| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৬. পঠমভৰসুত্তং
6. Paṭhamabhavasuttaṃ
৭৭. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘ভৰো, ভৰোতি, ভন্তে, ৰুচ্চতি। কিত্তাৰতা নু খো, ভন্তে, ভৰো হোতী’’তি?
77. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘bhavo, bhavoti, bhante, vuccati. Kittāvatā nu kho, bhante, bhavo hotī’’ti?
‘‘কামধাতুৰেপক্কঞ্চ, আনন্দ, কম্মং নাভৰিস্স, অপি নু খো কামভৰো পঞ্ঞাযেথা’’তি? ‘‘নো হেতং, ভন্তে’’। ‘‘ইতি খো, আনন্দ, কম্মং খেত্তং, ৰিঞ্ঞাণং বীজং, তণ্হা স্নেহো 1। অৰিজ্জানীৰরণানং সত্তানং তণ্হাসংযোজনানং হীনায ধাতুযা ৰিঞ্ঞাণং পতিট্ঠিতং এৰং আযতিং 2 পুনব্ভৰাভিনিব্বত্তি হোতি। ( ) 3
‘‘Kāmadhātuvepakkañca, ānanda, kammaṃ nābhavissa, api nu kho kāmabhavo paññāyethā’’ti? ‘‘No hetaṃ, bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho 4. Avijjānīvaraṇānaṃ sattānaṃ taṇhāsaṃyojanānaṃ hīnāya dhātuyā viññāṇaṃ patiṭṭhitaṃ evaṃ āyatiṃ 5 punabbhavābhinibbatti hoti. ( ) 6
‘‘রূপধাতুৰেপক্কঞ্চ, আনন্দ, কম্মং নাভৰিস্স, অপি নু খো রূপভৰো পঞ্ঞাযেথা’’তি? ‘‘নো হেতং, ভন্তে’’। ‘‘ইতি খো আনন্দ, কম্মং খেত্তং, ৰিঞ্ঞাণং বীজং, তণ্হা স্নেহো। অৰিজ্জানীৰরণানং সত্তানং তণ্হাসংযোজনানং মজ্ঝিমায ধাতুযা ৰিঞ্ঞাণং পতিট্ঠিতং এৰং আযতিং পুনব্ভৰাভিনিব্বত্তি হোতি। ( ) 7
‘‘Rūpadhātuvepakkañca, ānanda, kammaṃ nābhavissa, api nu kho rūpabhavo paññāyethā’’ti? ‘‘No hetaṃ, bhante’’. ‘‘Iti kho ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ majjhimāya dhātuyā viññāṇaṃ patiṭṭhitaṃ evaṃ āyatiṃ punabbhavābhinibbatti hoti. ( ) 8
‘‘অরূপধাতুৰেপক্কঞ্চ, আনন্দ, কম্মং নাভৰিস্স, অপি নু খো অরূপভৰো পঞ্ঞাযেথা’’তি? ‘‘নো হেতং, ভন্তে’’। ‘‘ইতি খো, আনন্দ, কম্মং খেত্তং, ৰিঞ্ঞাণং বীজং, তণ্হা স্নেহো। অৰিজ্জানীৰরণানং সত্তানং তণ্হাসংযোজনানং পণীতায ধাতুযা ৰিঞ্ঞাণং পতিট্ঠিতং এৰং আযতিং পুনব্ভৰাভিনিব্বত্তি হোতি। এৰং খো, আনন্দ, ভৰো হোতী’’তি। ছট্ঠং।
‘‘Arūpadhātuvepakkañca, ānanda, kammaṃ nābhavissa, api nu kho arūpabhavo paññāyethā’’ti? ‘‘No hetaṃ, bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ paṇītāya dhātuyā viññāṇaṃ patiṭṭhitaṃ evaṃ āyatiṃ punabbhavābhinibbatti hoti. Evaṃ kho, ānanda, bhavo hotī’’ti. Chaṭṭhaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৬. পঠমভৰসুত্তৰণ্ণনা • 6. Paṭhamabhavasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬-৭. পঠমভৰসুত্তাদিৰণ্ণনা • 6-7. Paṭhamabhavasuttādivaṇṇanā
