| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
১০. পঠমভিক্খাদাযিকাৰিমানৰণ্ণনা
10. Paṭhamabhikkhādāyikāvimānavaṇṇanā
অভিক্কন্তেন ৰণ্ণেনাতি ভিক্খাদাযিকাৰিমানং। তস্স কা উপ্পত্তি? ভগৰা সাৰত্থিযং ৰিহরতি জেতৰনে। তেন চ সমযেন উত্তরমধুরাযং অঞ্ঞতরা ইত্থী খীণাযুকা হোতি অপাযে উপ্পজ্জনারহা। ভগৰা পচ্চূসৰেলাযং মহাকরুণাসমাপত্তিতো ৰুট্ঠায লোকং ৰোলোকেন্তো তং ইত্থিং অপাযে উপ্পজ্জনারহং দিস্ৰা মহাকরুণায সঞ্চোদিতমানসো তং সুগতিযং পতিট্ঠাপেতুকামো একো অদুতিযো মধুরং অগমাসি। গন্ত্ৰা পুব্বণ্হসমযং নিৰাসেত্ৰা পত্তচীৰরং আদায বহিনগরং পিণ্ডায পাৰিসি। তেন সমযেন সা ইত্থী গেহে আহারং সম্পাদেত্ৰা একমন্তে পটিসামেত্ৰা ঘটং গহেত্ৰা উদকতিত্থং গন্ত্ৰা ন্হাযিত্ৰা ঘটেন উদকং গহেত্ৰা অত্তনো গেহং গচ্ছন্তী অন্তরামগ্গে ভগৰন্তং পস্সিত্ৰা ‘‘অপি, ভন্তে, পিণ্ডো লদ্ধো’’তি ৰত্ৰা ‘‘লভিস্সামী’’তি চ ভগৰতা ৰুত্তে অলদ্ধভাৰং ঞত্ৰা ঘটং ঠপেত্ৰা ভগৰন্তং উপসঙ্কমিত্ৰা ৰন্দিত্ৰা ‘‘অহং, ভন্তে, পিণ্ডপাতং দস্সামি, অধিৰাসেথা’’তি আহ। অধিৰাসেসি ভগৰা তুণ্হীভাৰেন। সা ভগৰতো অধিৰাসনং ৰিদিত্ৰা পঠমতরং গন্ত্ৰা সিত্তসম্মট্ঠে পদেসে আসনং পঞ্ঞাপেত্ৰা ভগৰতো পৰেসনং উদিক্খমানা অট্ঠাসি। ভগৰা গেহং পৰিসিত্ৰা পঞ্ঞত্তে আসনে নিসীদি। অথ সা ভগৰন্তং ভোজেসি। ভগৰা কতভত্তকিচ্চো ওনীতপত্তপাণী তস্সা অনুমোদনং কত্ৰা পক্কামি। সা অনুমোদনং সুত্ৰা অনপ্পকং পীতিসোমনস্সং পটিসংৰেদেন্তী যাৰ চক্খুপথসমতিক্কমা বুদ্ধারম্মণং পীতিং অৰিজহন্তী নমস্সমানা অট্ঠাসি। সা কতিপযদিৰসাতিক্কমেনেৰ কালং কত্ৰা তাৰতিংসভৰনে নিব্বত্তি, অচ্ছরাসহস্সঞ্চস্সা পরিৰারো অহোসি। তং আযস্মা মহামোগ্গল্লানো –
Abhikkantena vaṇṇenāti bhikkhādāyikāvimānaṃ. Tassa kā uppatti? Bhagavā sāvatthiyaṃ viharati jetavane. Tena ca samayena uttaramadhurāyaṃ aññatarā itthī khīṇāyukā hoti apāye uppajjanārahā. Bhagavā paccūsavelāyaṃ mahākaruṇāsamāpattito vuṭṭhāya lokaṃ volokento taṃ itthiṃ apāye uppajjanārahaṃ disvā mahākaruṇāya sañcoditamānaso taṃ sugatiyaṃ patiṭṭhāpetukāmo eko adutiyo madhuraṃ agamāsi. Gantvā pubbaṇhasamayaṃ nivāsetvā pattacīvaraṃ ādāya bahinagaraṃ piṇḍāya pāvisi. Tena samayena sā itthī gehe āhāraṃ sampādetvā ekamante paṭisāmetvā ghaṭaṃ gahetvā udakatitthaṃ gantvā nhāyitvā ghaṭena udakaṃ gahetvā attano gehaṃ gacchantī antarāmagge bhagavantaṃ passitvā ‘‘api, bhante, piṇḍo laddho’’ti vatvā ‘‘labhissāmī’’ti ca bhagavatā vutte aladdhabhāvaṃ ñatvā ghaṭaṃ ṭhapetvā bhagavantaṃ upasaṅkamitvā vanditvā ‘‘ahaṃ, bhante, piṇḍapātaṃ dassāmi, adhivāsethā’’ti āha. Adhivāsesi bhagavā tuṇhībhāvena. Sā bhagavato adhivāsanaṃ viditvā paṭhamataraṃ gantvā sittasammaṭṭhe padese āsanaṃ paññāpetvā bhagavato pavesanaṃ udikkhamānā aṭṭhāsi. Bhagavā gehaṃ pavisitvā paññatte āsane nisīdi. Atha sā bhagavantaṃ bhojesi. Bhagavā katabhattakicco onītapattapāṇī tassā anumodanaṃ katvā pakkāmi. Sā anumodanaṃ sutvā anappakaṃ pītisomanassaṃ paṭisaṃvedentī yāva cakkhupathasamatikkamā buddhārammaṇaṃ pītiṃ avijahantī namassamānā aṭṭhāsi. Sā katipayadivasātikkameneva kālaṃ katvā tāvatiṃsabhavane nibbatti, accharāsahassañcassā parivāro ahosi. Taṃ āyasmā mahāmoggallāno –
২৭০.
270.
‘‘অভিক্কন্তেন ৰণ্ণেন…পে॰… ওসধী ৰিয তারকা॥
‘‘Abhikkantena vaṇṇena…pe… osadhī viya tārakā.
২৭১.
271.
‘‘কেন তেতাদিসো ৰণ্ণো…পে॰…
‘‘Kena tetādiso vaṇṇo…pe…
ৰণ্ণো চ তে সব্বদিসা পভাসতী’’তি॥ – গাথাহি পুচ্ছি।
Vaṇṇo ca te sabbadisā pabhāsatī’’ti. – gāthāhi pucchi;
২৭৩.
273.
‘‘সা দেৰতা অত্তমনা…পে॰… যস্স কম্মস্সিদং ফলং’’॥
‘‘Sā devatā attamanā…pe… yassa kammassidaṃ phalaṃ’’.
২৭৪.
274.
‘‘অহং মনুস্সেসু মনুস্সভূতা,
‘‘Ahaṃ manussesu manussabhūtā,
পুরিমায জাতিযা মনুস্সলোকে॥
Purimāya jātiyā manussaloke.
২৭৫.
275.
‘‘অদ্দসং ৰিরজং বুদ্ধং, ৰিপ্পসন্নমনাৰিলং।
‘‘Addasaṃ virajaṃ buddhaṃ, vippasannamanāvilaṃ;
তস্স অদাসহং ভিক্খং, পসন্না সেহি পাণিভি॥
Tassa adāsahaṃ bhikkhaṃ, pasannā sehi pāṇibhi.
২৭৬.
276.
‘‘তেন মেতাদিসো ৰণ্ণো…পে॰…
‘‘Tena metādiso vaṇṇo…pe…
ৰণ্ণো চ মে সব্বদিসা পভাসতী’’তি॥ –
Vaṇṇo ca me sabbadisā pabhāsatī’’ti. –
দেৰতা ব্যাকাসি। সেসং সব্বং হেট্ঠা ৰুত্তনযত্তা উত্তানত্থমেৰ।
Devatā byākāsi. Sesaṃ sabbaṃ heṭṭhā vuttanayattā uttānatthameva.
পঠমভিক্খাদাযিকাৰিমানৰণ্ণনা নিট্ঠিতা।
Paṭhamabhikkhādāyikāvimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ১০. পঠমভিক্খাদাযিকাৰিমানৰত্থু • 10. Paṭhamabhikkhādāyikāvimānavatthu
