| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. පඨමභික්‌ඛුසුත්‌තං
5. Paṭhamabhikkhusuttaṃ
991. අථ ඛො සම්‌බහුලා භික්‌ඛූ යෙන භගවා තෙනුපසඞ්‌කමිංසු; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදිංසු. එකමන්‌තං නිසින්‌නා ඛො තෙ භික්‌ඛූ භගවන්‌තං එතදවොචුං – ‘‘අත්‌ථි නු ඛො, භන්‌තෙ, එකධම්‌මො භාවිතො බහුලීකතො චත්‌තාරො ධම්‌මෙ පරිපූරෙති, චත්‌තාරො ධම්‌මා භාවිතා බහුලීකතා සත්‌ත ධම්‌මෙ පරිපූරෙන්‌ති, සත්‌ත ධම්‌මා භාවිතා බහුලීකතා ද්‌වෙ ධම්‌මෙ පරිපූරෙන්‌තී’’ති? ‘‘අත්‌ථි ඛො, භික්‌ඛවෙ, එකධම්‌මො භාවිතො බහුලීකතො චත්‌තාරො ධම්‌මෙ පරිපූරෙති, චත්‌තාරො ධම්‌මා භාවිතා බහුලීකතා සත්‌ත ධම්‌මෙ පරිපූරෙන්‌ති, සත්‌ත ධම්‌මා භාවිතා බහුලීකතා ද්‌වෙ ධම්‌මෙ පරිපූරෙන්‌තී’’ති.
991. Atha kho sambahulā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘atthi nu kho, bhante, ekadhammo bhāvito bahulīkato cattāro dhamme paripūreti, cattāro dhammā bhāvitā bahulīkatā satta dhamme paripūrenti, satta dhammā bhāvitā bahulīkatā dve dhamme paripūrentī’’ti? ‘‘Atthi kho, bhikkhave, ekadhammo bhāvito bahulīkato cattāro dhamme paripūreti, cattāro dhammā bhāvitā bahulīkatā satta dhamme paripūrenti, satta dhammā bhāvitā bahulīkatā dve dhamme paripūrentī’’ti.
‘‘කතමො පන, භන්‌තෙ, එකධම්‌මො භාවිතො බහුලීකතො චත්‌තාරො ධම්‌මෙ පරිපූරෙති, චත්‌තාරො ධම්‌මා භාවිතා බහුලීකතා සත්‌ත ධම්‌මෙ පරිපූරෙන්‌ති, සත්‌ත ධම්‌මා භාවිතා බහුලීකතා ද්‌වෙ ධම්‌මෙ පරිපූරෙන්‌තී’’ති? ‘‘ආනාපානස්‌සතිසමාධි ඛො, භික්‌ඛවෙ, එකධම්‌මො භාවිතො බහුලීකතො චත්‌තාරො සතිපට්‌ඨානෙ පරිපූරෙති, චත්‌තාරො සතිපට්‌ඨානා භාවිතා බහුලීකතා සත්‌ත බොජ්‌ඣඞ්‌ගෙ පරිපූරෙන්‌ති, සත්‌ත බොජ්‌ඣඞ්‌ගා භාවිතා බහුලීකතා විජ්‌ජාවිමුත්‌තිං පරිපූරෙන්‌තී’’ති.
‘‘Katamo pana, bhante, ekadhammo bhāvito bahulīkato cattāro dhamme paripūreti, cattāro dhammā bhāvitā bahulīkatā satta dhamme paripūrenti, satta dhammā bhāvitā bahulīkatā dve dhamme paripūrentī’’ti? ‘‘Ānāpānassatisamādhi kho, bhikkhave, ekadhammo bhāvito bahulīkato cattāro satipaṭṭhāne paripūreti, cattāro satipaṭṭhānā bhāvitā bahulīkatā satta bojjhaṅge paripūrenti, satta bojjhaṅgā bhāvitā bahulīkatā vijjāvimuttiṃ paripūrentī’’ti.
‘‘කථං භාවිතො ච, භික්‌ඛවෙ, ආනාපානස්‌සතිසමාධි කථං බහුලීකතො චත්‌තාරො සතිපට්‌ඨානෙ පරිපූරෙති? ඉධ, භික්‌ඛවෙ, භික්‌ඛු අරඤ්‌ඤගතො වා…පෙ.… එවං භාවිතා ඛො, භික්‌ඛවෙ, සත්‌ත බොජ්‌ඣඞ්‌ගා එවං බහුලීකතා විජ්‌ජාවිමුත්‌තිං පරිපූරෙන්‌තී’’ති. පඤ්‌චමං.
‘‘Kathaṃ bhāvito ca, bhikkhave, ānāpānassatisamādhi kathaṃ bahulīkato cattāro satipaṭṭhāne paripūreti? Idha, bhikkhave, bhikkhu araññagato vā…pe… evaṃ bhāvitā kho, bhikkhave, satta bojjhaṅgā evaṃ bahulīkatā vijjāvimuttiṃ paripūrentī’’ti. Pañcamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3-10. පඨමආනන්‌දසුත්‌තාදිවණ්‌ණනා • 3-10. Paṭhamaānandasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3-10. පඨමආනන්‌දසුත්‌තාදිවණ්‌ණනා • 3-10. Paṭhamaānandasuttādivaṇṇanā
