Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya

    ६. पठमभवसुत्तं

    6. Paṭhamabhavasuttaṃ

    ७७. अथ खो आयस्मा आनन्दो येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं निसीदि। एकमन्तं निसिन्‍नो खो आयस्मा आनन्दो भगवन्तं एतदवोच – ‘‘भवो, भवोति, भन्ते, वुच्‍चति। कित्तावता नु खो, भन्ते, भवो होती’’ति?

    77. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘bhavo, bhavoti, bhante, vuccati. Kittāvatā nu kho, bhante, bhavo hotī’’ti?

    ‘‘कामधातुवेपक्‍कञ्‍च, आनन्द, कम्मं नाभविस्स, अपि नु खो कामभवो पञ्‍ञायेथा’’ति? ‘‘नो हेतं, भन्ते’’। ‘‘इति खो, आनन्द, कम्मं खेत्तं, विञ्‍ञाणं बीजं, तण्हा स्नेहो 1। अविज्‍जानीवरणानं सत्तानं तण्हासंयोजनानं हीनाय धातुया विञ्‍ञाणं पतिट्ठितं एवं आयतिं 2 पुनब्भवाभिनिब्बत्ति होति। ( ) 3

    ‘‘Kāmadhātuvepakkañca, ānanda, kammaṃ nābhavissa, api nu kho kāmabhavo paññāyethā’’ti? ‘‘No hetaṃ, bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho 4. Avijjānīvaraṇānaṃ sattānaṃ taṇhāsaṃyojanānaṃ hīnāya dhātuyā viññāṇaṃ patiṭṭhitaṃ evaṃ āyatiṃ 5 punabbhavābhinibbatti hoti. ( ) 6

    ‘‘रूपधातुवेपक्‍कञ्‍च, आनन्द, कम्मं नाभविस्स, अपि नु खो रूपभवो पञ्‍ञायेथा’’ति? ‘‘नो हेतं, भन्ते’’। ‘‘इति खो आनन्द, कम्मं खेत्तं, विञ्‍ञाणं बीजं, तण्हा स्नेहो। अविज्‍जानीवरणानं सत्तानं तण्हासंयोजनानं मज्झिमाय धातुया विञ्‍ञाणं पतिट्ठितं एवं आयतिं पुनब्भवाभिनिब्बत्ति होति। ( ) 7

    ‘‘Rūpadhātuvepakkañca, ānanda, kammaṃ nābhavissa, api nu kho rūpabhavo paññāyethā’’ti? ‘‘No hetaṃ, bhante’’. ‘‘Iti kho ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ majjhimāya dhātuyā viññāṇaṃ patiṭṭhitaṃ evaṃ āyatiṃ punabbhavābhinibbatti hoti. ( ) 8

    ‘‘अरूपधातुवेपक्‍कञ्‍च, आनन्द, कम्मं नाभविस्स, अपि नु खो अरूपभवो पञ्‍ञायेथा’’ति? ‘‘नो हेतं, भन्ते’’। ‘‘इति खो, आनन्द, कम्मं खेत्तं, विञ्‍ञाणं बीजं, तण्हा स्नेहो। अविज्‍जानीवरणानं सत्तानं तण्हासंयोजनानं पणीताय धातुया विञ्‍ञाणं पतिट्ठितं एवं आयतिं पुनब्भवाभिनिब्बत्ति होति। एवं खो, आनन्द, भवो होती’’ति। छट्ठं।

    ‘‘Arūpadhātuvepakkañca, ānanda, kammaṃ nābhavissa, api nu kho arūpabhavo paññāyethā’’ti? ‘‘No hetaṃ, bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ paṇītāya dhātuyā viññāṇaṃ patiṭṭhitaṃ evaṃ āyatiṃ punabbhavābhinibbatti hoti. Evaṃ kho, ānanda, bhavo hotī’’ti. Chaṭṭhaṃ.




    Next: ७. दुतियभवसुत्तं • 7. Dutiyabhavasuttaṃ




    Footnotes:
    1. सिनेहो (सी॰ स्या॰ कं॰ पी॰)
    2. आयति (सी॰)
    3. (एवं खो आनन्द भवो होतीति) (क॰) दुतियसुत्ते पन इदं पाठनानत्तं नत्थि
    4. sineho (sī. syā. kaṃ. pī.)
    5. āyati (sī.)
    6. (evaṃ kho ānanda bhavo hotīti) (ka.) dutiyasutte pana idaṃ pāṭhanānattaṃ natthi
    7. (एवं खो आनन्द भवो होतीति) (क॰) दुतियसुत्ते पन इदं पाठनानत्तं नत्थि
    8. (evaṃ kho ānanda bhavo hotīti) (ka.) dutiyasutte pana idaṃ pāṭhanānattaṃ natthi



    Related texts:



    अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ६. पठमभवसुत्तवण्णना • 6. Paṭhamabhavasuttavaṇṇanā

    टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ६-७. पठमभवसुत्तादिवण्णना • 6-7. Paṭhamabhavasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact