃ bhikkhuṃ sammannitvā āyasmato yasassa kākaṇḍakaputtassa anudūtaṃ adaṃsu. Atha kho āyasmā yaso kākaṇḍakaputto anudūtena bhikkhunā saddhiṃ vesāliṃ pavisitvā vesālike upāsake etadavoca – ‘‘ahaṃ kirāyasmante upāsake saddhe pasanne akkosāmi, paribhāsāmi, appasādaṃ karomi; yohaṃ adhammaṃ adhammoti vadāmi, dhammaṃ dhammoti vadāmi, avinayaṃ avinayoti vadāmi, vinayaṃ vinayoti vadāmi.
447. ‘‘згамид̣̇ам̣, аавусо, самаяам̣ бхаг̇аваа саавад̇т̇ияам̣ вихарад̇и ж̇зд̇аванз анаат̇абин̣д̣игасса аараамз. д̇ад̇ра ко, аавусо, бхаг̇аваа бхигкуу ааманд̇зси – 7 ‘жад̇д̇ааромз, бхигкавз, жанд̣̇имасуурияаанам̣ убаггилзсаа, язхи убаггилзсзхи убаггилидтаа жанд̣̇имасуурияаа на д̇абанд̇и, на бхаасанд̇и, на вирожанд̇и. гад̇амз жад̇д̇ааро? аб̣бхам̣, бхигкавз, жанд̣̇имасуурияаанам̣ убаггилзсо, язна убаггилзсзна убаггилидтаа жанд̣̇имасуурияаа на д̇абанд̇и, на бхаасанд̇и на вирожанд̇и. махигаа, бхигкавз, жанд̣̇имасуурияаанам̣ убаггилзсо, язна убаггилзсзна убаггилидтаа жанд̣̇имасуурияаа на д̇абанд̇и, на бхаасанд̇и, на вирожанд̇и, д̇хуумараж̇о, бхигкавз, жанд̣̇имасуурияаанам̣ убаггилзсо, язна убаггилзсзна убаггилидтаа жанд̣̇имасуурияаа на д̇абанд̇и, на бхаасанд̇и, на вирожанд̇и. рааху, бхигкавз, асуринд̣̇о жанд̣̇имасуурияаанам̣ убаггилзсо, язна убаггилзсзна убаггилидтаа жанд̣̇имасуурияаа на д̇абанд̇и, на бхаасанд̇и, на вирожанд̇и. имз ко, бхигкавз, жад̇д̇ааро жанд̣̇имасуурияаанам̣ убаггилзсаа, язхи убаггилзсзхи убаггилидтаа жанд̣̇имасуурияаа на д̇абанд̇и, на бхаасанд̇и, на вирожанд̇и. звамзва ко, бхигкавз, жад̇д̇ааромз саман̣аб̣раахман̣аанам̣ убаггилзсаа, язхи убаггилзсзхи убаггилидтаа згз саман̣аб̣раахман̣аа на д̇абанд̇и, на бхаасанд̇и, на вирожанд̇и. гад̇амз жад̇д̇ааро? санд̇и, бхигкавз, згз саман̣аб̣раахман̣аа сурам̣ биванд̇и, мзраяам̣ биванд̇и, сураамзраяабаанаа аббадивирад̇аа – аяам̣, бхигкавз, батамо саман̣аб̣раахман̣аанам̣ убаггилзсо, язна убаггилзсзна убаггилидтаа згз саман̣аб̣раахман̣аа на д̇абанд̇и, на бхаасанд̇и, на вирожанд̇и. буна жабарам̣, бхигкавз, згз саман̣аб̣раахман̣аа мзт̇унам̣ д̇хаммам̣ бадисзванд̇и, мзт̇унад̇хаммаа аббадивирад̇аа – аяам̣, бхигкавз, д̣̇уд̇ияо саман̣аб̣раахман̣аанам̣ убаггилзсо, язна убаггилзсзна убаггилидтаа згз саман̣аб̣раахман̣аа на д̇абанд̇и, на бхаасанд̇и, на вирожанд̇и. буна жабарам̣, бхигкавз, згз саман̣аб̣раахман̣аа ж̇аад̇аруубараж̇ад̇ам̣ саад̣̇ияанд̇и, ж̇аад̇аруубараж̇ад̇аббадиг̇г̇ахан̣аа аббадивирад̇аа – аяам̣, бхигкавз, д̇ад̇ияо саман̣аб̣раахман̣аанам̣ убаггилзсо, язна убаггилзсзна убаггилидтаа згз саман̣аб̣раахман̣аа на д̇абанд̇и, на бхаасанд̇и, на вирожанд̇и. буна жабарам̣, бхигкавз, згз саман̣аб̣раахман̣аа мижчааж̇ийвзна ж̇ийвид̇ам̣ габбзнд̇и; мижчааж̇ийваа аббадивирад̇аа – аяам̣, бхигкавз, жад̇уд̇т̇о саман̣аб̣раахман̣аанам̣ убаггилзсо, язна убаггилзсзна убаггилидтаа згз саман̣аб̣раахман̣аа на д̇абанд̇и, на бхаасанд̇и, на вирожанд̇и. имз ко, бхигкавз, жад̇д̇ааро саман̣аб̣раахман̣аанам̣ убаггилзсаа, язхи убаггилзсзхи убаггилидтаа згз саман̣аб̣раахман̣аа на д̇абанд̇и, на бхаасанд̇и , на вирожанд̇и’. ‘‘ид̣̇амавожаавусо, бхаг̇аваа. ид̣̇ам̣ вад̇ваана суг̇ад̇о ат̇аабарам̣ зд̇ад̣̇авожа сад̇т̇аа –
447. ‘‘Ekamidaṃ, āvuso, samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho, āvuso, bhagavā bhikkhū āmantesi – 8 ‘cattārome, bhikkhave, candimasūriyānaṃ upakkilesā, yehi upakkilesehi upakkiliṭṭhā candimasūriyā na tapanti, na bhāsanti, na virocanti. Katame cattāro? Abbhaṃ, bhikkhave, candimasūriyānaṃ upakkileso, yena upakkilesena upakkiliṭṭhā candimasūriyā na tapanti, na bhāsanti na virocanti. Mahikā, bhikkhave, candimasūriyānaṃ upakkileso, yena upakkilesena upakkiliṭṭhā candimasūriyā na tapanti, na bhāsanti, na virocanti, dhūmarajo, bhikkhave, candimasūriyānaṃ upakkileso, yena upakkilesena upakkiliṭṭhā candimasūriyā na tapanti, na bhāsanti, na virocanti. Rāhu, bhikkhave, asurindo candimasūriyānaṃ upakkileso, yena upakkilesena upakkiliṭṭhā candimasūriyā na tapanti, na bhāsanti, na virocanti. Ime kho, bhikkhave, cattāro candimasūriyānaṃ upakkilesā, yehi upakkilesehi upakkiliṭṭhā candimasūriyā na tapanti, na bhāsanti, na virocanti. Evameva kho, bhikkhave, cattārome samaṇabrāhmaṇānaṃ upakkilesā, yehi upakkilesehi upakkiliṭṭhā eke samaṇabrāhmaṇā na tapanti, na bhāsanti, na virocanti. Katame cattāro? Santi, bhikkhave, eke samaṇabrāhmaṇā suraṃ pivanti, merayaṃ pivanti, surāmerayapānā appaṭiviratā – ayaṃ, bhikkhave, paṭhamo samaṇabrāhmaṇānaṃ upakkileso, yena upakkilesena upakkiliṭṭhā eke samaṇabrāhmaṇā na tapanti, na bhāsanti, na virocanti. Puna caparaṃ, bhikkhave, eke samaṇabrāhmaṇā methunaṃ dhammaṃ paṭisevanti, methunadhammā appaṭiviratā – ayaṃ, bhikkhave, dutiyo samaṇabrāhmaṇānaṃ upakkileso, yena upakkilesena upakkiliṭṭhā eke samaṇabrāhmaṇā na tapanti, na bhāsanti, na virocanti. Puna caparaṃ, bhikkhave, eke samaṇabrāhmaṇā jātarūparajataṃ sādiyanti, jātarūparajatappaṭiggahaṇā appaṭiviratā – ayaṃ, bhikkhave, tatiyo samaṇabrāhmaṇānaṃ upakkileso, yena upakkilesena upakkiliṭṭhā eke samaṇabrāhmaṇā na tapanti, na bhāsanti, na virocanti. Puna caparaṃ, bhikkhave, eke samaṇabrāhmaṇā micchājīvena jīvitaṃ kappenti; micchājīvā appaṭiviratā – ayaṃ, bhikkhave, catuttho samaṇabrāhmaṇānaṃ upakkileso, yena upakkilesena upakkiliṭṭhā eke samaṇabrāhmaṇā na tapanti, na bhāsanti, na virocanti. Ime kho, bhikkhave, cattāro samaṇabrāhmaṇānaṃ upakkilesā, yehi upakkilesehi upakkiliṭṭhā eke samaṇabrāhmaṇā na tapanti, na bhāsanti , na virocanti’. ‘‘Idamavocāvuso, bhagavā. Idaṃ vatvāna sugato athāparaṃ etadavoca satthā –
‘‘рааг̇ад̣̇осабариглидтаа, згз саман̣аб̣раахман̣аа;
‘‘Rāgadosaparikliṭṭhā, eke samaṇabrāhmaṇā;
‘‘сурам̣ биванд̇и мзраяам̣, бадисзванд̇и мзт̇унам̣;
‘‘Suraṃ pivanti merayaṃ, paṭisevanti methunaṃ;
раж̇ад̇ам̣ ж̇аад̇аруубан̃жа, саад̣̇ияанд̇и авид̣̇д̣̇асуу.
Rajataṃ jātarūpañca, sādiyanti aviddasū.
‘‘мижчааж̇ийвзна ж̇ийванд̇и, згз саман̣аб̣раахман̣аа;
‘‘Micchājīvena jīvanti, eke samaṇabrāhmaṇā;
зд̇з убаггилзсаа вуд̇д̇аа, б̣уд̣̇д̇хзнаад̣̇ижжаб̣анд̇хунаа.
Ete upakkilesā vuttā, buddhenādiccabandhunā.
‘‘язхи убаггилзсзхи убаггилидтаа, згз саман̣аб̣раахман̣аа;
‘‘Yehi upakkilesehi upakkiliṭṭhā, eke samaṇabrāhmaṇā;
на д̇абанд̇и на бхаасанд̇и, асуд̣̇д̇хаа сараж̇аа маг̇аа.
Na tapanti na bhāsanti, asuddhā sarajā magā.
‘‘анд̇хагаарзна онад̣̇д̇хаа, д̇ан̣хаад̣̇аасаа санзд̇д̇игаа;
‘‘Andhakārena onaddhā, taṇhādāsā sanettikā;
вад̣дхзнд̇и гадасим̣ гхорам̣, аад̣̇ияанд̇и бунаб̣бхаванд̇и.
Vaḍḍhenti kaṭasiṃ ghoraṃ, ādiyanti punabbhavanti.
‘‘звам̣ваад̣̇ий гираахам̣ ааяасманд̇з убаасагз сад̣̇д̇хз басаннз аггосаами, барибхаасаами, аббасаад̣̇ам̣ гароми; яохам̣ ад̇хаммам̣ ад̇хаммод̇и вад̣̇аами, д̇хаммам̣ д̇хаммод̇и вад̣̇аами, авинаяам̣ авинаяод̇и вад̣̇аами, винаяам̣ винаяод̇и вад̣̇аами.
‘‘Evaṃvādī kirāhaṃ āyasmante upāsake saddhe pasanne akkosāmi, paribhāsāmi, appasādaṃ karomi; yohaṃ adhammaṃ adhammoti vadāmi, dhammaṃ dhammoti vadāmi, avinayaṃ avinayoti vadāmi, vinayaṃ vinayoti vadāmi.
448. 11 ‘‘згамид̣̇ам̣, аавусо, самаяам̣ бхаг̇аваа рааж̇аг̇ахз вихарад̇и взл̣уванз галанд̣̇аганиваабз. д̇зна ко бана самаязна рааж̇анд̇збурз рааж̇абарисааяам̣ саннисиннаанам̣ саннибад̇ид̇аанам̣ аяаманд̇арагат̇аа уд̣̇абаад̣̇и – ‘габбад̇и саман̣аанам̣ сагяабуд̇д̇ияаанам̣ ж̇аад̇аруубараж̇ад̇ам̣; саад̣̇ияанд̇и саман̣аа сагяабуд̇д̇ияаа ж̇аад̇аруубараж̇ад̇ам̣; бадиг̇г̇ан̣ханд̇и саман̣аа сагяабуд̇д̇ияаа ж̇аад̇аруубараж̇ад̇а’нд̇и. д̇зна ко банаавусо самаязна, ман̣ижуул̣аго г̇ааман̣ий д̇ассам̣ барисааяам̣ нисинно ход̇и. ат̇а ко, аавусо, ман̣ижуул̣аго г̇ааман̣ий д̇ам̣ барисам̣ зд̇ад̣̇авожа – ‘маа аяяаа звам̣ аважуд̇т̇а. на габбад̇и саман̣аанам̣ сагяабуд̇д̇ияаанам̣ ж̇аад̇аруубараж̇ад̇ам̣; на саад̣̇ияанд̇и саман̣аа сагяабуд̇д̇ияаа ж̇аад̇аруубараж̇ад̇ам̣; на бадиг̇г̇ан̣ханд̇и саман̣аа сагяабуд̇д̇ияаа ж̇аад̇аруубараж̇ад̇ам̣; нигкид̇д̇аман̣исуван̣н̣аа саман̣аа сагяабуд̇д̇ияаа абзд̇аж̇аад̇аруубараж̇ад̇аа’д̇и. асагки ко, аавусо, ман̣ижуул̣аго г̇ааман̣ий д̇ам̣ барисам̣ сан̃н̃аабзд̇ум̣.
448.12 ‘‘Ekamidaṃ, āvuso, samayaṃ bhagavā rājagahe viharati veḷuvane kalandakanivāpe. Tena kho pana samayena rājantepure rājaparisāyaṃ sannisinnānaṃ sannipatitānaṃ ayamantarakathā udapādi – ‘kappati samaṇānaṃ sakyaputtiyānaṃ jātarūparajataṃ; sādiyanti samaṇā sakyaputtiyā jātarūparajataṃ; paṭiggaṇhanti samaṇā sakyaputtiyā jātarūparajata’nti. Tena kho panāvuso samayena, maṇicūḷako gāmaṇī tassaṃ parisāyaṃ nisinno hoti. Atha kho, āvuso, maṇicūḷako gāmaṇī taṃ parisaṃ etadavoca – ‘mā ayyā evaṃ avacuttha. Na kappati samaṇānaṃ sakyaputtiyānaṃ jātarūparajataṃ; na sādiyanti samaṇā sakyaputtiyā jātarūparajataṃ; na paṭiggaṇhanti samaṇā sakyaputtiyā jātarūparajataṃ; nikkhittamaṇisuvaṇṇā samaṇā sakyaputtiyā apetajātarūparajatā’ti. Asakkhi kho, āvuso, maṇicūḷako gāmaṇī taṃ parisaṃ saññāpetuṃ.
‘‘ат̇а ко, аавусо, ман̣ижуул̣аго г̇ааман̣ий д̇ам̣ барисам̣ сан̃н̃аабзд̇ваа язна бхаг̇аваа д̇знубасан̇гами, убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисинно ко, аавусо, ман̣ижуул̣аго г̇ааман̣ий бхаг̇аванд̇ам̣ зд̇ад̣̇авожа – ‘ид̇ха, бханд̇з, рааж̇анд̇збурз рааж̇абарисааяам̣ саннисиннаанам̣ саннибад̇ид̇аанам̣ аяаманд̇арагат̇аа уд̣̇абаад̣̇и – габбад̇и саман̣аанам̣ сагяабуд̇д̇ияаанам̣ ж̇аад̇аруубараж̇ад̇ам̣; саад̣̇ияанд̇и саман̣аа сагяабуд̇д̇ияаа ж̇аад̇аруубараж̇ад̇ам̣; бадиг̇г̇ан̣ханд̇и саман̣аа сагяабуд̇д̇ияаа ж̇аад̇аруубараж̇ад̇анд̇и. звам̣ вуд̇д̇з ахам̣ бханд̇з, д̇ам̣ барисам̣ зд̇ад̣̇авожам̣ – маа аяяаа звам̣ аважуд̇т̇а. на габбад̇и саман̣аанам̣ сагяабуд̇д̇ияаанам̣ ж̇аад̇аруубараж̇ад̇ам̣; на саад̣̇ияанд̇и саман̣аа сагяабуд̇д̇ияаа ж̇аад̇аруубараж̇ад̇ам̣ ; на бадиг̇г̇ан̣ханд̇и саман̣аа сагяабуд̇д̇ияаа ж̇аад̇аруубараж̇ад̇ам̣; нигкид̇д̇аман̣исуван̣н̣аа саман̣аа сагяабуд̇д̇ияаа абзд̇аж̇аад̇аруубараж̇ад̇аад̇и. асагким̣ ко ахам̣, бханд̇з, д̇ам̣ барисам̣ сан̃н̃аабзд̇ум̣. гажжаахам̣, бханд̇з, звам̣ б̣яаагарамаано вуд̇д̇аваад̣̇ий жзва бхаг̇авад̇о хоми, на жа бхаг̇аванд̇ам̣ абхууд̇зна аб̣бхаажигкаами, д̇хаммасса жаануд̇хаммам̣ б̣яаагароми, на жа гожи сахад̇хаммиго ваад̣̇аануваад̣̇о г̇аараяхам̣ таанам̣ ааг̇ажчад̇ий’д̇и? ‘д̇аг̇гха д̇вам̣, г̇ааман̣и, звам̣ б̣яаагарамаано вуд̇д̇аваад̣̇ий жзва мз хоси; на жа мам̣ абхууд̇зна аб̣бхаажигкаси 13, д̇хаммасса жаануд̇хаммам̣ б̣яаагароси, на жа гожи сахад̇хаммиго ваад̣̇аануваад̣̇о г̇аараяхам̣ таанам̣ ааг̇ажчад̇и. на хи, г̇ааман̣и, габбад̇и саман̣аанам̣ сагяабуд̇д̇ияаанам̣ ж̇аад̇аруубараж̇ад̇ам̣; на саад̣̇ияанд̇и саман̣аа сагяабуд̇д̇ияаа ж̇аад̇аруубараж̇ад̇ам̣; на бадиг̇г̇ан̣ханд̇и саман̣аа сагяабуд̇д̇ияаа ж̇аад̇аруубараж̇ад̇ам̣; нигкид̇д̇аман̣исуван̣н̣аа саман̣аа сагяабуд̇д̇ияаа абзд̇аж̇аад̇аруубараж̇ад̇аа. яасса ко, г̇ааман̣и, ж̇аад̇аруубараж̇ад̇ам̣ габбад̇и, бан̃жаби д̇асса гаамаг̇ун̣аа габбанд̇и. яасса бан̃жа гаамаг̇ун̣аа габбанд̇и згам̣сзнзд̇ам̣, г̇ааман̣и, д̇хаарзяяааси – ассаман̣ад̇хаммо асагяабуд̇д̇ияад̇хаммод̇и. аби жаахам̣, г̇ааман̣и, звам̣ вад̣̇аами д̇ин̣ам̣ д̇ин̣ад̇т̇игзна бариязсид̇аб̣б̣ам̣; д̣̇аару д̣̇ааруд̇т̇игзна бариязсид̇аб̣б̣ам̣; сагадам̣ сагадад̇т̇игзна бариязсид̇аб̣б̣ам̣; бурисо бурисад̇т̇игзна бариязсид̇аб̣б̣о. на д̇взваахам̣, г̇ааман̣и, гзнажи барияааязна ж̇аад̇аруубараж̇ад̇ам̣ саад̣̇ид̇аб̣б̣ам̣ бариязсид̇аб̣б̣анд̇и вад̣̇аамий’д̇и.
‘‘Atha kho, āvuso, maṇicūḷako gāmaṇī taṃ parisaṃ saññāpetvā yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho, āvuso, maṇicūḷako gāmaṇī bhagavantaṃ etadavoca – ‘idha, bhante, rājantepure rājaparisāyaṃ sannisinnānaṃ sannipatitānaṃ ayamantarakathā udapādi – kappati samaṇānaṃ sakyaputtiyānaṃ jātarūparajataṃ; sādiyanti samaṇā sakyaputtiyā jātarūparajataṃ; paṭiggaṇhanti samaṇā sakyaputtiyā jātarūparajatanti. Evaṃ vutte ahaṃ bhante, taṃ parisaṃ etadavocaṃ – mā ayyā evaṃ avacuttha. Na kappati samaṇānaṃ sakyaputtiyānaṃ jātarūparajataṃ; na sādiyanti samaṇā sakyaputtiyā jātarūparajataṃ ; na paṭiggaṇhanti samaṇā sakyaputtiyā jātarūparajataṃ; nikkhittamaṇisuvaṇṇā samaṇā sakyaputtiyā apetajātarūparajatāti. Asakkhiṃ kho ahaṃ, bhante, taṃ parisaṃ saññāpetuṃ. Kaccāhaṃ, bhante, evaṃ byākaramāno vuttavādī ceva bhagavato homi, na ca bhagavantaṃ abhūtena abbhācikkhāmi, dhammassa cānudhammaṃ byākaromi, na ca koci sahadhammiko vādānuvādo gārayhaṃ ṭhānaṃ āgacchatī’ti? ‘Taggha tvaṃ, gāmaṇi, evaṃ byākaramāno vuttavādī ceva me hosi; na ca maṃ abhūtena abbhācikkhasi 14, dhammassa cānudhammaṃ byākarosi, na ca koci sahadhammiko vādānuvādo gārayhaṃ ṭhānaṃ āgacchati. Na hi, gāmaṇi, kappati samaṇānaṃ sakyaputtiyānaṃ jātarūparajataṃ; na sādiyanti samaṇā sakyaputtiyā jātarūparajataṃ; na paṭiggaṇhanti samaṇā sakyaputtiyā jātarūparajataṃ; nikkhittamaṇisuvaṇṇā samaṇā sakyaputtiyā apetajātarūparajatā. Yassa kho, gāmaṇi, jātarūparajataṃ kappati, pañcapi tassa kāmaguṇā kappanti. Yassa pañca kāmaguṇā kappanti ekaṃsenetaṃ, gāmaṇi, dhāreyyāsi – assamaṇadhammo asakyaputtiyadhammoti. Api cāhaṃ, gāmaṇi, evaṃ vadāmi tiṇaṃ tiṇatthikena pariyesitabbaṃ; dāru dārutthikena pariyesitabbaṃ; sakaṭaṃ sakaṭatthikena pariyesitabbaṃ; puriso purisatthikena pariyesitabbo. Na tvevāhaṃ, gāmaṇi, kenaci pariyāyena jātarūparajataṃ sāditabbaṃ pariyesitabbanti vadāmī’ti.
‘‘звам̣ваад̣̇ий гираахам̣ ааяасманд̇з убаасагз сад̣̇д̇хз басаннз аггосаами, барибхаасаами, аббасаад̣̇ам̣ гароми; яохам̣ ад̇хаммам̣ ад̇хаммод̇и вад̣̇аами, д̇хаммам̣ д̇хаммод̇и вад̣̇аами, авинаяам̣ авинаяод̇и вад̣̇аами, винаяам̣ винаяод̇и вад̣̇аами.
‘‘Evaṃvādī kirāhaṃ āyasmante upāsake saddhe pasanne akkosāmi, paribhāsāmi, appasādaṃ karomi; yohaṃ adhammaṃ adhammoti vadāmi, dhammaṃ dhammoti vadāmi, avinayaṃ avinayoti vadāmi, vinayaṃ vinayoti vadāmi.
449. ‘‘згамид̣̇ам̣, аавусо, самаяам̣ бхаг̇аваа рааж̇аг̇ахз ааяасманд̇ам̣ убананд̣̇ам̣ сагяабуд̇д̇ам̣ аараб̣бха ж̇аад̇аруубараж̇ад̇ам̣ бадигкиби, сигкаабад̣̇ан̃жа бан̃н̃абзси. звам̣ваад̣̇ий гираахам̣ ааяасманд̇з убаасагз сад̣̇д̇хз басаннз аггосаами, барибхаасаами, аббасаад̣̇ам̣ гароми; яохам̣ ад̇хаммам̣ ад̇хаммод̇и вад̣̇аами, д̇хаммам̣ д̇хаммод̇и вад̣̇аами, авинаяам̣ авинаяод̇и вад̣̇аами, винаяам̣ винаяод̇и вад̣̇аамий’’д̇и.
449. ‘‘Ekamidaṃ, āvuso, samayaṃ bhagavā rājagahe āyasmantaṃ upanandaṃ sakyaputtaṃ ārabbha jātarūparajataṃ paṭikkhipi, sikkhāpadañca paññapesi. Evaṃvādī kirāhaṃ āyasmante upāsake saddhe pasanne akkosāmi, paribhāsāmi, appasādaṃ karomi; yohaṃ adhammaṃ adhammoti vadāmi, dhammaṃ dhammoti vadāmi, avinayaṃ avinayoti vadāmi, vinayaṃ vinayoti vadāmī’’ti.
звам̣ вуд̇д̇з взсаалигаа убаасагаа ааяасманд̇ам̣ яасам̣ гааган̣д̣агабуд̇д̇ам̣ зд̇ад̣̇авожум̣ – ‘‘згова бханд̇з, аяяо яасо гааган̣д̣агабуд̇д̇о саман̣о сагяабуд̇д̇ияо. саб̣б̣звимз ассаман̣аа асагяабуд̇д̇ияаа. васад̇у, бханд̇з, аяяо яасо гааган̣д̣агабуд̇д̇о взсаалияам̣. маяам̣ аяяасса яасасса гааган̣д̣агабуд̇д̇асса уссуггам̣ гариссаама жийварабин̣д̣абаад̇асзнаасанаг̇илаанаббажжаяабхзсаж̇ж̇абаригкаараана’’нд̇и. ат̇а ко ааяасмаа яасо гааган̣д̣агабуд̇д̇о взсаалигз убаасагз сан̃н̃аабзд̇ваа ануд̣̇ууд̇зна бхигкунаа сад̣̇д̇хим̣ аараамам̣ аг̇амааси.
Evaṃ vutte vesālikā upāsakā āyasmantaṃ yasaṃ kākaṇḍakaputtaṃ etadavocuṃ – ‘‘ekova bhante, ayyo yaso kākaṇḍakaputto samaṇo sakyaputtiyo. Sabbevime assamaṇā asakyaputtiyā. Vasatu, bhante, ayyo yaso kākaṇḍakaputto vesāliyaṃ. Mayaṃ ayyassa yasassa kākaṇḍakaputtassa ussukkaṃ karissāma cīvarapiṇḍapātasenāsanagilānappaccayabhesajjaparikkhārāna’’nti. Atha kho āyasmā yaso kākaṇḍakaputto vesālike upāsake saññāpetvā anudūtena bhikkhunā saddhiṃ ārāmaṃ agamāsi.
ат̇а ко взсаалигаа важ̇ж̇ибуд̇д̇агаа бхигкуу ануд̣̇ууд̇ам̣ бхигкум̣ бужчим̣су – ‘‘камаабид̇аавусо, яасзна гааган̣д̣агабуд̇д̇зна взсаалигаа убаасагаа’’д̇и ? ‘‘убаасагзхи баабигам̣ но, аавусо, гад̇ам̣. згова яасо гааган̣д̣агабуд̇д̇о саман̣о сагяабуд̇д̇ияо гад̇о. саб̣б̣зва маяам̣ ассаман̣аа асагяабуд̇д̇ияаа гад̇аа’’д̇и. ат̇а ко взсаалигаа важ̇ж̇ибуд̇д̇агаа бхигкуу – ‘‘аяам̣, аавусо, яасо гааган̣д̣агабуд̇д̇о амхзхи асаммад̇о г̇ихийнам̣ багаасзси; ханд̣̇асса маяам̣ угкзбанийяагаммам̣ гаромаа’’д̇и. д̇з д̇асса угкзбанийяагаммам̣ гад̇д̇угаамаа саннибад̇им̣су. ат̇а ко ааяасмаа яасо гааган̣д̣агабуд̇д̇о взхаасам̣ аб̣бхуг̇г̇анд̇ваа госамб̣ияам̣ бажжудтааси.
Atha kho vesālikā vajjiputtakā bhikkhū anudūtaṃ bhikkhuṃ pucchiṃsu – ‘‘khamāpitāvuso, yasena kākaṇḍakaputtena vesālikā upāsakā’’ti ? ‘‘Upāsakehi pāpikaṃ no, āvuso, kataṃ. Ekova yaso kākaṇḍakaputto samaṇo sakyaputtiyo kato. Sabbeva mayaṃ assamaṇā asakyaputtiyā katā’’ti. Atha kho vesālikā vajjiputtakā bhikkhū – ‘‘ayaṃ, āvuso, yaso kākaṇḍakaputto amhehi asammato gihīnaṃ pakāsesi; handassa mayaṃ ukkhepanīyakammaṃ karomā’’ti. Te tassa ukkhepanīyakammaṃ kattukāmā sannipatiṃsu. Atha kho āyasmā yaso kākaṇḍakaputto vehāsaṃ abbhuggantvā kosambiyaṃ paccuṭṭhāsi.
450. ат̇а ко ааяасмаа яасо гааган̣д̣агабуд̇д̇о баавзяяагаанан̃жа 15 аванд̇ид̣̇агкин̣аабат̇агаанан̃жа бхигкуунам̣ санд̇игз д̣̇ууд̇ам̣ баахзси – ‘‘ааг̇ажчанд̇у ааяасманд̇аа; имам̣ ад̇хигаран̣ам̣ аад̣̇ияиссаама. бурз ад̇хаммо д̣̇иббад̇и, д̇хаммо бадиб̣аахияяад̇и; авинаяо д̣̇иббад̇и, винаяо бадиб̣аахияяад̇и; бурз ад̇хаммаваад̣̇ино б̣алаванд̇о хонд̇и, д̇хаммаваад̣̇ино д̣̇уб̣б̣алаа хонд̇и; авинаяаваад̣̇ино б̣алаванд̇о хонд̇и, винаяаваад̣̇ино д̣̇уб̣б̣алаа хонд̇ий’’д̇и.
450. Atha kho āyasmā yaso kākaṇḍakaputto pāveyyakānañca 16 avantidakkhiṇāpathakānañca bhikkhūnaṃ santike dūtaṃ pāhesi – ‘‘āgacchantu āyasmantā; imaṃ adhikaraṇaṃ ādiyissāma. Pure adhammo dippati, dhammo paṭibāhiyyati; avinayo dippati, vinayo paṭibāhiyyati; pure adhammavādino balavanto honti, dhammavādino dubbalā honti; avinayavādino balavanto honti, vinayavādino dubbalā hontī’’ti.
д̇зна ко бана самаязна ааяасмаа самбхууд̇о саан̣аваасий ахог̇ан̇г̇з баб̣б̣ад̇з бадивасад̇и. ат̇а ко ааяасмаа яасо гааган̣д̣агабуд̇д̇о язна ахог̇ан̇г̇о баб̣б̣ад̇о, язнааяасмаа самбхууд̇о саан̣аваасий д̇знубасан̇гами, убасан̇гамид̇ваа ааяасманд̇ам̣ самбхууд̇ам̣ саан̣аваасим̣ абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисинно ко ааяасмаа яасо гааган̣д̣агабуд̇д̇о ааяасманд̇ам̣ самбхууд̇ам̣ саан̣аваасим̣ зд̇ад̣̇авожа – ‘‘имз, бханд̇з, взсаалигаа важ̇ж̇ибуд̇д̇агаа бхигкуу взсаалияам̣ д̣̇аса вад̇т̇ууни д̣̇ийбзнд̇и – габбад̇и син̇г̇илон̣агаббо, габбад̇и д̣̇ван̇г̇улагаббо, габбад̇и г̇ааманд̇арагаббо, габбад̇и ааваасагаббо, габбад̇и анумад̇игаббо, габбад̇и аажин̣н̣агаббо, габбад̇и амат̇ид̇агаббо, габбад̇и ж̇ал̣ог̇им̣ баад̇ум̣, габбад̇и ад̣̇асагам̣ нисийд̣̇анам̣, габбад̇и ж̇аад̇аруубараж̇ад̇анд̇и. ханд̣̇а маяам̣, бханд̇з, имам̣ ад̇хигаран̣ам̣ аад̣̇ияиссаама. бурз ад̇хаммо д̣̇иббад̇и, д̇хаммо бадиб̣аахияяад̇и; авинаяо д̣̇иббад̇и, винаяо бадиб̣аахияяад̇и; бурз ад̇хаммаваад̣̇ино б̣алаванд̇о хонд̇и, д̇хаммаваад̣̇ино д̣̇уб̣б̣алаа хонд̇и; авинаяаваад̣̇ино б̣алаванд̇о хонд̇и, винаяаваад̣̇ино д̣̇уб̣б̣алаа хонд̇ий’’д̇и. ‘‘звамаавусо’’д̇и ко ааяасмаа самбхууд̇о саан̣аваасий ааяасмад̇о яасасса гааган̣д̣агабуд̇д̇асса бажжассоси. ат̇а ко садтимад̇д̇аа баавзяяагаа бхигкуу – саб̣б̣з ааран̃н̃игаа, саб̣б̣з бин̣д̣абаад̇игаа, саб̣б̣з бам̣сугуулигаа, саб̣б̣з д̇зжийваригаа, саб̣б̣зва араханд̇о – ахог̇ан̇г̇з баб̣б̣ад̇з саннибад̇им̣су. адтаасийд̇имад̇д̇аа аванд̇ид̣̇агкин̣аабат̇агаа бхигкуу – аббзгажжз ааран̃н̃игаа, аббзгажжз бин̣д̣абаад̇игаа, аббзгажжз бам̣сугуулигаа, аббзгажжз д̇зжийваригаа, саб̣б̣зва араханд̇о – ахог̇ан̇г̇з баб̣б̣ад̇з саннибад̇им̣су. ат̇а ко т̇зраанам̣ бхигкуунам̣ манд̇аяамаанаанам̣ зд̇ад̣̇ахоси – ‘‘ид̣̇ам̣ ко ад̇хигаран̣ам̣ гагкал̣ан̃жа, ваал̣ан̃жа; гам̣ ну ко маяам̣ багкам̣ лабхзяяаама, язна маяам̣ имасмим̣ ад̇хигаран̣з б̣алаванд̇ад̇араа ассаамаа’’д̇и.
Tena kho pana samayena āyasmā sambhūto sāṇavāsī ahogaṅge pabbate paṭivasati. Atha kho āyasmā yaso kākaṇḍakaputto yena ahogaṅgo pabbato, yenāyasmā sambhūto sāṇavāsī tenupasaṅkami, upasaṅkamitvā āyasmantaṃ sambhūtaṃ sāṇavāsiṃ abhivādetvā ekamantaṃ nisīdi. Ekamantaṃ nisinno kho āyasmā yaso kākaṇḍakaputto āyasmantaṃ sambhūtaṃ sāṇavāsiṃ etadavoca – ‘‘ime, bhante, vesālikā vajjiputtakā bhikkhū vesāliyaṃ dasa vatthūni dīpenti – kappati siṅgiloṇakappo, kappati dvaṅgulakappo, kappati gāmantarakappo, kappati āvāsakappo, kappati anumatikappo, kappati āciṇṇakappo, kappati amathitakappo, kappati jaḷogiṃ pātuṃ, kappati adasakaṃ nisīdanaṃ, kappati jātarūparajatanti. Handa mayaṃ, bhante, imaṃ adhikaraṇaṃ ādiyissāma. Pure adhammo dippati, dhammo paṭibāhiyyati; avinayo dippati, vinayo paṭibāhiyyati; pure adhammavādino balavanto honti, dhammavādino dubbalā honti; avinayavādino balavanto honti, vinayavādino dubbalā hontī’’ti. ‘‘Evamāvuso’’ti kho āyasmā sambhūto sāṇavāsī āyasmato yasassa kākaṇḍakaputtassa paccassosi. Atha kho saṭṭhimattā pāveyyakā bhikkhū – sabbe āraññikā, sabbe piṇḍapātikā, sabbe paṃsukūlikā, sabbe tecīvarikā, sabbeva arahanto – ahogaṅge pabbate sannipatiṃsu. Aṭṭhāsītimattā avantidakkhiṇāpathakā bhikkhū – appekacce āraññikā, appekacce piṇḍapātikā, appekacce paṃsukūlikā, appekacce tecīvarikā, sabbeva arahanto – ahogaṅge pabbate sannipatiṃsu. Atha kho therānaṃ bhikkhūnaṃ mantayamānānaṃ etadahosi – ‘‘idaṃ kho adhikaraṇaṃ kakkhaḷañca, vāḷañca; kaṃ nu kho mayaṃ pakkhaṃ labheyyāma, yena mayaṃ imasmiṃ adhikaraṇe balavantatarā assāmā’’ti.
451. д̇зна ко бана самаязна ааяасмаа рзвад̇о сорзяяз бадивасад̇и – б̣ахуссуд̇о ааг̇ад̇ааг̇амо д̇хаммад̇харо винаяад̇харо маад̇игаад̇харо бан̣д̣ид̇о вияад̇д̇о мзд̇хаавий лаж̇ж̇ий гуггужжаго сигкаагаамо. ат̇а ко т̇зраанам̣ бхигкуунам̣ зд̇ад̣̇ахоси – ‘‘аяам̣ ко ааяасмаа рзвад̇о сорзяяз бадивасад̇и – б̣ахуссуд̇о ааг̇ад̇ааг̇амо д̇хаммад̇харо винаяад̇харо маад̇игаад̇харо бан̣д̣ид̇о вияад̇д̇о мзд̇хаавий лаж̇ж̇ий гуггужжаго сигкаагаамо. сажз маяам̣ ааяасманд̇ам̣ рзвад̇ам̣ багкам̣ лабхиссаама, звам̣ маяам̣ имасмим̣ ад̇хигаран̣з б̣алаванд̇ад̇араа ассаамаа’’д̇и. ассоси ко ааяасмаа рзвад̇о – д̣̇иб̣б̣ааяа сод̇ад̇хаад̇уяаа висуд̣̇д̇хааяа ад̇игганд̇амаанусигааяа – т̇зраанам̣ бхигкуунам̣ манд̇аяамаанаанам̣. суд̇ваанасса зд̇ад̣̇ахоси – ‘‘ид̣̇ам̣ ко ад̇хигаран̣ам̣ гагкал̣ан̃жа ваал̣ан̃жа. на ко мзд̇ам̣ бад̇ируубам̣ яохам̣ зваруубз ад̇хигаран̣з осаггзяяам̣. ид̣̇аани жа бана д̇з бхигкуу ааг̇ажчиссанд̇и. сохам̣ д̇зхи аагин̣н̣о на паасу г̇амиссаами. яам̣нуунаахам̣ бадигажжзва г̇ажчзяяа’’нд̇и. ат̇а ко ааяасмаа рзвад̇о сорзяяаа сан̇гассам̣ аг̇амааси.
451. Tena kho pana samayena āyasmā revato soreyye paṭivasati – bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. Atha kho therānaṃ bhikkhūnaṃ etadahosi – ‘‘ayaṃ kho āyasmā revato soreyye paṭivasati – bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. Sace mayaṃ āyasmantaṃ revataṃ pakkhaṃ labhissāma, evaṃ mayaṃ imasmiṃ adhikaraṇe balavantatarā assāmā’’ti. Assosi kho āyasmā revato – dibbāya sotadhātuyā visuddhāya atikkantamānusikāya – therānaṃ bhikkhūnaṃ mantayamānānaṃ. Sutvānassa etadahosi – ‘‘idaṃ kho adhikaraṇaṃ kakkhaḷañca vāḷañca. Na kho metaṃ patirūpaṃ yohaṃ evarūpe adhikaraṇe osakkeyyaṃ. Idāni ca pana te bhikkhū āgacchissanti. Sohaṃ tehi ākiṇṇo na phāsu gamissāmi. Yaṃnūnāhaṃ paṭikacceva gaccheyya’’nti. Atha kho āyasmā revato soreyyā saṅkassaṃ agamāsi.
ат̇а ко т̇зраа бхигкуу сорзяяам̣ г̇анд̇ваа бужчим̣су – ‘‘гахам̣ ааяасмаа рзвад̇о’’д̇и? д̇з звамаахам̣су – ‘‘зсааяасмаа рзвад̇о сан̇гассам̣ г̇ад̇о’’д̇и. ат̇а ко ааяасмаа рзвад̇о сан̇гассаа ган̣н̣агуж̇ж̇ам̣ 17 аг̇амааси. ат̇а ко т̇зраа бхигкуу сан̇гассам̣ г̇анд̇ваа бужчим̣су – ‘‘гахам̣ ааяасмаа рзвад̇о’’д̇и? д̇з звамаахам̣су – ‘‘зсааяасмаа рзвад̇о ган̣н̣агуж̇ж̇ам̣ г̇ад̇о’’д̇и. ат̇а ко ааяасмаа рзвад̇о ган̣н̣агуж̇ж̇аа уд̣̇умб̣арам̣ аг̇амааси. ат̇а ко т̇зраа бхигкуу ган̣н̣агуж̇ж̇ам̣ г̇анд̇ваа бужчим̣су – ‘‘гахам̣ ааяасмаа рзвад̇о’’д̇и? д̇з звамаахам̣су – ‘‘зсааяасмаа рзвад̇о уд̣̇умб̣арам̣ г̇ад̇о’’д̇и. ат̇а ко ааяасмаа рзвад̇о уд̣̇умб̣араа аг̇г̇ал̣абурам̣ аг̇амааси. ат̇а ко т̇зраа бхигкуу уд̣̇умб̣арам̣ г̇анд̇ваа бужчим̣су – ‘‘гахам̣ ааяасмаа рзвад̇о’’д̇и? д̇з звамаахам̣су – ‘‘зсааяасмаа рзвад̇о аг̇г̇ал̣абурам̣ г̇ад̇о’’д̇и. ат̇а ко ааяасмаа рзвад̇о аг̇г̇ал̣абураа сахаж̇аад̇им̣ 18 аг̇амааси. ат̇а ко т̇зраа бхигкуу аг̇г̇ал̣абурам̣ г̇анд̇ваа бужчим̣су – ‘‘гахам̣ ааяасмаа рзвад̇о’’д̇и? д̇з звамаахам̣су – ‘‘зсааяасмаа рзвад̇о сахаж̇аад̇им̣ г̇ад̇о’’д̇и. ат̇а ко т̇зраа бхигкуу ааяасманд̇ам̣ рзвад̇ам̣ сахаж̇аад̇ияам̣ самбхаавзсум̣.
Atha kho therā bhikkhū soreyyaṃ gantvā pucchiṃsu – ‘‘kahaṃ āyasmā revato’’ti? Te evamāhaṃsu – ‘‘esāyasmā revato saṅkassaṃ gato’’ti. Atha kho āyasmā revato saṅkassā kaṇṇakujjaṃ 19 agamāsi. Atha kho therā bhikkhū saṅkassaṃ gantvā pucchiṃsu – ‘‘kahaṃ āyasmā revato’’ti? Te evamāhaṃsu – ‘‘esāyasmā revato kaṇṇakujjaṃ gato’’ti. Atha kho āyasmā revato kaṇṇakujjā udumbaraṃ agamāsi. Atha kho therā bhikkhū kaṇṇakujjaṃ gantvā pucchiṃsu – ‘‘kahaṃ āyasmā revato’’ti? Te evamāhaṃsu – ‘‘esāyasmā revato udumbaraṃ gato’’ti. Atha kho āyasmā revato udumbarā aggaḷapuraṃ agamāsi. Atha kho therā bhikkhū udumbaraṃ gantvā pucchiṃsu – ‘‘kahaṃ āyasmā revato’’ti? Te evamāhaṃsu – ‘‘esāyasmā revato aggaḷapuraṃ gato’’ti. Atha kho āyasmā revato aggaḷapurā sahajātiṃ 20 agamāsi. Atha kho therā bhikkhū aggaḷapuraṃ gantvā pucchiṃsu – ‘‘kahaṃ āyasmā revato’’ti? Te evamāhaṃsu – ‘‘esāyasmā revato sahajātiṃ gato’’ti. Atha kho therā bhikkhū āyasmantaṃ revataṃ sahajātiyaṃ sambhāvesuṃ.
452. ат̇а ко ааяасмаа самбхууд̇о саан̣аваасий ааяасманд̇ам̣ яасам̣ гааган̣д̣агабуд̇д̇ам̣ зд̇ад̣̇авожа – ‘‘аяам̣, аавусо, ааяасмаа рзвад̇о б̣ахуссуд̇о ааг̇ад̇ааг̇амо д̇хаммад̇харо винаяад̇харо маад̇игаад̇харо бан̣д̣ид̇о вияад̇д̇о мзд̇хаавий лаж̇ж̇ий гуггужжаго сигкаагаамо. сажз маяам̣ ааяасманд̇ам̣ рзвад̇ам̣ бан̃хам̣ бужчиссаама, бадиб̣ало ааяасмаа рзвад̇о згзнзва бан̃хзна сагаламби рад̇д̇им̣ вийд̇инаамзд̇ум̣. ид̣̇аани жа банааяасмаа рзвад̇о анд̇зваасигам̣ 21 сарабхаан̣агам̣ бхигкум̣ аж̇жхзсиссад̇и. со д̇вам̣ д̇асса бхигкуно сарабхан̃н̃абарияосаанз ааяасманд̇ам̣ рзвад̇ам̣ убасан̇гамид̇ваа имаани д̣̇аса вад̇т̇ууни бужчзяяаасий’’д̇и. ‘‘звам̣ бханд̇з’’д̇и ко ааяасмаа яасо гааган̣д̣агабуд̇д̇о ааяасмад̇о самбхууд̇асса саан̣аваасисса бажжассоси. ат̇а ко ааяасмаа рзвад̇о анд̇зваасигам̣ сарабхаан̣агам̣ бхигкум̣ аж̇жхзси. ат̇а ко ааяасмаа яасо гааган̣д̣агабуд̇д̇о д̇асса бхигкуно сарабхан̃н̃абарияосаанз язнааяасмаа рзвад̇о д̇знубасан̇гами, убасан̇гамид̇ваа ааяасманд̇ам̣ рзвад̇ам̣ абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисинно ко ааяасмаа яасо гааган̣д̣агабуд̇д̇о ааяасманд̇ам̣ рзвад̇ам̣ зд̇ад̣̇авожа – ‘‘габбад̇и, бханд̇з, син̇г̇илон̣агаббо’’д̇и? ‘‘го со, аавусо, син̇г̇илон̣агаббо’’д̇и? ‘‘габбад̇и, бханд̇з, син̇г̇инаа лон̣ам̣ барихарид̇ум̣ – яад̇т̇а алон̣агам̣ бхависсад̇и д̇ад̇т̇а барибхун̃ж̇иссаамий’’д̇и? ‘‘наавусо, габбад̇ий’’д̇и. ‘‘габбад̇и, бханд̇з, д̣̇ван̇г̇улагаббо’’д̇и ? ‘‘го со, аавусо, д̣̇ван̇г̇улагаббо’’д̇и? ‘‘габбад̇и, бханд̇з, д̣̇ван̇г̇улааяа чааяааяа вийд̇ивад̇д̇ааяа, вигаалз бхож̇анам̣ бхун̃ж̇ид̇у’’нд̇и? ‘‘наавусо, габбад̇ий’’д̇и. ‘‘габбад̇и, бханд̇з, г̇ааманд̇арагаббо’’д̇и? ‘‘го со, аавусо, г̇ааманд̇арагаббо’’д̇и? ‘‘габбад̇и, бханд̇з – ид̣̇аани г̇ааманд̇арам̣ г̇амиссаамийд̇и – бхуд̇д̇аавинаа баваарид̇зна анад̇ирид̇д̇ам̣ бхож̇анам̣ бхун̃ж̇ид̇у’’нд̇и? ‘‘наавусо, габбад̇ий’’д̇и. ‘‘габбад̇и, бханд̇з, ааваасагаббо’’д̇и? ‘‘го со, аавусо, ааваасагаббо’’д̇и? ‘‘габбад̇и, бханд̇з, самб̣ахулаа ааваасаа самаанасиймаа наанубосат̇ам̣ гаад̇у’’нд̇и? ‘‘наавусо , габбад̇ий’’д̇и. ‘‘габбад̇и , бханд̇з, анумад̇игаббо’’д̇и? ‘‘го со, аавусо, анумад̇игаббо’’д̇и? ‘‘габбад̇и, бханд̇з, ваг̇г̇зна сан̇гхзна гаммам̣ гаад̇ум̣ – ааг̇ад̇з бхигкуу анумаанзссаамаа’’д̇и 22? ‘‘наавусо, габбад̇ий’’д̇и. ‘‘габбад̇и, бханд̇з, аажин̣н̣агаббо’’д̇и? ‘‘го со, аавусо, аажин̣н̣агаббо’’д̇и? ‘‘габбад̇и, бханд̇з, ид̣̇ам̣ мз убаж̇жхааязна аж̇жхаажин̣н̣ам̣, ид̣̇ам̣ мз аажариязна аж̇жхаажин̣н̣ам̣, д̇ам̣ аж̇жхаажарид̇у’’нд̇и? ‘‘аажин̣н̣агаббо ко, аавусо, згажжо габбад̇и, згажжо на габбад̇ий’’д̇и. ‘‘габбад̇и, бханд̇з, амат̇ид̇агаббо’’д̇и? ‘‘го со, аавусо, амат̇ид̇агаббо’’д̇и? ‘‘габбад̇и, бханд̇з, яам̣ д̇ам̣ кийрам̣ кийрабхаавам̣ виж̇ахид̇ам̣, асамбад̇д̇ам̣ д̣̇ад̇хибхаавам̣, д̇ам̣ бхуд̇д̇аавинаа баваарид̇зна анад̇ирид̇д̇ам̣ баад̇у’’нд̇и? ‘‘наавусо, габбад̇ий’’д̇и? ‘‘габбад̇и, бханд̇з, ж̇ал̣ог̇им̣ баад̇у’’нд̇и? ‘‘гаа саа, аавусо, ж̇ал̣ог̇ий’’д̇и? ‘‘габбад̇и, бханд̇з, яаа саа сураа аасуд̇аа, асамбад̇д̇аа маж̇ж̇абхаавам̣, саа баад̇у’’нд̇и? ‘‘наавусо, габбад̇ий’’д̇и. ‘‘габбад̇и, бханд̇з, ад̣̇асагам̣ нисийд̣̇ана’’нд̇и? ‘‘наавусо, габбад̇ий’’д̇и. ‘‘габбад̇и, бханд̇з, ж̇аад̇аруубараж̇ад̇а’’нд̇и? ‘‘наавусо, габбад̇ий’’д̇и. ‘‘имз, бханд̇з, взсаалигаа важ̇ж̇ибуд̇д̇агаа бхигкуу взсаалияам̣ имаани д̣̇аса вад̇т̇ууни д̣̇ийбзнд̇и. ханд̣̇а маяам̣, бханд̇з, имам̣ ад̇хигаран̣ам̣ аад̣̇ияиссаама. бурз ад̇хаммо д̣̇иббад̇и, д̇хаммо бадиб̣аахияяад̇и; авинаяо д̣̇иббад̇и, винаяо бадиб̣аахияяад̇и; бурз ад̇хаммаваад̣̇ино б̣алаванд̇о хонд̇и, д̇хаммаваад̣̇ино д̣̇уб̣б̣алаа хонд̇и; авинаяаваад̣̇ино б̣алаванд̇о хонд̇и, винаяаваад̣̇ино д̣̇уб̣б̣алаа хонд̇ий’’д̇и. ‘‘звамаавусо’’д̇и ко ааяасмаа рзвад̇о ааяасмад̇о яасасса гааган̣д̣агабуд̇д̇асса бажжассоси.
452. Atha kho āyasmā sambhūto sāṇavāsī āyasmantaṃ yasaṃ kākaṇḍakaputtaṃ etadavoca – ‘‘ayaṃ, āvuso, āyasmā revato bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. Sace mayaṃ āyasmantaṃ revataṃ pañhaṃ pucchissāma, paṭibalo āyasmā revato ekeneva pañhena sakalampi rattiṃ vītināmetuṃ. Idāni ca panāyasmā revato antevāsikaṃ 23 sarabhāṇakaṃ bhikkhuṃ ajjhesissati. So tvaṃ tassa bhikkhuno sarabhaññapariyosāne āyasmantaṃ revataṃ upasaṅkamitvā imāni dasa vatthūni puccheyyāsī’’ti. ‘‘Evaṃ bhante’’ti kho āyasmā yaso kākaṇḍakaputto āyasmato sambhūtassa sāṇavāsissa paccassosi. Atha kho āyasmā revato antevāsikaṃ sarabhāṇakaṃ bhikkhuṃ ajjhesi. Atha kho āyasmā yaso kākaṇḍakaputto tassa bhikkhuno sarabhaññapariyosāne yenāyasmā revato tenupasaṅkami, upasaṅkamitvā āyasmantaṃ revataṃ abhivādetvā ekamantaṃ nisīdi. Ekamantaṃ nisinno kho āyasmā yaso kākaṇḍakaputto āyasmantaṃ revataṃ etadavoca – ‘‘kappati, bhante, siṅgiloṇakappo’’ti? ‘‘Ko so, āvuso, siṅgiloṇakappo’’ti? ‘‘Kappati, bhante, siṅginā loṇaṃ pariharituṃ – yattha aloṇakaṃ bhavissati tattha paribhuñjissāmī’’ti? ‘‘Nāvuso, kappatī’’ti. ‘‘Kappati, bhante, dvaṅgulakappo’’ti ? ‘‘Ko so, āvuso, dvaṅgulakappo’’ti? ‘‘Kappati, bhante, dvaṅgulāya chāyāya vītivattāya, vikāle bhojanaṃ bhuñjitu’’nti? ‘‘Nāvuso, kappatī’’ti. ‘‘Kappati, bhante, gāmantarakappo’’ti? ‘‘Ko so, āvuso, gāmantarakappo’’ti? ‘‘Kappati, bhante – idāni gāmantaraṃ gamissāmīti – bhuttāvinā pavāritena anatirittaṃ bhojanaṃ bhuñjitu’’nti? ‘‘Nāvuso, kappatī’’ti. ‘‘Kappati, bhante, āvāsakappo’’ti? ‘‘Ko so, āvuso, āvāsakappo’’ti? ‘‘Kappati, bhante, sambahulā āvāsā samānasīmā nānuposathaṃ kātu’’nti? ‘‘Nāvuso , kappatī’’ti. ‘‘Kappati , bhante, anumatikappo’’ti? ‘‘Ko so, āvuso, anumatikappo’’ti? ‘‘Kappati, bhante, vaggena saṅghena kammaṃ kātuṃ – āgate bhikkhū anumānessāmā’’ti 24? ‘‘Nāvuso, kappatī’’ti. ‘‘Kappati, bhante, āciṇṇakappo’’ti? ‘‘Ko so, āvuso, āciṇṇakappo’’ti? ‘‘Kappati, bhante, idaṃ me upajjhāyena ajjhāciṇṇaṃ, idaṃ me ācariyena ajjhāciṇṇaṃ, taṃ ajjhācaritu’’nti? ‘‘Āciṇṇakappo kho, āvuso, ekacco kappati, ekacco na kappatī’’ti. ‘‘Kappati, bhante, amathitakappo’’ti? ‘‘Ko so, āvuso, amathitakappo’’ti? ‘‘Kappati, bhante, yaṃ taṃ khīraṃ khīrabhāvaṃ vijahitaṃ, asampattaṃ dadhibhāvaṃ, taṃ bhuttāvinā pavāritena anatirittaṃ pātu’’nti? ‘‘Nāvuso, kappatī’’ti? ‘‘Kappati, bhante, jaḷogiṃ pātu’’nti? ‘‘Kā sā, āvuso, jaḷogī’’ti? ‘‘Kappati, bhante, yā sā surā āsutā, asampattā majjabhāvaṃ, sā pātu’’nti? ‘‘Nāvuso, kappatī’’ti. ‘‘Kappati, bhante, adasakaṃ nisīdana’’nti? ‘‘Nāvuso, kappatī’’ti. ‘‘Kappati, bhante, jātarūparajata’’nti? ‘‘Nāvuso, kappatī’’ti. ‘‘Ime, bhante, vesālikā vajjiputtakā bhikkhū vesāliyaṃ imāni dasa vatthūni dīpenti. Handa mayaṃ, bhante, imaṃ adhikaraṇaṃ ādiyissāma. Pure adhammo dippati, dhammo paṭibāhiyyati; avinayo dippati, vinayo paṭibāhiyyati; pure adhammavādino balavanto honti, dhammavādino dubbalā honti; avinayavādino balavanto honti, vinayavādino dubbalā hontī’’ti. ‘‘Evamāvuso’’ti kho āyasmā revato āyasmato yasassa kākaṇḍakaputtassa paccassosi.
батамабхаан̣авааро нидтид̇о.
Paṭhamabhāṇavāro niṭṭhito.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / жуул̣аваг̇г̇а-адтагат̇аа • Cūḷavagga-aṭṭhakathā / д̣̇асавад̇т̇угат̇аа • Dasavatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / д̣̇асавад̇т̇угат̇ааван̣н̣анаа • Dasavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / д̣̇асавад̇т̇угат̇ааван̣н̣анаа • Dasavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / д̣̇асавад̇т̇угат̇ааван̣н̣анаа • Dasavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / д̣̇асавад̇т̇угат̇аа • Dasavatthukathā
