Library / Tipiṭaka / ཏིཔིཊཀ • Tipiṭaka / ཨུདཱན-ཨཊྛཀཐཱ • Udāna-aṭṭhakathā

    ༡. བོདྷིཝགྒོ

    1. Bodhivaggo

    ༡. པཋམབོདྷིསུཏྟཝཎྞནཱ

    1. Paṭhamabodhisuttavaṇṇanā

    ༡. ཡཾ པནེཏྠ ‘‘ཨེཝཾ མེ སུཏ’’ནྟིཨཱདིཀཾ ནིདཱནཾ, ཏཏྠ ཨེཝནྟི ནིཔཱཏཔདཾ། མེཏིཨཱདཱིནི ནཱམཔདཱནི། ཨུརུཝེལཱཡཾ ཝིཧརཏཱིཏི ཨེཏྠ ཝཱིཏི ཨུཔསགྒཔདཾ, ཧརཏཱིཏི ཨཱཁྱཱཏཔདནྟི ཨིམིནཱཝ ནཡེན སབྦཏྠ པདཝིབྷཱགོ ཝེདིཏབྦོ།

    1. Yaṃ panettha ‘‘evaṃ me suta’’ntiādikaṃ nidānaṃ, tattha evanti nipātapadaṃ. Metiādīni nāmapadāni. Uruvelāyaṃ viharatīti ettha vīti upasaggapadaṃ, haratīti ākhyātapadanti imināva nayena sabbattha padavibhāgo veditabbo.

    ཨཏྠཏོ པན ཨེཝཾསདྡོ ཏཱཝ ཨུཔམཱུཔདེསསམྤཧཾསནགརཧཎཝཙནསམྤཊིགྒཧཱཀཱར- ནིདསྶནཱཝདྷཱརཎཔུཙྪཱཨིདམཏྠཔརིམཱཎཱདི ཨནེཀཏྠཔྤབྷེདོ། ཏཐཱ ཧེས ‘‘ཨེཝཾ ཛཱཏེན མཙྩེན, ཀཏྟབྦཾ ཀུསལཾ བཧུ’’ནྟི ཨེཝམཱདཱིསུ (དྷ॰ པ॰ ༥༣) ཨུཔམཱཡཾ ཨཱགཏོ། ‘‘ཨེཝཾ ཏེ ཨབྷིཀྐམིཏབྦཾ, ཨེཝཾ ཏེ པཊིཀྐམིཏབྦ’’ནྟིཨཱདཱིསུ (ཨ॰ ནི॰ ༤.༡༢༢) ཨུཔདེསེ། ‘‘ཨེཝམེཏཾ བྷགཝཱ, ཨེཝམེཏཾ སུགཏཱ’’ཏིཨཱདཱིསུ (ཨ॰ ནི॰ ༣.༦༦) སམྤཧཾསནེ། ‘‘ཨེཝམེཝཾ པནཱཡཾ ཝསལཱི ཡསྨིཾ ཝཱ ཏསྨིཾ ཝཱ ཏསྶ མུཎྜཀསྶ སམཎཀསྶ ཝཎྞཾ བྷཱསཏཱི’’ཏིཨཱདཱིསུ (སཾ॰ ནི॰ ༡.༡༨༧) གརཧཎེ། ‘‘ཨེཝཾ, བྷནྟེཏི ཁོ ཏེ བྷིཀྑཱུ བྷགཝཏོ པཙྩསྶོསུ’’ནྟིཨཱདཱིསུ (དཱི॰ ནི॰ ༢.༣; མ॰ ནི॰ ༡.༡) ཝཙནསམྤཊིགྒཧེ། ‘‘ཨེཝཾ བྱཱ ཁོ ཨཧཾ, བྷནྟེ, བྷགཝཏཱ དྷམྨཾ དེསིཏཾ ཨཱཛཱནཱམཱི’’ཏིཨཱདཱིསུ (མ॰ ནི॰ ༡.༣༩༨) ཨཱཀཱརེ། ‘‘ཨེཧི ཏྭཾ, མཱཎཝཀ, ཡེན སམཎོ ཨཱནནྡོ ཏེནུཔསངྐམ, ཨུཔསངྐམིཏྭཱ མམ ཝཙནེན སམཎཾ ཨཱནནྡཾ ཨཔྤཱབཱདྷཾ ཨཔྤཱཏངྐཾ ལཧུཊྛཱནཾ བལཾ ཕཱསུཝིཧཱརཾ པུཙྪ ‘སུབྷོ མཱཎཝོ ཏོདེཡྻཔུཏྟོ བྷཝནྟཾ ཨཱནནྡཾ ཨཔྤཱབཱདྷཾ ཨཔྤཱཏངྐཾ ལཧུཊྛཱནཾ བལཾ ཕཱསུཝིཧཱརཾ པུཙྪཏཱི’ཏི, ཨེཝཉྩ ཝདེཧི ‘སཱདྷུ ཀིར བྷཝཾ ཨཱནནྡོ ཡེན སུབྷསྶ མཱཎཝསྶ ཏོདེཡྻཔུཏྟསྶ ནིཝེསནཾ, ཏེནུཔསངྐམཏུ ཨནུཀམྤཾ ཨུཔཱདཱཡཱ’ཏི’’ཨཱདཱིསུ (དཱི॰ ནི॰ ༡.༤༤༥) ནིདསྶནེ། ‘‘‘ཏཾ ཀིཾ མཉྙཐ, ཀཱལཱམཱ, ཨིམེ དྷམྨཱ ཀུསལཱ ཝཱ ཨཀུསལཱ ཝཱ’ཏི? ‘ཨཀུསལཱ, བྷནྟེ’། ‘སཱཝཛྫཱ ཝཱ ཨནཝཛྫཱ ཝཱ’ཏི? ‘སཱཝཛྫཱ, བྷནྟེ’། ‘ཝིཉྙཱུགརཧིཏཱ ཝཱ ཝིཉྙུཔྤསཏྠཱ ཝཱ’ཏི? ‘ཝིཉྙཱུགརཧིཏཱ, བྷནྟེ’། ‘སམཏྟཱ སམཱདིནྣཱ ཨཧིཏཱཡ དུཀྑཱཡ སཾཝཏྟནྟི, ནོ’ཝཱ? ‘ཀཐཾ ཝོ ཨེཏྠ ཧོཏཱི’ཏི? ‘སམཏྟཱ, བྷནྟེ, སམཱདིནྣཱ ཨཧིཏཱཡ དུཀྑཱཡ སཾཝཏྟནྟི, ཨེཝཾ ནོ ཨེཏྠ ཧོཏཱིཏི’’’ཨཱདཱིསུ (ཨ॰ ནི॰ ༣.༦༦) ཨཝདྷཱརཎེ། ‘‘ཨེཝམེཏེ སུནྷཱཏཱ སུཝིལིཏྟཱ ཀཔྤིཏཀེསམསྶཱུ ཨཱམུཏྟམཱལཱབྷརཎཱ’’ཏིཨཱདཱིསུ (དཱི॰ ནི॰ ༡.༢༨༦) པུཙྪཱཡཾ། ‘‘ཨེཝཾགཏཱནི པུཐུསིཔྤཱཡཏནཱནི (དཱི॰ ནི॰ ༡.༡༨༢), ཨེཝཾཝིདྷོ ཨེཝམཱཀཱརོ’’ཏིཨཱདཱིསུ ཨིདཾསདྡསྶ ཨཏྠེ། གཏསདྡོ ཧི པཀཱརཔརིཡཱཡོ, ཏཐཱ ཝིདྷཱཀཱརསདྡཱ། ཏཐཱ ཧི ཝིདྷཡུཏྟགཏསདྡེ ལོཀིཡཱ པཀཱརཏྠེ ཝདནྟི། ‘‘ཨེཝཾ ལཧུཔརིཝཏྟཾ ཨེཝམཱཡུཔརིཡནྟོ’’ཏིཨཱདཱིསུ (ཨ॰ ནི॰ ༡.༤༨) པརིམཱཎེ།

    Atthato pana evaṃsaddo tāva upamūpadesasampahaṃsanagarahaṇavacanasampaṭiggahākāra- nidassanāvadhāraṇapucchāidamatthaparimāṇādi anekatthappabhedo. Tathā hesa ‘‘evaṃ jātena maccena, kattabbaṃ kusalaṃ bahu’’nti evamādīsu (dha. pa. 53) upamāyaṃ āgato. ‘‘Evaṃ te abhikkamitabbaṃ, evaṃ te paṭikkamitabba’’ntiādīsu (a. ni. 4.122) upadese. ‘‘Evametaṃ bhagavā, evametaṃ sugatā’’tiādīsu (a. ni. 3.66) sampahaṃsane. ‘‘Evamevaṃ panāyaṃ vasalī yasmiṃ vā tasmiṃ vā tassa muṇḍakassa samaṇakassa vaṇṇaṃ bhāsatī’’tiādīsu (saṃ. ni. 1.187) garahaṇe. ‘‘Evaṃ, bhanteti kho te bhikkhū bhagavato paccassosu’’ntiādīsu (dī. ni. 2.3; ma. ni. 1.1) vacanasampaṭiggahe. ‘‘Evaṃ byā kho ahaṃ, bhante, bhagavatā dhammaṃ desitaṃ ājānāmī’’tiādīsu (ma. ni. 1.398) ākāre. ‘‘Ehi tvaṃ, māṇavaka, yena samaṇo ānando tenupasaṅkama, upasaṅkamitvā mama vacanena samaṇaṃ ānandaṃ appābādhaṃ appātaṅkaṃ lahuṭṭhānaṃ balaṃ phāsuvihāraṃ puccha ‘subho māṇavo todeyyaputto bhavantaṃ ānandaṃ appābādhaṃ appātaṅkaṃ lahuṭṭhānaṃ balaṃ phāsuvihāraṃ pucchatī’ti, evañca vadehi ‘sādhu kira bhavaṃ ānando yena subhassa māṇavassa todeyyaputtassa nivesanaṃ, tenupasaṅkamatu anukampaṃ upādāyā’ti’’ādīsu (dī. ni. 1.445) nidassane. ‘‘‘Taṃ kiṃ maññatha, kālāmā, ime dhammā kusalā vā akusalā vā’ti? ‘Akusalā, bhante’. ‘Sāvajjā vā anavajjā vā’ti? ‘Sāvajjā, bhante’. ‘Viññūgarahitā vā viññuppasatthā vā’ti? ‘Viññūgarahitā, bhante’. ‘Samattā samādinnā ahitāya dukkhāya saṃvattanti, no’vā? ‘Kathaṃ vo ettha hotī’ti? ‘Samattā, bhante, samādinnā ahitāya dukkhāya saṃvattanti, evaṃ no ettha hotīti’’’ādīsu (a. ni. 3.66) avadhāraṇe. ‘‘Evamete sunhātā suvilittā kappitakesamassū āmuttamālābharaṇā’’tiādīsu (dī. ni. 1.286) pucchāyaṃ. ‘‘Evaṃgatāni puthusippāyatanāni (dī. ni. 1.182), evaṃvidho evamākāro’’tiādīsu idaṃsaddassa atthe. Gatasaddo hi pakārapariyāyo, tathā vidhākārasaddā. Tathā hi vidhayuttagatasadde lokiyā pakāratthe vadanti. ‘‘Evaṃ lahuparivattaṃ evamāyupariyanto’’tiādīsu (a. ni. 1.48) parimāṇe.

    ནནུ ཙ ‘‘ཨེཝཾ ཝིཏཀྐིཏཾ ནོ ཏུམྷེཧི, ཨེཝམཱཡུཔརིཡནྟོ’’ཏི ཙེཏྠ ཨེཝཾསདྡེན པུཙྪནཱཀཱརཔརིམཱཎཱཀཱརཱནཾ ཝུཏྟཏྟཱ ཨཱཀཱརཏྠོ ཨེཝ ཨེཝཾསདྡོཏི། ན, ཝིསེསསབྦྷཱཝཏོ། ཨཱཀཱརམཏྟཝཱཙཀོ ཧེཏྠ ཨེཝཾསདྡོ ཨཱཀཱརཏྠོཏི ཨདྷིཔྤེཏོ། ‘‘ཨེཝཾ བྱཱ ཁོ’’ཏིཨཱདཱིསུ པན ཨཱཀཱརཝིསེསཝཙནོ། ཨཱཀཱརཝིསེསཝཱཙིནོ ཙེཏེ ཨེཝཾསདྡཱ པུཙྪནཱཀཱརཔརིམཱཎཱཀཱརཱནཾ ཝཱཙཀཏྟཱ། ཨེཝཉྩ ཀཏྭཱ ‘‘ཨེཝཾ ཛཱཏེན མཙྩེནཱ’’ཏིཨཱདཱིནི ཨུཔམཱནཨུདཱཧརཎཱནི ཡུཛྫནྟི། ཏཏྠ ཧི –

    Nanu ca ‘‘evaṃ vitakkitaṃ no tumhehi, evamāyupariyanto’’ti cettha evaṃsaddena pucchanākāraparimāṇākārānaṃ vuttattā ākārattho eva evaṃsaddoti. Na, visesasabbhāvato. Ākāramattavācako hettha evaṃsaddo ākāratthoti adhippeto. ‘‘Evaṃ byā kho’’tiādīsu pana ākāravisesavacano. Ākāravisesavācino cete evaṃsaddā pucchanākāraparimāṇākārānaṃ vācakattā. Evañca katvā ‘‘evaṃ jātena maccenā’’tiādīni upamānaudāharaṇāni yujjanti. Tattha hi –

    ‘‘ཡཐཱཔི པུཔྥརཱསིམྷཱ, ཀཡིརཱ མཱལཱགུཎེ བཧཱུ།

    ‘‘Yathāpi puppharāsimhā, kayirā mālāguṇe bahū;

    ཨེཝཾ ཛཱཏེན མཙྩེན, ཀཏྟབྦཾ ཀུསལཾ བཧུ’’ནྟི༎ –

    Evaṃ jātena maccena, kattabbaṃ kusalaṃ bahu’’nti. –

    ཨེཏྠ པུཔྥརཱསིཊྛཱནཱིཡཏོ མནུསྶུཔྤཏྟི སཔྤུརིསཱུཔནིསྶཡསདྡྷམྨསྶཝནཡོནིསོམནསིཀཱརབྷོགསམྤཏྟིཨཱདིཏོ དཱནཱདིཔུཉྙཀིརིཡཱཧེཏུསམུདཱཡཏོ སོབྷཱསུགནྡྷཏཱདིགུཎཝིསེསཡོགཏོ མཱལཱགུཎསདིསིཡོ བཧུཀཱ པུཉྙཀིརིཡཱ མརིཏབྦསབྷཱཝཏཱཡ མཙྩེན ཀཏྟབྦཱཏི ཨབྷེདཏཱཡ པུཔྥརཱསི མཱལཱགུཎཱ ཙ ཨུཔམཱ, ཏེསཾ ཨུཔམཱནཱཀཱརོ ཡཐཱསདྡེན ཨནིཡམཏོ ཝུཏྟོ། པུན ཨེཝཾསདྡེན ནིཡམནཝསེན ཝུཏྟོ། སོ པན ཨུཔམཱཀཱརོ ནིཡམིཡམཱནོ ཨཏྠཏོ ཨུཔམཱ ཨེཝ ཧོཏཱིཏི ཝུཏྟཾ ‘‘ཨུཔམཱཡཾ ཨཱགཏོ’’ཏི།

    Ettha puppharāsiṭṭhānīyato manussuppatti sappurisūpanissayasaddhammassavanayonisomanasikārabhogasampattiādito dānādipuññakiriyāhetusamudāyato sobhāsugandhatādiguṇavisesayogato mālāguṇasadisiyo bahukā puññakiriyā maritabbasabhāvatāya maccena kattabbāti abhedatāya puppharāsi mālāguṇā ca upamā, tesaṃ upamānākāro yathāsaddena aniyamato vutto. Puna evaṃsaddena niyamanavasena vutto. So pana upamākāro niyamiyamāno atthato upamā eva hotīti vuttaṃ ‘‘upamāyaṃ āgato’’ti.

    ཏཐཱ ‘‘ཨེཝཾ ཨིམིནཱ ཨཱཀཱརེན ཨབྷིཀྐམིཏབྦ’’ནྟིཨཱདིནཱ ཨུཔདིསིཡམཱནཱཡ སམཎསཱརུཔྤཱཡ ཨཱཀཔྤསམྤཏྟིཡཱ ཡོ ཏཏྠ ཨུཔདེསཱཀཱརོ, སོ ཨཏྠཏོ ཨུཔདེསོཡེཝཱཏི ཝུཏྟཾ – ‘‘ཨེཝཾ ཏེ ཨབྷིཀྐམིཏབྦཾ, ཨེཝཾ ཏེ པཊིཀྐམིཏབྦནྟིཨཱདཱིསུ ཨུཔདེསེ’’ཏི།

    Tathā ‘‘evaṃ iminā ākārena abhikkamitabba’’ntiādinā upadisiyamānāya samaṇasāruppāya ākappasampattiyā yo tattha upadesākāro, so atthato upadesoyevāti vuttaṃ – ‘‘evaṃ te abhikkamitabbaṃ, evaṃ te paṭikkamitabbantiādīsu upadese’’ti.

    ‘‘ཨེཝམེཏཾ བྷགཝཱ, ཨེཝམེཏཾ སུགཏཱ’’ཏི ཨེཏྠ བྷགཝཏཱ ཡཐཱཝུཏྟམཏྠཾ ཨཝིཔརཱིཏཏོ ཛཱནནྟེཧི ཀཏཾ ཡཾ ཏཏྠ ཝིཛྫམཱནགུཎཱནཾ པཀཱརེཧི ཧཾསནཾ ཨུདགྒཏཱཀརཎཾ སམྤཧཾསནཾ, སོ ཏཏྠ པཧཾསནཱཀཱརོཏི ཝུཏྟནཡེན ཡོཛེཏབྦཾ།

    ‘‘Evametaṃ bhagavā, evametaṃ sugatā’’ti ettha bhagavatā yathāvuttamatthaṃ aviparītato jānantehi kataṃ yaṃ tattha vijjamānaguṇānaṃ pakārehi haṃsanaṃ udaggatākaraṇaṃ sampahaṃsanaṃ, so tattha pahaṃsanākāroti vuttanayena yojetabbaṃ.

    ‘‘ཨེཝམེཝཾ པནཱཡ’’ནྟི ཨེཏྠ གརཧཎཱཀཱརོཏི ཝུཏྟནཡེན ཡོཛེཏབྦཾ། སོ ཙ གརཧཎཱཀཱརོ ‘‘ཝསལཱི’’ཏིཨཱདིཁུཾསནསདྡསནྣིདྷཱནཏོ ཨིདྷ ཨེཝཾསདྡེན པཀཱསིཏོཏི ཝིཉྙཱཡཏི། ཡཐཱ ཙེཏྠ, ཨེཝཾ ཨུཔམཱཀཱརཱདཡོཔི ཨུཔམཱདིཝསེན ཝུཏྟཱནཾ པུཔྥརཱསིཨཱདིསདྡཱནཾ སནྣིདྷཱནཏོ ཝུཏྟཱཏི ཝེདིཏབྦཾ།

    ‘‘Evamevaṃ panāya’’nti ettha garahaṇākāroti vuttanayena yojetabbaṃ. So ca garahaṇākāro ‘‘vasalī’’tiādikhuṃsanasaddasannidhānato idha evaṃsaddena pakāsitoti viññāyati. Yathā cettha, evaṃ upamākārādayopi upamādivasena vuttānaṃ puppharāsiādisaddānaṃ sannidhānato vuttāti veditabbaṃ.

    ‘‘ཨེཝཾ ནོ’’ཏི ཨེཏྠཱཔི ཏེསཾ ཡཐཱཝུཏྟདྷམྨཱནཾ ཨཧིཏདུཀྑཱཝཧབྷཱཝེན སནྣིཊྛཱནཛནནཏྠཾ ཨནུམཏིགྒཧཎཝསེན ‘‘ནོ ཝཱ ཀཐཾ ཝོ ཨེཏྠ ཧོཏཱི’’ཏི པུཙྪཱཡ ཀཏཱཡ ‘‘ཨེཝཾ ནོ ཨེཏྠ ཧོཏཱི’’ཏི ཝུཏྟཏྟཱ ཏདཱཀཱརསནྣིཊྛཱནཾ ཨེཝཾསདྡེན ཨཱཝིཀཏཾ། སོ པན ཏེསཾ དྷམྨཱནཾ ཨཧིཏཱཡ དུཀྑཱཡ སཾཝཏྟནཱཀཱརོ ནིཡམིཡམཱནོ ཨཝདྷཱརཎཏྠོ ཧོཏཱིཏི ཝུཏྟཾ – ‘‘ཨེཝཾ ནོ ཨེཏྠ ཧོཏཱིཏིཨཱདཱིསུ ཨཝདྷཱརཎེ’’ཏི།

    ‘‘Evaṃ no’’ti etthāpi tesaṃ yathāvuttadhammānaṃ ahitadukkhāvahabhāvena sanniṭṭhānajananatthaṃ anumatiggahaṇavasena ‘‘no vā kathaṃ vo ettha hotī’’ti pucchāya katāya ‘‘evaṃ no ettha hotī’’ti vuttattā tadākārasanniṭṭhānaṃ evaṃsaddena āvikataṃ. So pana tesaṃ dhammānaṃ ahitāya dukkhāya saṃvattanākāro niyamiyamāno avadhāraṇattho hotīti vuttaṃ – ‘‘evaṃ no ettha hotītiādīsu avadhāraṇe’’ti.

    ‘‘ཨེཝཉྩ ཝདེཧཱི’’ཏི ཡཐཱཧཾ ཝདཱམི ཨེཝཾ སམཎཾ ཨཱནནྡཾ ཝདེཧཱིཏི ཝདནཱཀཱརོ ཨིདཱནི ཝཏྟབྦོ ཨེཝཾསདྡེན ནིདསྶཱིཡཏཱིཏི ‘‘ནིདསྶནཏྠོ’’ཏི ཝུཏྟཾ།

    ‘‘Evañca vadehī’’ti yathāhaṃ vadāmi evaṃ samaṇaṃ ānandaṃ vadehīti vadanākāro idāni vattabbo evaṃsaddena nidassīyatīti ‘‘nidassanattho’’ti vuttaṃ.

    ཨེཝམཱཀཱརཝིསེསཝཱཙཱིནམྤི ཨེཏེསཾ ཨེཝཾསདྡཱནཾ ཨུཔམཱདིཝིསེསཏྠཝུཏྟིཏཱཡ ཨུཔམཱདིཨཏྠཏཱ ཝུཏྟཱ། ‘‘ཨེཝཾ, བྷནྟེ’’ཏི པན དྷམྨསྶ སཱདྷུཀཾ སཝནམནསིཀཱརེ ནིཡོཛིཏེཧི བྷིཀྑཱུཧི ཏཏྠ པཏིཊྛིཏབྷཱཝསྶ པཊིཛཱནནཝསེན ཝུཏྟཏྟཱ ཏཏྠ ཨེཝཾསདྡོ ཝཙནསམྤཊིགྒཧཏྠོ། ཏེན ཨེཝཾ, བྷནྟེཏི སཱདྷུ, བྷནྟེ, སུཊྛུ, བྷནྟེཏི ཝུཏྟཾ ཧོཏི། སྭཱཡམིདྷ ཨཱཀཱརནིདསྶནཱཝདྷཱརཎེསུ དཊྛབྦོ།

    Evamākāravisesavācīnampi etesaṃ evaṃsaddānaṃ upamādivisesatthavuttitāya upamādiatthatā vuttā. ‘‘Evaṃ, bhante’’ti pana dhammassa sādhukaṃ savanamanasikāre niyojitehi bhikkhūhi tattha patiṭṭhitabhāvassa paṭijānanavasena vuttattā tattha evaṃsaddo vacanasampaṭiggahattho. Tena evaṃ, bhanteti sādhu, bhante, suṭṭhu, bhanteti vuttaṃ hoti. Svāyamidha ākāranidassanāvadhāraṇesu daṭṭhabbo.

    ཏཏྠ ཨཱཀཱརཏྠེན ཨེཝཾསདྡེན ཨེཏམཏྠཾ དཱིཔེཏི – ནཱནཱནཡནིཔུཎམནེཀཛ྄ཛྷཱསཡསམུཊྛཱནཾ ཨཏྠབྱཉྫནསམྤནྣཾ ཝིཝིདྷཔཱཊིཧཱརིཡཾ དྷམྨཏྠདེསནཱཔཊིཝེདྷགམྦྷཱིརཾ སབྦསཏྟཱནཾ སཀསཀབྷཱསཱནུརཱུཔཏོ སོཏཔཐམཱགཙྪནྟཾ ཏསྶ བྷགཝཏོ ཝཙནཾ སབྦཔྤཀཱརེན ཀོ སམཏྠོ ཝིཉྙཱཏུཾ, སབྦཐཱམེན པན སོཏུཀཱམཏཾ ཛནེཏྭཱཔི ཨེཝཾ མེ སུཏཾ, མཡཱཔི ཨེཀེནཱཀཱརེན སུཏནྟི།

    Tattha ākāratthena evaṃsaddena etamatthaṃ dīpeti – nānānayanipuṇamanekajjhāsayasamuṭṭhānaṃ atthabyañjanasampannaṃ vividhapāṭihāriyaṃ dhammatthadesanāpaṭivedhagambhīraṃ sabbasattānaṃ sakasakabhāsānurūpato sotapathamāgacchantaṃ tassa bhagavato vacanaṃ sabbappakārena ko samattho viññātuṃ, sabbathāmena pana sotukāmataṃ janetvāpi evaṃ me sutaṃ, mayāpi ekenākārena sutanti.

    ཨེཏྠ ཙ ཨེཀཏྟནཱནཏྟཨབྱཱཔཱརཨེཝཾདྷམྨཏཱསངྑཱཏཱ ནནྡིཡཱཝཏྟཏིཔུཀྑལསཱིཧཝིཀྐཱིལི༹ཏདིསཱལོཙནཨངྐུསསངྑཱཏཱ ཙ ཨསྶཱདཱདིཝིསཡཱདིབྷེདེན ནཱནཱཝིདྷཱ ནཡཱ ནཱནཱནཡཱ། ནཡཱ ཝཱ པཱལི༹གཏིཡོ, ཏཱ ཙ པཉྙཏྟིཨནུཔཉྙཏྟཱདིཝསེན སཾཀིལེསབྷཱགིཡཱདིལོཀིཡཱདིཏདུབྷཡཝོམིསྶཀཱདིཝསེན ཀུསལཱདིཝསེན ཁནྡྷཱདིཝསེན, སངྒཧཱདིཝསེན, སམཡཝིམུཏྟཱདིཝསེན, ཋཔནཱདིཝསེན , ཀུསལམཱུལཱདིཝསེན, ཏིཀཔཊྛཱནཱདིཝསེན ཙ ནཱནཔྤཀཱརཱཏི ནཱནཱནཡཱ, ཏེཧི ནིཔུཎཾ སཎྷཾ སུཁུམནྟི ནཱནཱནཡནིཔུཎཾ།

    Ettha ca ekattanānattaabyāpāraevaṃdhammatāsaṅkhātā nandiyāvattatipukkhalasīhavikkīḷitadisālocanaaṅkusasaṅkhātā ca assādādivisayādibhedena nānāvidhā nayā nānānayā. Nayā vā pāḷigatiyo, tā ca paññattianupaññattādivasena saṃkilesabhāgiyādilokiyāditadubhayavomissakādivasena kusalādivasena khandhādivasena, saṅgahādivasena, samayavimuttādivasena, ṭhapanādivasena , kusalamūlādivasena, tikapaṭṭhānādivasena ca nānappakārāti nānānayā, tehi nipuṇaṃ saṇhaṃ sukhumanti nānānayanipuṇaṃ.

    ཨཱསཡོཝ ཨཛ྄ཛྷཱསཡོ, སོ ཙ སསྶཏཱདིབྷེདེན ཨཔྤརཛཀྑཏཱདིབྷེདེན ཙ ཨནེཀཝིདྷོ། ཨཏྟཛ྄ཛྷཱསཡཱདིཀོ ཨེཝ ཝཱ ཨནེཀོ ཨཛ྄ཛྷཱསཡོ ཨནེཀཛ྄ཛྷཱསཡོ། སོ སམུཊྛཱནཾ ཨུཔྤཏྟིཧེཏུ ཨེཏསྶཱཏི ཨནེཀཛ྄ཛྷཱསཡསམུཊྛཱནཾ།

    Āsayova ajjhāsayo, so ca sassatādibhedena apparajakkhatādibhedena ca anekavidho. Attajjhāsayādiko eva vā aneko ajjhāsayo anekajjhāsayo. So samuṭṭhānaṃ uppattihetu etassāti anekajjhāsayasamuṭṭhānaṃ.

    སཱིལཱདིཨཏྠསམྤཏྟིཡཱ ཏབྦིབྷཱཝནབྱཉྫནསམྤཏྟིཡཱ སངྐཱསནཔཀཱསནཝིཝརཎཝིབྷཛནཨུཏྟཱནཱིཀརཎཔཉྙཏྟིཝསེན ཚཧི ཨཏྠཔདེཧི ཨཀྑརཔདབྱཉྫནཱཀཱརནིརུཏྟིནིདྡེསཝསེན ཚཧི བྱཉྫནཔདེཧི ཙ སམནྣཱགཏཏྟཱ ཨཏྠབྱཉྫནསམྤནྣཾ།

    Sīlādiatthasampattiyā tabbibhāvanabyañjanasampattiyā saṅkāsanapakāsanavivaraṇavibhajanauttānīkaraṇapaññattivasena chahi atthapadehi akkharapadabyañjanākāraniruttiniddesavasena chahi byañjanapadehi ca samannāgatattā atthabyañjanasampannaṃ.

    ཨིདྡྷིཨཱདེསནཱནུསཱསནཱིབྷེདེན ཏེསུ ཙ ཨེཀེཀསྶ ཝིསཡཱདིབྷེདེན ཝིཝིདྷཾ བཧུཝིདྷཾ ཝཱ པཱཊིཧཱརིཡཾ ཨེཏསྶཱཏི ཝིཝིདྷཔཱཊིཧཱརིཡཾ། ཏཏྠ པཊིཔཀྑཧརཎཏོ རཱགཱདིཀིལེསཱཔནཡནཏོ པཱཊིཧཱརིཡནྟི ཨཏྠེ སཏི བྷགཝཏོ ན པཊིཔཀྑཱ རཱགཱདཡོ སནྟི ཡེ ཧརིཏབྦཱ, པུཐུཛྫནཱནམྤི ཝིགཏཱུཔཀྐིལེསེ ཨཊྛགུཎསམནྣཱགཏེ ཙིཏྟེ ཧཏཔཊིཔཀྑེ ཨིདྡྷིཝིདྷཾ པཝཏྟཏི, ཏསྨཱ ཏཏྠ པཝཏྟཝོཧཱརེན ཙ ན སཀྐཱ ཨིདྷ པཱཊིཧཱརིཡནྟི ཝཏྟུཾ། སཙེ པན མཧཱཀཱརུཎིཀསྶ བྷགཝཏོ ཝེནེཡྻགཏཱ ཙ ཀིལེསཱ པཊིཔཀྑཱ, ཏེསཾ ཧརཎཏོ པཱཊིཧཱརིཡནྟི ཝུཏྟཾ, ཨེཝཾ སཏི ཡུཏྟམེཏཾ། ཨཐ ཝཱ བྷགཝཏོ ཙེཝ སཱསནསྶ ཙ པཊིཔཀྑཱ ཏིཏྠིཡཱ, ཏེསཾ ཧརཎཏོ པཱཊིཧཱརིཡཾ། ཏེ ཧི དིཊྛིཧརཎཝསེན དིཊྛིཔྤཀཱསནེ ཨསམཏྠབྷཱཝེན ཙ ཨིདྡྷིཨཱདེསནཱནུསཱསནཱིཧི ཧརིཏཱ ཨཔནཱིཏཱ ཧོནྟི། པཊཱིཏི ཝཱ ཨཡཾ སདྡོ པཙྪཱཏི ཨེཏསྶ ཨཏྠཾ བོདྷེཏི ‘‘ཏསྨིཾ པཊིཔཝིཊྛམྷི, ཨཉྙོ ཨཱགཉྪི བྲཱཧྨཎོ’’ཏིཨཱདཱིསུ (ཙཱུལ༹ནི॰ པཱརཱཡནཝགྒ, ཝཏྠུགཱཐཱ ༤) ཝིཡ། ཏསྨཱ སམཱཧིཏེ ཙིཏྟེ ཝིགཏཱུཔཀྐིལེསེ ཀཏཀིཙྩེན པཙྪཱ ཧརིཏབྦཾ པཝཏྟེཏབྦནྟི པཊིཧཱརིཡཾ། ཨཏྟནོ ཝཱ ཨུཔཀྐིལེསེསུ ཙཏུཏྠཛ྄ཛྷཱནམགྒེཧི ཧརིཏེསུ པཙྪཱ ཧརཎཾ པཊིཧཱརིཡཾ། ཨིདྡྷིཨཱདེསནཱནུསཱསནིཡོ ཝིགཏཱུཔཀྐིལེསེན ཀཏཀིཙྩེན སཏྟཧིཏཏྠཾ པུན པཝཏྟེཏབྦཱ, ཧརིཏེསུ ཙ ཨཏྟནོ ཨུཔཀྐིལེསེསུ པརསཏྟཱནཾ ཨུཔཀྐིལེསཧརཎཱནི ཧོནྟཱིཏི པཊིཧཱརིཡཱནི བྷཝནྟི། པཊིཧཱརིཡམེཝ པཱཊིཧཱརིཡཾ, པཊིཧཱརིཡེ ཝཱ ཨིདྡྷིཨཱདེསནཱནུསཱསནཱིསམུདཱཡེ བྷཝཾ ཨེཀེཀཾ པཱཊིཧཱརིཡནྟི ཝུཙྩཏི། པཊིཧཱརིཡཾ ཝཱ ཙཏུཏྠཛ྄ཛྷཱནཾ མགྒོ ཙ པཊིཔཀྑཧརཎཏོ། ཏཏྠ ཛཱཏཾ ནིམིཏྟབྷཱུཏཏོ ཏཏོ ཝཱ ཨཱགཏནྟི པཱཊིཧཱརིཡནྟི ཨཏྠོ ཝེདིཏབྦོ།

    Iddhiādesanānusāsanībhedena tesu ca ekekassa visayādibhedena vividhaṃ bahuvidhaṃ vā pāṭihāriyaṃ etassāti vividhapāṭihāriyaṃ. Tattha paṭipakkhaharaṇato rāgādikilesāpanayanato pāṭihāriyanti atthe sati bhagavato na paṭipakkhā rāgādayo santi ye haritabbā, puthujjanānampi vigatūpakkilese aṭṭhaguṇasamannāgate citte hatapaṭipakkhe iddhividhaṃ pavattati, tasmā tattha pavattavohārena ca na sakkā idha pāṭihāriyanti vattuṃ. Sace pana mahākāruṇikassa bhagavato veneyyagatā ca kilesā paṭipakkhā, tesaṃ haraṇato pāṭihāriyanti vuttaṃ, evaṃ sati yuttametaṃ. Atha vā bhagavato ceva sāsanassa ca paṭipakkhā titthiyā, tesaṃ haraṇato pāṭihāriyaṃ. Te hi diṭṭhiharaṇavasena diṭṭhippakāsane asamatthabhāvena ca iddhiādesanānusāsanīhi haritā apanītā honti. Paṭīti vā ayaṃ saddo pacchāti etassa atthaṃ bodheti ‘‘tasmiṃ paṭipaviṭṭhamhi, añño āgañchi brāhmaṇo’’tiādīsu (cūḷani. pārāyanavagga, vatthugāthā 4) viya. Tasmā samāhite citte vigatūpakkilese katakiccena pacchā haritabbaṃ pavattetabbanti paṭihāriyaṃ. Attano vā upakkilesesu catutthajjhānamaggehi haritesu pacchā haraṇaṃ paṭihāriyaṃ. Iddhiādesanānusāsaniyo vigatūpakkilesena katakiccena sattahitatthaṃ puna pavattetabbā, haritesu ca attano upakkilesesu parasattānaṃ upakkilesaharaṇāni hontīti paṭihāriyāni bhavanti. Paṭihāriyameva pāṭihāriyaṃ, paṭihāriye vā iddhiādesanānusāsanīsamudāye bhavaṃ ekekaṃ pāṭihāriyanti vuccati. Paṭihāriyaṃ vā catutthajjhānaṃ maggo ca paṭipakkhaharaṇato. Tattha jātaṃ nimittabhūtato tato vā āgatanti pāṭihāriyanti attho veditabbo.

    ཡསྨཱ པན ཏནྟིཨཏྠདེསནཱ ཏབྦོཧཱརཱབྷིསམཡསངྑཱཏཱ ཧེཏུཧེཏུཕལཏདུབྷཡཔཉྙཏྟིཔཊིཝེདྷསངྑཱཏཱ ཝཱ དྷམྨཏྠདེསནཱཔཊིཝེདྷཱ གམྦྷཱིརཱ, སསཱདཱིཧི ཝིཡ མཧཱསམུདྡོ ཨནུཔཙིཏཀུསལསམྦྷཱརེཧི ཨལབྦྷནེཡྻཔྤཏིཊྛཱ དུཔྤརིཡོགཱཧཱ ཙ, ཏསྨཱ ཏེཧི ཙཏཱུཧི གམྦྷཱིརབྷཱཝེཧི ཡུཏྟནྟི བྷགཝཏོ ཝཙནཾ དྷམྨཏྠདེསནཱཔཊིཝེདྷགམྦྷཱིརཾ།

    Yasmā pana tantiatthadesanā tabbohārābhisamayasaṅkhātā hetuhetuphalatadubhayapaññattipaṭivedhasaṅkhātā vā dhammatthadesanāpaṭivedhā gambhīrā, sasādīhi viya mahāsamuddo anupacitakusalasambhārehi alabbhaneyyappatiṭṭhā duppariyogāhā ca, tasmā tehi catūhi gambhīrabhāvehi yuttanti bhagavato vacanaṃ dhammatthadesanāpaṭivedhagambhīraṃ.

    ཨེཀོ ཨེཝ བྷགཝཏོ དྷམྨདེསནཱགྷོསོ, ཨེཀསྨིཾ ཁཎེ པཝཏྟམཱནོ ནཱནཱབྷཱསཱནཾ སཏྟཱནཾ ཨཏྟནོ ཨཏྟནོ བྷཱསཱཝསེན ཨཔུབྦཾ ཨཙརིམཾ གཧཎཱུཔགོ ཧོཏི། ཨཙིནྟེཡྻོ ཧི བུདྡྷཱནཾ བུདྡྷཱནུབྷཱཝོཏི སབྦསཏྟཱནཾ སཀསཀབྷཱསཱནུརཱུཔཏོ སོཏཔཐཾ ཨཱགཙྪཏཱིཏི ཝེདིཏབྦཾ།

    Eko eva bhagavato dhammadesanāghoso, ekasmiṃ khaṇe pavattamāno nānābhāsānaṃ sattānaṃ attano attano bhāsāvasena apubbaṃ acarimaṃ gahaṇūpago hoti. Acinteyyo hi buddhānaṃ buddhānubhāvoti sabbasattānaṃ sakasakabhāsānurūpato sotapathaṃ āgacchatīti veditabbaṃ.

    ནིདསྶནཏྠེན ‘‘ནཱཧཾ སཡམྦྷཱུ, ན མཡཱ ཨིདཾ སཙྪིཀཏ’’ནྟི ཨཏྟཱནཾ པརིམོཙེནྟོ ‘‘ཨེཝཾ མེ སུཏཾ, མཡཱཔི ཨེཝཾ སུཏ’’ནྟི ཨིདཱནི ཝཏྟབྦཾ སཀལཾ སུཏྟཾ ནིདསྶེཏི།

    Nidassanatthena ‘‘nāhaṃ sayambhū, na mayā idaṃ sacchikata’’nti attānaṃ parimocento ‘‘evaṃ me sutaṃ, mayāpi evaṃ suta’’nti idāni vattabbaṃ sakalaṃ suttaṃ nidasseti.

    ཨཝདྷཱརཎཏྠེན ‘‘ཨེཏདགྒཾ, བྷིཀྑཝེ, མམ སཱཝཀཱནཾ བྷིཀྑཱུནཾ བཧུསྶུཏཱནཾ ཡདིདཾ ཨཱནནྡོ, གཏིམནྟཱནཾ, སཏིམནྟཱནཾ, དྷིཏིམནྟཱནཾ, ཨུཔཊྛཱཀཱནཾ ཡདིདཾ ཨཱནནྡོ’’ཏི (ཨ॰ ནི॰ ༡.༢༡༩-༢༢༣) ཨེཝཾ བྷགཝཏཱ, ‘‘ཨཱཡསྨཱ ཨཱནནྡོ ཨཏྠཀུསལོ, དྷམྨཀུསལོ, བྱཉྫནཀུསལོ, ནིརུཏྟིཀུསལོ, པུབྦཱཔརཀུསལོ’’ཏི (ཨ॰ ནི॰ ༥.༡༦༩) ཨེཝཾ དྷམྨསེནཱཔཏིནཱ ཙ པསཏྠབྷཱཝཱནུརཱུཔཾ ཨཏྟནོ དྷཱརཎབལཾ དསྶེནྟོ སཏྟཱནཾ སོཏུཀཱམཏཾ ཛནེཏི། ‘‘ཨེཝཾ མེ སུཏཾ, ཏཉྩ ཁོ ཨཏྠཏོ ཝཱ བྱཉྫནཏོ ཝཱ ཨནཱུནམནདྷིཀཾ, ཨེཝམེཝ ན ཨཉྙཐཱ དཊྛབྦ’’ནྟི། ཨཉྙཐཱཏི བྷགཝཏོ སམྨུཁཱ སུཏཱཀཱརཏོ ཨཉྙཐཱ ན པན བྷགཝཏཱ དེསིཏཱཀཱརཏོ། ཨཙིནྟེཡྻཱནུབྷཱཝཱ ཧི བྷགཝཏོ དེསནཱ, སཱ ནེཝ སབྦཱཀཱརེན སཀྐཱ ཝིཉྙཱཏུནྟི ཝུཏྟོཝཱཡམཏྠོ། སུཏཱཀཱརཱཝིརུཛ྄ཛྷནམེཝ ཧི དྷཱརཎབལཾ།

    Avadhāraṇatthena ‘‘etadaggaṃ, bhikkhave, mama sāvakānaṃ bhikkhūnaṃ bahussutānaṃ yadidaṃ ānando, gatimantānaṃ, satimantānaṃ, dhitimantānaṃ, upaṭṭhākānaṃ yadidaṃ ānando’’ti (a. ni. 1.219-223) evaṃ bhagavatā, ‘‘āyasmā ānando atthakusalo, dhammakusalo, byañjanakusalo, niruttikusalo, pubbāparakusalo’’ti (a. ni. 5.169) evaṃ dhammasenāpatinā ca pasatthabhāvānurūpaṃ attano dhāraṇabalaṃ dassento sattānaṃ sotukāmataṃ janeti. ‘‘Evaṃ me sutaṃ, tañca kho atthato vā byañjanato vā anūnamanadhikaṃ, evameva na aññathā daṭṭhabba’’nti. Aññathāti bhagavato sammukhā sutākārato aññathā na pana bhagavatā desitākārato. Acinteyyānubhāvā hi bhagavato desanā, sā neva sabbākārena sakkā viññātunti vuttovāyamattho. Sutākārāvirujjhanameva hi dhāraṇabalaṃ.

    མེསདྡོ ཏཱིསུ ཨཏྠེསུ དིསྶཏི། ཏཐཱ ཧིསྶ ‘‘གཱཐཱབྷིགཱིཏཾ མེ ཨབྷོཛནེཡྻ’’ནྟིཨཱདཱིསུ (སཾ॰ ནི॰ ༡.༡༩༤; སུ॰ ནི॰ ༨༡) མཡཱཏི ཨཏྠོ། ‘‘སཱདྷུ མེ, བྷནྟེ, བྷགཝཱ སཾཁིཏྟེན དྷམྨཾ དེསེཏཱུ’’ཏིཨཱདཱིསུ (སཾ॰ ནི॰ ༤.༨༨; ༥.༣༨༢; ཨ॰ ནི॰ ༤.༢༥༧) མཡ྄ཧནྟི ཨཏྠོ། ‘‘དྷམྨདཱཡཱདཱ མེ, བྷིཀྑཝེ, བྷཝཐཱ’’ཏིཨཱདཱིསུ (མ॰ ནི॰ ༡.༢༩) མམཱཏི ཨཏྠོ། ཨིདྷ པན ‘‘མཡཱ སུཏཾ, མམ སུཏ’’ནྟི ཙ ཨཏྠདྭཡེ ཡུཛྫཏི།

    Mesaddo tīsu atthesu dissati. Tathā hissa ‘‘gāthābhigītaṃ me abhojaneyya’’ntiādīsu (saṃ. ni. 1.194; su. ni. 81) mayāti attho. ‘‘Sādhu me, bhante, bhagavā saṃkhittena dhammaṃ desetū’’tiādīsu (saṃ. ni. 4.88; 5.382; a. ni. 4.257) mayhanti attho. ‘‘Dhammadāyādā me, bhikkhave, bhavathā’’tiādīsu (ma. ni. 1.29) mamāti attho. Idha pana ‘‘mayā sutaṃ, mama suta’’nti ca atthadvaye yujjati.

    ཨེཏྠ ཙ ཡོ པརོ ན ཧོཏི, སོ ཨཏྟཱཏི ཨེཝཾ ཝཏྟབྦེ ནིཡཀཛ྄ཛྷཏྟསངྑཱཏེ སསནྟཱནེ ཝཏྟནཏོ ཏིཝིདྷོཔི མེསདྡོ ཀིཉྩཱཔི ཨེཀསྨིཾཡེཝ ཨཏྠེ དིསྶཏི, ཀརཎསམྤདཱནཱདིཝིསེསསངྑཱཏོ པན ཝིཉྙཱཡཏེཝཱཡཾ ཨཏྠབྷེདོཏི ‘‘མེ-སདྡོ ཏཱིསུ ཨཏྠེསུ དིསྶཏཱི’’ཏི ཝུཏྟོཏི དཊྛབྦཾ།

    Ettha ca yo paro na hoti, so attāti evaṃ vattabbe niyakajjhattasaṅkhāte sasantāne vattanato tividhopi mesaddo kiñcāpi ekasmiṃyeva atthe dissati, karaṇasampadānādivisesasaṅkhāto pana viññāyatevāyaṃ atthabhedoti ‘‘me-saddo tīsu atthesu dissatī’’ti vuttoti daṭṭhabbaṃ.

    སུཏནྟི ཨཡཾ སུཏསདྡོ སཨུཔསགྒོ ཨནུཔསགྒོ ཙ གམནཝིསྶུཏཀིལིནྣཱུཔཙིཏཱནུཡོགསོཏཝིཉྙེཡྻ སོཏདྭཱརཱནུསཱར ཝིཉྙཱཏཱདིཨནེཀཏྠཔྤབྷེདོ། ཀིཉྩཱཔི ཧི ཨུཔསགྒོ ཀིརིཡཾ ཝིསེསེཏི, ཛོཏཀབྷཱཝཏོ པན སཏིཔི ཏསྨིཾ སུཏསདྡོ ཨེཝ ཏཾ ཏམཏྠཾ ཝདཏཱིཏི ཨནུཔསགྒསྶ སུཏསདྡསྶ ཨཏྠུདྡྷཱརེ སཨུཔསགྒསྶ གཧཎཾ ན ཝིརུཛ྄ཛྷཏི།

    Sutanti ayaṃ sutasaddo saupasaggo anupasaggo ca gamanavissutakilinnūpacitānuyogasotaviññeyya sotadvārānusāra viññātādianekatthappabhedo. Kiñcāpi hi upasaggo kiriyaṃ viseseti, jotakabhāvato pana satipi tasmiṃ sutasaddo eva taṃ tamatthaṃ vadatīti anupasaggassa sutasaddassa atthuddhāre saupasaggassa gahaṇaṃ na virujjhati.

    ཏཏྠ ‘‘སེནཱཡ པསུཏོ’’ཏིཨཱདཱིསུ གཙྪནྟོཏི ཨཏྠོ། ‘‘སུཏདྷམྨསྶ པསྶཏོ’’ཏིཨཱདཱིསུ (ཨུདཱ॰ ༡༡) ཝིསྶུཏདྷམྨསྶཱཏི ཨཏྠོ། ‘‘ཨཝསྶུཏཱ ཨཝསྶུཏསྶཱ’’ཏིཨཱདཱིསུ (པཱཙི॰ ༦༥༧) ཀིལེསེན ཀིལིནྣཱ ཀིལིནྣསྶཱཏི ཨཏྠོ། ‘‘ཏུམྷེཧི པུཉྙཾ པསུཏཾ ཨནཔྤཀ’’ནྟིཨཱདཱིསུ (ཁུ॰ པཱ॰ ༧.༡༢) ཨུཔཙིཏནྟི ཨཏྠོ། ‘‘ཡེ ཛྷཱནཔྤསུཏཱ དྷཱིརཱ’’ཏིཨཱདཱིསུ (དྷ॰ པ॰ ༡༨༡) ཛྷཱནཱནུཡུཏྟཱཏི ཨཏྠོ། ‘‘དིཊྛཾ སུཏཾ མུཏ’’ནྟིཨཱདཱིསུ (མ॰ ནི॰ ༡.༢༤༡) སོཏཝིཉྙེཡྻནྟི ཨཏྠོ། ‘‘སུཏདྷརོ སུཏསནྣིཙཡོ’’ཏིཨཱདཱིསུ (མ॰ ནི॰ ༡.༣༣༩) སོཏདྭཱརཱནུསཱརཝིཉྙཱཏདྷརོཏི ཨཏྠོ། ཨིདྷ པནསྶ ‘‘སོཏདྭཱརཱནུསཱརེན ཨུཔདྷཱརིཏ’’ནྟི ཝཱ ‘‘ཨུཔདྷཱརཎ’’ནྟི ཝཱ ཨཏྠོ། མེ-སདྡསྶ ཧི མཡཱཏི ཨཏྠེ སཏི ‘‘ཨེཝཾ མཡཱ སུཏཾ སོཏདྭཱརཱནུསཱརེན ཨུཔདྷཱརིཏ’’ནྟི ཡུཛྫཏི། མམཱཏི ཨཏྠེ སཏི ‘‘ཨེཝཾ མམ སུཏཾ སོཏདྭཱརཱནུསཱརེན ཨུཔདྷཱརཎ’’ནྟི ཡུཛྫཏི།

    Tattha ‘‘senāya pasuto’’tiādīsu gacchantoti attho. ‘‘Sutadhammassa passato’’tiādīsu (udā. 11) vissutadhammassāti attho. ‘‘Avassutā avassutassā’’tiādīsu (pāci. 657) kilesena kilinnā kilinnassāti attho. ‘‘Tumhehi puññaṃ pasutaṃ anappaka’’ntiādīsu (khu. pā. 7.12) upacitanti attho. ‘‘Ye jhānappasutā dhīrā’’tiādīsu (dha. pa. 181) jhānānuyuttāti attho. ‘‘Diṭṭhaṃ sutaṃ muta’’ntiādīsu (ma. ni. 1.241) sotaviññeyyanti attho. ‘‘Sutadharo sutasannicayo’’tiādīsu (ma. ni. 1.339) sotadvārānusāraviññātadharoti attho. Idha panassa ‘‘sotadvārānusārena upadhārita’’nti vā ‘‘upadhāraṇa’’nti vā attho. Me-saddassa hi mayāti atthe sati ‘‘evaṃ mayā sutaṃ sotadvārānusārena upadhārita’’nti yujjati. Mamāti atthe sati ‘‘evaṃ mama sutaṃ sotadvārānusārena upadhāraṇa’’nti yujjati.

    ཨེཝམེཏེསུ ཏཱིསུ པདེསུ ཡསྨཱ སུཏསདྡསནྣིདྷཱནེ པཡུཏྟེན ཨེཝཾསདྡེན སཝནཀིརིཡཱཛོཏཀེན བྷཝིཏབྦཾ, ཏསྨཱ ཨེཝནྟི སོཏཝིཉྙཱཎསམྤཊིཙྪནཱདིསོཏདྭཱརིཀཝིཉྙཱཎཱནནྟརཾ ཨུཔྤནྣམནོདྭཱརིཀཝིཉྙཱཎཀིཙྩནིདསྶནཾ། མེཏི ཝུཏྟཝིཉྙཱཎསམངྒཱིཔུགྒལནིདསྶནཾ། སབྦཱནི ཧི ཝཱཀྱཱནི ཨེཝཀཱརཏྠསཧིཏཱནིཡེཝ ཨཝདྷཱརཎཕལཏྟཱ ཏེསཾ། སུཏནྟི ཨསྶཝནབྷཱཝཔྤཊིཀྑེཔཏོ ཨནཱུནཱནདྷིཀཱཝིཔརཱིཏགྒཧཎནིདསྶནཾ། ཡཐཱ ཧི སུཏཾ སུཏམེཝཱཏི ཝཏྟབྦཏཾ ཨརཧཏི ཏཐཱ ཏཾ སམྨཱ སུཏཾ ཨནཱུནགྒཧཎཾ ཨནདྷིཀགྒཧཎཾ ཨཝིཔརཱིཏགྒཧཎཉྩ ཧོཏཱིཏི། ཨཐ ཝཱ སདྡནྟརཏྠཱཔོཧནཝསེན སདྡོ ཨཏྠཾ ཝདཏཱིཏི ཨེཏསྨིཾ པཀྑེ ཡསྨཱ སུཏནྟི ཨེཏསྶ ཨསུཏཾ ན ཧོཏཱིཏི ཨཡམཏྠོ ཝུཏྟོ, ཏསྨཱ སུཏནྟི ཨསྶཝནབྷཱཝཔྤཊིཀྑེཔཏོ ཨནཱུནཱནདྷིཀཱཝིཔརཱིཏགྒཧཎནིདསྶནཾ། ཨིདཾ ཝུཏྟཾ ཧོཏི – ཨེཝཾ མེ སུཏཾ, ན མཡཱ ཨིདཾ དིཊྛཾ, ན སཡམྦྷཱུཉཱཎེན སཙྪིཀཏཾ, ན ཨཉྙཐཱ ཝཱ ཨུཔལདྡྷཾ། ཨཔི ཙ སུཏཾཝ, ཏཉྩ ཁོ སམྨདེཝཱཏི། ཨཝདྷཱརཎཏྠེ ཝཱ ཨེཝཾསདྡེ ཨཡམཏྠཡོཛནཱ, ཏདཔེཀྑསྶ སུཏསདྡསྶ ནིཡམཏྠོ སམྦྷཝཏཱིཏི ཏདཔེཀྑསྶ སུཏསདྡསྶ ཨསྶཝནབྷཱཝཔྤཊིཀྑེཔོ ཨནཱུནཱནདྷིཀཱཝིཔརཱིཏགྒཧཎནིདསྶནཏཱ ཙ ཝེདིཏབྦཱ། ཨིཏི སཝནཧེཏུསཝནཝིསེསཝསེནཔི སུཏསདྡསྶ ཨཏྠཡོཛནཱ ཀཏཱཏི དཊྛབྦཾ།

    Evametesu tīsu padesu yasmā sutasaddasannidhāne payuttena evaṃsaddena savanakiriyājotakena bhavitabbaṃ, tasmā evanti sotaviññāṇasampaṭicchanādisotadvārikaviññāṇānantaraṃ uppannamanodvārikaviññāṇakiccanidassanaṃ. Meti vuttaviññāṇasamaṅgīpuggalanidassanaṃ. Sabbāni hi vākyāni evakāratthasahitāniyeva avadhāraṇaphalattā tesaṃ. Sutanti assavanabhāvappaṭikkhepato anūnānadhikāviparītaggahaṇanidassanaṃ. Yathā hi sutaṃ sutamevāti vattabbataṃ arahati tathā taṃ sammā sutaṃ anūnaggahaṇaṃ anadhikaggahaṇaṃ aviparītaggahaṇañca hotīti. Atha vā saddantaratthāpohanavasena saddo atthaṃ vadatīti etasmiṃ pakkhe yasmā sutanti etassa asutaṃ na hotīti ayamattho vutto, tasmā sutanti assavanabhāvappaṭikkhepato anūnānadhikāviparītaggahaṇanidassanaṃ. Idaṃ vuttaṃ hoti – evaṃ me sutaṃ, na mayā idaṃ diṭṭhaṃ, na sayambhūñāṇena sacchikataṃ, na aññathā vā upaladdhaṃ. Api ca sutaṃva, tañca kho sammadevāti. Avadhāraṇatthe vā evaṃsadde ayamatthayojanā, tadapekkhassa sutasaddassa niyamattho sambhavatīti tadapekkhassa sutasaddassa assavanabhāvappaṭikkhepo anūnānadhikāviparītaggahaṇanidassanatā ca veditabbā. Iti savanahetusavanavisesavasenapi sutasaddassa atthayojanā katāti daṭṭhabbaṃ.

    ཏཐཱ ཨེཝནྟི ཏསྶཱ སོཏདྭཱརཱནུསཱརེན པཝཏྟཱཡ ཝིཉྙཱཎཝཱིཐིཡཱ ནཱནཏྠབྱཉྫནགྒཧཎཏོ ནཱནཔྤཀཱརེན ཨཱརམྨཎེ པཝཏྟིབྷཱཝཔྤཀཱསནཾ ཨཱཀཱརཏྠོ ཨེཝཾསདྡོཏི ཀརིཏྭཱ། མེཏི ཨཏྟཔྤཀཱསནཾ། སུཏནྟི དྷམྨཔྤཀཱསནཾ ཡཐཱཝུཏྟཱཡ ཝིཉྙཱཎཝཱིཐིཡཱ པརིཡཏྟིདྷམྨཱརམྨཎཏྟཱ། ཨཡཉྷེཏྠ སངྑེཔོ – ནཱནཔྤཀཱརེན ཨཱརམྨཎེ པཝཏྟཱཡ ཝིཉྙཱཎཝཱིཐིཡཱ ཀརཎབྷཱུཏཱཡ མཡཱ ན ཨཉྙཾ ཀཏཾ, ཨིདཾ པན ཀཏཾ, ཨཡཾ དྷམྨོ སུཏོཏི།

    Tathā evanti tassā sotadvārānusārena pavattāya viññāṇavīthiyā nānatthabyañjanaggahaṇato nānappakārena ārammaṇe pavattibhāvappakāsanaṃ ākārattho evaṃsaddoti karitvā. Meti attappakāsanaṃ. Sutanti dhammappakāsanaṃ yathāvuttāya viññāṇavīthiyā pariyattidhammārammaṇattā. Ayañhettha saṅkhepo – nānappakārena ārammaṇe pavattāya viññāṇavīthiyā karaṇabhūtāya mayā na aññaṃ kataṃ, idaṃ pana kataṃ, ayaṃ dhammo sutoti.

    ཏཐཱ ཨེཝནྟི ནིདསྶིཏབྦཔྤཀཱསནཾ ནིདསྶནཏྠོ ཨེཝཾསདྡོཏི ཀཏྭཱ ནིདསྶེཏབྦསྶ ནིདྡིསིཏབྦབྷཱཝཏོ། ཏསྨཱ ཨེཝཾསདྡེན སཀལམྤི སུཏྟཾ པཙྩཱམཊྛནྟི ཝེདིཏབྦཾ། མེཏི པུགྒལཔྤཀཱསནཾ། སུཏནྟི པུགྒལཀིཙྩཔྤཀཱསནཾ། སུཏསདྡེན ཧི ལབྦྷམཱནཱ སཝནཀིརིཡཱ སཝནཝིཉྙཱཎཔྤབནྡྷཔྤཊིབདྡྷཱ, ཏཏྠ ཙ པུགྒལཝོཧཱརོ, ན ཙ པུགྒལཝོཧཱརརཧིཏེ དྷམྨཔྤབནྡྷེ སཝནཀིརིཡཱ ལབྦྷཏི། ཏསྶཱཡཾ སངྑེཔཏྠོ – ཡཾ སུཏྟཾ ནིདྡིསིསྶཱམི, ཏཾ མཡཱ ཨེཝཾ སུཏནྟི།

    Tathā evanti nidassitabbappakāsanaṃ nidassanattho evaṃsaddoti katvā nidassetabbassa niddisitabbabhāvato. Tasmā evaṃsaddena sakalampi suttaṃ paccāmaṭṭhanti veditabbaṃ. Meti puggalappakāsanaṃ. Sutanti puggalakiccappakāsanaṃ. Sutasaddena hi labbhamānā savanakiriyā savanaviññāṇappabandhappaṭibaddhā, tattha ca puggalavohāro, na ca puggalavohārarahite dhammappabandhe savanakiriyā labbhati. Tassāyaṃ saṅkhepattho – yaṃ suttaṃ niddisissāmi, taṃ mayā evaṃ sutanti.

    ཏཐཱ ཨེཝནྟི ཡསྶ ཙིཏྟསནྟཱནསྶ ནཱནཱརམྨཎཔྤཝཏྟིཡཱ ནཱནཏྠབྱཉྫནགྒཧཎཾ ཧོཏི, ཏསྶ ནཱནཱཀཱརནིདྡེསོ ཨཱཀཱརཏྠོ ཨེཝ ཨེཝཾསདྡོཏི ཀཏྭཱ། ཨེཝནྟི ཧི ཨཡམཱཀཱརཔཉྙཏྟི དྷམྨཱནཾ ཏཾ ཏཾ པཝཏྟིཨཱཀཱརཾ ཨུཔཱདཱཡ པཉྙཔེཏབྦསབྷཱཝཏྟཱ། མེཏི ཀཏྟུནིདྡེསོ། སུཏནྟི ཝིསཡནིདྡེསོ, སོཏབྦོ ཧི དྷམྨོ སཝནཀིརིཡཱཀཏྟུཔུགྒལསྶ སཝནཀིརིཡཱཝསེན པཝཏྟིཊྛཱནཾ ཧོཏི། ཨེཏྟཱཝཏཱ ནཱནཔྤཀཱརེན པཝཏྟེན ཙིཏྟསནྟཱནེན ཏཾསམངྒིནོ ཀཏྟུ ཝིསཡེ གཧཎསནྣིཊྛཱནཾ དསྶིཏཾ ཧོཏི།

    Tathā evanti yassa cittasantānassa nānārammaṇappavattiyā nānatthabyañjanaggahaṇaṃ hoti, tassa nānākāraniddeso ākārattho eva evaṃsaddoti katvā. Evanti hi ayamākārapaññatti dhammānaṃ taṃ taṃ pavattiākāraṃ upādāya paññapetabbasabhāvattā. Meti kattuniddeso. Sutanti visayaniddeso, sotabbo hi dhammo savanakiriyākattupuggalassa savanakiriyāvasena pavattiṭṭhānaṃ hoti. Ettāvatā nānappakārena pavattena cittasantānena taṃsamaṅgino kattu visaye gahaṇasanniṭṭhānaṃ dassitaṃ hoti.

    ཨཐ ཝཱ ཨེཝནྟི པུགྒལཀིཙྩནིདྡེསོ, སུཏཱནཉྷི དྷམྨཱནཾ གཧིཏཱཀཱརསྶ ནིདསྶནསྶ ཨཝདྷཱརཎསྶ ཝཱ པཀཱསནསབྷཱཝེན ཨེཝཾསདྡེན ཏདཱཀཱརཱདིདྷཱརཎསྶ པུགྒལཝོཧཱརུཔཱདཱནདྷམྨབྱཱཔཱརབྷཱཝཏོ པུགྒལཀིཙྩཾནཱམ ནིདྡིཊྛཾ ཧོཏཱིཏི། སུཏནྟི ཝིཉྙཱཎཀིཙྩནིདྡེསོ, པུགྒལཝཱདིནོཔི ཧི སཝནཀིརིཡཱ ཝིཉྙཱཎནིརཔེཀྑཱ ན ཧོཏཱིཏི། མེཏི ཨུབྷཡཀིཙྩཡུཏྟཔུགྒལནིདྡེསོ། མེཏི ཧི སདྡཔྤཝཏྟི ཨེཀནྟེནེཝ སཏྟཝིསེསཝིསཡཱ ཝིཉྙཱཎཀིཙྩཉྩ ཏཏྠེཝ སམོདཧིཏབྦནྟི། ཨཡཾ པནེཏྠ སངྑེཔོ – མཡཱ སཝནཀིཙྩཝིཉྙཱཎསམངྒིནཱ པུགྒལེན ཝིཉྙཱཎཝསེན ལདྡྷསཝནཀིཙྩཝོཧཱརེན སུཏནྟི།

    Atha vā evanti puggalakiccaniddeso, sutānañhi dhammānaṃ gahitākārassa nidassanassa avadhāraṇassa vā pakāsanasabhāvena evaṃsaddena tadākārādidhāraṇassa puggalavohārupādānadhammabyāpārabhāvato puggalakiccaṃnāma niddiṭṭhaṃ hotīti. Sutanti viññāṇakiccaniddeso, puggalavādinopi hi savanakiriyā viññāṇanirapekkhā na hotīti. Meti ubhayakiccayuttapuggalaniddeso. Meti hi saddappavatti ekanteneva sattavisesavisayā viññāṇakiccañca tattheva samodahitabbanti. Ayaṃ panettha saṅkhepo – mayā savanakiccaviññāṇasamaṅginā puggalena viññāṇavasena laddhasavanakiccavohārena sutanti.

    ཏཐཱ ཨེཝནྟི ཙ མེཏི ཙ སཙྩིཀཊྛཔརམཏྠཝསེན ཨཝིཛྫམཱནཔཉྙཏྟི། སབྦསྶ ཧི སདྡཱདྷིགམནཱིཡསྶ ཨཏྠསྶ པཉྙཏྟིམུཁེནེཝ པཊིཔཛྫིཏབྦཏྟཱ སབྦཔཉྙཏྟཱིནཉྩ ཝིཛྫམཱནཱདཱིསུ ཚསུ པཉྙཏྟཱིསུ ཨཝརོདྷོ, ཏསྨཱ ཡོ མཱཡཱམརཱིཙིཨཱདཡོ ཝིཡ ཨབྷཱུཏཏྠོ ཨནུསྶཝཱདཱིཧི གཧེཏབྦོ ཝིཡ ཨནུཏྟམཏྠོཔི ན ཧོཏི། སོ རཱུཔསདྡཱདིཀོ རུཔྤནཱནུབྷཝནཱདིཀོ ཙ པརམཏྠསབྷཱཝོ སཙྩིཀཊྛཔརམཏྠཝསེན ཝིཛྫཏི། ཡོ པན ཨེཝནྟི ཙ མེཏི ཙ ཝུཙྩམཱནོ ཨཱཀཱརཏྠོ, སོ ཨཔརམཏྠསབྷཱཝོ སཙྩིཀཊྛཔརམཏྠཝསེན ཨནུཔལབྦྷམཱནོ ཨཝིཛྫམཱནཔཉྙཏྟི ནཱམ། ཏསྨཱ ཀིཉྷེཏྠ ཏཾ པརམཏྠཏོ ཨཏྠི, ཡཾ ཨེཝནྟི ཝཱ མེཏི ཝཱ ནིདྡེསཾ ལབྷེཐ? སུཏནྟི ཝིཛྫམཱནཔཉྙཏྟི, ཡཉྷི ཏཾ ཨེཏྠ སོཏེན ཨུཔལདྡྷཾ, ཏཾ པརམཏྠཏོ ཝིཛྫམཱནནྟི།

    Tathā evanti ca meti ca saccikaṭṭhaparamatthavasena avijjamānapaññatti. Sabbassa hi saddādhigamanīyassa atthassa paññattimukheneva paṭipajjitabbattā sabbapaññattīnañca vijjamānādīsu chasu paññattīsu avarodho, tasmā yo māyāmarīciādayo viya abhūtattho anussavādīhi gahetabbo viya anuttamatthopi na hoti. So rūpasaddādiko ruppanānubhavanādiko ca paramatthasabhāvo saccikaṭṭhaparamatthavasena vijjati. Yo pana evanti ca meti ca vuccamāno ākārattho, so aparamatthasabhāvo saccikaṭṭhaparamatthavasena anupalabbhamāno avijjamānapaññatti nāma. Tasmā kiñhettha taṃ paramatthato atthi, yaṃ evanti vā meti vā niddesaṃ labhetha? Sutanti vijjamānapaññatti, yañhi taṃ ettha sotena upaladdhaṃ, taṃ paramatthato vijjamānanti.

    ཏཐཱ ཨེཝནྟི སོཏཔཐམཱགཏེ དྷམྨེ ཨུཔཱདཱཡ ཏེསཾ ཨུཔདྷཱརིཏཱཀཱརཱདཱིནཾ པཙྩཱམསནཝསེན། མེཏི སསནྟཏིཔརིཡཱཔནྣེ ཁནྡྷེ ཀརཎཱདིཝིསེསཝིསིཊྛེ ཨུཔཱདཱཡ ཝཏྟབྦཏོ ཨུཔཱདཱཔཉྙཏྟི། སུཏནྟི དིཊྛཱདཱིནི ཨུཔནིདྷཱཡ ཝཏྟབྦཏོ ཨུཔནིདྷཱཔཉྙཏྟི། དིཊྛཱདིསབྷཱཝརཧིཏེ སདྡཱཡཏནེ པཝཏྟམཱནོཔི སུཏཝོཧཱརོ དུཏིཡཾ ཏཏིཡནྟིཨཱདིཀོ ཝིཡ པཋམཱདཱིནི, དིཊྛམུཏཝིཉྙཱཏེ ཨཔེཀྑིཏྭཱ སུཏནྟི ཝིཉྙེཡྻཏྟཱ དིཊྛཱདཱིནི ཨུཔནིདྷཱཡ ཝཏྟབྦོ ཧོཏི། ཨསུཏཾ ན ཧོཏཱིཏི ཧི སུཏནྟི པཀཱསིཏོཡམཏྠོཏི།

    Tathā evanti sotapathamāgate dhamme upādāya tesaṃ upadhāritākārādīnaṃ paccāmasanavasena. Meti sasantatipariyāpanne khandhe karaṇādivisesavisiṭṭhe upādāya vattabbato upādāpaññatti. Sutanti diṭṭhādīni upanidhāya vattabbato upanidhāpaññatti. Diṭṭhādisabhāvarahite saddāyatane pavattamānopi sutavohāro dutiyaṃ tatiyantiādiko viya paṭhamādīni, diṭṭhamutaviññāte apekkhitvā sutanti viññeyyattā diṭṭhādīni upanidhāya vattabbo hoti. Asutaṃ na hotīti hi sutanti pakāsitoyamatthoti.

    ཨེཏྠ ཙ ཨེཝནྟིཝཙནེན ཨསམྨོཧཾ དཱིཔེཏི། པཊིཝིདྡྷཱ ཧི ཨཏྟནཱ སུཏསྶ པཀཱརཝིསེསཱ ཨེཝནྟི ཨིདྷ ཨཱཡསྨཏཱ ཨཱནནྡེན པཙྩཱམཊྛཱ, ཏེནསྶ ཨསམྨོཧོ དཱིཔིཏོ ཧོཏི། ན ཧི སམྨཱུལ༹ྷོ ནཱནཔྤཀཱརཔཊིཝེདྷསམཏྠོ ཧོཏི, པཙྩཡཱཀཱརཝསེན ནཱནཔྤཀཱརཱ དུཔྤཊིཝིདྡྷཱ ཙ སུཏྟནྟཱཏི དཱིཔིཏནྟི། སུཏནྟིཝཙནེན སུཏསྶ ཨསམྨོསཾ དཱིཔེཏི, སུཏཱཀཱརསྶ ཡཱཐཱཝཏོ དསྶིཡམཱནཏྟཱ། ཡསྶ ཧི སུཏཾ སམྨུཊྛཾ ཧོཏི, ན སོ ཀཱལནྟརེ མཡཱ སུཏནྟི པཊིཛཱནཱཏི། ཨིཙྩསྶ ཨསམྨོཧེན པཉྙཱསིདྡྷི, སམྨོཧཱབྷཱཝེན པཉྙཱཡ ཨེཝ ཝཱ སཝནཀཱལསམྦྷཱུཏཱཡ ཏདུཏྟརིཀཱལཔཉྙཱསིདྡྷི, ཏཐཱ ཨསམྨོསེན སཏིསིདྡྷི། ཏཏྠ པཉྙཱཔུབྦངྒམཱཡ སཏིཡཱ བྱཉྫནཱཝདྷཱརཎསམཏྠཏཱ། བྱཉྫནཱནཉྷི པཊིཝིཛ྄ཛྷིཏབྦོ ཨཱཀཱརོ ནཱཏིགམྦྷཱིརོ, ཡཐཱསུཏཾ དྷཱརཎམེཝ ཏཏྠ ཀརཎཱིཡནྟི སཏིཡཱ བྱཱཔཱརོ ཨདྷིཀོ, པཉྙཱ ཏཏྠ གུཎཱིབྷཱུཏཱ ཧོཏི པཉྙཱཡ པུབྦངྒམཱཏི ཀཏྭཱ། སཏིཔུབྦངྒམཱཡ པཉྙཱཡ ཨཏྠཔྤཊིཝེདྷསམཏྠཏཱ། ཨཏྠསྶ ཧི པཊིཝིཛ྄ཛྷིཏབྦོ ཨཱཀཱརོ གམྦྷཱིརོཏི པཉྙཱཡ བྱཱཔཱརོ ཨདྷིཀོ, སཏི ཏཏྠ གུཎཱིབྷཱུཏཱཡེཝཱཏི སཏིཡཱ པུབྦངྒམཱཡཱཏི ཀཏྭཱ། ཏདུབྷཡསམཏྠཏཱཡོགེན ཨཏྠབྱཉྫནསམྤནྣསྶ དྷམྨཀོསསྶ ཨནུཔཱལནསམཏྠཏཱཡ དྷམྨབྷཎྜཱགཱརིཀཏྟསིདྡྷི།

    Ettha ca evantivacanena asammohaṃ dīpeti. Paṭividdhā hi attanā sutassa pakāravisesā evanti idha āyasmatā ānandena paccāmaṭṭhā, tenassa asammoho dīpito hoti. Na hi sammūḷho nānappakārapaṭivedhasamattho hoti, paccayākāravasena nānappakārā duppaṭividdhā ca suttantāti dīpitanti. Sutantivacanena sutassa asammosaṃ dīpeti, sutākārassa yāthāvato dassiyamānattā. Yassa hi sutaṃ sammuṭṭhaṃ hoti, na so kālantare mayā sutanti paṭijānāti. Iccassa asammohena paññāsiddhi, sammohābhāvena paññāya eva vā savanakālasambhūtāya taduttarikālapaññāsiddhi, tathā asammosena satisiddhi. Tattha paññāpubbaṅgamāya satiyā byañjanāvadhāraṇasamatthatā. Byañjanānañhi paṭivijjhitabbo ākāro nātigambhīro, yathāsutaṃ dhāraṇameva tattha karaṇīyanti satiyā byāpāro adhiko, paññā tattha guṇībhūtā hoti paññāya pubbaṅgamāti katvā. Satipubbaṅgamāya paññāya atthappaṭivedhasamatthatā. Atthassa hi paṭivijjhitabbo ākāro gambhīroti paññāya byāpāro adhiko, sati tattha guṇībhūtāyevāti satiyā pubbaṅgamāyāti katvā. Tadubhayasamatthatāyogena atthabyañjanasampannassa dhammakosassa anupālanasamatthatāya dhammabhaṇḍāgārikattasiddhi.

    ཨཔརོ ནཡོ – ཨེཝནྟིཝཙནེན ཡོནིསོམནསིཀཱརཾ དཱིཔེཏི, ཏེན ཙ ཝུཙྩམཱནཱནཾ ཨཱཀཱརནིདསྶནཱཝདྷཱརཎཏྠཱནཾ ཨུཔརི ཝཀྑམཱནཱནཾ ནཱནཔྤཀཱརཔྤཊིཝེདྷཛོཏཀཱནཾ ཨཝིཔརཱིཏསིདྡྷི དྷམྨཝིསཡཏྟཱ། ན ཧི ཨཡོནིསོ མནསིཀརོཏོ ནཱནཔྤཀཱརཔྤཊིཝེདྷོ སམྦྷཝཏི། སུཏནྟིཝཙནེན ཨཝིཀྑེཔཾ དཱིཔེཏི, ‘‘པཋམབོདྷིསུཏྟཾ ཀཏྠ བྷཱསིཏ’’ནྟིཨཱདིཔུཙྪཱཝསེན པཀརཎཔཏྟསྶ ཝཀྑམཱནསྶ སུཏྟསྶ སཝནཾ སམཱདྷཱནམནྟརེན ན སམྦྷཝཏི ཝིཀྑིཏྟཙིཏྟསྶ སཝནཱབྷཱཝཏོ། ཏཐཱ ཧི ཝིཀྑིཏྟཙིཏྟོ པུགྒལོ སབྦསམྤཏྟིཡཱ ཝུཙྩམཱནོཔི ‘‘ན མཡཱ སུཏཾ, པུན བྷཎཐཱ’’ཏི བྷཎཏི། ཡོནིསོམནསིཀཱརེན ཙེཏྠ ཨཏྟསམྨཱཔཎིདྷིཾ པུབྦེ ཙ ཀཏཔུཉྙཏཾ སཱདྷེཏི སམྨཱ ཨཔྤཎིཧིཏཏྟསྶ པུབྦེ ཨཀཏཔུཉྙསྶ ཝཱ ཏདབྷཱཝཏོ། ཨཝིཀྑེཔེན སདྡྷམྨསྶཝནཾ སཔྤུརིསཱུཔནིསྶཡཉྩ སཱདྷེཏི ཨསྶུཏཝཏོ སཔྤུརིསཱུཔནིསྶཡཝིརཧིཏསྶ ཙ ཏདབྷཱཝཏོ། ན ཧི ཝིཀྑིཏྟོ སོཏུཾ སཀྐོཏི, ན ཙ སཔྤུརིསེ ཨནུཔནིསྶཡམཱནསྶ སཝནཾ ཨཏྠཱིཏི།

    Aparo nayo – evantivacanena yonisomanasikāraṃ dīpeti, tena ca vuccamānānaṃ ākāranidassanāvadhāraṇatthānaṃ upari vakkhamānānaṃ nānappakārappaṭivedhajotakānaṃ aviparītasiddhi dhammavisayattā. Na hi ayoniso manasikaroto nānappakārappaṭivedho sambhavati. Sutantivacanena avikkhepaṃ dīpeti, ‘‘paṭhamabodhisuttaṃ kattha bhāsita’’ntiādipucchāvasena pakaraṇapattassa vakkhamānassa suttassa savanaṃ samādhānamantarena na sambhavati vikkhittacittassa savanābhāvato. Tathā hi vikkhittacitto puggalo sabbasampattiyā vuccamānopi ‘‘na mayā sutaṃ, puna bhaṇathā’’ti bhaṇati. Yonisomanasikārena cettha attasammāpaṇidhiṃ pubbe ca katapuññataṃ sādheti sammā appaṇihitattassa pubbe akatapuññassa vā tadabhāvato. Avikkhepena saddhammassavanaṃ sappurisūpanissayañca sādheti assutavato sappurisūpanissayavirahitassa ca tadabhāvato. Na hi vikkhitto sotuṃ sakkoti, na ca sappurise anupanissayamānassa savanaṃ atthīti.

    ཨཔརོ ནཡོ – ‘‘ཡསྶ ཙིཏྟསནྟཱནསྶ ནཱནཔྤཀཱརཔྤཝཏྟིཡཱ ནཱནཏྠབྱཉྫནགྒཧཎཾ ཧོཏི, ཏསྶ ནཱནཱཀཱརནིདྡེསོ’’ཏི ཝུཏྟཾ། ཡསྨཱ ཙ སོ བྷགཝཏོ ཝཙནསྶ ཨཏྠབྱཉྫནཔྤབྷེདཔརིཙྪེདཝསེན སཀལསཱསནསམྤཏྟིཨོགཱཧནེན ནིརཝསེསཾ པརཧིཏཔཱརིཔཱུརཱིཀརཎབྷཱུཏོ ཨེཝཾ བྷདྡཀོ ཨཱཀཱརོ ན སམྨཱ ཨཔྤཎིཧིཏཏྟསྶ པུབྦེ ཨཀཏཔུཉྙསྶ ཝཱ ཧོཏི། ཏསྨཱ ཨེཝནྟི ཨིམིནཱ བྷདྡཀེན ཨཱཀཱརེན པཙྪིམཙཀྐདྭཡསམྤཏྟིམཏྟནོ དཱིཔེཏི, སུཏནྟི སཝནཡོགེན པུརིམཙཀྐདྭཡསམྤཏྟིཾ། ན ཧི ཨཔྤཏིརཱུཔེ དེསེ ཝསཏོ སཔྤུརིསཱུཔནིསྶཡཝིརཧིཏསྶ ཙ སཝནཾ ཨཏྠི། ཨིཙྩསྶ པཙྪིམཙཀྐདྭཡསིདྡྷིཡཱ ཨཱསཡསུདྡྷི སིདྡྷཱ ཧོཏི། སམྨཱ པཎིཧིཏཙིཏྟོ པུབྦེ ཙ ཀཏཔུཉྙོ ཝིསུདྡྷཱསཡོ ཧོཏི ཏདསུདྡྷིཧེཏཱུནཾ ཀིལེསཱནཾ དཱུརཱིབྷཱཝཏོ། ཏཐཱ ཧི ཝུཏྟཾ ‘‘སམྨཱ པཎིཧིཏཾ ཙིཏྟཾ, སེཡྻསོ ནཾ ཏཏོ ཀརེ’’ཏི (དྷ॰ པ॰ ༤༣) ‘‘ཀཏཔུཉྙོསི ཏྭཾ, ཨཱནནྡ, པདྷཱནམནུཡུཉྫ, ཁིཔྤཾ ཧོཧིསི ཨནཱསཝོ’’ཏི (དཱི॰ ནི॰ ༢.༢༠༧) ཙ། པུརིམཙཀྐདྭཡསིདྡྷིཡཱ པཡོགསུདྡྷི། པཏིརཱུཔདེསཝཱསེན ཧི སཔྤུརིསཱུཔནིསྶཡེན ཙ སཱདྷཱུནཾ དིཊྛཱནུགཏིཨཱཔཛྫནེན པརིསུདྡྷཔྤཡོགོ ཧོཏི། ཏཱཡ ཙ ཨཱསཡསུདྡྷིཡཱ ཨདྷིགམབྱཏྟིསིདྡྷི, པུབྦེཡེཝ ཏཎྷཱདིཊྛིསཾཀིལེསཱནཾ ཝིསོདྷིཏཏྟཱ པཡོགསུདྡྷིཡཱ ཨཱགམབྱཏྟིསིདྡྷི། སུཔརིསུདྡྷཀཱཡཝཙཱིཔཡོགོ ཧི ཝིཔྤཊིསཱརཱབྷཱཝཏོ ཨཝིཀྑིཏྟཙིཏྟོ པརིཡཏྟིཡཾ ཝིསཱརདོ ཧོཏི། ཨིཏི པཡོགཱསཡསུདྡྷསྶ ཨཱགམཱདྷིགམསམྤནྣསྶ ཝཙནཾ ཨརུཎུགྒམནཾ ཝིཡ སཱུརིཡསྶ ཨུདཡཏོ ཡོནིསོམནསིཀཱརོ ཝིཡ ཙ ཀུསལཀམྨསྶ ཨརཧཏི བྷགཝཏོ ཝཙནསྶ པུབྦངྒམཾ བྷཝིཏུནྟི ཋཱནེ ནིདཱནཾ ཋཔེནྟོ ཨེཝཾ མེ སུཏནྟིཨཱདིམཱཧ།

    Aparo nayo – ‘‘yassa cittasantānassa nānappakārappavattiyā nānatthabyañjanaggahaṇaṃ hoti, tassa nānākāraniddeso’’ti vuttaṃ. Yasmā ca so bhagavato vacanassa atthabyañjanappabhedaparicchedavasena sakalasāsanasampattiogāhanena niravasesaṃ parahitapāripūrīkaraṇabhūto evaṃ bhaddako ākāro na sammā appaṇihitattassa pubbe akatapuññassa vā hoti. Tasmā evanti iminā bhaddakena ākārena pacchimacakkadvayasampattimattano dīpeti, sutanti savanayogena purimacakkadvayasampattiṃ. Na hi appatirūpe dese vasato sappurisūpanissayavirahitassa ca savanaṃ atthi. Iccassa pacchimacakkadvayasiddhiyā āsayasuddhi siddhā hoti. Sammā paṇihitacitto pubbe ca katapuñño visuddhāsayo hoti tadasuddhihetūnaṃ kilesānaṃ dūrībhāvato. Tathā hi vuttaṃ ‘‘sammā paṇihitaṃ cittaṃ, seyyaso naṃ tato kare’’ti (dha. pa. 43) ‘‘katapuññosi tvaṃ, ānanda, padhānamanuyuñja, khippaṃ hohisi anāsavo’’ti (dī. ni. 2.207) ca. Purimacakkadvayasiddhiyā payogasuddhi. Patirūpadesavāsena hi sappurisūpanissayena ca sādhūnaṃ diṭṭhānugatiāpajjanena parisuddhappayogo hoti. Tāya ca āsayasuddhiyā adhigamabyattisiddhi, pubbeyeva taṇhādiṭṭhisaṃkilesānaṃ visodhitattā payogasuddhiyā āgamabyattisiddhi. Suparisuddhakāyavacīpayogo hi vippaṭisārābhāvato avikkhittacitto pariyattiyaṃ visārado hoti. Iti payogāsayasuddhassa āgamādhigamasampannassa vacanaṃ aruṇuggamanaṃ viya sūriyassa udayato yonisomanasikāro viya ca kusalakammassa arahati bhagavato vacanassa pubbaṅgamaṃ bhavitunti ṭhāne nidānaṃ ṭhapento evaṃ me sutantiādimāha.

    ཨཔརོ ནཡོ – ཨེཝནྟི ཨིམིནཱ པུབྦེ ཝུཏྟནཡེནེཝ ནཱནཔྤཀཱརཔྤཊིཝེདྷདཱིཔཀེན ཝཙནེན ཨཏྟནོ ཨཏྠཔཊིབྷཱནཔཊིསམྦྷིདཱསམྤཏྟིསབྦྷཱཝཾ དཱིཔེཏི། སུཏནྟི ཨིམིནཱ ཨེཝཾསདྡསནྣིདྷཱནཏོ ཝཀྑམཱནཱཔེཀྑཱཡ ཝཱ སོཏབྦབྷེདཔྤཊིཝེདྷདཱིཔཀེན དྷམྨནིརུཏྟིཔཊིསམྦྷིདཱསམྤཏྟིསབྦྷཱཝཾ དཱིཔེཏི། ཨེཝནྟི ཙ ཨིདཾ ཝུཏྟནཡེནེཝ ཡོནིསོམནསིཀཱརདཱིཔཀཝཙནཾ བྷཱསམཱནོ ‘‘ཨེཏེ དྷམྨཱ མཡཱ མནསཱནུཔེཀྑིཏཱ དིཊྛིཡཱ སུཔྤཊིཝིདྡྷཱ’’ཏི དཱིཔེཏི། པརིཡཏྟིདྷམྨོ ཧི ‘‘ཨིདྷ སཱིལཾ ཀཐིཏཾ, ཨིདྷ སམཱདྷི, ཨིདྷ པཉྙཱ, ཨེཏྟཀཱ ཨེཏྠ ཨནུསནྡྷིཡོ’’ཏིཨཱདིནཱ ནཡེན མནསཱ ཨནུཔེཀྑིཏོ ཨནུསྶཝཱཀཱརཔརིཝིཏཀྐསཧིཏཱཡ དྷམྨནིཛ྄ཛྷཱནཀྑནྟིབྷཱུཏཱཡ ཉཱཏཔརིཉྙཱསངྑཱཏཱཡ ཝཱ དིཊྛིཡཱ ཏཏྠ ཏཏྠ ཝུཏྟརཱུཔཱརཱུཔདྷམྨེ ‘‘ཨིཏི རཱུཔཾ, ཨེཏྟཀཾ རཱུཔ’’ནྟིཨཱདིནཱ ནཡེན སུཊྛུ ཝཝཏྠཔེཏྭཱ པཊིཝིདྡྷོ ཨཏྟནོ ཙ པརེསཉྩ ཧིཏསུཁཱཝཧོ ཧོཏཱིཏི། སུཏནྟི ཨིདཾ སཝནཡོགདཱིཔཀཝཙནཾ བྷཱསམཱནོ ‘‘བཧཱུ མཡཱ དྷམྨཱ སུཏཱ དྷཱཏཱ ཝཙསཱ པརིཙིཏཱ’’ཏི དཱིཔེཏི། སོཏཱཝདྷཱནཔྤཊིབདྡྷཱ ཧི པརིཡཏྟིདྷམྨསྶ སཝནདྷཱརཎཔརིཙཡཱ། ཏདུབྷཡེནཔི དྷམྨསྶ སྭཱཀྑཱཏབྷཱཝེན, ཨཏྠབྱཉྫནཔཱརིཔཱུརིཾ དཱིཔེནྟོ སཝནེ ཨཱདརཾ ཛནེཏི། ཨཏྠབྱཉྫནཔརིཔུཎྞཉྷི དྷམྨཾ ཨཱདརེན ཨསྶུཎནྟོ མཧཏཱ ཧིཏཱ པརིབཱཧིརོ ཧོཏཱིཏི ཨཱདརཾ ཛནེཏྭཱ སཀྐཙྩཾ དྷམྨོ སོཏབྦོ།

    Aparo nayo – evanti iminā pubbe vuttanayeneva nānappakārappaṭivedhadīpakena vacanena attano atthapaṭibhānapaṭisambhidāsampattisabbhāvaṃ dīpeti. Sutanti iminā evaṃsaddasannidhānato vakkhamānāpekkhāya vā sotabbabhedappaṭivedhadīpakena dhammaniruttipaṭisambhidāsampattisabbhāvaṃ dīpeti. Evanti ca idaṃ vuttanayeneva yonisomanasikāradīpakavacanaṃ bhāsamāno ‘‘ete dhammā mayā manasānupekkhitā diṭṭhiyā suppaṭividdhā’’ti dīpeti. Pariyattidhammo hi ‘‘idha sīlaṃ kathitaṃ, idha samādhi, idha paññā, ettakā ettha anusandhiyo’’tiādinā nayena manasā anupekkhito anussavākāraparivitakkasahitāya dhammanijjhānakkhantibhūtāya ñātapariññāsaṅkhātāya vā diṭṭhiyā tattha tattha vuttarūpārūpadhamme ‘‘iti rūpaṃ, ettakaṃ rūpa’’ntiādinā nayena suṭṭhu vavatthapetvā paṭividdho attano ca paresañca hitasukhāvaho hotīti. Sutanti idaṃ savanayogadīpakavacanaṃ bhāsamāno ‘‘bahū mayā dhammā sutā dhātā vacasā paricitā’’ti dīpeti. Sotāvadhānappaṭibaddhā hi pariyattidhammassa savanadhāraṇaparicayā. Tadubhayenapi dhammassa svākkhātabhāvena, atthabyañjanapāripūriṃ dīpento savane ādaraṃ janeti. Atthabyañjanaparipuṇṇañhi dhammaṃ ādarena assuṇanto mahatā hitā paribāhiro hotīti ādaraṃ janetvā sakkaccaṃ dhammo sotabbo.

    ‘‘ཨེཝཾ མེ སུཏ’’ནྟི ཨིམིནཱ པན སཀལེན ཝཙནེན ཨཱཡསྨཱ ཨཱནནྡོ ཏཐཱགཏཔྤཝེདིཏཾ དྷམྨཾ ཨཏྟནོ ཨདཧནྟོ ཨསཔྤུརིསབྷཱུམིཾ ཨཏིཀྐམཏི, སཱཝཀཏྟཾ པཊིཛཱནནྟོ སཔྤུརིསབྷཱུམིཾ ཨོཀྐམཏི། ཏཐཱ ཨསདྡྷམྨཱ ཙིཏྟཾ ཝུཊྛཱཔེཏི, སདྡྷམྨེ ཙིཏྟཾ པཏིཊྛཱཔེཏི། ‘‘ཀེཝལཾ སུཏམེཝེཏཾ མཡཱ, ཏསྶེཝ པན བྷགཝཏོ ཝཙན’’ནྟི དཱིཔེནྟོ ཨཏྟཱནཾ པརིམོཙེཏི, སཏྠཱརཾ ཨཔདིསཏི, ཛིནཝཙནཾ ཨཔྤེཏི, དྷམྨནེཏྟིཾ པཏིཊྛཱཔེཏི།

    ‘‘Evaṃme suta’’nti iminā pana sakalena vacanena āyasmā ānando tathāgatappaveditaṃ dhammaṃ attano adahanto asappurisabhūmiṃ atikkamati, sāvakattaṃ paṭijānanto sappurisabhūmiṃ okkamati. Tathā asaddhammā cittaṃ vuṭṭhāpeti, saddhamme cittaṃ patiṭṭhāpeti. ‘‘Kevalaṃ sutamevetaṃ mayā, tasseva pana bhagavato vacana’’nti dīpento attānaṃ parimoceti, satthāraṃ apadisati, jinavacanaṃ appeti, dhammanettiṃ patiṭṭhāpeti.

    ཨཔིཙ ‘‘ཨེཝཾ མེ སུཏ’’ནྟི ཨཏྟནཱ ཨུཔྤཱདིཏབྷཱཝཾ ཨཔྤཊིཛཱནནྟོ པུརིམསྶཝནཾ ཝིཝརནྟོ ‘‘སམྨུཁཱ པཊིགྒཧིཏམིདཾ མཡཱ ཏསྶ བྷགཝཏོ ཙཏུཝེསཱརཛྫཝིསཱརདསྶ དསབལདྷརསྶ ཨཱསབྷཊྛཱནཊྛཱཡིནོ སཱིཧནཱདནཱདིནོ སབྦསཏྟུཏྟམསྶ དྷམྨིསྶརསྶ དྷམྨརཱཛསྶ དྷམྨཱདྷིཔཏིནོ དྷམྨདཱིཔསྶ དྷམྨསརཎསྶ སདྡྷམྨཝརཙཀྐཝཏྟིནོ སམྨཱསམྦུདྡྷསྶ, ན ཨེཏྠ ཨཏྠེ ཝཱ དྷམྨེ ཝཱ པདེ ཝཱ བྱཉྫནེ ཝཱ ཀངྑཱ ཝཱ ཝིམཏི ཝཱ ཀཏྟབྦཱ’’ཏི སབྦདེཝམནུསྶཱནཾ ཨིམསྨིཾ དྷམྨེ ཨསྶདྡྷིཡཾ ཝིནཱསེཏི, སདྡྷཱསམྤདཾ ཨུཔྤཱདེཏི། ཏེནེཏཾ ཝུཙྩཏི –

    Apica ‘‘evaṃ me suta’’nti attanā uppāditabhāvaṃ appaṭijānanto purimassavanaṃ vivaranto ‘‘sammukhā paṭiggahitamidaṃ mayā tassa bhagavato catuvesārajjavisāradassa dasabaladharassa āsabhaṭṭhānaṭṭhāyino sīhanādanādino sabbasattuttamassa dhammissarassa dhammarājassa dhammādhipatino dhammadīpassa dhammasaraṇassa saddhammavaracakkavattino sammāsambuddhassa, na ettha atthe vā dhamme vā pade vā byañjane vā kaṅkhā vā vimati vā kattabbā’’ti sabbadevamanussānaṃ imasmiṃ dhamme assaddhiyaṃ vināseti, saddhāsampadaṃ uppādeti. Tenetaṃ vuccati –

    ‘‘ཝིནཱསཡཏི ཨསྶདྡྷཾ, སདྡྷཾ ཝཌྜྷེཏི སཱསནེ།

    ‘‘Vināsayati assaddhaṃ, saddhaṃ vaḍḍheti sāsane;

    ཨེཝཾ མེ སུཏམིཙྩེཝཾ, ཝདཾ གོཏམསཱཝཀོ’’ཏི༎

    Evaṃ me sutamiccevaṃ, vadaṃ gotamasāvako’’ti.

    ཨེཀནྟི གཎནཔརིཙྪེདནིདྡེསོ། ཨཡཉྷི ཨེཀསདྡོ ཨཉྙསེཊྛཱསཧཱཡསངྑྱཱདཱིསུ དིསྶཏི། ཏཐཱ ཧི ཨཡཾ ‘‘སསྶཏོ ཨཏྟཱ ཙ ལོཀོ ཙ, ཨིདམེཝ སཙྩཾ མོགྷམཉྙནྟི ཨིཏྠེཀེ ཨབྷིཝདནྟཱི’’ཏིཨཱདཱིསུ (མ॰ ནི॰ ༣.༢༧; ཨུདཱ॰ ༥༥) ཨཉྙེ དིསྶཏི། ‘‘ཙེཏསོ ཨེཀོདིབྷཱཝ’’ནྟིཨཱདཱིསུ (པཱརཱ॰ ༡༡; དཱི॰ ནི॰ ༡.༢༢༨) སེཊྛེ། ‘‘ཨེཀོ ཝཱུཔཀཊྛོ’’ཏིཨཱདཱིསུ (ཙཱུལ༹ཝ॰ ༤༤༥; དཱི॰ ནི॰ ༡.༤༠༥) ཨསཧཱཡེ། ‘‘ཨེཀོཝ ཁོ, བྷིཀྑཝེ, ཁཎོ ཙ སམཡོ ཙ བྲཧྨཙརིཡཝཱསཱཡཱ’’ཏིཨཱདཱིསུ (ཨ॰ ནི॰ ༨.༢༩) སངྑྱཱཡཾ, ཨིདྷཱཔི སངྑྱཱཡམེཝ དཊྛབྦོ། ཏེན ཝུཏྟཾ – ‘‘ཨེཀནྟི གཎནཔརིཙྪེདནིདྡེསོ’’ཏི།

    Ekanti gaṇanaparicchedaniddeso. Ayañhi ekasaddo aññaseṭṭhāsahāyasaṅkhyādīsu dissati. Tathā hi ayaṃ ‘‘sassato attā ca loko ca, idameva saccaṃ moghamaññanti ittheke abhivadantī’’tiādīsu (ma. ni. 3.27; udā. 55) aññe dissati. ‘‘Cetaso ekodibhāva’’ntiādīsu (pārā. 11; dī. ni. 1.228) seṭṭhe. ‘‘Eko vūpakaṭṭho’’tiādīsu (cūḷava. 445; dī. ni. 1.405) asahāye. ‘‘Ekova kho, bhikkhave, khaṇo ca samayo ca brahmacariyavāsāyā’’tiādīsu (a. ni. 8.29) saṅkhyāyaṃ, idhāpi saṅkhyāyameva daṭṭhabbo. Tena vuttaṃ – ‘‘ekanti gaṇanaparicchedaniddeso’’ti.

    སམཡནྟི པརིཙྪིནྣནིདྡེསོ། ཨེཀཾ སམཡནྟི ཨནིཡམིཏཔརིདཱིཔནཾ། ཏཏྠ སམཡསདྡོ –

    Samayanti paricchinnaniddeso. Ekaṃ samayanti aniyamitaparidīpanaṃ. Tattha samayasaddo –

    ‘‘སམཝཱཡེ ཁཎེ ཀཱལེ, སམཱུཧེ ཧེཏུདིཊྛིསུ།

    ‘‘Samavāye khaṇe kāle, samūhe hetudiṭṭhisu;

    པཊིལཱབྷེ པཧཱནེ ཙ, པཊིཝེདྷེ ཙ དིསྶཏི’’༎

    Paṭilābhe pahāne ca, paṭivedhe ca dissati’’.

    ཏཐཱ ཧིསྶ ‘‘ཨཔྤེཝ ནཱམ སྭེཔི ཨུཔསངྐམེཡྻཱམ ཀཱལཉྩ སམཡཉྩ ཨུཔཱདཱཡཱ’’ཏི ཨེཝམཱདཱིསུ (དཱི॰ ནི॰ ༡.༤༤༧) སམཝཱཡོ ཨཏྠོ, ཡུཏྟཀཱལཉྩ པཙྩཡསཱམགྒིཉྩ ལབྷིཏྭཱཏི ཧི ཨདྷིཔྤཱཡོ, ཏསྨཱ པཙྩཡསམཝཱཡོཏི ཝེདིཏབྦོ ། ‘‘ཨེཀོཝ ཁོ, བྷིཀྑཝེ, ཁཎོ ཙ སམཡོ ཙ བྲཧྨཙརིཡཝཱསཱཡཱ’’ཏིཨཱདཱིསུ (ཨ॰ ནི॰ ༨.༢༩) ཁཎོ, ཨོཀཱསོཏི ཨཏྠོ། ཏཐཱགཏུཔྤཱདཱདིཀོ ཧི མགྒབྲཧྨཙརིཡསྶ ཨོཀཱསོ ཏཔྤཙྩཡཔྤཊིལཱབྷཧེཏུཏྟཱ, ཁཎོ ཨེཝ ཙ སམཡོ, ཡོ ཁཎོཏི ཙ སམཡོཏི ཙ ཝུཙྩཏི, སོ ཨེཀོ ཡེཝཱཏི ཧི ཨཏྠོ། ‘‘ཨུཎྷསམཡོ པརིལཱ༹ཧསམཡོ’’ཏིཨཱདཱིསུ (པཱཙི॰ ༣༥༨) ཀཱལོ། ‘‘མཧཱསམཡོ པཝནསྨི’’ནྟིཨཱདཱིསུ (དཱི॰ ནི॰ ༢.༣༣༢) སམཱུཧོ། མཧཱསམཡོཏི ཧི བྷིཀྑཱུནཾ དེཝཏཱནཉྩ མཧཱསནྣིཔཱཏོཏི ཨཏྠོ། ‘‘སམཡོཔི ཁོ ཏེ, བྷདྡཱལི, ཨཔྤཊིཝིདྡྷོ ཨཧོསི, བྷགཝཱ ཁོ སཱཝཏྠིཡཾ ཝིཧརཏི, བྷགཝཱཔི མཾ ཛཱནིསྶཏི ‘བྷདྡཱལི ནཱམ བྷིཀྑུ སཏྠུསཱསནེ སིཀྑཱཡ ན པརིཔཱུརཀཱརཱི’ཏི, ཨཡམྤི ཁོ ཏེ, བྷདྡཱལི, སམཡོ ཨཔྤཊིཝིདྡྷོ ཨཧོསཱི’’ཏིཨཱདཱིསུ (མ॰ ནི॰ ༢.༡༣༥) ཧེཏུ། སིཀྑཱཔདསྶ ཀཱརཎཉྷི ཨིདྷ སམཡོཏི ཨདྷིཔྤེཏཾ། ‘‘ཏེན ཁོ པན སམཡེན ཨུགྒཱཧམཱནོ པརིབྦཱཛཀོ སམཎམུཎྜིཀཱཔུཏྟོ སམཡཔྤཝཱདཀེ ཏིནྡུཀཱཙཱིརེ ཨེཀསཱལཀེ མལླིཀཱཡ ཨཱརཱམེ པཊིཝསཏཱི’’ཏིཨཱདཱིསུ (མ॰ ནི॰ ༢.༢༦༠) དིཊྛི། ཏཏྠ ཧི ནིསིནྣཱ ཏིཏྠིཡཱ ཨཏྟནོ ཨཏྟནོ དིཊྛིསངྑཱཏཾ སམཡཾ པཝདནྟཱིཏི སོ པརིབྦཱཛཀཱརཱམོ ‘‘སམཡཔྤཝཱདཀོ’’ཏི ཝུཙྩཏི།

    Tathā hissa ‘‘appeva nāma svepi upasaṅkameyyāma kālañca samayañca upādāyā’’ti evamādīsu (dī. ni. 1.447) samavāyo attho, yuttakālañca paccayasāmaggiñca labhitvāti hi adhippāyo, tasmā paccayasamavāyoti veditabbo . ‘‘Ekova kho, bhikkhave, khaṇo ca samayo ca brahmacariyavāsāyā’’tiādīsu (a. ni. 8.29) khaṇo, okāsoti attho. Tathāgatuppādādiko hi maggabrahmacariyassa okāso tappaccayappaṭilābhahetuttā, khaṇo eva ca samayo, yo khaṇoti ca samayoti ca vuccati, so eko yevāti hi attho. ‘‘Uṇhasamayo pariḷāhasamayo’’tiādīsu (pāci. 358) kālo. ‘‘Mahāsamayo pavanasmi’’ntiādīsu (dī. ni. 2.332) samūho. Mahāsamayoti hi bhikkhūnaṃ devatānañca mahāsannipātoti attho. ‘‘Samayopi kho te, bhaddāli, appaṭividdho ahosi, bhagavā kho sāvatthiyaṃ viharati, bhagavāpi maṃ jānissati ‘bhaddāli nāma bhikkhu satthusāsane sikkhāya na paripūrakārī’ti, ayampi kho te, bhaddāli, samayo appaṭividdho ahosī’’tiādīsu (ma. ni. 2.135) hetu. Sikkhāpadassa kāraṇañhi idha samayoti adhippetaṃ. ‘‘Tena kho pana samayena uggāhamāno paribbājako samaṇamuṇḍikāputto samayappavādake tindukācīre ekasālake mallikāya ārāme paṭivasatī’’tiādīsu (ma. ni. 2.260) diṭṭhi. Tattha hi nisinnā titthiyā attano attano diṭṭhisaṅkhātaṃ samayaṃ pavadantīti so paribbājakārāmo ‘‘samayappavādako’’ti vuccati.

    ‘‘དིཊྛེ དྷམྨེ ཙ ཡོ ཨཏྠོ, ཡོ ཙཏྠོ སམྤརཱཡིཀོ།

    ‘‘Diṭṭhe dhamme ca yo attho, yo cattho samparāyiko;

    ཨཏྠཱབྷིསམཡཱ དྷཱིརོ, པཎྜིཏོཏི པཝུཙྩཏཱི’’ཏི༎ (སཾ॰ ནི॰ ༡.༡༢༩) –

    Atthābhisamayā dhīro, paṇḍitoti pavuccatī’’ti. (saṃ. ni. 1.129) –

    ཨཱདཱིསུ པཊིལཱབྷོ། ཨཏྠཱབྷིསམཡཱཏི ཧི ཨཏྠསྶ ཨདྷིགམཱཏི ཨཏྠོ། ‘‘སམྨཱ མཱནཱབྷིསམཡཱ ཨནྟམཀཱསི དུཀྑསྶཱ’’ཏིཨཱདཱིསུ (མ॰ ནི॰ ༡.༢༨) པཧཱནཾ། ཨདྷིཀརཎཾ སམཡཾ ཝཱུཔསམནཾ ཨཔགམོཏི ཨབྷིསམཡོ པཧཱནཾ། ‘‘དུཀྑསྶ པཱིལ༹ནཊྛོ སངྑཏཊྛོ སནྟཱཔཊྛོ ཝིཔརིཎཱམཊྛོ ཨབྷིསམཡཊྛོ’’ཏིཨཱདཱིསུ (པཊི॰ མ॰ ༢.༨) པཊིཝེདྷོ ། པཊིཝེདྷོཏི ཧི ཨབྷིསམེཏབྦཏོ ཨབྷིསམཡོ, ཨབྷིསམཡོཝ ཨཏྠོ ཨབྷིསམཡཊྛོཏི པཱིལ༹ནཱདཱིནི ཨབྷིསམེཏབྦབྷཱཝེན ཨེཀཱིབྷཱཝཾ ཨུཔནེཏྭཱ ཝུཏྟཱནི, ཨབྷིསམཡསྶ ཝཱ པཊིཝེདྷསྶ ཝིསཡབྷཱུཏོ ཨཏྠོ ཨབྷིསམཡཊྛོཏི ཏཱནེཝ ཏཐཱ ཨེཀནྟེན ཝུཏྟཱནི། ཏཏྠ པཱིལ༹ནཾ དུཀྑསཙྩསྶ ཏཾསམངྒིནོ ཧིཾསནཾ ཨཝིཔྥཱརིཀཏཱཀརཎཾ། སནྟཱཔོ དུཀྑདུཀྑཏཱདིཝསེན སནྟཔྤནཾ པརིདཧནཾ།

    Ādīsu paṭilābho. Atthābhisamayāti hi atthassa adhigamāti attho. ‘‘Sammā mānābhisamayā antamakāsi dukkhassā’’tiādīsu (ma. ni. 1.28) pahānaṃ. Adhikaraṇaṃ samayaṃ vūpasamanaṃ apagamoti abhisamayo pahānaṃ. ‘‘Dukkhassa pīḷanaṭṭho saṅkhataṭṭho santāpaṭṭho vipariṇāmaṭṭho abhisamayaṭṭho’’tiādīsu (paṭi. ma. 2.8) paṭivedho . Paṭivedhoti hi abhisametabbato abhisamayo, abhisamayova attho abhisamayaṭṭhoti pīḷanādīni abhisametabbabhāvena ekībhāvaṃ upanetvā vuttāni, abhisamayassa vā paṭivedhassa visayabhūto attho abhisamayaṭṭhoti tāneva tathā ekantena vuttāni. Tattha pīḷanaṃ dukkhasaccassa taṃsamaṅgino hiṃsanaṃ avipphārikatākaraṇaṃ. Santāpo dukkhadukkhatādivasena santappanaṃ paridahanaṃ.

    ཨེཏྠ ཙ སཧཀཱརཱིཀཱརཎསནྣིཛ྄ཛྷཾ སམེཏི སམཝེཏཱིཏི སམཝཱཡོ སམཡོ། སམེཏི སམཱགཙྪཏི ཨེཏྠ མགྒབྲཧྨཙརིཡཾ ཏདཱདྷཱརཔུགྒལེཧཱིཏི ཁཎོ སམཡོ། སམེཏི ཨེཏྠ ཨེཏེན ཝཱ སཾགཙྪཏི སཏྟོ སབྷཱཝདྷམྨོ ཝཱ ཨུཔྤཱདཱདཱིཧི སཧཛཱཏཱདཱིཧི ཝཱཏི ཀཱལོ སམཡོ། དྷམྨཔྤཝཏྟིམཏྟཏཱཡ ཨཏྠཏོ ཨབྷཱུཏོཔི ཧི ཀཱལོ དྷམྨཔྤཝཏྟིཡཱ ཨདྷིཀརཎཾ ཀརཎཾ ཝིཡ ཙ ཀཔྤནཱམཏྟསིདྡྷེནཱནུརཱུཔེན ཝོཧརཱིཡཏཱིཏི། སམཾ, སཧ ཝཱ ཨཝཡཝཱནཾ ཨཡནཾ པཝཏྟི ཨཝཊྛཱནནྟི སམཱུཧོ སམཡོ ཡཐཱ སམུདཱཡོཏི། ཨཝཡཝསཧཱཝཊྛཱནམེཝ ཧི སམཱུཧོ། ཨཝསེསཔཙྩཡཱནཾ སམཱགམེ སཏི ཨེཏི ཕལམེཏསྨཱ ཨུཔྤཛྫཏི པཝཏྟཏཱིཏི སམཡོ ཧེཏུ ཡཐཱ སམུདཡོཏི། སམེཏི སཾཡོཛནབྷཱཝཏོ སམྦནྡྷོ ཨེཏི ཨཏྟནོ ཝིསཡེ པཝཏྟཏི, དལ༹ྷགྒཧཎབྷཱཝཏོ ཝཱ སཾཡུཏྟཱ ཨཡནྟི པཝཏྟནྟི སཏྟཱ ཡཐཱབྷིནིཝེསཾ ཨེཏེནཱཏི སམཡོ དིཊྛི། དིཊྛིསཾཡོཛནེན ཧི སཏྟཱ ཨཏིཝིཡ བཛ྄ཛྷནྟཱིཏི། སམིཏི སངྒཏི སམོདྷཱནནྟི སམཡོ པཊིལཱབྷོ། སམཡནཾ ཨུཔསམཡནཾ ཨཔགམོཏི སམཡོ པཧཱནཾ། སམུཙྪེདཔྤཧཱནབྷཱཝཏོ པན ཨདྷིཀོ སམཡོཏི ཨབྷིསམཡོ ཡཐཱ ཨབྷིདྷམྨོཏི། ཨབྷིམུཁཾ ཉཱཎེན སམྨཱ ཨེཏབྦོ ཨབྷིསམེཏབྦོཏི ཨབྷིསམཡོ, དྷམྨཱནཾ ཨཝིཔརཱིཏསབྷཱཝོ། ཨབྷིམུཁབྷཱཝེན སམྨཱ ཨེཏི གཙྪཏི བུཛ྄ཛྷཏཱིཏི ཨབྷིསམཡོ, དྷམྨཱནཾ ཡཐཱབྷཱུཏསབྷཱཝཱཝབོདྷོ། ཨེཝཾ ཏསྨིཾ ཏསྨིཾ ཨཏྠེ སམཡསདྡསྶ པཝཏྟི ཝེདིཏབྦཱ།

    Ettha ca sahakārīkāraṇasannijjhaṃ sameti samavetīti samavāyo samayo. Sameti samāgacchati ettha maggabrahmacariyaṃ tadādhārapuggalehīti khaṇo samayo. Sameti ettha etena vā saṃgacchati satto sabhāvadhammo vā uppādādīhi sahajātādīhi vāti kālo samayo. Dhammappavattimattatāya atthato abhūtopi hi kālo dhammappavattiyā adhikaraṇaṃ karaṇaṃ viya ca kappanāmattasiddhenānurūpena voharīyatīti. Samaṃ, saha vā avayavānaṃ ayanaṃ pavatti avaṭṭhānanti samūho samayo yathā samudāyoti. Avayavasahāvaṭṭhānameva hi samūho. Avasesapaccayānaṃ samāgame sati eti phalametasmā uppajjati pavattatīti samayo hetu yathā samudayoti. Sameti saṃyojanabhāvato sambandho eti attano visaye pavattati, daḷhaggahaṇabhāvato vā saṃyuttā ayanti pavattanti sattā yathābhinivesaṃ etenāti samayo diṭṭhi. Diṭṭhisaṃyojanena hi sattā ativiya bajjhantīti. Samiti saṅgati samodhānanti samayo paṭilābho. Samayanaṃ upasamayanaṃ apagamoti samayo pahānaṃ. Samucchedappahānabhāvato pana adhiko samayoti abhisamayo yathā abhidhammoti. Abhimukhaṃ ñāṇena sammā etabbo abhisametabboti abhisamayo, dhammānaṃ aviparītasabhāvo. Abhimukhabhāvena sammā eti gacchati bujjhatīti abhisamayo, dhammānaṃ yathābhūtasabhāvāvabodho. Evaṃ tasmiṃ tasmiṃ atthe samayasaddassa pavatti veditabbā.

    སམཡསདྡསྶ ཨཏྠུདྡྷཱརེ ཨབྷིསམཡསདྡསྶ གཧཎེ ཀཱརཎཾ ཝུཏྟནཡེནེཝ ཝེདིཏབྦཾ། ཨིདྷ པནསྶ ཀཱལོ ཨཏྠོ སམཝཱཡཱདཱིནཾ ཨསམྦྷཝཏོ། དེསདེསཀཔརིསཱ ཝིཡ ཧི དེསནཱཡ ནིདཱནབྷཱཝེ ཀཱལོ ཨེཝ ཨིཙྪིཏབྦོཏི། ཡསྨཱ པནེཏྠ སམཡོཏི ཀཱལོ ཨདྷིཔྤེཏོ, ཏསྨཱ སཾཝཙྪརཨུཏུམཱསདྡྷམཱསརཏྟིདིཝསཔུབྦཎྷམཛ྄ཛྷནྷིཀསཱཡནྷཔཋམཡཱམ- མཛ྄ཛྷིམཡཱམཔཙྪིམཡཱམམུཧུཏྟཱདཱིསུ ཀཱལབྷེདབྷཱུཏེསུ སམཡེསུ ཨེཀཾ སམཡནྟི དཱིཔེཏི།

    Samayasaddassa atthuddhāre abhisamayasaddassa gahaṇe kāraṇaṃ vuttanayeneva veditabbaṃ. Idha panassa kālo attho samavāyādīnaṃ asambhavato. Desadesakaparisā viya hi desanāya nidānabhāve kālo eva icchitabboti. Yasmā panettha samayoti kālo adhippeto, tasmā saṃvaccharautumāsaddhamāsarattidivasapubbaṇhamajjhanhikasāyanhapaṭhamayāma- majjhimayāmapacchimayāmamuhuttādīsu kālabhedabhūtesu samayesu ekaṃ samayanti dīpeti.

    ཀསྨཱ པནེཏྠ ཨནིཡམིཏཝསེནེཝ ཀཱལོ ནིདྡིཊྛོ, ན ཨུཏུསཾཝཙྪརཱདིཝསེན ནིཡམེཏྭཱ ནིདྡིཊྛོཏི ཙེ? ཀིཉྩཱཔི ཨེཏེསུ སཾཝཙྪརཱདཱིསུ སམཡེསུ ཡཾ ཡཾ སུཏྟཾ ཡསྨིཾ ཡསྨིཾ སཾཝཙྪརེ ཨུཏུམྷི མཱསེ པཀྑེ རཏྟིབྷཱགེ དིཝསབྷཱགེ ཝཱ ཝུཏྟཾ, སབྦམྤི ཏཾ ཐེརསྶ སུཝིདིཏཾ སུཝཝཏྠཱཔིཏཾ པཉྙཱཡ། ཡསྨཱ པན ‘‘ཨེཝཾ མེ སུཏཾ ཨསུཀསཾཝཙྪརེ ཨསུཀཨུཏུམྷི ཨསུཀམཱསེ ཨསུཀཔཀྑེ ཨསུཀརཏྟིབྷཱགེ ཨསུཀདིཝསབྷཱགེ ཝཱ’’ཏི ཨེཝཾ ཝུཏྟེ ན སཀྐཱ སུཁེན དྷཱརེཏུཾ ཝཱ ཨུདྡིསིཏུཾ ཝཱ ཨུདྡིསཱཔེཏུཾ ཝཱ, བཧུ ཙ ཝཏྟབྦཾ ཧོཏི, ཏསྨཱ ཨེཀེནེཝ པདེན ཏམཏྠཾ སམོདྷཱནེཏྭཱ ‘‘ཨེཀཾ སམཡ’’ནྟི ཨཱཧ།

    Kasmā panettha aniyamitavaseneva kālo niddiṭṭho, na utusaṃvaccharādivasena niyametvā niddiṭṭhoti ce? Kiñcāpi etesu saṃvaccharādīsu samayesu yaṃ yaṃ suttaṃ yasmiṃ yasmiṃ saṃvacchare utumhi māse pakkhe rattibhāge divasabhāge vā vuttaṃ, sabbampi taṃ therassa suviditaṃ suvavatthāpitaṃ paññāya. Yasmā pana ‘‘evaṃ me sutaṃ asukasaṃvacchare asukautumhi asukamāse asukapakkhe asukarattibhāge asukadivasabhāge vā’’ti evaṃ vutte na sakkā sukhena dhāretuṃ vā uddisituṃ vā uddisāpetuṃ vā, bahu ca vattabbaṃ hoti, tasmā ekeneva padena tamatthaṃ samodhānetvā ‘‘ekaṃ samaya’’nti āha.

    ཡེ ཝཱ ཨིམེ གབྦྷོཀྐནྟིསམཡོ ཛཱཏིསམཡོ སཾཝེགསམཡོ ཨབྷིནིཀྑམནསམཡོ དུཀྐརཀཱརིཀསམཡོ མཱརཝིཛཡསམཡོ ཨབྷིསམྦོདྷིསམཡོ དིཊྛདྷམྨསུཁཝིཧཱརསམཡོ དེསནཱསམཡོ པརིནིབྦཱནསམཡོཏི ཨེཝམཱདཡོ བྷགཝཏོ དེཝམནུསྶེསུ ཨཏིཝིཡ པཀཱསཱ ཨནེཀཀཱལཔྤབྷེདཱ ཨེཝ སམཡཱ, ཏེསུ སམཡེསུ དེསནཱསམཡསངྑཱཏཾ ཨེཀཾ སམཡནྟི དཱིཔེཏི། ཡོ ཝཱཡཾ ཉཱཎཀརུཎཱཀིཙྩསམཡེསུ ཀརུཎཱཀིཙྩསམཡོ, ཨཏྟཧིཏཔརཧིཏཔྤཊིཔཏྟིསམཡེསུ པརཧིཏཔྤཊིཔཏྟིསམཡོ, སནྣིཔཏིཏཱནཾ ཀརཎཱིཡདྭཡསམཡེསུ དྷམྨཀཐཱསམཡོ, དེསནཱཔཊིཔཏྟིསམཡེསུ དེསནཱསམཡོ, ཏེསུ སམཡེསུ ཨཉྙཏརསམཡཾ སནྡྷཱཡ ‘‘ཨེཀཾ སམཡ’’ནྟི ཨཱཧ།

    Ye vā ime gabbhokkantisamayo jātisamayo saṃvegasamayo abhinikkhamanasamayo dukkarakārikasamayo māravijayasamayo abhisambodhisamayo diṭṭhadhammasukhavihārasamayo desanāsamayo parinibbānasamayoti evamādayo bhagavato devamanussesu ativiya pakāsā anekakālappabhedā eva samayā, tesu samayesu desanāsamayasaṅkhātaṃ ekaṃ samayanti dīpeti. Yo vāyaṃ ñāṇakaruṇākiccasamayesu karuṇākiccasamayo, attahitaparahitappaṭipattisamayesu parahitappaṭipattisamayo, sannipatitānaṃ karaṇīyadvayasamayesu dhammakathāsamayo, desanāpaṭipattisamayesu desanāsamayo, tesu samayesu aññatarasamayaṃ sandhāya ‘‘ekaṃ samaya’’nti āha.

    ཀསྨཱ པནེཏྠ ཡཐཱ ཨབྷིདྷམྨེ ‘‘ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏཱི’’ཏི (དྷ॰ ས॰ ༡) ཙ ཨིཏོ ཨཉྙེསུ སུཏྟཔདེསུ ‘‘ཡསྨིཾ སམཡེ, བྷིཀྑཝེ, བྷིཀྑུ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧཱི’’ཏི (ཨ॰ ནི॰ ༤.༢༠༠) ཙ བྷུམྨཝཙནེན ནིདྡེསོ ཀཏོ, ཝིནཡེ ཙ ‘‘ཏེན སམཡེན བུདྡྷོ བྷགཝཱ’’ཏི (པཱརཱ॰ ༡) ཀརཎཝཙནེན ནིདྡེསོ ཀཏོ, ཏཐཱ ཨཀཏྭཱ ‘‘ཨེཀཾ སམཡ’’ནྟི ཨཙྩནྟསཾཡོགཏྠེ ཨུཔཡོགཝཙནེན ནིདྡེསོ ཀཏོཏི? ཏཏྠ ཏཐཱ, ཨིདྷ ཙ ཨཉྙཐཱ ཨཏྠསམྦྷཝཏོ། ཏཏྠ ཧི ཨབྷིདྷམྨེ ཨིཏོ ཨཉྙེསུ ཙ སུཏྟནྟེསུ ཨཱདྷཱརཝིསཡསངྑཱཏོ ཨདྷིཀརཎཏྠོ ཀིརིཡཱཡ ཀིརིཡནྟརལཀྑཎསངྑཱཏོ བྷཱཝེནབྷཱཝལཀྑཎཏྠོ ཙ སམྦྷཝཏཱིཏི། ཨདྷིཀརཎཉྷི ཀཱལཏྠོ སམཱུཧཏྠོ ཙ སམཡོ ཏཏྠ ཝུཏྟཱནཾ ཕསྶཱདིདྷམྨཱནཾ, ཏཐཱ ཀཱལོ སབྷཱཝདྷམྨཔྤཝཏྟིམཏྟཏཱཡ པརམཏྠཏོ ཨཝིཛྫམཱནོཔི ཨཱདྷཱརབྷཱཝེན པཉྙཱཏོ ཏངྑཎཔྤཝཏྟཱནཾ ཏཏོ པུབྦེ པརཏོ ཙ ཨབྷཱཝཏོ ཡཐཱ ‘‘པུབྦཎྷེ ཛཱཏོ སཱཡནྷེ ཛཱཏོ’’ཏིཨཱདཱིསུ། སམཱུཧོཏིཔི ཨཝཡཝཝིནིམུཏྟོ པརམཏྠཏོ ཨཝིཛྫམཱནོཔི ཀཔྤནཱམཏྟསིདྡྷེན རཱུཔེན ཨཝཡཝཱནཾ ཨཱདྷཱརབྷཱཝེན པཉྙཱཔཱིཡཏི, ཡཐཱ ‘‘རུཀྑེ སཱཁཱ, ཡཝོ ཡཝརཱསིམྷི སམུཊྛིཏོ’’ཏིཨཱདཱིསུ། ཡསྨིཾ ཀཱལེ དྷམྨཔུཉྫེ ཙ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི, ཏསྨིཾཡེཝ ཀཱལེ དྷམྨཔུཉྫེ ཙ ཕསྶཱདཡོཔི ཧོནྟཱིཏི ཨཡཉྷི ཏཏྠ ཨཏྠོ། ཏཐཱ ཁཎསམཝཱཡཧེཏུསངྑཱཏསྶ སམཡསྶ བྷཱཝེན ཏཏྠ ཝུཏྟཱནཾ ཕསྶཱདིདྷམྨཱནཾ བྷཱཝོ ལཀྑཱིཡཏི། ཡཐཱ ཧི ‘‘གཱཝཱིསུ དུཡ྄ཧམཱནཱསུ གཏོ, དུདྡྷཱསུ ཨཱགཏོ’’ཏི ཨེཏྠ གཱཝཱིནཾ དོཧནཀིརིཡཱཡ གམནཀིརིཡཱ ལཀྑཱིཡཏི, ཨེཝཾ ཨིདྷཱཔི ཡསྨིཾ སམཡེཏི ཝུཏྟེ ཙ པདཏྠསྶ སཏྟཱཝིརཧཱབྷཱཝཏོ སཏཱིཏི ཨཡམཏྠོ ཝིཉྙཱཡམཱནོ ཨེཝ ཧོཏཱིཏི སམཡསྶ སཏྟཱཀིརིཡཱཡ ཙིཏྟསྶ ཨུཔྤཱདཀིརིཡཱ ཕསྶཱདཱིནཾ བྷཝནཀིརིཡཱ ཙ ལཀྑཱིཡཏི། ཏཐཱ ཡསྨིཾ སམཡེ ཡསྨིཾ ནཝམེ ཁཎེ ཡསྨིཾ ཡོནིསོམནསིཀཱརཱདིཧེཏུམྷི པཙྩཡསམཝཱཡེ ཝཱ སཏི ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི, ཏསྨིཾ སམཡེ ཁཎེ ཧེཏུམྷི པཙྩཡསམཝཱཡེ ཙ ཕསྶཱདཡོཔི ཧོནྟཱིཏི། ཏསྨཱ ཏདཏྠཛོཏནཏྠཾ བྷུམྨཝཙནེན ནིདྡེསོ ཀཏོ།

    Kasmā panettha yathā abhidhamme ‘‘yasmiṃ samaye kāmāvacaraṃ kusalaṃ cittaṃ uppannaṃ hotī’’ti (dha. sa. 1) ca ito aññesu suttapadesu ‘‘yasmiṃ samaye, bhikkhave, bhikkhu vivicceva kāmehi vivicca akusalehi dhammehī’’ti (a. ni. 4.200) ca bhummavacanena niddeso kato, vinaye ca ‘‘tena samayena buddho bhagavā’’ti (pārā. 1) karaṇavacanena niddeso kato, tathā akatvā ‘‘ekaṃ samaya’’nti accantasaṃyogatthe upayogavacanena niddeso katoti? Tattha tathā, idha ca aññathā atthasambhavato. Tattha hi abhidhamme ito aññesu ca suttantesu ādhāravisayasaṅkhāto adhikaraṇattho kiriyāya kiriyantaralakkhaṇasaṅkhāto bhāvenabhāvalakkhaṇattho ca sambhavatīti. Adhikaraṇañhi kālattho samūhattho ca samayo tattha vuttānaṃ phassādidhammānaṃ, tathā kālo sabhāvadhammappavattimattatāya paramatthato avijjamānopi ādhārabhāvena paññāto taṅkhaṇappavattānaṃ tato pubbe parato ca abhāvato yathā ‘‘pubbaṇhe jāto sāyanhe jāto’’tiādīsu. Samūhotipi avayavavinimutto paramatthato avijjamānopi kappanāmattasiddhena rūpena avayavānaṃ ādhārabhāvena paññāpīyati, yathā ‘‘rukkhe sākhā, yavo yavarāsimhi samuṭṭhito’’tiādīsu. Yasmiṃ kāle dhammapuñje ca kāmāvacaraṃ kusalaṃ cittaṃ uppannaṃ hoti, tasmiṃyeva kāle dhammapuñje ca phassādayopi hontīti ayañhi tattha attho. Tathā khaṇasamavāyahetusaṅkhātassa samayassa bhāvena tattha vuttānaṃ phassādidhammānaṃ bhāvo lakkhīyati. Yathā hi ‘‘gāvīsu duyhamānāsu gato, duddhāsu āgato’’ti ettha gāvīnaṃ dohanakiriyāya gamanakiriyā lakkhīyati, evaṃ idhāpi yasmiṃ samayeti vutte ca padatthassa sattāvirahābhāvato satīti ayamattho viññāyamāno eva hotīti samayassa sattākiriyāya cittassa uppādakiriyā phassādīnaṃ bhavanakiriyā ca lakkhīyati. Tathā yasmiṃ samaye yasmiṃ navame khaṇe yasmiṃ yonisomanasikārādihetumhi paccayasamavāye vā sati kāmāvacaraṃ kusalaṃ cittaṃ uppannaṃ hoti, tasmiṃ samaye khaṇe hetumhi paccayasamavāye ca phassādayopi hontīti. Tasmā tadatthajotanatthaṃ bhummavacanena niddeso kato.

    ཝིནཡེ ཙ ‘‘ཨནྣེན ཝསཏི, ཨཛ྄ཛྷེནེན ཝསཏཱི’’ཏིཨཱདཱིསུ ཝིཡ ཧེཏུཨཏྠོ, ‘‘ཕརསུནཱ ཚིནྡཏི, ཀུདཱལེན ཁཎཏཱི’’ཏིཨཱདཱིསུ ཝིཡ ཀརཎཏྠོ ཙ སམྦྷཝཏི། ཡོ ཧི སིཀྑཱཔདཔཉྙཏྟིསམཡོ དྷམྨསེནཱཔཏིཨཱདཱིཧིཔི དུབྦིཉྙེཡྻོ, ཏེན སམཡེན ཀརཎབྷཱུཏེན ཧེཏུབྷཱུཏེན ཙ ཝཱིཏིཀྐམཾ སུཏྭཱ བྷིཀྑུསངྒྷཾ སནྣིཔཱཏཱཔེཏྭཱ ཨོཏིཎྞཝཏྠུཀཾ པུགྒལཾ པཊིཔུཙྪིཏྭཱ ཝིགརཧིཏྭཱ ཙ ཏཾ ཏཾ ཝཏྠུཾ ཨོཏིཎྞསམཡསངྑཱཏཾ ཀཱལཾ ཨནཏིཀྐམིཏྭཱ སིཀྑཱཔདཱནི པཉྙཱཔེནྟོ ཏཏིཡཔཱརཱཛིཀཱདཱིནཾ ཝིཡ སིཀྑཱཔདཔཉྙཏྟིཡཱ ཧེཏུཾ ཨཔེཀྑམཱནོ ཏཏྠ ཏཏྠ ཝིཧཱསི, ཏསྨཱ ཏདཏྠཛོཏནཏྠཾ ཝིནཡེ ཀརཎཝཙནེན ནིདྡེསོ ཀཏོ།

    Vinaye ca ‘‘annena vasati, ajjhenena vasatī’’tiādīsu viya hetuattho, ‘‘pharasunā chindati, kudālena khaṇatī’’tiādīsu viya karaṇattho ca sambhavati. Yo hi sikkhāpadapaññattisamayo dhammasenāpatiādīhipi dubbiññeyyo, tena samayena karaṇabhūtena hetubhūtena ca vītikkamaṃ sutvā bhikkhusaṅghaṃ sannipātāpetvā otiṇṇavatthukaṃ puggalaṃ paṭipucchitvā vigarahitvā ca taṃ taṃ vatthuṃ otiṇṇasamayasaṅkhātaṃ kālaṃ anatikkamitvā sikkhāpadāni paññāpento tatiyapārājikādīnaṃ viya sikkhāpadapaññattiyā hetuṃ apekkhamāno tattha tattha vihāsi, tasmā tadatthajotanatthaṃ vinaye karaṇavacanena niddeso kato.

    ཨིདྷ པན ཨཉྙསྨིཉྩ ཨེཝཾཛཱཏིཀེ ཨཙྩནྟསཾཡོགཏྠོ སམྦྷཝཏི། ཡསྨིཉྷི སམཡེ སཧ སམུཊྛཱནཧེཏུནཱ ཨིདཾ ཨུདཱནཾ ཨུཔྤནྣཾ, ཨཙྩནྟམེཝ ཏཾ སམཡཾ ཨརིཡཝིཧཱརཔུབྦངྒམཱཡ དྷམྨཔཙྩཝེཀྑཎཱཡ བྷགཝཱ ཝིཧཱསི, ཏསྨཱ ‘‘མཱསཾ ཨཛ྄ཛྷེཏཱི’’ཏིཨཱདཱིསུ ཝིཡ ཨུཔཡོགཏྠཛོཏནཏྠཾ ཨིདྷ ཨུཔཡོགཝཙནེན ནིདྡེསོ ཀཏོ། ཏེནེཏཾ ཝུཙྩཏི –

    Idha pana aññasmiñca evaṃjātike accantasaṃyogattho sambhavati. Yasmiñhi samaye saha samuṭṭhānahetunā idaṃ udānaṃ uppannaṃ, accantameva taṃ samayaṃ ariyavihārapubbaṅgamāya dhammapaccavekkhaṇāya bhagavā vihāsi, tasmā ‘‘māsaṃ ajjhetī’’tiādīsu viya upayogatthajotanatthaṃ idha upayogavacanena niddeso kato. Tenetaṃ vuccati –

    ‘‘ཏཾ ཏཾ ཨཏྠམཔེཀྑིཏྭཱ, བྷུམྨེན ཀརཎེན ཙ།

    ‘‘Taṃ taṃ atthamapekkhitvā, bhummena karaṇena ca;

    ཨཉྙཏྲ སམཡོ ཝུཏྟོ, ཨུཔཡོགེན སོ ཨིདྷཱ’’ཏི༎

    Aññatra samayo vutto, upayogena so idhā’’ti.

    པོརཱཎཱ པན ཝཎྞཡནྟི – ‘‘ཡསྨིཾ སམཡེ’’ཏི ཝཱ ‘‘ཏེན སམཡེནཱ’’ཏི ཝཱ ‘‘ཨེཀཾ སམཡ’’ནྟི ཝཱ ཨབྷིལཱཔམཏྟབྷེདོ ཨེས ནིདྡེསོ, སབྦཏྠ བྷུམྨམེཝ ཨཏྠོཏི། ཏསྨཱ ‘‘ཨེཀཾ སམཡ’’ནྟི ཝུཏྟེཔི ཨེཀསྨིཾ སམཡེཏི ཨཏྠོ ཝེདིཏབྦོ།

    Porāṇā pana vaṇṇayanti – ‘‘yasmiṃ samaye’’ti vā ‘‘tena samayenā’’ti vā ‘‘ekaṃ samaya’’nti vā abhilāpamattabhedo esa niddeso, sabbattha bhummameva atthoti. Tasmā ‘‘ekaṃ samaya’’nti vuttepi ekasmiṃ samayeti attho veditabbo.

    བྷགཝཱཏི གརུ། གརུཉྷི ལོཀེ ‘‘བྷགཝཱ’’ཏི ཝདནྟི། ཨཡཉྩ སབྦགུཎཝིསིཊྛཏཱཡ སབྦསཏྟཱནཾ གརུ, ཏསྨཱ བྷགཝཱཏི ཝེདིཏབྦོ། པོརཱཎེཧིཔི ཝུཏྟཾ –

    Bhagavāti garu. Garuñhi loke ‘‘bhagavā’’ti vadanti. Ayañca sabbaguṇavisiṭṭhatāya sabbasattānaṃ garu, tasmā bhagavāti veditabbo. Porāṇehipi vuttaṃ –

    ‘‘བྷགཝཱཏི ཝཙནཾ སེཊྛཾ, བྷགཝཱཏི ཝཙནམུཏྟམཾ།

    ‘‘Bhagavāti vacanaṃ seṭṭhaṃ, bhagavāti vacanamuttamaṃ;

    གརུ གཱརཝཡུཏྟོ སོ, བྷགཝཱ ཏེན ཝུཙྩཏཱི’’ཏི༎

    Garu gāravayutto so, bhagavā tena vuccatī’’ti.

    ཏཏྠ སེཊྛཝཱཙཀཝཙནཾ སེཊྛནྟི ཝུཏྟཾ སེཊྛགུཎསཧཙརཎཏོ། ཨཐ ཝཱ ཝུཙྩཏཱིཏི ཝཙནཾ, ཨཏྠོ། བྷགཝཱཏི ཝཙནཾ སེཊྛནྟི བྷགཝཱཏི ཨིམིནཱ ཝཙནེན ཝཙནཱིཡོ ཡོ ཨཏྠོ, སོ སེཊྛོཏི ཨཏྠོ། བྷགཝཱཏི ཝཙནམུཏྟམནྟི ཨེཏྠཱཔི ཝུཏྟནཡེནེཝ ཨཏྠོ ཝེདིཏབྦོ། གཱརཝཡུཏྟོཏི གརུབྷཱཝཡུཏྟོ གརུགུཎཡོགཏོ ཝིསེསགརུཀརཎཱརཧཏཱཡ ཝཱ གཱརཝཡུཏྟོ། ཨེཝཾ གུཎཝིསིཊྛསཏྟུཏྟམགརུགཱརཝཱདྷིཝཙནཾ བྷགཝཱཏི ཨིདཾ ཝཙནནྟི ཝེདིཏབྦཾ། ཨཔིཙ –

    Tattha seṭṭhavācakavacanaṃ seṭṭhanti vuttaṃ seṭṭhaguṇasahacaraṇato. Atha vā vuccatīti vacanaṃ, attho. Bhagavāti vacanaṃ seṭṭhanti bhagavāti iminā vacanena vacanīyo yo attho, so seṭṭhoti attho. Bhagavāti vacanamuttamanti etthāpi vuttanayeneva attho veditabbo. Gāravayuttoti garubhāvayutto garuguṇayogato visesagarukaraṇārahatāya vā gāravayutto. Evaṃ guṇavisiṭṭhasattuttamagarugāravādhivacanaṃ bhagavāti idaṃ vacananti veditabbaṃ. Apica –

    ‘‘བྷགཱི བྷཛཱི བྷཱགཱི ཝིབྷཏྟཝཱ ཨིཏི,

    ‘‘Bhagī bhajī bhāgī vibhattavā iti,

    ཨཀཱསི བྷགྒནྟི གརཱུཏི བྷཱགྱཝཱ།

    Akāsi bhagganti garūti bhāgyavā;

    བཧཱུཧི ཉཱཡེཧི སུབྷཱཝིཏཏྟནོ,

    Bahūhi ñāyehi subhāvitattano,

    བྷཝནྟགོ སོ བྷགཝཱཏི ཝུཙྩཏཱི’’ཏི༎ –

    Bhavantago so bhagavāti vuccatī’’ti. –

    ནིདྡེསེ (མཧཱནི॰ ༨༤) ཨཱགཏནཡེན –

    Niddese (mahāni. 84) āgatanayena –

    ‘‘བྷཱགྱཝཱ བྷགྒཝཱ ཡུཏྟོ, བྷགེཧི ཙ ཝིབྷཏྟཝཱ།

    ‘‘Bhāgyavā bhaggavā yutto, bhagehi ca vibhattavā;

    བྷཏྟཝཱ ཝནྟགམནོ, བྷཝེསུ བྷགཝཱ ཏཏོ’’ཏི༎ –

    Bhattavā vantagamano, bhavesu bhagavā tato’’ti. –

    ཨིམཱཡ གཱཐཱཡ ཙ ཝསེན བྷགཝཱཏི པདསྶ ཨཏྠོ ཝེདིཏབྦོ། སོ པནཱཡཾ ཨཏྠོ སབྦཱཀཱརེན ཝིསུདྡྷིམགྒེ (ཝིསུདྡྷི॰ ༡.༡༤༢) ཝུཏྟོ, ཏསྨཱ ཏཏྠ ཝུཏྟནཡེནེཝ ཝིཝརིཏབྦོ།

    Imāya gāthāya ca vasena bhagavāti padassa attho veditabbo. So panāyaṃ attho sabbākārena visuddhimagge (visuddhi. 1.142) vutto, tasmā tattha vuttanayeneva vivaritabbo.

    ཨཔིཙ བྷཱགེ ཝནི, བྷགེ ཝཱ ཝམཱིཏི བྷགཝཱ། ཏཐཱགཏོ ཧི དཱནསཱིལཱདིཔཱརམིདྷམྨེ ཛྷཱནཝིམོཀྑཱདིཨུཏྟརིམནུསྶདྷམྨེ ཝནི བྷཛི སེཝི བཧུལམཀཱསི, ཏསྨཱ བྷགཝཱ། ཨཐ ཝཱ ཏེཡེཝ ‘‘ཝེནེཡྻསཏྟསནྟཱནེསུ ཀཐཾ ནུ ཁོ ཨུཔྤཛྫེཡྻུ’’ནྟི ཝནི ཨབྷིཔཏྠཡཱིཏི བྷགཝཱ། ཨཐ ཝཱ བྷགསངྑཱཏཾ ཨིསྶརིཡཾ ཡསཉྩ ཝམི ཨུགྒིརི ཁེལ༹པིཎྜཾ ཝིཡ ཨནཔེཀྑོ ཚཌྜཡཱིཏི བྷགཝཱ། ཏཐཱ ཧི ཏཐཱགཏོ ཧཏྠགཏཾ ཙཀྐཝཏྟིསིརིཾ དེཝལོཀཱདྷིཔཙྩསདིསཾ ཙཱཏུདྡཱིཔིསྶརིཡཾ, ཙཀྐཝཏྟིསམྤཏྟིསནྣིསྶཡཉྩ སཏྟརཏནསམུཛྫལཾ ཡསཾ ཏིཎཱཡཔི ཨམཉྙམཱནོ ནིརཔེཀྑོ པཧཱཡ ཨབྷིནིཀྑམིཏྭཱ སམྨཱསམྦོདྷིཾ ཨབྷིསམྦུདྡྷོ, ཏསྨཱ ཨིམེ སིརིཨཱདིཀེ བྷགེ ཝམཱིཏི བྷགཝཱ། ཨཐ ཝཱ བྷཱནི ནཱམ ནཀྑཏྟཱནི, ཏེཧི སམཾ གཙྪནྟི པཝཏྟནྟཱིཏི བྷགཱ། སིནེརུཡུགནྡྷརཨུཏྟརཀུརུཧིམཝནྟཱདིབྷཱཛནལོཀཝིསེསསནྣིསྶཡསོབྷཱ ཀཔྤཊྛིཏིབྷཱཝཏོ, ཏེཔི བྷགེ ཝམི, ཏནྣིཝཱསིསཏྟཱཝཱསསམཏིཀྐམནཏོ ཏཔྤཊིབདྡྷཚནྡརཱགཔྤཧཱནེན པཛཧཱིཏི། ཨེཝམྤི བྷགེ ཝམཱིཏི བྷགཝཱཏི ཨེཝམཱདིནཱ ནཡེན བྷགཝཱཏི པདསྶ ཨཏྠོ ཝེདིཏབྦོ།

    Apica bhāge vani, bhage vā vamīti bhagavā. Tathāgato hi dānasīlādipāramidhamme jhānavimokkhādiuttarimanussadhamme vani bhaji sevi bahulamakāsi, tasmā bhagavā. Atha vā teyeva ‘‘veneyyasattasantānesu kathaṃ nu kho uppajjeyyu’’nti vani abhipatthayīti bhagavā. Atha vā bhagasaṅkhātaṃ issariyaṃ yasañca vami uggiri kheḷapiṇḍaṃ viya anapekkho chaḍḍayīti bhagavā. Tathā hi tathāgato hatthagataṃ cakkavattisiriṃ devalokādhipaccasadisaṃ cātuddīpissariyaṃ, cakkavattisampattisannissayañca sattaratanasamujjalaṃ yasaṃ tiṇāyapi amaññamāno nirapekkho pahāya abhinikkhamitvā sammāsambodhiṃ abhisambuddho, tasmā ime siriādike bhage vamīti bhagavā. Atha vā bhāni nāma nakkhattāni, tehi samaṃ gacchanti pavattantīti bhagā. Sineruyugandharauttarakuruhimavantādibhājanalokavisesasannissayasobhā kappaṭṭhitibhāvato, tepi bhage vami, tannivāsisattāvāsasamatikkamanato tappaṭibaddhachandarāgappahānena pajahīti. Evampi bhage vamīti bhagavāti evamādinā nayena bhagavāti padassa attho veditabbo.

    ཨེཏྟཱཝཏཱ ཙེཏྠ ཨེཝཾ མེ སུཏནྟི ཝཙནེན ཡཐཱསུཏཾ དྷམྨཾ སཝནཝསེན བྷཱསནྟོ བྷགཝཏོ དྷམྨསརཱིརཾ པཙྩཀྑཾ ཀརོཏི, ཏེན ‘‘ནཡིདཾ ཨཏིཀྐནྟསཏྠུཀཾ པཱཝཙནཾ, ཨཡཾ ཝོ སཏྠཱ’’ཏི སཏྠུ ཨདསྶནེན ཨུཀྐཎྛིཏཾ ཛནཾ སམསྶཱསེཏི། ཝུཏྟཉྷེཏཾ བྷགཝཏཱ ‘‘ཡོ ཁོ, ཨཱནནྡ, མཡཱ དྷམྨོ ཙ ཝིནཡོ ཙ དེསིཏོ པཉྙཏྟོ, སོ ཝོ མམཙྩཡེན སཏྠཱ’’ཏི (དཱི॰ ནི॰ ༢.༢༡༦; མི॰ པ॰ ༤.༡.༡)། ཨེཀཾ སམཡཾ བྷགཝཱཏི ཝཙནེན ཏསྨིཾ སམཡེ བྷགཝཏོ ཨཝིཛྫམཱནབྷཱཝཾ དསྶེནྟོ རཱུཔཀཱཡཔརིནིབྦཱནཾ སཱདྷེཏི, ཏེན ‘‘ཨེཝཾཝིདྷསྶ ནཱམ དྷམྨསྶ དེསེཏཱ དསབལདྷརོ ཝཛིརསངྒྷཱཏསམཱནཀཱཡོ སོཔི བྷགཝཱ པརིནིབྦུཏོ, ཀེནཉྙེན ཛཱིཝིཏེ ཨཱསཱ ཛནེཏབྦཱ’’ཏི ཛཱིཝིཏམདམཏྟཾ ཛནཾ སཾཝེཛེཏི, སདྡྷམྨེ ཙསྶ ཨུསྶཱཧཾ ཛནེཏི།

    Ettāvatā cettha evaṃ me sutanti vacanena yathāsutaṃ dhammaṃ savanavasena bhāsanto bhagavato dhammasarīraṃ paccakkhaṃ karoti, tena ‘‘nayidaṃ atikkantasatthukaṃ pāvacanaṃ, ayaṃ vo satthā’’ti satthu adassanena ukkaṇṭhitaṃ janaṃ samassāseti. Vuttañhetaṃ bhagavatā ‘‘yo kho, ānanda, mayā dhammo ca vinayo ca desito paññatto, so vo mamaccayena satthā’’ti (dī. ni. 2.216; mi. pa. 4.1.1). Ekaṃ samayaṃ bhagavāti vacanena tasmiṃ samaye bhagavato avijjamānabhāvaṃ dassento rūpakāyaparinibbānaṃ sādheti, tena ‘‘evaṃvidhassa nāma dhammassa desetā dasabaladharo vajirasaṅghātasamānakāyo sopi bhagavā parinibbuto, kenaññena jīvite āsā janetabbā’’ti jīvitamadamattaṃ janaṃ saṃvejeti, saddhamme cassa ussāhaṃ janeti.

    ཨེཝནྟི ཙ བྷཎནྟོ དེསནཱསམྤཏྟིཾ ནིདྡིསཏི, ཝཀྑམཱནསྶ སཀལསུཏྟསྶ ཨེཝནྟི ནིདསྶནཏོ། མེ སུཏནྟི སཱཝཀསམྤཏྟིཾ སཝནསམྤཏྟིཉྩ ནིདྡིསཏི, པཊིསམྦྷིདཱཔཏྟེན པཉྩསུ ཋཱནེསུ བྷགཝཏཱ ཨེཏདགྒེ ཋཔིཏེན དྷམྨབྷཎྜཱགཱརིཀེན སུཏབྷཱཝདཱིཔནཏོ ‘‘ཏཉྩ ཁོ མཡཱཝ སུཏཾ, ན ཨནུསྶུཏིཀཾ, ན པརམྤརཱབྷཏ’’ནྟི ཨིམསྶ ཙཏྠསྶ དཱིཔནཏོ། ཨེཀཾ སམཡནྟི ཀཱལསམྤཏྟིཾ ནིདྡིསཏི བྷགཝཏོ ཨུརུཝེལཱཡཾ ཝིཧརཎསམཡབྷཱཝེན བུདྡྷུཔྤཱདཔྤཊིམཎྜིཏབྷཱཝདཱིཔནཏོ། བུདྡྷུཔྤཱདཔརམཱ ཧི ཀཱལསམྤདཱ། བྷགཝཱཏི དེསཀསམྤཏྟིཾ ནིདྡིསཏི གུཎཝིསིཊྛསཏྟུཏྟམགརུབྷཱཝདཱིཔནཏོ།

    Evanti ca bhaṇanto desanāsampattiṃ niddisati, vakkhamānassa sakalasuttassa evanti nidassanato. Me sutanti sāvakasampattiṃ savanasampattiñca niddisati, paṭisambhidāpattena pañcasu ṭhānesu bhagavatā etadagge ṭhapitena dhammabhaṇḍāgārikena sutabhāvadīpanato ‘‘tañca kho mayāva sutaṃ, na anussutikaṃ, na paramparābhata’’nti imassa catthassa dīpanato. Ekaṃ samayanti kālasampattiṃ niddisati bhagavato uruvelāyaṃ viharaṇasamayabhāvena buddhuppādappaṭimaṇḍitabhāvadīpanato. Buddhuppādaparamā hi kālasampadā. Bhagavāti desakasampattiṃ niddisati guṇavisiṭṭhasattuttamagarubhāvadīpanato.

    ཨུརུཝེལཱཡནྟི མཧཱཝེལཱཡཾ, མཧནྟེ ཝཱལུཀཱརཱསིམྷཱིཏི ཨཏྠོ། ཨཐ ཝཱ ཨུརཱུཏི ཝཱལུཀཱ ཝུཙྩཏི, ཝེལཱཏི མརིཡཱདཱ། ཝེལཱཏིཀྐམནཧེཏུ ཨཱབྷཏཱ ཨུརུ ཨུརུཝེལཱཏི ཨེཝམྤེཏྠ ཨཏྠོ དཊྛབྦོ།

    Uruvelāyanti mahāvelāyaṃ, mahante vālukārāsimhīti attho. Atha vā urūti vālukā vuccati, velāti mariyādā. Velātikkamanahetu ābhatā uru uruvelāti evampettha attho daṭṭhabbo.

    ཨཏཱིཏེ ཀིར ཨནུཔྤནྣེ བུདྡྷེ དསསཧསྶཏཱཔསཱ ཏསྨིཾ པདེསེ ཝིཧརནྟཱ ‘‘ཀཱཡཀམྨཝཙཱིཀམྨཱནི པརེསམྤི པཱཀཊཱནི ཧོནྟི, མནོཀམྨཾ པན ཨཔཱཀཊཾ། ཏསྨཱ ཡོ མིཙྪཱཝིཏཀྐཾ ཝིཏཀྐེཏི, སོ ཨཏྟནཱཝ ཨཏྟཱནཾ ཙོདེཏྭཱ པཏྟཔུཊེན ཝཱལུཀཾ ཨཱཧརིཏྭཱ ཨིམསྨིཾ ཋཱནེ ཨཱཀིརཏུ, ཨིདམསྶ དཎྜཀམྨ’’ནྟི ཀཏིཀཝཏྟཾ ཀཏྭཱ ཏཏོ པཊྛཱཡ ཡོ ཏཱདིསཾ ཝིཏཀྐཾ ཝིཏཀྐེཏི, སོ ཏཏྠ པཏྟཔུཊེན ཝཱལུཀཾ ཨཱཧརིཏྭཱ ཨཱཀིརཏི། ཨེཝཾ ཏཏྠ ཨནུཀྐམེན མཧཱཝཱལུཀཱརཱསི ཛཱཏོ, ཏཏོ ནཾ པཙྪིམཱ ཛནཏཱ པརིཀྑིཔིཏྭཱ ཙེཏིཡཊྛཱནམཀཱསི། ཏཾ སནྡྷཱཡ ཝུཏྟཾ – ‘‘ཨུརུཝེལཱཡནྟི མཧཱཝེལཱཡཾ, མཧནྟེ ཝཱལུཀཱརཱསིམྷཱིཏི ཨཏྠོ དཊྛབྦོ’’ཏི།

    Atīte kira anuppanne buddhe dasasahassatāpasā tasmiṃ padese viharantā ‘‘kāyakammavacīkammāni paresampi pākaṭāni honti, manokammaṃ pana apākaṭaṃ. Tasmā yo micchāvitakkaṃ vitakketi, so attanāva attānaṃ codetvā pattapuṭena vālukaṃ āharitvā imasmiṃ ṭhāne ākiratu, idamassa daṇḍakamma’’nti katikavattaṃ katvā tato paṭṭhāya yo tādisaṃ vitakkaṃ vitakketi, so tattha pattapuṭena vālukaṃ āharitvā ākirati. Evaṃ tattha anukkamena mahāvālukārāsi jāto, tato naṃ pacchimā janatā parikkhipitvā cetiyaṭṭhānamakāsi. Taṃ sandhāya vuttaṃ – ‘‘uruvelāyanti mahāvelāyaṃ, mahante vālukārāsimhīti attho daṭṭhabbo’’ti.

    ཝིཧརཏཱིཏི ཨཝིསེསེན ཨིརིཡཱཔཐདིབྦབྲཧྨཨརིཡཝིཧཱརེསུ ཨཉྙཏརཝིཧཱརསམངྒིཏཱཔརིདཱིཔནཾ། ཨིདྷ པན ཋཱནནིསཛྫཱགམནསཡནཔྤབྷེདེསུ ཨིརིཡཱཔཐེསུ ཨཱསནསངྑཱཏཨིརིཡཱཔཐསམཱཡོགཔརིདཱིཔནཾ ཨརིཡཝིཧཱརསམངྒིཏཱཔརིདཱིཔནཉྩཱཏི ཝེདིཏབྦཾ། ཏཏྠ ཡསྨཱ ཨེཀཾ ཨིརིཡཱཔཐབཱདྷནཾ ཨཉྙེན ཨིརིཡཱཔཐེན ཝིཙྪིནྡིཏྭཱ ཨཔརིཔཏནྟཾ ཨཏྟབྷཱཝཾ ཧརཏི པཝཏྟེཏི, ཏསྨཱ ཝིཧརཏཱིཏི པདསྶ ཨིརིཡཱཔཐཝིཧཱརཝསེནེཏྠ ཨཏྠོ ཝེདིཏབྦོ། ཡསྨཱ པན བྷགཝཱ དིབྦཝིཧཱརཱདཱིཧི སཏྟཱནཾ ཝིཝིདྷཾ ཧིཏཾ ཧརཏི ཨུཔཧརཏི ཨུཔནེཏི ཨུཔྤཱདེཏི, ཏསྨཱ ཏེསམྤི ཝསེན ཝིཝིདྷཾ ཧརཏཱིཏི ཨེཝམཏྠོ ཝེདིཏབྦོ།

    Viharatīti avisesena iriyāpathadibbabrahmaariyavihāresu aññataravihārasamaṅgitāparidīpanaṃ. Idha pana ṭhānanisajjāgamanasayanappabhedesu iriyāpathesu āsanasaṅkhātairiyāpathasamāyogaparidīpanaṃ ariyavihārasamaṅgitāparidīpanañcāti veditabbaṃ. Tattha yasmā ekaṃ iriyāpathabādhanaṃ aññena iriyāpathena vicchinditvā aparipatantaṃ attabhāvaṃ harati pavatteti, tasmā viharatīti padassa iriyāpathavihāravasenettha attho veditabbo. Yasmā pana bhagavā dibbavihārādīhi sattānaṃ vividhaṃ hitaṃ harati upaharati upaneti uppādeti, tasmā tesampi vasena vividhaṃ haratīti evamattho veditabbo.

    ནཛྫཱཏི ནདཏི སནྡཏཱིཏི ནདཱི, ཏསྶཱ ནཛྫཱ, ནདིཡཱ ནིནྣགཱཡཱཏི ཨཏྠོ། ནེརཉྫརཱཡཱཏི ནེལཾ ཛལམསྶཱཏི ‘‘ནེལཉྫལཱཡཱ’’ཏི ཝཏྟབྦེ ལཀཱརསྶ རཀཱརཾ ཀཏྭཱ ‘‘ནེརཉྫརཱཡཱ’’ཏི ཝུཏྟཾ, ཀདྡམསེཝཱལཔཎཀཱདིདོསརཧིཏསལིལཱཡཱཏི ཨཏྠོ། ཀེཙི ‘‘ནཱིལཛལཱཡཱཏི ཝཏྟབྦེ ནེརཉྫརཱཡཱཏི ཝུཏྟ’’ནྟི ཝདནྟི། ནཱམམེཝ ཝཱ ཨེཏཾ ཨེཏིསྶཱ ནདིཡཱཏི ཝེདིཏབྦཾ། ཏསྶཱ ནདིཡཱ ཏཱིརེ ཡཏྠ བྷགཝཱ ཝིཧཱསི, ཏཾ དསྶེཏུཾ ‘‘བོདྷིརུཀྑམཱུལེ’’ཏི ཝུཏྟཾ། ཏཏྠ ‘‘བོདྷི ཝུཙྩཏི ཙཏཱུསུ མགྒེསུ ཉཱཎ’’ནྟི ཨེཏྠ (ཙཱུལ༹ནི॰ ཁགྒཝིསཱཎསུཏྟནིདྡེས ༡༢༡) མགྒཉཱཎཾ བོདྷཱིཏི ཝུཏྟཾ། ‘‘པཔྤོཏི བོདྷིཾ ཝརབྷཱུརིམེདྷསོ’’ཏི ཨེཏྠ (དཱི॰ ནི॰ ༣.༢༡༧) སབྦཉྙུཏཉྙཱཎཾ། ཏདུབྷཡམྤི བོདྷིཾ བྷགཝཱ ཨེཏྠ པཏྟོཏི རུཀྑོཔི བོདྷིརུཀྑོཏྭེཝ ནཱམཾ ལབྷི། ཨཐ ཝཱ སཏྟ བོཛ྄ཛྷངྒེ བུཛ྄ཛྷཱིཏི བྷགཝཱ བོདྷི, ཏེན བུཛ྄ཛྷནྟེན སནྣིསྶིཏཏྟཱ སོ རུཀྑོཔི བོདྷིརུཀྑོཏི ནཱམཾ ལབྷི, ཏསྶ བོདྷིརུཀྑསྶ། མཱུལེཏི སམཱིཔེ། ཨཡཉྷི མཱུལསདྡོ ‘‘མཱུལཱནི ཨུདྡྷརེཡྻ ཨནྟམསོ ཨུསཱིརནཱལ༹མཏྟཱནིཔཱི’’ཏིཨཱདཱིསུ (ཨ॰ ནི॰ ༤.༡༩༥) མཱུལམཱུལེ དིསྶཏི། ‘‘ལོབྷོ ཨཀུསལམཱུལ’’ནྟིཨཱདཱིསུ (དཱི॰ ནི॰ ༣.༣༠༥) ཨསཱདྷཱརཎཧེཏུམྷི། ‘‘ཡཱཝཏཱ མཛ྄ཛྷནྷིཀེ ཀཱལེ ཚཱཡཱ ཕརཏི, ནིཝཱཏེ པཎྞཱནི པཏནྟི, ཨེཏྟཱཝཏཱ རུཀྑམཱུལ’’ནྟིཨཱདཱིསུ སམཱིཔེ། ཨིདྷཱཔི སམཱིཔེ ཨདྷིཔྤེཏོ, ཏསྨཱ བོདྷིརུཀྑསྶ མཱུལེ སམཱིཔེཏི ཨེཝམེཏྠ ཨཏྠོ དཊྛབྦོ།

    Najjāti nadati sandatīti nadī, tassā najjā, nadiyā ninnagāyāti attho. Nerañjarāyāti nelaṃ jalamassāti ‘‘nelañjalāyā’’ti vattabbe lakārassa rakāraṃ katvā ‘‘nerañjarāyā’’ti vuttaṃ, kaddamasevālapaṇakādidosarahitasalilāyāti attho. Keci ‘‘nīlajalāyāti vattabbe nerañjarāyāti vutta’’nti vadanti. Nāmameva vā etaṃ etissā nadiyāti veditabbaṃ. Tassā nadiyā tīre yattha bhagavā vihāsi, taṃ dassetuṃ ‘‘bodhirukkhamūle’’ti vuttaṃ. Tattha ‘‘bodhi vuccati catūsu maggesu ñāṇa’’nti ettha (cūḷani. khaggavisāṇasuttaniddesa 121) maggañāṇaṃ bodhīti vuttaṃ. ‘‘Pappoti bodhiṃ varabhūrimedhaso’’ti ettha (dī. ni. 3.217) sabbaññutaññāṇaṃ. Tadubhayampi bodhiṃ bhagavā ettha pattoti rukkhopi bodhirukkhotveva nāmaṃ labhi. Atha vā satta bojjhaṅge bujjhīti bhagavā bodhi, tena bujjhantena sannissitattā so rukkhopi bodhirukkhoti nāmaṃ labhi, tassa bodhirukkhassa. Mūleti samīpe. Ayañhi mūlasaddo ‘‘mūlāni uddhareyya antamaso usīranāḷamattānipī’’tiādīsu (a. ni. 4.195) mūlamūle dissati. ‘‘Lobho akusalamūla’’ntiādīsu (dī. ni. 3.305) asādhāraṇahetumhi. ‘‘Yāvatā majjhanhike kāle chāyā pharati, nivāte paṇṇāni patanti, ettāvatā rukkhamūla’’ntiādīsu samīpe. Idhāpi samīpe adhippeto, tasmā bodhirukkhassa mūle samīpeti evamettha attho daṭṭhabbo.

    པཋམཱབྷིསམྦུདྡྷོཏི པཋམཾ ཨབྷིསམྦུདྡྷོ ཧུཏྭཱ, སབྦཔཋམཾཡེཝཱཏི ཨཏྠོ། ཨེཏྟཱཝཏཱ དྷམྨབྷཎྜཱགཱརིཀེན ཨུདཱནདེསནཱཡ ནིདཱནཾ ཋཔེནྟེན ཀཱལདེསདེསཀཱཔདེསཱ སཧ ཝིསེསེན པཀཱསིཏཱ ཧོནྟི།

    Paṭhamābhisambuddhoti paṭhamaṃ abhisambuddho hutvā, sabbapaṭhamaṃyevāti attho. Ettāvatā dhammabhaṇḍāgārikena udānadesanāya nidānaṃ ṭhapentena kāladesadesakāpadesā saha visesena pakāsitā honti.

    ཨེཏྠཱཧ ‘‘ཀསྨཱ དྷམྨཝིནཡསངྒཧེ ཀཡིརམཱནེ ནིདཱནཝཙནཾ ཝུཏྟཾ, ནནུ བྷགཝཏཱ བྷཱསིཏཝཙནསྶེཝ སངྒཧོ ཀཱཏབྦོ’’ཏི? ཝུཙྩཏེ – དེསནཱཡ ཙིརཊྛིཏིཨསམྨོསསདྡྷེཡྻབྷཱཝསམྤཱདནཏྠཾ། ཀཱལདེསདེསཀཝཏྠུཨཱདཱིཧི ཨུཔནིབནྡྷིཏྭཱ ཋཔིཏཱ ཧི དེསནཱ ཙིརཊྛིཏིཀཱ ཧོཏི ཨསམྨོསཱ སདྡྷེཡྻཱ ཙ དེསཀཱལཀཏྟུཧེཏུནིམིཏྟེཧི ཨུཔནིབདྡྷོ ཝིཡ ཝོཧཱརཝིནིཙྪཡོ། ཏེནེཝ ཙ ཨཱཡསྨཏཱ མཧཱཀསྶཔེན ‘‘པཋམཾ, ཨཱཝུསོ ཨཱནནྡ, ཨུདཱནཾ ཀཏྠ བྷཱསིཏ’’ནྟིཨཱདིནཱ དེསཱདཱིསུ པུཙྪཱཡ ཀཏཱཡ ཝིསྶཛྫནཾ ཀརོནྟེན དྷམྨབྷཎྜཱགཱརིཀེན ‘‘ཨེཝཾ མེ སུཏ’’ནྟིཨཱདིནཱ ཨུདཱནསྶ ནིདཱནཾ བྷཱསིཏནྟི།

    Etthāha ‘‘kasmā dhammavinayasaṅgahe kayiramāne nidānavacanaṃ vuttaṃ, nanu bhagavatā bhāsitavacanasseva saṅgaho kātabbo’’ti? Vuccate – desanāya ciraṭṭhitiasammosasaddheyyabhāvasampādanatthaṃ. Kāladesadesakavatthuādīhi upanibandhitvā ṭhapitā hi desanā ciraṭṭhitikā hoti asammosā saddheyyā ca desakālakattuhetunimittehi upanibaddho viya vohāravinicchayo. Teneva ca āyasmatā mahākassapena ‘‘paṭhamaṃ, āvuso ānanda, udānaṃ kattha bhāsita’’ntiādinā desādīsu pucchāya katāya vissajjanaṃ karontena dhammabhaṇḍāgārikena ‘‘evaṃ me suta’’ntiādinā udānassa nidānaṃ bhāsitanti.

    ཨཔིཙ སཏྠུ སམྤཏྟིཔཀཱསནཏྠཾ ནིདཱནཝཙནཾ། ཏཐཱགཏསྶ ཧི བྷགཝཏོ པུབྦརཙནཱནུམཱནཱགམཏཀྐཱབྷཱཝཏོ སམྦུདྡྷཏྟསིདྡྷི། ན ཧི སམྨཱསམྦུདྡྷསྶ པུབྦརཙནཱདཱིཧི ཨཏྠོ ཨཏྠི སབྦཏྠ ཨཔྤཊིཧཏཉཱཎཙཱརཏཱཡ ཨེཀཔྤམཱཎཏྟཱ ཉེཡྻདྷམྨེསུ། ཏཐཱ ཨཱཙརིཡམུཊྛིདྷམྨམཙྪརིཡསཱསནསཱཝཀཱནུརཱགཱབྷཱཝཏོ ཁཱིཎཱསཝཏྟསིདྡྷི། ན ཧི སབྦསོ པརིཀྑཱིཎཱསཝསྶ ཀཏྠཙིཔི ཨཱཙརིཡམུཊྛིཨཱདཱིནཾ སམྦྷཝོཏི སུཝིསུདྡྷསྶ པརཱནུགྒཧཔྤཝཏྟི། ཨིཏི དེསཀདོསབྷཱུཏཱནཾ དིཊྛིསཱིལསམྤཏྟིདཱུསཀཱནཾ ཨཙྩནྟཾ ཨཝིཛྫཱཏཎྷཱནཾ ཨབྷཱཝསཾསཱུཙཀེཧི ཉཱཎསམྤདཱཔཧཱནསམྤདཱབྷིབྱཉྫཀེཧི ཙ སམྦུདྡྷཝིསུདྡྷབྷཱཝེཧི པུརིམཝེསཱརཛྫདྭཡསིདྡྷི, ཏཏོ ཙ ཨནྟརཱཡིཀནིཡྻཱནིཀདྷམྨེསུ སམྨོཧཱབྷཱཝསིདྡྷིཏོ པཙྪིམཝེསཱརཛྫདྭཡསིདྡྷཱིཏི བྷགཝཏོ ཙཏུཝེསཱརཛྫསམནྣཱགམོ ཨཏྟཧིཏཔརཧིཏཔྤཊིཔཏྟི ཙ ནིདཱནཝཙནེན པཀཱསིཏཱ ཧོནྟི, ཏཏྠ ཏཏྠ སམྤཏྟཔརིསཱཡ ཨཛ྄ཛྷཱསཡཱནུརཱུཔཾ ཋཱནུཔྤཏྟིཀཔྤཊིབྷཱནེན དྷམྨདེསནཱདཱིཔནཏོ། ཨིདྷ པན ཝིམུཏྟིསུཁཔྤཊིསཾཝེདནཔཊིཙྩསམུཔྤཱདམནསིཀཱརཔཀཱསནེནཱཏི ཡོཛེཏབྦཾ། ཏེན ཝུཏྟཾ – ‘‘སཏྠུ སམྤཏྟིཔཀཱསནཏྠཾ ནིདཱནཝཙན’’ནྟི།

    Apica satthu sampattipakāsanatthaṃ nidānavacanaṃ. Tathāgatassa hi bhagavato pubbaracanānumānāgamatakkābhāvato sambuddhattasiddhi. Na hi sammāsambuddhassa pubbaracanādīhi attho atthi sabbattha appaṭihatañāṇacāratāya ekappamāṇattā ñeyyadhammesu. Tathā ācariyamuṭṭhidhammamacchariyasāsanasāvakānurāgābhāvato khīṇāsavattasiddhi. Na hi sabbaso parikkhīṇāsavassa katthacipi ācariyamuṭṭhiādīnaṃ sambhavoti suvisuddhassa parānuggahappavatti. Iti desakadosabhūtānaṃ diṭṭhisīlasampattidūsakānaṃ accantaṃ avijjātaṇhānaṃ abhāvasaṃsūcakehi ñāṇasampadāpahānasampadābhibyañjakehi ca sambuddhavisuddhabhāvehi purimavesārajjadvayasiddhi, tato ca antarāyikaniyyānikadhammesu sammohābhāvasiddhito pacchimavesārajjadvayasiddhīti bhagavato catuvesārajjasamannāgamo attahitaparahitappaṭipatti ca nidānavacanena pakāsitā honti, tattha tattha sampattaparisāya ajjhāsayānurūpaṃ ṭhānuppattikappaṭibhānena dhammadesanādīpanato. Idha pana vimuttisukhappaṭisaṃvedanapaṭiccasamuppādamanasikārapakāsanenāti yojetabbaṃ. Tena vuttaṃ – ‘‘satthu sampattipakāsanatthaṃ nidānavacana’’nti.

    ཏཐཱ སཱསནསམྤཏྟིཔཀཱསནཏྠཾ ནིདཱནཝཙནཾ། ཉཱཎཀརུཎཱཔརིགྒཧིཏསབྦཀིརིཡསྶ ཧི བྷགཝཏོ ནཏྠི ནིརཏྠཀཱ པཊིཔཏྟི ཨཏྟཧིཏཱ ཝཱ། ཏསྨཱ པརེསཾཡེཝ ཨཏྠཱཡ པཝཏྟསབྦཀིརིཡསྶ སམྨཱསམྦུདྡྷསྶ སཀལམྤི ཀཱཡཝཙཱིམནོཀམྨཾ ཡཐཱཔཝཏྟཾ ཝུཙྩམཱནཾ དིཊྛདྷམྨིཀསམྤརཱཡིཀཔརམཏྠེཧི ཡཐཱརཧཾ སཏྟཱནཾ ཨནུསཱསནཊྛེན སཱསནཾ, ན ཀབྦརཙནཱ། ཏཡིདཾ སཏྠུ ཙརིཏཾ ཀཱལདེསདེསཀཔརིསཱཔདེསཱདཱིཧི སདྡྷིཾ ཏཏྠ ཏཏྠ ནིདཱནཝཙནེན ཡཐཱརཧཾ པཀཱསཱིཡཏི, ཨིདྷ པན ཨབྷིསམྦོདྷིཝིམུཏྟིསུཁཔྤཊིསཾཝེདནཔཊིཙྩསམུཔྤཱདམནསིཀཱརེནཱཏི ཡོཛེཏབྦཾ། ཏེན ཝུཏྟཾ – ‘‘སཱསནསམྤཏྟིཔཀཱསནཏྠཾ ནིདཱནཝཙན’’ནྟི།

    Tathā sāsanasampattipakāsanatthaṃ nidānavacanaṃ. Ñāṇakaruṇāpariggahitasabbakiriyassa hi bhagavato natthi niratthakā paṭipatti attahitā vā. Tasmā paresaṃyeva atthāya pavattasabbakiriyassa sammāsambuddhassa sakalampi kāyavacīmanokammaṃ yathāpavattaṃ vuccamānaṃ diṭṭhadhammikasamparāyikaparamatthehi yathārahaṃ sattānaṃ anusāsanaṭṭhena sāsanaṃ, na kabbaracanā. Tayidaṃ satthu caritaṃ kāladesadesakaparisāpadesādīhi saddhiṃ tattha tattha nidānavacanena yathārahaṃ pakāsīyati, idha pana abhisambodhivimuttisukhappaṭisaṃvedanapaṭiccasamuppādamanasikārenāti yojetabbaṃ. Tena vuttaṃ – ‘‘sāsanasampattipakāsanatthaṃ nidānavacana’’nti.

    ཨཔིཙ སཏྠུནོ པམཱཎབྷཱཝཔྤཀཱསནེན སཱསནསྶ པམཱཎབྷཱཝདསྶནཏྠཾ ནིདཱནཝཙནཾ། སཱ ཙསྶ པམཱཎབྷཱཝདསྶནཏཱ ཧེཊྛཱ ཝུཏྟནཡཱནུསཱརེན ཝེདིཏབྦཱ། བྷགཝཱཏི ཧི ཨིམིནཱ ཏཐཱགཏསྶ རཱགདོསམོཧཱདིསབྦཀིལེསམལདུཙྩརིཏཱདིདོསཔྤཧཱནདཱིཔནེན , སབྦསཏྟུཏྟམབྷཱཝདཱིཔནེན ཙ ཨནཉྙསཱདྷཱརཎཉཱཎཀརུཎཱདིགུཎཝིསེསཡོགཔརིདཱིཔནེན, ཨཡམཏྠོ སབྦཐཱ པཀཱསིཏོ ཧོཏཱིཏི ཨིདམེཏྠ ནིདཱནཝཙནཔྤཡོཛནསྶ མུཁམཏྟདསྶནཾ།

    Apica satthuno pamāṇabhāvappakāsanena sāsanassa pamāṇabhāvadassanatthaṃ nidānavacanaṃ. Sā cassa pamāṇabhāvadassanatā heṭṭhā vuttanayānusārena veditabbā. Bhagavāti hi iminā tathāgatassa rāgadosamohādisabbakilesamaladuccaritādidosappahānadīpanena , sabbasattuttamabhāvadīpanena ca anaññasādhāraṇañāṇakaruṇādiguṇavisesayogaparidīpanena, ayamattho sabbathā pakāsito hotīti idamettha nidānavacanappayojanassa mukhamattadassanaṃ.

    ཏཾ པནེཏཾ ‘‘ཨེཝཾ མེ སུཏ’’ནྟི ཨཱརབྷིཏྭཱ ཡཱཝ ‘‘ཨིམཾ ཨུདཱནཾ ཨུདཱནེསཱི’’ཏི པདཾ, ཏཱཝ ཨིམསྶ ཨུདཱནསྶ ནིདཱནནྟི ཝེདིཏབྦཾ། ཏཐཱ ཧི ཏཾ ཡཐཱ པཊིཔནྣོ བྷགཝཱ ཨིམཾ ཨུདཱནཾ ཨུདཱནེསི, ཨཱདིཏོ པཊྛཱཡ ཏསྶ ཀཱཡིཀཙེཏསིཀཔྤཊིཔཏྟིཡཱ པཀཱསནཏྠཾ སངྒཱིཏིཀཱརེཧི སངྒཱིཏིཀཱལེ བྷཱསིཏཝཙནཾ།

    Taṃ panetaṃ ‘‘evaṃ me suta’’nti ārabhitvā yāva ‘‘imaṃ udānaṃ udānesī’’ti padaṃ, tāva imassa udānassa nidānanti veditabbaṃ. Tathā hi taṃ yathā paṭipanno bhagavā imaṃ udānaṃ udānesi, ādito paṭṭhāya tassa kāyikacetasikappaṭipattiyā pakāsanatthaṃ saṅgītikārehi saṅgītikāle bhāsitavacanaṃ.

    ནནུ ཙ ‘‘ཨིམསྨིཾ སཏི ཨིདཾ ཧོཏཱི’’ཏིཨཱདི བྷགཝཏོ ཨེཝ ཝཙནཾ བྷཝིཏུཾ ཨརཧཏི, ན ཧི སཏྠཱརཾ མུཉྩིཏྭཱ ཨཉྙོ པཊིཙྩསམུཔྤཱདཾ དེསེཏུཾ སམཏྠོ ཧོཏཱིཏི? སཙྩམེཏཾ, ཡཐཱ པན བྷགཝཱ བོདྷིརུཀྑམཱུལེ དྷམྨསབྷཱཝཔཙྩཝེཀྑཎཝསེན པཊིཙྩསམུཔྤཱདཾ མནསཱཀཱསི, ཏཐེཝ ནཾ བོདྷནེཡྻབནྡྷཝཱནཾ བོདྷནཏྠཾ པཊིཙྩསམུཔྤཱདསཱིཧནཱདསུཏྟཱདཱིསུ དེསིཏསྶ ཙ ཝཙནཱནཾ དེསིཏཱཀཱརསྶ ཨནུཀརཎཝསེན པཊིཙྩསམུཔྤཱདསྶ མནསིཀཱརཾ ཨཊྛུཔྤཏྟིཾ ཀཏྭཱ བྷགཝཏཱ བྷཱསིཏསྶ ཨིམསྶ ཨུདཱནསྶ དྷམྨསངྒཱཧཀཱ མཧཱཐེརཱ ནིདཱནཾ སངྒཱཡིཾསཱུཏི ཡཐཱཝུཏྟཝཙནཾ སངྒཱིཏིཀཱརཱནམེཝ ཝཙནནྟི ནིཊྛམེཏྠ གནྟབྦཾ། ཨིཏོ པརེསུཔི སུཏྟནྟེསུ ཨེསེཝ ནཡོ།

    Nanu ca ‘‘imasmiṃ sati idaṃ hotī’’tiādi bhagavato eva vacanaṃ bhavituṃ arahati, na hi satthāraṃ muñcitvā añño paṭiccasamuppādaṃ desetuṃ samattho hotīti? Saccametaṃ, yathā pana bhagavā bodhirukkhamūle dhammasabhāvapaccavekkhaṇavasena paṭiccasamuppādaṃ manasākāsi, tatheva naṃ bodhaneyyabandhavānaṃ bodhanatthaṃ paṭiccasamuppādasīhanādasuttādīsu desitassa ca vacanānaṃ desitākārassa anukaraṇavasena paṭiccasamuppādassa manasikāraṃ aṭṭhuppattiṃ katvā bhagavatā bhāsitassa imassa udānassa dhammasaṅgāhakā mahātherā nidānaṃ saṅgāyiṃsūti yathāvuttavacanaṃ saṅgītikārānameva vacananti niṭṭhamettha gantabbaṃ. Ito paresupi suttantesu eseva nayo.

    ཨེཏྠ ཙ ཨཏྟཛ྄ཛྷཱསཡོ པརཛ྄ཛྷཱསཡོ པུཙྪཱཝསིཀོ ཨཊྛུཔྤཏྟིཀོཏི ཙཏྟཱརོ སུཏྟནིཀྑེཔཱ ཝེདིཏབྦཱ། ཡཐཱ ཧི ཨནེཀསཏཨནེཀསཧསྶབྷེདཱནིཔི སུཏྟཱནི སཾཀིལེསབྷཱགིཡཱདིཔཊྛཱནནཡེན སོལ༹སཝིདྷཏཾ ནཱཏིཝཏྟནྟི, ཨེཝཾ ཏཱནི སབྦཱནིཔི ཨཏྟཛ྄ཛྷཱསཡཱདིསུཏྟནིཀྑེཔཝསེན ཙཏུབྦིདྷབྷཱཝཾ ནཱཏིཝཏྟནྟི། ཀཱམཉྩེཏྠ ཨཏྟཛ྄ཛྷཱསཡསྶ ཨཊྛུཔྤཏྟིཡཱ ཙ པརཛ྄ཛྷཱསཡཔུཙྪཱཝསིཀེཧི སདྡྷིཾ སཾསགྒབྷེདོ སམྦྷཝཏི ཨཛ྄ཛྷཱསཡཱནུསནྡྷིཔུཙྪཱནུསནྡྷིསམྦྷཝཏོ, ཨཏྟཛ྄ཛྷཱསཡཨཊྛུཔྤཏྟཱིནཾ ཨཉྙམཉྙཾ སཾསགྒོ ནཏྠཱིཏི ནིརཝསེསོ པཊྛཱནནཡོ ན སམྦྷཝཏི། ཏདནྟོགདྷཏྟཱ ཝཱ སམྦྷཝནྟཱནཾ སེསནིཀྑེཔཱནཾ མཱུལནིཀྑེཔཝསེན ཙཏྟཱརོ སུཏྟནིཀྑེཔཱཏི ཝུཏྟཾ།

    Ettha ca attajjhāsayo parajjhāsayo pucchāvasiko aṭṭhuppattikoti cattāro suttanikkhepā veditabbā. Yathā hi anekasataanekasahassabhedānipi suttāni saṃkilesabhāgiyādipaṭṭhānanayena soḷasavidhataṃ nātivattanti, evaṃ tāni sabbānipi attajjhāsayādisuttanikkhepavasena catubbidhabhāvaṃ nātivattanti. Kāmañcettha attajjhāsayassa aṭṭhuppattiyā ca parajjhāsayapucchāvasikehi saddhiṃ saṃsaggabhedo sambhavati ajjhāsayānusandhipucchānusandhisambhavato, attajjhāsayaaṭṭhuppattīnaṃ aññamaññaṃ saṃsaggo natthīti niravaseso paṭṭhānanayo na sambhavati. Tadantogadhattā vā sambhavantānaṃ sesanikkhepānaṃ mūlanikkhepavasena cattāro suttanikkhepāti vuttaṃ.

    ཏཏྲཱཡཾ ཝཙནཏྠོ – ནིཀྑིཔནཾ ནིཀྑེཔོ, སུཏྟསྶ ནིཀྑེཔོ སུཏྟནིཀྑེཔོ, སུཏྟདེསནཱཏི ཨཏྠོ། ནིཀྑིཔཱིཡཏཱིཏི ཝཱ ནིཀྑེཔོ, སུཏྟཾ ཨེཝ ནིཀྑེཔོ སུཏྟནིཀྑེཔོ། ཨཏྟནོ ཨཛ྄ཛྷཱསཡོ ཨཏྟཛ྄ཛྷཱསཡོ, སོ ཨསྶ ཨཏྠི ཀཱརཎབྷཱུཏོཏི ཨཏྟཛ྄ཛྷཱསཡོ, ཨཏྟནོ ཨཛ྄ཛྷཱསཡོ ཨེཏསྶཱཏི ཝཱ ཨཏྟཛ྄ཛྷཱསཡོ། པརཛ྄ཛྷཱསཡེཔི ཨེསེཝ ནཡོ། པུཙྪཱཡ ཝསོ པུཙྪཱཝསོ, སོ ཨེཏསྶ ཨཏྠཱིཏི པུཙྪཱཝསིཀོ། སུཏྟདེསནཱཡ ཝཏྠུབྷཱུཏསྶ ཨཏྠསྶ ཨུཔྤཏྟི ཨཏྠུཔྤཏྟི, ཨཏྠུཔྤཏྟི ཨེཝ ཨཊྛུཔྤཏྟི, སཱ ཨེཏསྶ ཨཏྠཱིཏི ཨཊྛུཔྤཏྟིཀོ། ཨཐ ཝཱ ནིཀྑིཔཱིཡཏི སུཏྟཾ ཨེཏེནཱཏི ནིཀྑེཔོ, ཨཏྟཛ྄ཛྷཱསཡཱདི ཨེཝ། ཨེཏསྨིཾ པན ཨཏྠཝིཀཔྤེ ཨཏྟནོ ཨཛ྄ཛྷཱསཡོ ཨཏྟཛ྄ཛྷཱསཡོ། པརེསཾ ཨཛ྄ཛྷཱསཡོ པརཛ྄ཛྷཱསཡོ། པུཙྪཱིཡཏཱིཏི པུཙྪཱ, པུཙྪིཏབྦོ ཨཏྠོ། པུཙྪནཝསེན པཝཏྟཾ དྷམྨཔྤཊིགྒཱཧཀཱནཾ ཝཙནཾ པུཙྪཱཝསཾ, ཏདེཝ ནིཀྑེཔསདྡཱཔེཀྑཱཡ པུཙྪཱཝསིཀོཏི པུལླིངྒཝསེན ཝུཏྟཾ། ཏཐཱ ཨཏྠུཔྤཏྟིཡེཝ ཨཊྛུཔྤཏྟིཀོཏི ཨེཝམེཏྠ ཨཏྠོ ཝེདིཏབྦོ།

    Tatrāyaṃ vacanattho – nikkhipanaṃ nikkhepo, suttassa nikkhepo suttanikkhepo, suttadesanāti attho. Nikkhipīyatīti vā nikkhepo, suttaṃ eva nikkhepo suttanikkhepo. Attano ajjhāsayo attajjhāsayo, so assa atthi kāraṇabhūtoti attajjhāsayo, attano ajjhāsayo etassāti vā attajjhāsayo. Parajjhāsayepi eseva nayo. Pucchāya vaso pucchāvaso, so etassa atthīti pucchāvasiko. Suttadesanāya vatthubhūtassa atthassa uppatti atthuppatti, atthuppatti eva aṭṭhuppatti, sā etassa atthīti aṭṭhuppattiko. Atha vā nikkhipīyati suttaṃ etenāti nikkhepo, attajjhāsayādi eva. Etasmiṃ pana atthavikappe attano ajjhāsayo attajjhāsayo. Paresaṃ ajjhāsayo parajjhāsayo. Pucchīyatīti pucchā, pucchitabbo attho. Pucchanavasena pavattaṃ dhammappaṭiggāhakānaṃ vacanaṃ pucchāvasaṃ, tadeva nikkhepasaddāpekkhāya pucchāvasikoti pulliṅgavasena vuttaṃ. Tathā atthuppattiyeva aṭṭhuppattikoti evamettha attho veditabbo.

    ཨེཏྠ ཙ པརེསཾ ཨིནྡྲིཡཔརིཔཱཀཱདིཀཱརཎནིརཔེཀྑཏྟཱ ཨཏྟཛ྄ཛྷཱསཡསྶ ཝིསུཾ སུཏྟནིཀྑེཔབྷཱཝོ ཡུཏྟོ ཀེཝལཾ ཨཏྟནོ ཨཛ྄ཛྷཱསཡེནེཝ དྷམྨཏནྟིཋཔནཏྠཾ པཝཏྟིཏདེསནཏྟཱ, པརཛ྄ཛྷཱསཡཔུཙྪཱཝསིཀཱནཾ པན པརེསཾ ཨཛ྄ཛྷཱསཡཔུཙྪཱནཾ དེསནཱཔཝཏྟིཧེཏུབྷཱུཏཱནཾ ཨུཔྤཏྟིཡཾ པཝཏྟིཏཱནཾ ཀཐམཊྛུཔྤཏྟིཡཱ ཨནཝརོདྷོ, པུཙྪཱཝསིཀཨཊྛུཔྤཏྟིཔུབྦཀཱནཾ ཝཱ པརཛ྄ཛྷཱསཡཱནུརོདྷེན པཝཏྟིཏཱནཾ ཀཐཾ པརཛ྄ཛྷཱསཡེ ཨནཝརོདྷོཏི? ན ཙོདེཏབྦམེཏཾ། པརེསཉྷི ཨབྷིནཱིཧཱརཔརིཔུཙྪཱདིཝིནིཙྪཡཱདིཝིནིམུཏྟསྶེཝ སུཏྟནྟདེསནཱཀཱརཎུཔྤཱདསྶ ཨཊྛུཔྤཏྟིབྷཱཝེན གཧིཏཏྟཱ པརཛ྄ཛྷཱསཡཔུཙྪཱཝསིཀཱནཾ ཝིསུཾ གཧཎཾ། ཏཐཱ ཧི བྲཧྨཛཱལདྷམྨདཱཡཱདསུཏྟཱདཱིནཾ ཝཎྞཱཝཎྞཨཱམིསུཔྤཱདཱདིདེསནཱནིམིཏྟཾ ཨཊྛུཔྤཏྟི ཝུཙྩཏི, པརེསཾ པུཙྪཱཡ ཝིནཱ ཨཛ྄ཛྷཱསཡམེཝ ནིམིཏྟཾ ཀཏྭཱ དེསིཏོ པརཛ྄ཛྷཱསཡོ, པུཙྪཱཝསེན དེསིཏོ པུཙྪཱཝསིཀོཏི པཱཀཊོཡམཏྠོཏི།

    Ettha ca paresaṃ indriyaparipākādikāraṇanirapekkhattā attajjhāsayassa visuṃ suttanikkhepabhāvo yutto kevalaṃ attano ajjhāsayeneva dhammatantiṭhapanatthaṃ pavattitadesanattā, parajjhāsayapucchāvasikānaṃ pana paresaṃ ajjhāsayapucchānaṃ desanāpavattihetubhūtānaṃ uppattiyaṃ pavattitānaṃ kathamaṭṭhuppattiyā anavarodho, pucchāvasikaaṭṭhuppattipubbakānaṃ vā parajjhāsayānurodhena pavattitānaṃ kathaṃ parajjhāsaye anavarodhoti? Na codetabbametaṃ. Paresañhi abhinīhāraparipucchādivinicchayādivinimuttasseva suttantadesanākāraṇuppādassa aṭṭhuppattibhāvena gahitattā parajjhāsayapucchāvasikānaṃ visuṃ gahaṇaṃ. Tathā hi brahmajāladhammadāyādasuttādīnaṃ vaṇṇāvaṇṇaāmisuppādādidesanānimittaṃ aṭṭhuppatti vuccati, paresaṃ pucchāya vinā ajjhāsayameva nimittaṃ katvā desito parajjhāsayo, pucchāvasena desito pucchāvasikoti pākaṭoyamatthoti.

    ཏཏྠ པཋམཱདཱིནི ཏཱིཎི བོདྷིསུཏྟཱནི མུཙལིནྡསུཏྟཾ, ཨཱཡུསངྑཱརོསྶཛྫནསུཏྟཾ, པཙྩཝེཀྑཎསུཏྟཾ, པཔཉྩསཉྙཱསུཏྟནྟི ཨིམེསཾ ཨུདཱནཱནཾ ཨཏྟཛ྄ཛྷཱསཡོ ནིཀྑེཔོ། ཧུཧུངྐསུཏྟཾ, བྲཱཧྨཎཛཱཏིཀསུཏྟཾ, བཱཧིཡསུཏྟནྟི ཨིམེསཾ ཨུདཱནཱནཾ པུཙྪཱཝསིཀོ ནིཀྑེཔོ། རཱཛསུཏྟཾ, སཀྐཱརསུཏྟཾ, ཨུཙྪཱདནསུཏྟཾ, པིཎྜཔཱཏིཀསུཏྟཾ, སིཔྤསུཏྟཾ, གོཔཱལསུཏྟཾ, སུནྡརིཀསུཏྟཾ , མཱཏུསུཏྟཾ, སངྒྷབྷེདཀསུཏྟཾ, ཨུདཔཱནསུཏྟཾ, ཏཐཱགཏུཔྤཱདསུཏྟཾ, མོནེཡྻསུཏྟཾ, པཱཊལིགཱམིཡསུཏྟཾ, དྭེཔི དབྦསུཏྟཱནཱིཏི ཨེཏེསཾ ཨུདཱནཱནཾ ཨཊྛུཔྤཏྟིཀོ ནིཀྑེཔོ། པཱལིལེཡྻསུཏྟཾ, པིཡསུཏྟཾ, ནཱགསམཱལསུཏྟཾ, ཝིསཱཁཱསུཏྟཉྩཱཏི ཨིམེསཾ ཨུདཱནཱནཾ ཨཏྟཛ྄ཛྷཱསཡོ པརཛ྄ཛྷཱསཡོ ཙ ནིཀྑེཔོ། སེསཱནཾ ཨེཀཔཉྙཱསཱཡ སུཏྟཱནཾ པརཛ྄ཛྷཱསཡོ ནིཀྑེཔོ། ཨེཝམེཏེསཾ ཨུདཱནཱནཾ ཨཏྟཛ྄ཛྷཱསཡཱདིཝསེན ནིཀྑེཔཝིསེསོ ཝེདིཏབྦོ།

    Tattha paṭhamādīni tīṇi bodhisuttāni mucalindasuttaṃ, āyusaṅkhārossajjanasuttaṃ, paccavekkhaṇasuttaṃ, papañcasaññāsuttanti imesaṃ udānānaṃ attajjhāsayo nikkhepo. Huhuṅkasuttaṃ, brāhmaṇajātikasuttaṃ, bāhiyasuttanti imesaṃ udānānaṃ pucchāvasiko nikkhepo. Rājasuttaṃ, sakkārasuttaṃ, ucchādanasuttaṃ, piṇḍapātikasuttaṃ, sippasuttaṃ, gopālasuttaṃ, sundarikasuttaṃ , mātusuttaṃ, saṅghabhedakasuttaṃ, udapānasuttaṃ, tathāgatuppādasuttaṃ, moneyyasuttaṃ, pāṭaligāmiyasuttaṃ, dvepi dabbasuttānīti etesaṃ udānānaṃ aṭṭhuppattiko nikkhepo. Pālileyyasuttaṃ, piyasuttaṃ, nāgasamālasuttaṃ, visākhāsuttañcāti imesaṃ udānānaṃ attajjhāsayo parajjhāsayo ca nikkhepo. Sesānaṃ ekapaññāsāya suttānaṃ parajjhāsayo nikkhepo. Evametesaṃ udānānaṃ attajjhāsayādivasena nikkhepaviseso veditabbo.

    ཨེཏྠ ཙ ཡཱནི ཨུདཱནཱནི བྷགཝཏཱ བྷིཀྑཱུནཾ སམྨུཁཱ བྷཱསིཏཱནི, ཏཱནི ཏེཧི ཡཐཱབྷཱསིཏསུཏྟཱནི ཝཙསཱ པརིཙིཏཱནི མནསཱནུཔེཀྑིཏཱནི དྷམྨབྷཎྜཱགཱརིཀསྶ ཀཐིཏཱནི། ཡཱནི པན བྷགཝཏཱ བྷིཀྑཱུནཾ ཨསམྨུཁཱ བྷཱསིཏཱནི, ཏཱནིཔི ཨཔརབྷཱགེ བྷགཝཏཱ དྷམྨབྷཎྜཱགཱརིཀསྶ པུན བྷཱསིཏཱནི། ཨེཝཾ སབྦཱནིཔི ཏཱནི ཨཱཡསྨཱ ཨཱནནྡོ ཨེཀཛ྄ཛྷཾ ཀཏྭཱ དྷཱརེནྟོ བྷིཀྑཱུནཉྩ ཝཱཙེནྟོ ཨཔརབྷཱགེ པཋམམཧཱསངྒཱིཏིཀཱལེ ཨུདཱནནྟྭེཝ སངྒཧཾ ཨཱརོཔེསཱིཏི ཝེདིཏབྦཾ།

    Ettha ca yāni udānāni bhagavatā bhikkhūnaṃ sammukhā bhāsitāni, tāni tehi yathābhāsitasuttāni vacasā paricitāni manasānupekkhitāni dhammabhaṇḍāgārikassa kathitāni. Yāni pana bhagavatā bhikkhūnaṃ asammukhā bhāsitāni, tānipi aparabhāge bhagavatā dhammabhaṇḍāgārikassa puna bhāsitāni. Evaṃ sabbānipi tāni āyasmā ānando ekajjhaṃ katvā dhārento bhikkhūnañca vācento aparabhāge paṭhamamahāsaṅgītikāle udānantveva saṅgahaṃ āropesīti veditabbaṃ.

    ཏེན ཁོ པན སམཡེནཱཏིཨཱདཱིསུ ཏེན སམཡེནཱཏི ཙ བྷུམྨཏྠེ ཀརཎཝཙནཾ, ཁོ པནཱཏི ནིཔཱཏོ, ཏསྨིཾ སམཡེཏི ཨཏྠོ། ཀསྨིཾ པན སམཡེ? ཡཾ སམཡཾ བྷགཝཱ ཨུརུཝེལཱཡཾ ཝིཧརཏི ནཛྫཱ ནེརཉྫརཱཡ ཏཱིརེ བོདྷིརུཀྑམཱུལེ པཋམཱབྷིསམྦུདྡྷོ། ཏསྨིཾ སམཡེ། སཏྟཱཧནྟི སཏྟ ཨཧཱནི སཏྟཱཧཾ, ཨཙྩནྟསཾཡོགཏྠེ ཨེཏཾ ཨུཔཡོགཝཙནཾ། ཡསྨཱ བྷགཝཱ ཏཾ སཏྟཱཧཾ ནིརནྟརཏཱཡ ཨཙྩནྟམེཝ ཕལསམཱཔཏྟིསུཁེན ཝིཧཱསི, ཏསྨཱ སཏྟཱཧནྟི ཨཙྩནྟསཾཡོགཝསེན ཨུཔཡོགཝཙནཾ ཝུཏྟཾ། ཨེཀཔལླངྐེནཱཏི ཝིསཱཁཱཔུཎྞམཱཡ ཨནཏྠངྒཏེཡེཝ སཱུརིཡེ ཨཔརཱཛིཏཔལླངྐཝརེ ཝཛིརཱསནེ ནིསིནྣཀཱལཏོ པཊྛཱཡ སཀིམྤི ཨནུཊྛཧིཏྭཱ ཡཐཱཨཱབྷུཛིཏེན ཨེཀེནེཝ པལླངྐེན །

    Tena kho pana samayenātiādīsu tena samayenāti ca bhummatthe karaṇavacanaṃ, kho panāti nipāto, tasmiṃ samayeti attho. Kasmiṃ pana samaye? Yaṃ samayaṃ bhagavā uruvelāyaṃ viharati najjā nerañjarāya tīre bodhirukkhamūle paṭhamābhisambuddho. Tasmiṃ samaye. Sattāhanti satta ahāni sattāhaṃ, accantasaṃyogatthe etaṃ upayogavacanaṃ. Yasmā bhagavā taṃ sattāhaṃ nirantaratāya accantameva phalasamāpattisukhena vihāsi, tasmā sattāhanti accantasaṃyogavasena upayogavacanaṃ vuttaṃ. Ekapallaṅkenāti visākhāpuṇṇamāya anatthaṅgateyeva sūriye aparājitapallaṅkavare vajirāsane nisinnakālato paṭṭhāya sakimpi anuṭṭhahitvā yathāābhujitena ekeneva pallaṅkena .

    ཝིམུཏྟིསུཁཔཊིསཾཝེདཱིཏི ཝིམུཏྟིསུཁཾ ཕལསམཱཔཏྟིསུཁཾ པཊིསཾཝེདིཡམཱནོ ནིསིནྣོ ཧོཏཱིཏི ཨཏྠོ། ཏཏྠ ཝིམུཏྟཱིཏི ཏདངྒཝིམུཏྟི, ཝིཀྑམྦྷནཝིམུཏྟི, སམུཙྪེདཝིམུཏྟི, པཊིཔྤསྶདྡྷིཝིམུཏྟི, ནིསྶརཎཝིམུཏྟཱིཏི པཉྩ ཝིམུཏྟིཡོ། ཏཱསུ ཡཾ དེཡྻདྷམྨཔརིཙྩཱགཱདཱིཧི ཏེཧི ཏེཧི གུཎངྒེཧི ནཱམརཱུཔཔརིཙྪེདཱདཱིཧི ཝིཔསྶནངྒེཧི ཙ ཡཱཝ ཏསྶ ཏསྶ ཨངྒསྶ ཨཔརིཧཱནིཝསེན པཝཏྟི, ཏཱཝ ཏཾཏཾཔཊིཔཀྑཏོ ཝིམུཙྩནཏོ ཝིམུཙྩནཾ པཧཱནཾ། སེཡྻཐིདཾ ? དཱནེན མཙྪརིཡལོབྷཱདིཏོ, སཱིལེན པཱཎཱཏིཔཱཏཱདིཏོ, ནཱམརཱུཔཝཝཏྠཱནེན སཀྐཱཡདིཊྛིཏོ, པཙྩཡཔརིགྒཧེན ཨཧེཏུཝིསམཧེཏུདིཊྛཱིཧི, ཏསྶེཝ ཨཔརབྷཱགེན ཀངྑཱཝིཏརཎེན ཀཐཾཀཐཱིབྷཱཝཏོ, ཀལཱཔསམྨསནེན ‘‘ཨཧཾ མམཱ’’ཏི གཱཧཏོ, མགྒཱམགྒཝཝཏྠཱནེན ཨམགྒེ མགྒསཉྙཱཡ, ཨུདཡདསྶནེན ཨུཙྪེདདིཊྛིཡཱ, ཝཡདསྶནེན སསྶཏདིཊྛིཡཱ, བྷཡདསྶནེན སབྷཡེ ཨབྷཡསཉྙཱཡ, ཨཱདཱིནཝདསྶནེན ཨསྶཱདསཉྙཱཡ, ནིབྦིདཱནུཔསྶནེན ཨབྷིརཏིསཉྙཱཡ, མུཙྩིཏུཀམྱཏཱཉཱཎེན ཨམུཙྩིཏུཀམྱཏཱཡ, ཨུཔེཀྑཱཉཱཎེན ཨནུཔེཀྑཱཡ, ཨནུལོམེན དྷམྨཊྛིཏིཡཾ ནིབྦཱནེ ཙ པཊིལོམབྷཱཝཏོ, གོཏྲབྷུནཱ སངྑཱརནིམིཏྟབྷཱཝཏོ ཝིམུཙྩནཾ, ཨཡཾ ཏདངྒཝིམུཏྟི ནཱམ། ཡཾ པན ཨུཔཙཱརཔྤནཱབྷེདེན སམཱདྷིནཱ ཡཱཝསྶ ཨཔརིཧཱནིཝསེན པཝཏྟི, ཏཱཝ ཀཱམཙྪནྡཱདཱིནཾ ནཱིཝརཎཱནཉྩེཝ, ཝིཏཀྐཱདཱིནཉྩ པཙྩནཱིཀདྷམྨཱནཾ, ཨནུཔྤཏྟིསཉྙིཏཾ ཝིམུཙྩནཾ, ཨཡཾ ཝིཀྑམྦྷནཝིམུཏྟི ནཱམ། ཡཾ ཙཏུནྣཾ ཨརིཡམགྒཱནཾ བྷཱཝིཏཏྟཱ ཏཾཏཾམགྒཝཏོ ཨརིཡསྶ སནྟཱནེ ཡཐཱརཧཾ ‘‘དིཊྛིགཏཱནཾ པཧཱནཱཡཱ’’ཏིཨཱདིནཱ (དྷ॰ ས॰ ༢༧༧; ཝིབྷ॰ ༦༢༨) ནཡེན ཝུཏྟསྶ སམུདཡཔཀྑིཡསྶ ཀིལེསགཎསྶ པུན ཨཙྩནྟཾ ཨཔྤཝཏྟིབྷཱཝེན སམུཙྪེདཔྤཧཱནཝསེན ཝིམུཙྩནཾ, ཨཡཾ སམུཙྪེདཝིམུཏྟི ནཱམ། ཡཾ པན ཕལཀྑཎེ པཊིཔྤསྶདྡྷཏྟཾ ཀིལེསཱནཾ, ཨཡཾ པཊིཔྤསྶདྡྷིཝིམུཏྟི ནཱམ། སབྦསངྑཏནིསྶཊཏྟཱ པན སབྦསངྑཱརཝིམུཏྟཾ ནིབྦཱནཾ, ཨཡཾ ནིསྶརཎཝིམུཏྟི ནཱམ། ཨིདྷ པན བྷགཝཏོ ནིབྦཱནཱརམྨཎཱ ཕལཝིམུཏྟི ཨདྷིཔྤེཏཱ། ཏེན ཝུཏྟཾ – ‘‘ཝིམུཏྟིསུཁཔཊིསཾཝེདཱིཏི ཝིམུཏྟིསུཁཾ ཕལསམཱཔཏྟིསུཁཾ པཊིསཾཝེདིཡམཱནོ ནིསིནྣོ ཧོཏཱིཏི ཨཏྠོ’’ཏི།

    Vimuttisukhapaṭisaṃvedīti vimuttisukhaṃ phalasamāpattisukhaṃ paṭisaṃvediyamāno nisinno hotīti attho. Tattha vimuttīti tadaṅgavimutti, vikkhambhanavimutti, samucchedavimutti, paṭippassaddhivimutti, nissaraṇavimuttīti pañca vimuttiyo. Tāsu yaṃ deyyadhammapariccāgādīhi tehi tehi guṇaṅgehi nāmarūpaparicchedādīhi vipassanaṅgehi ca yāva tassa tassa aṅgassa aparihānivasena pavatti, tāva taṃtaṃpaṭipakkhato vimuccanato vimuccanaṃ pahānaṃ. Seyyathidaṃ ? Dānena macchariyalobhādito, sīlena pāṇātipātādito, nāmarūpavavatthānena sakkāyadiṭṭhito, paccayapariggahena ahetuvisamahetudiṭṭhīhi, tasseva aparabhāgena kaṅkhāvitaraṇena kathaṃkathībhāvato, kalāpasammasanena ‘‘ahaṃ mamā’’ti gāhato, maggāmaggavavatthānena amagge maggasaññāya, udayadassanena ucchedadiṭṭhiyā, vayadassanena sassatadiṭṭhiyā, bhayadassanena sabhaye abhayasaññāya, ādīnavadassanena assādasaññāya, nibbidānupassanena abhiratisaññāya, muccitukamyatāñāṇena amuccitukamyatāya, upekkhāñāṇena anupekkhāya, anulomena dhammaṭṭhitiyaṃ nibbāne ca paṭilomabhāvato, gotrabhunā saṅkhāranimittabhāvato vimuccanaṃ, ayaṃ tadaṅgavimutti nāma. Yaṃ pana upacārappanābhedena samādhinā yāvassa aparihānivasena pavatti, tāva kāmacchandādīnaṃ nīvaraṇānañceva, vitakkādīnañca paccanīkadhammānaṃ, anuppattisaññitaṃ vimuccanaṃ, ayaṃ vikkhambhanavimutti nāma. Yaṃ catunnaṃ ariyamaggānaṃ bhāvitattā taṃtaṃmaggavato ariyassa santāne yathārahaṃ ‘‘diṭṭhigatānaṃ pahānāyā’’tiādinā (dha. sa. 277; vibha. 628) nayena vuttassa samudayapakkhiyassa kilesagaṇassa puna accantaṃ appavattibhāvena samucchedappahānavasena vimuccanaṃ, ayaṃ samucchedavimutti nāma. Yaṃ pana phalakkhaṇe paṭippassaddhattaṃ kilesānaṃ, ayaṃ paṭippassaddhivimutti nāma. Sabbasaṅkhatanissaṭattā pana sabbasaṅkhāravimuttaṃ nibbānaṃ, ayaṃ nissaraṇavimutti nāma. Idha pana bhagavato nibbānārammaṇā phalavimutti adhippetā. Tena vuttaṃ – ‘‘vimuttisukhapaṭisaṃvedīti vimuttisukhaṃ phalasamāpattisukhaṃ paṭisaṃvediyamāno nisinno hotīti attho’’ti.

    ཝིམུཏྟཱིཏི ཙ ཨུཔཀྐིལེསེཧི པཊིཔྤསྶདྡྷིཝསེན ཙིཏྟསྶ ཝིམུཏྟབྷཱཝོ, ཙིཏྟམེཝ ཝཱ ཏཐཱ ཝིམུཏྟཾ ཝེདིཏབྦཾ, ཏཱཡ ཝིམུཏྟིཡཱ ཛཱཏཾ སམྤཡུཏྟཾ ཝཱ སུཁཾ ཝིམུཏྟིསུཁཾ། ‘‘ཡཱཡཾ, བྷནྟེ, ཨུཔེཀྑཱ སནྟེ སུཁེ ཝུཏྟཱ བྷགཝཏཱ’’ཏི (མ॰ ནི॰ ༢.༨༨) ཝཙནཏོ ཨུཔེཀྑཱཔི ཙེཏྠ སུཁམིཙྩེཝ ཝེདིཏབྦཱ། ཏཐཱ ཙ ཝུཏྟཾ སམྨོཧཝིནོདནིཡཾ ‘‘ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱ’’ཏི (ཝིབྷ॰ ཨཊྛ॰ ༢༣༢)། བྷགཝཱ ཧི ཙཏུཏྠཛ྄ཛྷཱནིཀཾ ཨརཧཏྟསམཱཔཏྟིཾ སམཱཔཛྫཏི, ན ཨིཏརཾ། ཨཐ ཝཱ ‘‘ཏེསཾ ཝཱུཔསམོ སུཁོ’’ཏིཨཱདཱིསུ ཡཐཱ སངྑཱརདུཀྑཱུཔསམོ སུཁོཏི ཝུཙྩཏི, ཨེཝཾ སཀལཀིལེསདུཀྑཱུཔསམབྷཱཝཏོ ཨགྒཕལེ ལབྦྷམཱནཱ པཊིཔྤསྶདྡྷིཝིམུཏྟི ཨེཝ ཨིདྷ སུཁནྟི ཝེདིཏབྦཱ། ཏཡིདཾ ཝིམུཏྟིསུཁཾ མགྒཝཱིཐིཡཾ ཀཱལནྟརེཏི ཕལཙིཏྟསྶ པཝཏྟིཝིབྷཱགེན དུཝིདྷཾ ཧོཏི། ཨེཀེཀསྶ ཧི ཨརིཡམགྒསྶ ཨནནྟརཱ ཏསྶ ཏསྶེཝ ཝིཔཱཀབྷཱུཏཱནི ནིབྦཱནཱརམྨཎཱནི ཏཱིཎི དྭེ ཝཱ ཕལཙིཏྟཱནི ཨུཔྤཛྫནྟི ཨནནྟརཝིཔཱཀཏྟཱ ལོཀུཏྟརཀུསལཱནཾ། ཡསྨིཉྷི ཛཝནཝཱརེ ཨརིཡམགྒོ ཨུཔྤཛྫཏི, ཏཏྠ ཡདཱ དྭེ ཨནུལོམཱནི, ཏདཱ ཏཏིཡཾ གོཏྲབྷུ, ཙཏུཏྠཾ མགྒཙིཏྟཾ, ཏཏོ པརཾ ཏཱིཎི ཕལཙིཏྟཱནི ཧོནྟི། ཡདཱ པན ཏཱིཎི ཨནུལོམཱནི, ཏདཱ ཙཏུཏྠཾ གོཏྲབྷུ, པཉྩམཾ མགྒཙིཏྟཾ, ཏཏོ པརཾ དྭེ ཕལཙིཏྟཱནི ཧོནྟི། ཨེཝཾ ཙཏུཏྠཾ པཉྩམཾ ཨཔྤནཱཝསེན པཝཏྟཏི, ན ཏཏོ པརཾ བྷཝངྒསྶ ཨཱསནྣཏྟཱ། ཀེཙི པན ‘‘ཚཊྛམྤི ཙིཏྟཾ ཨཔྤེཏཱི’’ཏི ཝདནྟི, ཏཾ ཨཊྛཀཐཱསུ (ཝིསུདྡྷི॰ ༢.༨༡༡) པཊིཀྑིཏྟཾ། ཨེཝཾ མགྒཝཱིཐིཡཾ ཕལཾ ཝེདིཏབྦཾ། ཀཱལནྟརེ ཕལཾ པན ཕལསམཱཔཏྟིཝསེན པཝཏྟཾ, ནིརོདྷཱ ཝུཊྛཧནྟསྶ ཨུཔྤཛྫམཱནཉྩ ཨེཏེནེཝ སངྒཧིཏཾ། སཱ པནཱཡཾ ཕལསམཱཔཏྟི ཨཏྠཏོ ལོཀུཏྟརཀུསལཱནཾ ཝིཔཱཀབྷཱུཏཱ ནིབྦཱནཱརམྨཎཱ ཨཔྤནཱཏི དཊྛབྦཱ།

    Vimuttīti ca upakkilesehi paṭippassaddhivasena cittassa vimuttabhāvo, cittameva vā tathā vimuttaṃ veditabbaṃ, tāya vimuttiyā jātaṃ sampayuttaṃ vā sukhaṃ vimuttisukhaṃ. ‘‘Yāyaṃ, bhante, upekkhā sante sukhe vuttā bhagavatā’’ti (ma. ni. 2.88) vacanato upekkhāpi cettha sukhamicceva veditabbā. Tathā ca vuttaṃ sammohavinodaniyaṃ ‘‘upekkhā pana santattā, sukhamicceva bhāsitā’’ti (vibha. aṭṭha. 232). Bhagavā hi catutthajjhānikaṃ arahattasamāpattiṃ samāpajjati, na itaraṃ. Atha vā ‘‘tesaṃ vūpasamo sukho’’tiādīsu yathā saṅkhāradukkhūpasamo sukhoti vuccati, evaṃ sakalakilesadukkhūpasamabhāvato aggaphale labbhamānā paṭippassaddhivimutti eva idha sukhanti veditabbā. Tayidaṃ vimuttisukhaṃ maggavīthiyaṃ kālantareti phalacittassa pavattivibhāgena duvidhaṃ hoti. Ekekassa hi ariyamaggassa anantarā tassa tasseva vipākabhūtāni nibbānārammaṇāni tīṇi dve vā phalacittāni uppajjanti anantaravipākattā lokuttarakusalānaṃ. Yasmiñhi javanavāre ariyamaggo uppajjati, tattha yadā dve anulomāni, tadā tatiyaṃ gotrabhu, catutthaṃ maggacittaṃ, tato paraṃ tīṇi phalacittāni honti. Yadā pana tīṇi anulomāni, tadā catutthaṃ gotrabhu, pañcamaṃ maggacittaṃ, tato paraṃ dve phalacittāni honti. Evaṃ catutthaṃ pañcamaṃ appanāvasena pavattati, na tato paraṃ bhavaṅgassa āsannattā. Keci pana ‘‘chaṭṭhampi cittaṃ appetī’’ti vadanti, taṃ aṭṭhakathāsu (visuddhi. 2.811) paṭikkhittaṃ. Evaṃ maggavīthiyaṃ phalaṃ veditabbaṃ. Kālantare phalaṃ pana phalasamāpattivasena pavattaṃ, nirodhā vuṭṭhahantassa uppajjamānañca eteneva saṅgahitaṃ. Sā panāyaṃ phalasamāpatti atthato lokuttarakusalānaṃ vipākabhūtā nibbānārammaṇā appanāti daṭṭhabbā.

    ཀེ ཏཾ སམཱཔཛྫནྟི, ཀེ ན སམཱཔཛྫནྟཱིཏི? སབྦེཔི པུཐུཛྫནཱ ན སམཱཔཛྫནྟི ཨནདྷིགཏཏྟཱ། ཏཐཱ ཧེཊྛིམཱ ཨརིཡཱ ཨུཔརིམཾ, ཨུཔརིམཱཔི ཨརིཡཱ ཧེཊྛིམཾ ན སམཱཔཛྫནྟིཡེཝ པུགྒལནྟརབྷཱཝཱུཔགམནེན པཊིཔྤསྶདྡྷབྷཱཝཏོ། ཨཏྟནོ ཨེཝ ཕལཾ ཏེ ཏེ ཨརིཡཱ སམཱཔཛྫནྟི། ཀེཙི པན ‘‘སོཏཱཔནྣསཀདཱགཱམིནོ ཕལསམཱཔཏྟིཾ ན སམཱཔཛྫནྟི, ཨུཔརིམཱ དྭེཡེཝ སམཱཔཛྫནྟི སམཱདྷིསྨིཾ པརིཔཱུརཀཱརིབྷཱཝཏོ’’ཏི ཝདནྟི། ཏཾ ཨཀཱརཎཾ པུཐུཛྫནསྶཱཔི ཨཏྟནཱ པཊིལདྡྷལོཀིཡསམཱདྷིསམཱཔཛྫནཏོ། ཀིཾ ཝཱ ཨེཏྠ ཀཱརཎཙིནྟཱཡ? ཝུཏྟཉྷེཏཾ པཊིསམྦྷིདཱཡཾ ‘‘ཀཏམཱ དས སངྑཱརུཔེཀྑཱ ཝིཔསྶནཱཝསེན ཨུཔྤཛྫནྟི (པཊི॰ མ॰ ༡.༥༧), ཀཏམེ དས གོཏྲབྷུདྷམྨཱ ཝིཔསྶནཱཝསེན ཨུཔྤཛྫནྟཱི’’ཏི (པཊི॰ མ॰ ༡.༦༠) ཨིམེསཾ པཉྷཱནཾ ཝིསྶཛྫནེ སོཏཱཔཏྟིཕལསམཱཔཏྟཏྠཱཡ སཀདཱགཱམིཕལསམཱཔཏྟཏྠཱཡཱཏི ཏེསམྤི ཨརིཡཱནཾ ཕལསམཱཔཏྟིསམཱཔཛྫནཾ ཝུཏྟཾ། ཏསྨཱ སབྦེཔི ཨརིཡཱ ཡཐཱསཀཾ ཕལཾ སམཱཔཛྫནྟཱིཏི ནིཊྛམེཏྠ གནྟབྦཾ།

    Ke taṃ samāpajjanti, ke na samāpajjantīti? Sabbepi puthujjanā na samāpajjanti anadhigatattā. Tathā heṭṭhimā ariyā uparimaṃ, uparimāpi ariyā heṭṭhimaṃ na samāpajjantiyeva puggalantarabhāvūpagamanena paṭippassaddhabhāvato. Attano eva phalaṃ te te ariyā samāpajjanti. Keci pana ‘‘sotāpannasakadāgāmino phalasamāpattiṃ na samāpajjanti, uparimā dveyeva samāpajjanti samādhismiṃ paripūrakāribhāvato’’ti vadanti. Taṃ akāraṇaṃ puthujjanassāpi attanā paṭiladdhalokiyasamādhisamāpajjanato. Kiṃ vā ettha kāraṇacintāya? Vuttañhetaṃ paṭisambhidāyaṃ ‘‘katamā dasa saṅkhārupekkhā vipassanāvasena uppajjanti (paṭi. ma. 1.57), katame dasa gotrabhudhammā vipassanāvasena uppajjantī’’ti (paṭi. ma. 1.60) imesaṃ pañhānaṃ vissajjane sotāpattiphalasamāpattatthāya sakadāgāmiphalasamāpattatthāyāti tesampi ariyānaṃ phalasamāpattisamāpajjanaṃ vuttaṃ. Tasmā sabbepi ariyā yathāsakaṃ phalaṃ samāpajjantīti niṭṭhamettha gantabbaṃ.

    ཀསྨཱ པན ཏེ སམཱཔཛྫནྟཱིཏི? དིཊྛདྷམྨསུཁཝིཧཱརཏྠཾ། ཡཐཱ ཧི རཱཛཱནོ རཛྫསུཁཾ, དེཝཏཱ དིབྦསུཁཾ ཨནུབྷཝནྟི, ཨེཝཾ ཨརིཡཱ ‘‘ལོཀུཏྟརསུཁཾ ཨནུབྷཝིསྶཱམཱ’’ཏི ཨདྡྷཱནཔརིཙྪེདཾ ཀཏྭཱ ཨིཙྪིཏཀྑཎེ ཕལསམཱཔཏྟིཾ སམཱཔཛྫནྟི།

    Kasmā pana te samāpajjantīti? Diṭṭhadhammasukhavihāratthaṃ. Yathā hi rājāno rajjasukhaṃ, devatā dibbasukhaṃ anubhavanti, evaṃ ariyā ‘‘lokuttarasukhaṃ anubhavissāmā’’ti addhānaparicchedaṃ katvā icchitakkhaṇe phalasamāpattiṃ samāpajjanti.

    ཀཐཉྩསྶཱ སམཱཔཛྫནཾ, ཀཐཾ ཋཱནཾ, ཀཐཾ ཝུཊྛཱནནྟི? དྭཱིཧི ཏཱཝ ཨཱཀཱརེཧི ཨསྶཱ སམཱཔཛྫནཾ ཧོཏི ནིབྦཱནཏོ ཨཉྙསྶ ཨཱརམྨཎསྶ ཨམནསིཀཱརཱ, ནིབྦཱནསྶ ཙ མནསིཀཱརཱ། ཡཐཱཧ –

    Kathañcassā samāpajjanaṃ, kathaṃ ṭhānaṃ, kathaṃ vuṭṭhānanti? Dvīhi tāva ākārehi assā samāpajjanaṃ hoti nibbānato aññassa ārammaṇassa amanasikārā, nibbānassa ca manasikārā. Yathāha –

    ‘‘དྭེ ཁོ, ཨཱཝུསོ, པཙྩཡཱ ཨནིམིཏྟཱཡ ཙེཏོཝིམུཏྟིཡཱ སམཱཔཏྟིཡཱ, སབྦནིམིཏྟཱནཉྩ ཨམནསིཀཱརོ, ཨནིམིཏྟཱཡ ཙ དྷཱཏུཡཱ མནསིཀཱརོ’’ཏི (མ॰ ནི॰ ༡.༤༥༨)།

    ‘‘Dve kho, āvuso, paccayā animittāya cetovimuttiyā samāpattiyā, sabbanimittānañca amanasikāro, animittāya ca dhātuyā manasikāro’’ti (ma. ni. 1.458).

    ཨཡཾ པནེཏྠ སམཱཔཛྫནཀྐམོ – ཕལསམཱཔཏྟིཏྠིཀེན ཨརིཡསཱཝཀེན རཧོགཏེན པཊིསལླཱིནེན ཨུདཡབྦཡཱདིཝསེན སངྑཱརཱ ཝིཔསྶིཏབྦཱ། ཏསྶེཝཾ པཝཏྟཱནུཔུབྦཝིཔསྶནསྶེཝ སངྑཱརཱརམྨཎགོཏྲབྷུཉཱཎཱནནྟརཾ ཕལསམཱཔཏྟིཝསེན ནིརོདྷེ ཙིཏྟམཔྤེཏི, ཕལསམཱཔཏྟིནིནྣབྷཱཝེན ཙ སེཀྑསྶཱཔི ཕལམེཝ ཨུཔྤཛྫཏི, ན མགྒོ། ཡེ པན ཝདནྟི ‘‘སོཏཱཔནྣོ ཨཏྟནོ ཕལསམཱཔཏྟིཾ སམཱཔཛྫིསྶཱམཱིཏི ཝིཔསྶནཾ ཝཌྜྷེཏྭཱ སཀདཱགཱམཱི ཧོཏི, སཀདཱགཱམཱི ཙ ཨནཱགཱམཱི’’ཏི། ཏེ ཝཏྟབྦཱ – ཨེཝཾ སནྟེ ཨནཱགཱམཱི ཨརཧཱ བྷཝིསྶཏི, ཨརཧཱ ཙ པཙྩེཀབུདྡྷོ, པཙྩེཀབུདྡྷོ ཙ སམྦུདྡྷོཏི ཨཱཔཛྫེཡྻ, ཏསྨཱ ཡཐཱབྷིནིཝེསཾ ཡཐཱཛ྄ཛྷཱསཡཾ ཝིཔསྶནཱ ཨཏྠཾ སཱདྷེཏཱིཏི སེཀྑསྶཱཔི ཕལམེཝ ཨུཔྤཛྫཏི, ན མགྒོ། ཕལམྤི ཏསྶ སཙེ ཨནེན པཋམཛ྄ཛྷཱནིཀོ མགྒོ ཨདྷིགཏོ, པཋམཛ྄ཛྷཱནིཀམེཝ ཨུཔྤཛྫཏི། སཙེ དུཏིཡཱདཱིསུ ཨཉྙཏརཛ྄ཛྷཱནིཀོ, དུཏིཡཱདཱིསུ ཨཉྙཏརཛ྄ཛྷཱནིཀམེཝཱཏི།

    Ayaṃ panettha samāpajjanakkamo – phalasamāpattitthikena ariyasāvakena rahogatena paṭisallīnena udayabbayādivasena saṅkhārā vipassitabbā. Tassevaṃ pavattānupubbavipassanasseva saṅkhārārammaṇagotrabhuñāṇānantaraṃ phalasamāpattivasena nirodhe cittamappeti, phalasamāpattininnabhāvena ca sekkhassāpi phalameva uppajjati, na maggo. Ye pana vadanti ‘‘sotāpanno attano phalasamāpattiṃ samāpajjissāmīti vipassanaṃ vaḍḍhetvā sakadāgāmī hoti, sakadāgāmī ca anāgāmī’’ti. Te vattabbā – evaṃ sante anāgāmī arahā bhavissati, arahā ca paccekabuddho, paccekabuddho ca sambuddhoti āpajjeyya, tasmā yathābhinivesaṃ yathājjhāsayaṃ vipassanā atthaṃ sādhetīti sekkhassāpi phalameva uppajjati, na maggo. Phalampi tassa sace anena paṭhamajjhāniko maggo adhigato, paṭhamajjhānikameva uppajjati. Sace dutiyādīsu aññatarajjhāniko, dutiyādīsu aññatarajjhānikamevāti.

    ཀསྨཱ པནེཏྠ གོཏྲབྷུཉཱཎཾ མགྒཉཱཎཔུརེཙཱརིཀཾ ཝིཡ ནིབྦཱནཱརམྨཎཾ ན ཧོཏཱིཏི? ཕལཉཱཎཱནཾ ཨནིཡྻཱནིཀབྷཱཝཏོ། ཨརིཡམགྒདྷམྨཱཡེཝ ཧི ནིཡྻཱནིཀཱ། ཝུཏྟཉྷེཏཾ ‘‘ཀཏམེ དྷམྨཱ ནིཡྻཱནིཀཱ? ཙཏྟཱརོ ཨརིཡམགྒཱ ཨཔརིཡཱཔནྣཱ’’ཏི (དྷ॰ ས॰ ༡༢༩༥)། ཏསྨཱ ཨེཀནྟེནེཝ ནིཡྻཱནིཀབྷཱཝསྶ ཨུབྷཏོ ཝུཊྛཱནབྷཱཝེན པཝཏྟམཱནསྶ ཨནནྟརཔཙྩཡབྷཱུཏེན ཉཱཎེན ནིམིཏྟཏོ ཝུཊྛིཏེནེཝ བྷཝིཏབྦནྟི ཏསྶ ནིབྦཱནཱརམྨཎཏཱ ཡུཏྟཱ, ན པན ཨརིཡམགྒསྶ བྷཱཝིཏཏྟཱ ཏསྶ ཝིཔཱཀབྷཱཝེན པཝཏྟམཱནཱནཾ ཀིལེསཱནཾ ཨསམུཙྪིནྡནཏོ ཨནིཡྻཱནིཀཏྟཱ ཨཝུཊྛཱནསབྷཱཝཱནཾ ཕལཉཱཎཱནཾ པུརེཙཱརིཀཉཱཎསྶ ཀདཱཙིཔི ནིབྦཱནཱརམྨཎཏཱ ཨུབྷཡཏྠ ཨནུལོམཉཱཎཱནཾ ཨཏུལྱཱཀཱརཏོ། ཨརིཡམགྒཝཱིཐིཡཉྷི ཨནུལོམཉཱཎཱནི ཨནིབྦིདྡྷཔུབྦཱནཾ ཐཱུལཐཱུལཱནཾ ལོབྷཀྑནྡྷཱདཱིནཾ སཱཏིསཡཾ པདཱལནེན ལོཀིཡཉཱཎེན ཨུཀྐཾསཔཱརམིཔྤཏྟཱནི མགྒཉཱཎཱནུཀཱུལཱནི ཨུཔྤཛྫནྟི, ཕལསམཱཔཏྟིཝཱིཐིཡཾ པན ཏཱནི ཏཱནི ཏེན ཏེན མགྒེན ཏེསཾ ཏེསཾ ཀིལེསཱནཾ སམུཙྪིནྣཏྟཱ ཏཏྠ ནིརུསྶུཀྐཱནི ཀེཝལཾ ཨརིཡཱནཾ ཕལསམཱཔཏྟིསུཁསམངྒིབྷཱཝསྶ པརིཀམྨམཏྟཱནི ཧུཏྭཱ ཨུཔྤཛྫནྟཱིཏི ན ཏེསཾ ཀུཏོཙི ཝུཊྛཱནསམྦྷཝོ, ཡཏོ ཏེསཾ པརིཡོསཱནེ ཉཱཎཾ སངྑཱརནིམིཏྟཾ ཝུཊྛཱནཏོ ནིབྦཱནཱརམྨཎཾ སིཡཱ། ཨེཝཉྩ ཀཏྭཱ སེཀྑསྶ ཨཏྟནོ ཕལསམཱཔཏྟིཝལ༹ཉྫནཏྠཱཡ ཨུདཡབྦཡཱདིཝསེན སངྑཱརེ སམྨསནྟསྶ ཝིཔསྶནཱཉཱཎཱནུཔུབྦཱཡ ཕལམེཝ ཨུཔྤཛྫཏི, ན མགྒོཏི ཨཡཉྩ ཨཏྠོ སམཏྠིཏོ ཧོཏི། ཨེཝཾ ཏཱཝ ཕལསམཱཔཏྟིཡཱ སམཱཔཛྫནཾ ཝེདིཏབྦཾ།

    Kasmā panettha gotrabhuñāṇaṃ maggañāṇapurecārikaṃ viya nibbānārammaṇaṃ na hotīti? Phalañāṇānaṃ aniyyānikabhāvato. Ariyamaggadhammāyeva hi niyyānikā. Vuttañhetaṃ ‘‘katame dhammā niyyānikā? Cattāro ariyamaggā apariyāpannā’’ti (dha. sa. 1295). Tasmā ekanteneva niyyānikabhāvassa ubhato vuṭṭhānabhāvena pavattamānassa anantarapaccayabhūtena ñāṇena nimittato vuṭṭhiteneva bhavitabbanti tassa nibbānārammaṇatā yuttā, na pana ariyamaggassa bhāvitattā tassa vipākabhāvena pavattamānānaṃ kilesānaṃ asamucchindanato aniyyānikattā avuṭṭhānasabhāvānaṃ phalañāṇānaṃ purecārikañāṇassa kadācipi nibbānārammaṇatā ubhayattha anulomañāṇānaṃ atulyākārato. Ariyamaggavīthiyañhi anulomañāṇāni anibbiddhapubbānaṃ thūlathūlānaṃ lobhakkhandhādīnaṃ sātisayaṃ padālanena lokiyañāṇena ukkaṃsapāramippattāni maggañāṇānukūlāni uppajjanti, phalasamāpattivīthiyaṃ pana tāni tāni tena tena maggena tesaṃ tesaṃ kilesānaṃ samucchinnattā tattha nirussukkāni kevalaṃ ariyānaṃ phalasamāpattisukhasamaṅgibhāvassa parikammamattāni hutvā uppajjantīti na tesaṃ kutoci vuṭṭhānasambhavo, yato tesaṃ pariyosāne ñāṇaṃ saṅkhāranimittaṃ vuṭṭhānato nibbānārammaṇaṃ siyā. Evañca katvā sekkhassa attano phalasamāpattivaḷañjanatthāya udayabbayādivasena saṅkhāre sammasantassa vipassanāñāṇānupubbāya phalameva uppajjati, na maggoti ayañca attho samatthito hoti. Evaṃ tāva phalasamāpattiyā samāpajjanaṃ veditabbaṃ.

    ‘‘ཏཡོ ཁོ, ཨཱཝུསོ, པཙྩཡཱ ཨནིམིཏྟཱཡ ཙེཏོཝིམུཏྟིཡཱ ཋིཏིཡཱ, སབྦནིམིཏྟཱནཾ ཨམནསིཀཱརོ, ཨནིམིཏྟཱཡ ཙ དྷཱཏུཡཱ མནསིཀཱརོ, པུབྦེ ཙ ཨབྷིསངྑཱརོ’’ཏི (མ॰ ནི॰ ༡.༤༥༨) –

    ‘‘Tayo kho, āvuso, paccayā animittāya cetovimuttiyā ṭhitiyā, sabbanimittānaṃ amanasikāro, animittāya ca dhātuyā manasikāro, pubbe ca abhisaṅkhāro’’ti (ma. ni. 1.458) –

    ཝཙནཏོ པནསྶཱ ཏཱིཧཱཀཱརེཧི ཋཱནཾ ཧོཏི། ཏཏྠ པུབྦེ ཙ ཨབྷིསངྑཱརོཏི སམཱཔཏྟིཏོ པུབྦེ ཀཱལཔརིཙྪེདོ། ‘‘ཨསུཀསྨིཾ ནཱམ ཀཱལེ ཝུཊྛཧིསྶཱམཱི’’ཏི པརིཙྪིནྣཏྟཱ ཧིསྶཱ ཡཱཝ སོ ཀཱལོ ནཱགཙྪཏི, ཏཱཝ ཝུཊྛཱནཾ ན ཧོཏི།

    Vacanato panassā tīhākārehi ṭhānaṃ hoti. Tattha pubbe ca abhisaṅkhāroti samāpattito pubbe kālaparicchedo. ‘‘Asukasmiṃ nāma kāle vuṭṭhahissāmī’’ti paricchinnattā hissā yāva so kālo nāgacchati, tāva vuṭṭhānaṃ na hoti.

    ‘‘དྭེ ཁོ, ཨཱཝུསོ, པཙྩཡཱ ཨནིམིཏྟཱཡ ཙེཏོཝིམུཏྟིཡཱ ཝུཊྛཱནསྶ, སབྦནིམིཏྟཱནཉྩ མནསིཀཱརོ, ཨནིམིཏྟཱཡ ཙ དྷཱཏུཡཱ ཨམནསིཀཱརོ’’ཏི (མ॰ ནི॰ ༡.༤༥༨) –

    ‘‘Dve kho, āvuso, paccayā animittāya cetovimuttiyā vuṭṭhānassa, sabbanimittānañca manasikāro, animittāya ca dhātuyā amanasikāro’’ti (ma. ni. 1.458) –

    ཝཙནཏོ པནསྶཱ དྭཱིཧཱཀཱརེཧི ཝུཊྛཱནཾ ཧོཏི། ཏཏྠ སབྦནིམིཏྟཱནནྟི རཱུཔནིམིཏྟཝེདནཱསཉྙཱསངྑཱརཝིཉྙཱཎནིམིཏྟཱནཾ། ཀཱམཉྩ ན སབྦཱནེཝེཏཱནི ཨེཀཏོ མནསི ཀརོཏི, སབྦསངྒཱཧིཀཝསེན པནེཝཾ ཝུཏྟཾ། ཏསྨཱ ཡཾ བྷཝངྒསྶ ཨཱརམྨཎཾ, ཏསྶ མནསིཀརཎེན ཕལསམཱཔཏྟིཏོ ཝུཊྛཱནཾ ཧོཏཱིཏི ཨེཝཾ ཨསྶཱ ཝུཊྛཱནཾ ཝེདིཏབྦཾ། ཏཡིདཾ ཨེཝམིདྷ སམཱཔཛྫནཝུཊྛཱནཾ ཨརཧཏྟཕལབྷཱུཏཾ –

    Vacanato panassā dvīhākārehi vuṭṭhānaṃ hoti. Tattha sabbanimittānanti rūpanimittavedanāsaññāsaṅkhāraviññāṇanimittānaṃ. Kāmañca na sabbānevetāni ekato manasi karoti, sabbasaṅgāhikavasena panevaṃ vuttaṃ. Tasmā yaṃ bhavaṅgassa ārammaṇaṃ, tassa manasikaraṇena phalasamāpattito vuṭṭhānaṃ hotīti evaṃ assā vuṭṭhānaṃ veditabbaṃ. Tayidaṃ evamidha samāpajjanavuṭṭhānaṃ arahattaphalabhūtaṃ –

    ‘‘པཊིཔྤསྶདྡྷདརཐཾ, ཨམཏཱརམྨཎཾ སུབྷཾ།

    ‘‘Paṭippassaddhadarathaṃ, amatārammaṇaṃ subhaṃ;

    ཝནྟལོཀཱམིསཾ སནྟཾ, སཱམཉྙཕལམུཏྟམཾ’’༎

    Vantalokāmisaṃ santaṃ, sāmaññaphalamuttamaṃ’’.

    ཨིཏི ཝུཏྟཾ སཱཏཱཏིསཱཏཾ ཝིམུཏྟིསུཁཾ པཊིསཾཝེདེསི། ཏེན ཝུཏྟཾ – ‘‘ཝིམུཏྟིསུཁཔཊིསཾཝེདཱིཏི ཝིམུཏྟིསུཁཾ ཕལསམཱཔཏྟིསུཁཾ པཊིསཾཝེདིཡམཱནོ ནིསིནྣོ ཧོཏཱིཏི ཨཏྠོ’’ཏི།

    Iti vuttaṃ sātātisātaṃ vimuttisukhaṃ paṭisaṃvedesi. Tena vuttaṃ – ‘‘vimuttisukhapaṭisaṃvedīti vimuttisukhaṃ phalasamāpattisukhaṃ paṭisaṃvediyamāno nisinno hotīti attho’’ti.

    ཨཐཱཏི ཨདྷིཀཱརཏྠེ ནིཔཱཏོ། ཁོཏི པདཔཱུརཎེ། ཏེསུ ཨདྷིཀཱརཏྠེན ཨཐཱཏི ཨིམིནཱ ཝིམུཏྟིསུཁཔཊིསཾཝེདནཏོ ཨཉྙཾ ཨདྷིཀཱརཾ དསྶེཏི། ཀོ པནེསོཏི? པཊིཙྩསམུཔྤཱདམནསིཀཱརོ། ཨཐཱཏི ཝཱ པཙྪཱཏི ཨེཏསྨིཾ ཨཏྠེ ནིཔཱཏོ, ཏེན ‘‘ཏསྶ སཏྟཱཧསྶ ཨཙྩཡེནཱ’’ཏི ཝཀྑམཱནམེཝ ཨཏྠཾ ཛོཏེཏི། ཏསྶ སཏྟཱཧསྶཱཏི པལླངྐསཏྟཱཧསྶ། ཨཙྩཡེནཱཏི ཨཔགམེན། ཏམྷཱ སམཱདྷིམྷཱཏི ཨརཧཏྟཕལསམཱདྷིཏོ། ཨིདྷ པན ཋཏྭཱ པཊིཔཱཊིཡཱ སཏྟ སཏྟཱཧཱནི དསྶེཏབྦཱནཱིཏི ཀེཙི ཏཱནི ཝིཏྠཱརཡིཾསུ། མཡཾ པན ཏཱནི ཁནྡྷཀཔཱཋེན ཨིམིསྶཱ ཨུདཱནཔཱལི༹ཡཱ ཨཝིརོདྷདསྶནམུཁེན པརཏོ ཝཎྞཡིསྶཱམ། རཏྟིཡཱཏི ཨཝཡཝསམྦནྡྷེ སཱམིཝཙནཾ། པཋམནྟི ཨཙྩནྟསཾཡོགཏྠེ ཨུཔཡོགཝཙནཾ། བྷགཝཱ ཧི ཏསྶཱ རཏྟིཡཱ སཀལམྤི པཋམཾ ཡཱམཾ ཏེནེཝ མནསིཀཱརེན ཡུཏྟོ ཨཧོསཱིཏི།

    Athāti adhikāratthe nipāto. Khoti padapūraṇe. Tesu adhikāratthena athāti iminā vimuttisukhapaṭisaṃvedanato aññaṃ adhikāraṃ dasseti. Ko panesoti? Paṭiccasamuppādamanasikāro. Athāti vā pacchāti etasmiṃ atthe nipāto, tena ‘‘tassa sattāhassa accayenā’’ti vakkhamānameva atthaṃ joteti. Tassa sattāhassāti pallaṅkasattāhassa. Accayenāti apagamena. Tamhā samādhimhāti arahattaphalasamādhito. Idha pana ṭhatvā paṭipāṭiyā satta sattāhāni dassetabbānīti keci tāni vitthārayiṃsu. Mayaṃ pana tāni khandhakapāṭhena imissā udānapāḷiyā avirodhadassanamukhena parato vaṇṇayissāma. Rattiyāti avayavasambandhe sāmivacanaṃ. Paṭhamanti accantasaṃyogatthe upayogavacanaṃ. Bhagavā hi tassā rattiyā sakalampi paṭhamaṃ yāmaṃ teneva manasikārena yutto ahosīti.

    པཊིཙྩསམུཔྤཱདནྟི པཙྩཡདྷམྨཾ། ཨཝིཛྫཱདཡོ ཧི པཙྩཡདྷམྨཱ པཊིཙྩསམུཔྤཱདོ། ཀཐམིདཾ ཛཱནིཏབྦནྟི ཙེ? བྷགཝཏོ ཝཙནེན། བྷགཝཏཱ ཧི ‘‘ཏསྨཱཏིཧཱནནྡ, ཨེསེཝ ཧེཏུ, ཨེཏཾ ནིདཱནཾ, ཨེས སམུདཡོ, ཨེས པཙྩཡོ ཛརཱམརཎསྶ, ཡདིདཾ ཛཱཏི…པེ॰… སངྑཱརཱནཾ, ཡདིདཾ ཨཝིཛྫཱ’’ཏི (དཱི॰ ནི॰ ༢.༡༠༥ ཨཱདཡོ) ཨེཝཾ ཨཝིཛྫཱདཡོ ཧེཏཱུཏི ཝུཏྟཱ། ཡཐཱ དྭཱདས པཙྩཡཱ དྭཱདས པཊིཙྩསམུཔྤཱདཱཏི།

    Paṭiccasamuppādanti paccayadhammaṃ. Avijjādayo hi paccayadhammā paṭiccasamuppādo. Kathamidaṃ jānitabbanti ce? Bhagavato vacanena. Bhagavatā hi ‘‘tasmātihānanda, eseva hetu, etaṃ nidānaṃ, esa samudayo, esa paccayo jarāmaraṇassa, yadidaṃ jāti…pe… saṅkhārānaṃ, yadidaṃ avijjā’’ti (dī. ni. 2.105 ādayo) evaṃ avijjādayo hetūti vuttā. Yathā dvādasa paccayā dvādasa paṭiccasamuppādāti.

    ཏཏྲཱཡཾ ཝཙནཏྠོ – ཨཉྙམཉྙཾ པཊིཙྩ པཊིམུཁཾ ཀཏྭཱ ཀཱརཎསམཝཱཡཾ ཨཔྤཊིཀྑིཔིཏྭཱ སཧིཏེ ཨུཔྤཱདེཏཱིཏི པཊིཙྩསམུཔྤཱདོ། ཨཐ ཝཱ པཊིཙྩ པཙྩེཏབྦཾ པཙྩཡཱརཧཏཾ པཙྩཡཾ པཊིགནྟྭཱ ན ཝིནཱ ཏེན སམྦནྡྷསྶ ཨུཔྤཱདོ པཊིཙྩསམུཔྤཱདོ ། པཊིཙྩསམུཔྤཱདོཏི ཙེཏྠ སམུཔྤཱདཔདཊྛཱནཝཙནཝིཉྙེཡྻོ ཕལསྶ ཨུཔྤཱདནསམཏྠཏཱཡུཏྟོ ཧེཏུ, ན པཊིཙྩསམུཔྤཏྟིམཏྟཾ ཝེདིཏབྦཾ། ཨཐ ཝཱ པཙྩེཏུཾ ཨརཧནྟི ནཾ པཎྜིཏཱཏི པཊིཙྩོ, སམྨཱ སཡམེཝ ཝཱ ཨུཔྤཱདེཏཱིཏི སམུཔྤཱདོ, པཊིཙྩོ ཙ སོ སམུཔྤཱདོ ཙཱཏི པཊིཙྩསམུཔྤཱདོཏི ཨེཝམེཏྠ ཨཏྠོ དཊྛབྦོ།

    Tatrāyaṃ vacanattho – aññamaññaṃ paṭicca paṭimukhaṃ katvā kāraṇasamavāyaṃ appaṭikkhipitvā sahite uppādetīti paṭiccasamuppādo. Atha vā paṭicca paccetabbaṃ paccayārahataṃ paccayaṃ paṭigantvā na vinā tena sambandhassa uppādo paṭiccasamuppādo . Paṭiccasamuppādoti cettha samuppādapadaṭṭhānavacanaviññeyyo phalassa uppādanasamatthatāyutto hetu, na paṭiccasamuppattimattaṃ veditabbaṃ. Atha vā paccetuṃ arahanti naṃ paṇḍitāti paṭicco, sammā sayameva vā uppādetīti samuppādo, paṭicco ca so samuppādo cāti paṭiccasamuppādoti evamettha attho daṭṭhabbo.

    ཨནུལོམནྟི ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིནཱ ནཡེན ཝུཏྟོ ཨཝིཛྫཱདིཀོ པཙྩཡཱཀཱརོ ཨཏྟནཱ ཀཏྟབྦཀིཙྩཀརཎཏོ ཨནུལོམོཏི ཝུཙྩཏི། ཨཐ ཝཱ ཨཱདིཏོ པཊྛཱཡ ཨནྟཾ པཱཔེཏྭཱ ཝུཏྟཏྟཱ པཝཏྟིཡཱ ཝཱ ཨནུལོམཏོ ཨནུལོམོ, ཏཾ ཨནུལོམཾ། སཱདྷུཀཾ མནསཱཀཱསཱིཏི སཀྐཙྩཾ མནསི ཨཀཱསི། ཡོ ཡོ པཙྩཡདྷམྨོ ཡསྶ ཡསྶ པཙྩཡུཔྤནྣདྷམྨསྶ ཡཐཱ ཡཐཱ ཧེཏུཔཙྩཡཱདིནཱ པཙྩཡབྷཱཝེན པཙྩཡོ ཧོཏི, ཏཾ སབྦཾ ཨཝིཔརཱིཏཾ ཨཔརིཧཱཔེཏྭཱ ཨནཝསེསཏོ པཙྩཝེཀྑཎཝསེན ཙིཏྟེ ཨཀཱསཱིཏི ཨཏྠོ། ཡཐཱ པན བྷགཝཱ པཊིཙྩསམུཔྤཱདཱནུལོམཾ མནསཱཀཱསི, ཏཾ སངྑེཔེན ཏཱཝ དསྶེཏུཾ ‘‘ཨིཏི ཨིམསྨིཾ སཏི ཨིདཾ ཧོཏི, ཨིམསྶུཔྤཱདཱ ཨིདཾ ཨུཔྤཛྫཏཱི’’ཏི ཝུཏྟཾ།

    Anulomanti ‘‘avijjāpaccayā saṅkhārā’’tiādinā nayena vutto avijjādiko paccayākāro attanā kattabbakiccakaraṇato anulomoti vuccati. Atha vā ādito paṭṭhāya antaṃ pāpetvā vuttattā pavattiyā vā anulomato anulomo, taṃ anulomaṃ. Sādhukaṃ manasākāsīti sakkaccaṃ manasi akāsi. Yo yo paccayadhammo yassa yassa paccayuppannadhammassa yathā yathā hetupaccayādinā paccayabhāvena paccayo hoti, taṃ sabbaṃ aviparītaṃ aparihāpetvā anavasesato paccavekkhaṇavasena citte akāsīti attho. Yathā pana bhagavā paṭiccasamuppādānulomaṃ manasākāsi, taṃ saṅkhepena tāva dassetuṃ ‘‘iti imasmiṃ sati idaṃ hoti, imassuppādā idaṃ uppajjatī’’ti vuttaṃ.

    ཏཏྠ ཨིཏཱིཏི ཨེཝཾ, ཨནེན པཀཱརེནཱཏི ཨཏྠོ། ཨིམསྨིཾ སཏི ཨིདཾ ཧོཏཱིཏི ཨིམསྨིཾ ཨཝིཛྫཱདིཀེ པཙྩཡེ སཏི ཨིདཾ སངྑཱརཱདིཀཾ ཕལཾ ཧོཏི། ཨིམསྶུཔྤཱདཱ ཨིདཾ ཨུཔྤཛྫཏཱིཏི ཨིམསྶ ཨཝིཛྫཱདིཀསྶ པཙྩཡསྶ ཨུཔྤཱདཱ ཨིདཾ སངྑཱརཱདིཀཾ ཕལཾ ཨུཔྤཛྫཏཱིཏི ཨཏྠོ། ཨིམསྨིཾ ཨསཏི ཨིདཾ ན ཧོཏི, ཨིམསྶ ནིརོདྷཱ ཨིདཾ ནིརུཛ྄ཛྷཏཱིཏི ཨཝིཛྫཱདཱིནཾ ཨབྷཱཝེ སངྑཱརཱདཱིནཾ ཨབྷཱཝསྶ ཨཝིཛྫཱདཱིནཾ ནིརོདྷེ སངྑཱརཱདཱིནཾ ནིརོདྷསྶ ཙ དུཏིཡཏཏིཡསུཏྟཝཙནེན ཨེཏསྨིཾ པཙྩཡལཀྑཎེ ནིཡམོ དསྶིཏོ ཧོཏི – ཨིམསྨིཾ སཏི ཨེཝ, ནཱསཏི། ཨིམསྶུཔྤཱདཱ ཨེཝ, ནཱནུཔྤཱདཱ། ཨནིརོདྷཱ ཨེཝ, ན ནིརོདྷཱཏི། ཏེནེཏཾ ལཀྑཎཾ ཨནྟོགདྷནིཡམཾ ཨིདྷ པཊིཙྩསམུཔྤཱདསྶ ཝུཏྟནྟི དཊྛབྦཾ། ནིརོདྷོཏི ཙ ཨཝིཛྫཱདཱིནཾ ཝིརཱགཱདྷིགམེན ཨཱཡཏིཾ ཨནུཔྤཱདོ ཨཔྤཝཏྟི། ཏཐཱ ཧི ཝུཏྟཾ – ‘‘ཨཝིཛྫཱཡ ཏྭེཝ ཨསེསཝིརཱགནིརོདྷཱ སངྑཱརནིརོདྷོ’’ཏིཨཱདི། ནིརོདྷནིརོདྷཱི ཙ ཨུཔྤཱདནིརོདྷཱིབྷཱཝེན ཝུཏྟོ ‘‘ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི།

    Tattha itīti evaṃ, anena pakārenāti attho. Imasmiṃ sati idaṃ hotīti imasmiṃ avijjādike paccaye sati idaṃ saṅkhārādikaṃ phalaṃ hoti. Imassuppādā idaṃ uppajjatīti imassa avijjādikassa paccayassa uppādā idaṃ saṅkhārādikaṃ phalaṃ uppajjatīti attho. Imasmiṃ asati idaṃ na hoti, imassa nirodhā idaṃ nirujjhatīti avijjādīnaṃ abhāve saṅkhārādīnaṃ abhāvassa avijjādīnaṃ nirodhe saṅkhārādīnaṃ nirodhassa ca dutiyatatiyasuttavacanena etasmiṃ paccayalakkhaṇe niyamo dassito hoti – imasmiṃ sati eva, nāsati. Imassuppādā eva, nānuppādā. Anirodhā eva, na nirodhāti. Tenetaṃ lakkhaṇaṃ antogadhaniyamaṃ idha paṭiccasamuppādassa vuttanti daṭṭhabbaṃ. Nirodhoti ca avijjādīnaṃ virāgādhigamena āyatiṃ anuppādo appavatti. Tathā hi vuttaṃ – ‘‘avijjāya tveva asesavirāganirodhā saṅkhāranirodho’’tiādi. Nirodhanirodhī ca uppādanirodhībhāvena vutto ‘‘imassa nirodhā idaṃ nirujjhatī’’ti.

    ཏེནེཏཾ དསྶེཏི – ཨནིརོདྷོ ཨུཔྤཱདོ ནཱམ, སོ ཙེཏྠ ཨཏྠིབྷཱཝོཏིཔི ཝུཙྩཏཱིཏི། ‘‘ཨིམསྨིཾ སཏི ཨིདཾ ཧོཏཱི’’ཏི ཨིདམེཝ ཧི ལཀྑཎཾ པརིཡཱཡནྟརེན ‘‘ཨིམསྶ ཨུཔྤཱདཱ ཨིདཾ ཨུཔྤཛྫཏཱི’’ཏི ཝདནྟེན པརེན པུརིམཾ ཝིསེསིཏཾ ཧོཏི། ཏསྨཱ ན དྷརམཱནཏཾཡེཝ སནྡྷཱཡ ‘‘ཨིམསྨིཾ སཏཱི’’ཏི ཝུཏྟཾ, ཨཐ ཁོ མགྒེན ཨནིརུདྡྷབྷཱཝཉྩཱཏི ཝིཉྙཱཡཏི། ཡསྨཱ ཙ ‘‘ཨིམསྨིཾ ཨསཏི ཨིདཾ ན ཧོཏི, ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི དྭིདྷཱཔི ཨུདྡིཊྛསྶ ལཀྑཎསྶ ནིདྡེསཾ ཝདནྟེན ‘‘ཨཝིཛྫཱཡ ཏྭེཝ ཨསེསཝིརཱགནིརོདྷཱ སངྑཱརནིརོདྷོ’’ཏིཨཱདིནཱ ནིརོདྷོ ཨེཝ ཝུཏྟོ, ཏསྨཱ ནཏྠིབྷཱཝོཔི ནིརོདྷོ ཨེཝཱཏི ནཏྠིབྷཱཝཝིརུདྡྷོ ཨཏྠིབྷཱཝོ ཨནིརོདྷོཏི དསྶིཏཾ ཧོཏི། ཏེན ཨནིརོདྷསངྑཱཏེན ཨཏྠིབྷཱཝེན ཨུཔྤཱདཾ ཝིསེསེཏི། ཏཏོ ན ཨིདྷ ཨཏྠིབྷཱཝམཏྟཾ ཨུཔྤཱདོཏི ཨཏྠོ ཨདྷིཔྤེཏོ, ཨཐ ཁོ ཨནིརོདྷསངྑཱཏོ ཨཏྠིབྷཱཝོ ཙཱཏི ཨཡམཏྠོ ཝིབྷཱཝིཏོཏི། ཨེཝམེཏཾ ལཀྑཎདྭཡཝཙནཾ ཨཉྙམཉྙཝིསེསནཝིསེསིཏབྦབྷཱཝེན སཱཏྠཀནྟི ཝེདིཏབྦཾ།

    Tenetaṃ dasseti – anirodho uppādo nāma, so cettha atthibhāvotipi vuccatīti. ‘‘Imasmiṃ sati idaṃ hotī’’ti idameva hi lakkhaṇaṃ pariyāyantarena ‘‘imassa uppādā idaṃ uppajjatī’’ti vadantena parena purimaṃ visesitaṃ hoti. Tasmā na dharamānataṃyeva sandhāya ‘‘imasmiṃ satī’’ti vuttaṃ, atha kho maggena aniruddhabhāvañcāti viññāyati. Yasmā ca ‘‘imasmiṃ asati idaṃ na hoti, imassa nirodhā idaṃ nirujjhatī’’ti dvidhāpi uddiṭṭhassa lakkhaṇassa niddesaṃ vadantena ‘‘avijjāya tveva asesavirāganirodhā saṅkhāranirodho’’tiādinā nirodho eva vutto, tasmā natthibhāvopi nirodho evāti natthibhāvaviruddho atthibhāvo anirodhoti dassitaṃ hoti. Tena anirodhasaṅkhātena atthibhāvena uppādaṃ viseseti. Tato na idha atthibhāvamattaṃ uppādoti attho adhippeto, atha kho anirodhasaṅkhāto atthibhāvo cāti ayamattho vibhāvitoti. Evametaṃ lakkhaṇadvayavacanaṃ aññamaññavisesanavisesitabbabhāvena sātthakanti veditabbaṃ.

    ཀོ པནཱཡཾ ཨནིརོདྷོ ནཱམ, ཡོ ‘‘ཨཏྠིབྷཱཝོ, ཨུཔྤཱདོ’’ཏི ཙ ཝུཙྩཏཱིཏི? ཨཔྤཧཱིནབྷཱཝོ ཙ, ཨནིབྦཏྟིཏཕལཱརཧཏཱཔཧཱནེཧི ཕལཱནུཔྤཱདནཱརཧཏཱ ཙ། ཡེ ཧི པཧཱཏབྦཱ ཨཀུསལཱ དྷམྨཱ, ཏེསཾ ཨརིཡམགྒེན ཨསམུགྒྷཱཊིཏབྷཱཝོ ཙ། ཡེ པན ན པཧཱཏབྦཱ ཀུསལཱབྱཱཀཏཱ དྷམྨཱ, ཡཱནི ཏེསུ སཾཡོཛནཱནི ཨཁཱིཎཱསཝཱནཾ ཏེསཾ ཨཔརིཀྑཱིཎཏཱ ཙ། ཨསམུགྒྷཱཊིཏཱནུསཡཏཱཡ ཧི སསཾཡོཛནཱ ཁནྡྷཔྤཝཏྟི པཊིཙྩསམུཔྤཱདོ། ཏཐཱ ཙ ཝུཏྟཾ –

    Ko panāyaṃ anirodho nāma, yo ‘‘atthibhāvo, uppādo’’ti ca vuccatīti? Appahīnabhāvo ca, anibbattitaphalārahatāpahānehi phalānuppādanārahatā ca. Ye hi pahātabbā akusalā dhammā, tesaṃ ariyamaggena asamugghāṭitabhāvo ca. Ye pana na pahātabbā kusalābyākatā dhammā, yāni tesu saṃyojanāni akhīṇāsavānaṃ tesaṃ aparikkhīṇatā ca. Asamugghāṭitānusayatāya hi sasaṃyojanā khandhappavatti paṭiccasamuppādo. Tathā ca vuttaṃ –

    ‘‘ཡཱཡ ཙ, བྷིཀྑཝེ, ཨཝིཛྫཱཡ ནིཝུཏསྶ བཱལསྶ ཡཱཡ ཙ ཏཎྷཱཡ སམྤཡུཏྟསྶ ཨཡཾ ཀཱཡོ སམུདཱགཏོ, སཱ ཙེཝ ཨཝིཛྫཱ བཱལསྶ ཨཔྤཧཱིནཱ, སཱ ཙ ཏཎྷཱ ཨཔརིཀྑཱིཎཱ། ཏཾ ཀིསྶ ཧེཏུ? ན, བྷིཀྑཝེ, བཱལོ ཨཙརི བྲཧྨཙརིཡཾ སམྨཱ དུཀྑཀྑཡཱཡ, ཏསྨཱ བཱལོ ཀཱཡསྶ བྷེདཱ ཀཱཡཱུཔགོ ཧོཏི, སོ ཀཱཡཱུཔགོ སམཱནོ ན པརིམུཙྩཏི ཛཱཏིཡཱ ཛརཱམརཎེནཱ’’ཏིཨཱདི (སཾ॰ ནི॰ ༢.༡༩)།

    ‘‘Yāya ca, bhikkhave, avijjāya nivutassa bālassa yāya ca taṇhāya sampayuttassa ayaṃ kāyo samudāgato, sā ceva avijjā bālassa appahīnā, sā ca taṇhā aparikkhīṇā. Taṃ kissa hetu? Na, bhikkhave, bālo acari brahmacariyaṃ sammā dukkhakkhayāya, tasmā bālo kāyassa bhedā kāyūpago hoti, so kāyūpago samāno na parimuccati jātiyā jarāmaraṇenā’’tiādi (saṃ. ni. 2.19).

    ཁཱིཎསཾཡོཛནཱནཾ པན ཨཝིཛྫཱཡ ཨབྷཱཝཏོ སངྑཱརཱནཾ, ཏཎྷུཔཱདཱནཱནཾ ཨབྷཱཝཏོ ཨུཔཱདཱནབྷཝཱནཾ ཨསམྦྷཝོཏི ཝཊྚསྶ ཨུཔཙྪེདོ པཉྙཱཡིསྶཏཱིཏི། ཏེནེཝཱཧ –

    Khīṇasaṃyojanānaṃ pana avijjāya abhāvato saṅkhārānaṃ, taṇhupādānānaṃ abhāvato upādānabhavānaṃ asambhavoti vaṭṭassa upacchedo paññāyissatīti. Tenevāha –

    ‘‘ཚནྣཾ ཏྭེཝ, ཕགྒུཎ, ཕསྶཱཡཏནཱནཾ ཨསེསཝིརཱགནིརོདྷཱ ཕསྶནིརོདྷོ, ཕསྶནིརོདྷཱ ཝེདནཱནིརོདྷོ’’ཏིཨཱདི (སཾ॰ ནི॰ ༢.༡༢)།

    ‘‘Channaṃ tveva, phagguṇa, phassāyatanānaṃ asesavirāganirodhā phassanirodho, phassanirodhā vedanānirodho’’tiādi (saṃ. ni. 2.12).

    ན ཧི ཨགྒམགྒཱདྷིགམཏོ ཨུདྡྷཾ ཡཱཝ པརིནིབྦཱནཱ སལཱ༹ཡཏནཱདཱིནཾ ཨཔྤཝཏྟི། ཨཐ ཁོ ནཏྠིཏཱ ནིརོདྷསདྡཝཙནཱིཡཏཱ ཁཱིཎསཾཡོཛནཏཱཏི ནིརོདྷོ ཝུཏྟོ། ཨཔིཙ ཙིརཀཏམྤི ཀམྨཾ ཨནིབྦཏྟིཏཕལཏཱཡ ཨཔྤཧཱིནཱཧཱརཏཱཡ ཙ ཕལཱརཧཾ སནྟཾ ཨེཝ ནཱམ ཧོཏི, ན ནིབྦཏྟིཏཕལཾ , ནཱཔི པཧཱིནཱཧཱརནྟི། ཕལུཔྤཏྟིཔཙྩཡཱནཾ ཨཝིཛྫཱསངྑཱརཱདཱིནཾ ཝུཏྟནཡེནེཝ ཕལཱརཧབྷཱཝོ ཨནིརོདྷོཏི ཝེདིཏབྦོ། ཨེཝཾ ཨནིརུདྡྷབྷཱཝེནེཝ ཧི ཡེན ཝིནཱ ཕལཾ ན སམྦྷཝཏི, ཏཾ ཀཱརཎཾ ཨཏཱིཏནྟིཔི ཨིམསྨིཾ སཏཱིཏི ཨིམིནཱ ཝཙནེན ཝུཏྟཾ། ཏཏོཡེཝ ཙ ཨཝུསིཏབྲཧྨཙརིཡསྶ ཨཔྤཝཏྟིདྷམྨཏཾ ཨནཱཔནྣོ པཙྩཡུཔྤཱདོ ཀཱལབྷེདཾ ཨནཱམསིཏྭཱ ཨནིཝཏྟནཱཡ ཨེཝ ཨིམསྶ ཨུཔྤཱདཱཏི ཝུཏྟོ། ཨཐ ཝཱ ཨཝསེསཔཙྩཡསམཝཱཡེ ཨཝིཛྫམཱནསྶཔི ཝིཛྫམཱནསྶ ཝིཡ པགེཝ ཝིཛྫམཱནསྶ ཡཱ ཕལུཔྤཏྟིཨབྷིམུཁཏཱ, སཱ ཨིམསྶ ཨུཔྤཱདཱཏི ཝུཏྟཱ། ཏཐཱ ཧི ཏཏོ ཕལཾ ཨུཔྤཛྫཏཱིཏི ཏདཝཏྠཾ ཀཱརཎཾ ཕལསྶ ཨུཔྤཱདནབྷཱཝེན ཨུཊྛིཏཾ ཨུཔྤཏིཏཾ ནཱམ ཧོཏི, ན ཝིཛྫམཱནམྤི ཨཏདཝཏྠནྟི ཏདཝཏྠཏཱ ཨུཔྤཱདོཏི ཝེདིཏབྦོ།

    Na hi aggamaggādhigamato uddhaṃ yāva parinibbānā saḷāyatanādīnaṃ appavatti. Atha kho natthitā nirodhasaddavacanīyatā khīṇasaṃyojanatāti nirodho vutto. Apica cirakatampi kammaṃ anibbattitaphalatāya appahīnāhāratāya ca phalārahaṃ santaṃ eva nāma hoti, na nibbattitaphalaṃ , nāpi pahīnāhāranti. Phaluppattipaccayānaṃ avijjāsaṅkhārādīnaṃ vuttanayeneva phalārahabhāvo anirodhoti veditabbo. Evaṃ aniruddhabhāveneva hi yena vinā phalaṃ na sambhavati, taṃ kāraṇaṃ atītantipi imasmiṃ satīti iminā vacanena vuttaṃ. Tatoyeva ca avusitabrahmacariyassa appavattidhammataṃ anāpanno paccayuppādo kālabhedaṃ anāmasitvā anivattanāya eva imassa uppādāti vutto. Atha vā avasesapaccayasamavāye avijjamānassapi vijjamānassa viya pageva vijjamānassa yā phaluppattiabhimukhatā, sā imassa uppādāti vuttā. Tathā hi tato phalaṃ uppajjatīti tadavatthaṃ kāraṇaṃ phalassa uppādanabhāvena uṭṭhitaṃ uppatitaṃ nāma hoti, na vijjamānampi atadavatthanti tadavatthatā uppādoti veditabbo.

    ཏཏྠ སཏཱིཏི ཨིམིནཱ ཝིཛྫམཱནཏཱམཏྟེན པཙྩཡབྷཱཝཾ ཝདནྟོ ཨབྱཱཔཱརཏཾ པཊིཙྩསམུཔྤཱདསྶ དསྶེཏི། ཨུཔྤཱདཱཏི ཨུཔྤཏྟིདྷམྨཏཾ ཨསབྦཀཱལབྷཱཝིཏཾ ཕལུཔྤཏྟིཨབྷིམུཁཏཉྩ དཱིཔེནྟོ ཨནིཙྩཏཾ པཊིཙྩསམུཔྤཱདསྶ དསྶེཏི། ‘‘སཏི, ནཱསཏི, ཨུཔྤཱདཱ, ན ནིརོདྷཱ’’ཏི པན ཧེཏུཨཏྠེཧི བྷུམྨནིསྶཀྐཝཙནེཧི སམཏྠིཏཾ ནིདཱནསམུདཡཛཱཏིཔབྷཝབྷཱཝཾ པཊིཙྩསམུཔྤཱདསྶ དསྶེཏི། ཧེཏུཨཏྠཏཱ ཙེཏྠ བྷུམྨཝཙནེ ཡསྶ བྷཱཝེ ཏདཝིནཱབྷཱཝིཕལསྶ བྷཱཝོ ལཀྑཱིཡཏི, ཏཏྠ པཝཏྟིཡཱ ཝེདིཏབྦཱ ཡཐཱ ‘‘ཨདྷནཱནཾ དྷནེ ཨནནུཔྤདཱིཡམཱནེ དཱལིདྡིཡཾ ཝེཔུལླཾ ཨགམཱསཱི’’ཏི (དཱི॰ ནི॰ ༣.༩༡) ཙ ‘‘ནིཔྥནྣེསུ སསྶེསུ སུབྷིཀྑཾ ཛཱཡཏཱི’’ཏི ཙ། ནིསྶཀྐཝཙནསྶཱཔི ཧེཏུཨཏྠཏཱ ཕལསྶ པབྷཝེ པཀཏིཡཉྩ པཝཏྟིཏོ ཡཐཱ ‘‘ཀལལཱ ཧོཏི ཨབྦུདཾ, ཨབྦུདཱ ཛཱཡཏཱི པེསཱི’’ཏི (སཾ॰ ནི॰ ༡.༢༣༥) ཙ ‘‘ཧིམཝཏཱ གངྒཱ པབྷཝནྟི, སིངྒཏོ སརོ ཛཱཡཏཱི’’ཏི ཙ། ཨཝིཛྫཱདིབྷཱཝེ ཙ ཏདཝིནཱབྷཱཝེན སངྑཱརཱདིབྷཱཝོ ལཀྑཱིཡཏི, ཨཝིཛྫཱདཱིཧི ཙ སངྑཱརཱདཡོ པབྷཝནྟི པཀརིཡནྟི ཙཱཏི ཏེ ཏེསཾ པབྷཝོ པཀཏི ཙ, ཏསྨཱ ཏདཏྠདཱིཔནཏྠཾ ‘‘ཨིམསྨིཾ སཏི ཨིམསྶ ཨུཔྤཱདཱ’’ཏི ཧེཏུཨཏྠེ བྷུམྨནིསྶཀྐནིདྡེསཱ ཀཏཱཏི།

    Tattha satīti iminā vijjamānatāmattena paccayabhāvaṃ vadanto abyāpārataṃ paṭiccasamuppādassa dasseti. Uppādāti uppattidhammataṃ asabbakālabhāvitaṃ phaluppattiabhimukhatañca dīpento aniccataṃ paṭiccasamuppādassa dasseti. ‘‘Sati, nāsati, uppādā, na nirodhā’’ti pana hetuatthehi bhummanissakkavacanehi samatthitaṃ nidānasamudayajātipabhavabhāvaṃ paṭiccasamuppādassa dasseti. Hetuatthatā cettha bhummavacane yassa bhāve tadavinābhāviphalassa bhāvo lakkhīyati, tattha pavattiyā veditabbā yathā ‘‘adhanānaṃ dhane ananuppadīyamāne dāliddiyaṃ vepullaṃ agamāsī’’ti (dī. ni. 3.91) ca ‘‘nipphannesu sassesu subhikkhaṃ jāyatī’’ti ca. Nissakkavacanassāpi hetuatthatā phalassa pabhave pakatiyañca pavattito yathā ‘‘kalalā hoti abbudaṃ, abbudā jāyatī pesī’’ti (saṃ. ni. 1.235) ca ‘‘himavatā gaṅgā pabhavanti, siṅgato saro jāyatī’’ti ca. Avijjādibhāve ca tadavinābhāvena saṅkhārādibhāvo lakkhīyati, avijjādīhi ca saṅkhārādayo pabhavanti pakariyanti cāti te tesaṃ pabhavo pakati ca, tasmā tadatthadīpanatthaṃ ‘‘imasmiṃ sati imassa uppādā’’ti hetuatthe bhummanissakkaniddesā katāti.

    ཡསྨཱ ཙེཏྠ ‘‘ཨིམསྨིཾ སཏི ཨིདཾ ཧོཏི, ཨིམསྶུཔྤཱདཱ ཨིདཾ ཨུཔྤཛྫཏཱི’’ཏི སངྑེཔེན ཨུདྡིཊྛསྶ པཊིཙྩསམུཔྤཱདསྶ ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིཀོ ནིདྡེསོ, ཏསྨཱ ཡཐཱཝུཏྟོ ཨཏྠིབྷཱཝོ ཨུཔྤཱདོ ཙ ཏེསཾ ཏེསཾ པཙྩཡུཔྤནྣདྷམྨཱནཾ པཙྩཡབྷཱཝོཏི ཝིཉྙཱཡཏི། ན ཧི ཨནིརུདྡྷཏཱསངྑཱཏཾ ཨཏྠིབྷཱཝཾ ཨུཔྤཱདཉྩ ཨནིཝཏྟསབྷཱཝཏཱསངྑཱཏཾ ཨུདཡཱཝཏྠཏཱསངྑཱཏཾ ཝཱ ‘‘སཏི ཨེཝ, ནཱསཏི, ཨུཔྤཱདཱ ཨེཝ, ན ནིརོདྷཱ’’ཏི ཨནྟོགདྷནིཡམེཧི ཝཙནེཧི ཨབྷིཧིཏཾ མུཉྩིཏྭཱ ཨཉྙོ པཙྩཡབྷཱཝོ ནཱམ ཨཏྠི, ཏསྨཱ ཡཐཱཝུཏྟོ ཨཏྠིབྷཱཝོ ཨུཔྤཱདོ ཙ པཙྩཡབྷཱཝོཏི ཝེདིཏབྦཾ། ཡེཔི པཊྛཱནེ ཨཱགཏཱ ཧེཏུཨཱདཡོ ཙཏུཝཱིསཏི པཙྩཡཱ, ཏེཔི ཨེཏསྶེཝ པཙྩཡབྷཱཝསྶ ཝིསེསཱཏི ཝེདིཏབྦཱ། ཨིཏི ཡཐཱ ཝིཏྠཱརེན ཨནུལོམཾ པཊིཙྩསམུཔྤཱདཾ མནསི ཨཀཱསི, ཏཾ དསྶེཏུཾ, ‘‘ཡདིདཾ ཨཝིཛྫཱཔཙྩཡཱ སངྑཱརཱ’’ཏིཨཱདི ཝུཏྟཾ།

    Yasmā cettha ‘‘imasmiṃ sati idaṃ hoti, imassuppādā idaṃ uppajjatī’’ti saṅkhepena uddiṭṭhassa paṭiccasamuppādassa ‘‘avijjāpaccayā saṅkhārā’’tiādiko niddeso, tasmā yathāvutto atthibhāvo uppādo ca tesaṃ tesaṃ paccayuppannadhammānaṃ paccayabhāvoti viññāyati. Na hi aniruddhatāsaṅkhātaṃ atthibhāvaṃ uppādañca anivattasabhāvatāsaṅkhātaṃ udayāvatthatāsaṅkhātaṃ vā ‘‘sati eva, nāsati, uppādā eva, na nirodhā’’ti antogadhaniyamehi vacanehi abhihitaṃ muñcitvā añño paccayabhāvo nāma atthi, tasmā yathāvutto atthibhāvo uppādo ca paccayabhāvoti veditabbaṃ. Yepi paṭṭhāne āgatā hetuādayo catuvīsati paccayā, tepi etasseva paccayabhāvassa visesāti veditabbā. Iti yathā vitthārena anulomaṃ paṭiccasamuppādaṃ manasi akāsi, taṃ dassetuṃ, ‘‘yadidaṃ avijjāpaccayā saṅkhārā’’tiādi vuttaṃ.

    ཏཏྠ ཡདིདནྟི ནིཔཱཏོ, ཏསྶ ཡོ ཨཡནྟི ཨཏྠོ། ཨཝིཛྫཱཔཙྩཡཱཏིཨཱདཱིསུ ཨཝིནྡིཡཾ ཀཱཡདུཙྩརིཏཱདིཾ ཝིནྡཏཱིཏི ཨཝིཛྫཱ, ཝིནྡིཡཾ ཀཱཡསུཙརིཏཱདིཾ ན ཝིནྡཏཱིཏི ཨཝིཛྫཱ, དྷམྨཱནཾ ཨཝིཔརཱིཏསབྷཱཝཾ ཨཝིདིཏཾ ཀརོཏཱིཏི ཨཝིཛྫཱ, ཨནྟཝིརཧིཏེ སཾསཱརེ བྷཝཱདཱིསུ སཏྟེ ཛཝཱཔེཏཱིཏི ཨཝིཛྫཱ, ཨཝིཛྫམཱནེསུ ཛཝཏི ཝིཛྫམཱནེསུ ན ཛཝཏཱིཏི ཨཝིཛྫཱ, ཝིཛྫཱཡ པཊིཔཀྑཱཏི ཨཝིཛྫཱ, སཱ ‘‘དུཀྑེ ཨཉྙཱཎ’’ནྟིཨཱདིནཱ ཙཏུབྦིདྷཱ ཝེདིཏབྦཱ། པཊིཙྩ ན ཝིནཱ ཕལཾ ཨེཏི ཨུཔྤཛྫཏི ཙེཝ པཝཏྟཏི ཙཱཏི པཙྩཡོ, ཨུཔཀཱརཀཏྠོ ཝཱ པཙྩཡོ། ཨཝིཛྫཱ ཙ སཱ པཙྩཡོ ཙཱཏི ཨཝིཛྫཱཔཙྩཡོ, ཏསྨཱ ཨཝིཛྫཱཔཙྩཡཱ། སངྑརོནྟཱིཏི སངྑཱརཱ, ལོཀིཡཀུསལཱཀུསལཙེཏནཱ, སཱ པུཉྙཱཔུཉྙཱནེཉྫཱབྷིསངྑཱརཝསེན ཏིཝིདྷཱ ཝེདིཏབྦཱ། ཝིཛཱནཱཏཱིཏི ཝིཉྙཱཎཾ, ཏཾ ལོཀིཡཝིཔཱཀཝིཉྙཱཎཝསེན དྭཏྟིཾསཝིདྷཾ། ནམཏཱིཏི ནཱམཾ, ཝེདནཱདིཀྑནྡྷཏྟཡཾ། རུཔྤཏཱིཏི རཱུཔཾ, བྷཱུཏརཱུཔཾ ཙཀྑཱདིཨུཔཱདཱརཱུཔཉྩ། ཨཱཡཏཏི ཨཱཡཏཉྩ སཾསཱརདུཀྑཾ ནཡཏཱིཏི ཨཱཡཏནཾ ། ཕུསཏཱིཏི ཕསྶོ། ཝེདཡཏཱིཏི ཝེདནཱ། ཨིདམྤི དྭཡཾ དྭཱརཝསེན ཚབྦིདྷཾ, ཝིཔཱཀཝསེན གཧཎེ ཚཏྟིཾསཝིདྷཾ། པརིཏསྶཏཱིཏི ཏཎྷཱ, སཱ ཀཱམཏཎྷཱདིཝསེན སངྑེཔཏོ ཏིཝིདྷཱ, ཝིཏྠཱརཏོ ཨཊྛུཏྟརསཏཝིདྷཱ ཙ། ཨུཔཱདཱིཡཏཱིཏི ཨུཔཱདཱནཾ, ཏཾ ཀཱམུཔཱདཱནཱདིཝསེན ཙཏུབྦིདྷཾ། བྷཝཏི བྷཱཝཡཏི ཙཱཏི བྷཝོ, སོ ཀམྨཱུཔཔཏྟིབྷེདཏོ དུཝིདྷོ། ཛནནཾ ཛཱཏི། ཛཱིརཎཾ ཛརཱ། མརནྟི ཏེནཱཏི མརཎཾ། སོཙནཾ སོཀོ། པརིདེཝནཾ པརིདེཝོ། དུཀྑཡཏཱིཏི དུཀྑཾ, ཨུཔྤཱདཊྛིཏིཝསེན དྭེདྷཱ ཁཎཏཱིཏི དུཀྑཾ། དུམནསྶ བྷཱཝོ དོམནསྶཾ། བྷུསོ ཨཱཡཱསོ ཨུཔཱཡཱསོ ། སམྦྷཝནྟཱིཏི ནིབྦཏྟནྟི། ན ཀེཝལཉྩ སོཀཱདཱིཧིཡེཝ, ཨཐ ཁོ སབྦཔདེཧི ‘‘སམྦྷཝནྟཱི’’ཏི པདསྶ ཡོཛནཱ ཀཱཏབྦཱ། ཨེཝཉྷི ‘‘ཨཝིཛྫཱཔཙྩཡཱ སངྑཱརཱ སམྦྷཝནྟཱི’’ཏི པཙྩཡཔཙྩཡུཔྤནྣཝཝཏྠཱནཾ དསྶིཏཾ ཧོཏི། ཨེས ནཡོ སབྦཏྠ།

    Tattha yadidanti nipāto, tassa yo ayanti attho. Avijjāpaccayātiādīsu avindiyaṃ kāyaduccaritādiṃ vindatīti avijjā, vindiyaṃ kāyasucaritādiṃ na vindatīti avijjā, dhammānaṃ aviparītasabhāvaṃ aviditaṃ karotīti avijjā, antavirahite saṃsāre bhavādīsu satte javāpetīti avijjā, avijjamānesu javati vijjamānesu na javatīti avijjā, vijjāya paṭipakkhāti avijjā, sā ‘‘dukkhe aññāṇa’’ntiādinā catubbidhā veditabbā. Paṭicca na vinā phalaṃ eti uppajjati ceva pavattati cāti paccayo, upakārakattho vā paccayo. Avijjā ca sā paccayo cāti avijjāpaccayo, tasmā avijjāpaccayā. Saṅkharontīti saṅkhārā, lokiyakusalākusalacetanā, sā puññāpuññāneñjābhisaṅkhāravasena tividhā veditabbā. Vijānātīti viññāṇaṃ, taṃ lokiyavipākaviññāṇavasena dvattiṃsavidhaṃ. Namatīti nāmaṃ, vedanādikkhandhattayaṃ. Ruppatīti rūpaṃ, bhūtarūpaṃ cakkhādiupādārūpañca. Āyatati āyatañca saṃsāradukkhaṃ nayatīti āyatanaṃ. Phusatīti phasso. Vedayatīti vedanā. Idampi dvayaṃ dvāravasena chabbidhaṃ, vipākavasena gahaṇe chattiṃsavidhaṃ. Paritassatīti taṇhā, sā kāmataṇhādivasena saṅkhepato tividhā, vitthārato aṭṭhuttarasatavidhā ca. Upādīyatīti upādānaṃ, taṃ kāmupādānādivasena catubbidhaṃ. Bhavati bhāvayati cāti bhavo, so kammūpapattibhedato duvidho. Jananaṃ jāti. Jīraṇaṃ jarā. Maranti tenāti maraṇaṃ. Socanaṃ soko. Paridevanaṃ paridevo. Dukkhayatīti dukkhaṃ, uppādaṭṭhitivasena dvedhā khaṇatīti dukkhaṃ. Dumanassa bhāvo domanassaṃ. Bhuso āyāso upāyāso. Sambhavantīti nibbattanti. Na kevalañca sokādīhiyeva, atha kho sabbapadehi ‘‘sambhavantī’’ti padassa yojanā kātabbā. Evañhi ‘‘avijjāpaccayā saṅkhārā sambhavantī’’ti paccayapaccayuppannavavatthānaṃ dassitaṃ hoti. Esa nayo sabbattha.

    ཏཏྠ ཨཉྙཱཎལཀྑཎཱ ཨཝིཛྫཱ, སམྨོཧནརསཱ, ཚཱདནཔཙྩུཔཊྛཱནཱ, ཨཱསཝཔདཊྛཱནཱ། ཨབྷིསངྑརཎལཀྑཎཱ སངྑཱརཱ, ཨཱཡཱུཧནརསཱ, སཾཝིདཧནཔཙྩུཔཊྛཱནཱ, ཨཝིཛྫཱཔདཊྛཱནཱ། ཝིཛཱནནལཀྑཎཾ ཝིཉྙཱཎཾ, པུབྦངྒམརསཾ, པཊིསནྡྷིཔཙྩུཔཊྛཱནཾ, སངྑཱརཔདཊྛཱནཾ, ཝཏྠཱརམྨཎཔདཊྛཱནཾ ཝཱ། ནམནལཀྑཎཾ ནཱམཾ, སམྤཡོགརསཾ, ཨཝིནིབྦྷོགཔཙྩུཔཊྛཱནཾ, ཝིཉྙཱཎཔདཊྛཱནཾ། རུཔྤནལཀྑཎཾ རཱུཔཾ, ཝིཀིརཎརསཾ, ཨཔྤཧེཡྻབྷཱཝཔཙྩུཔཊྛཱནཾ, ཝིཉྙཱཎཔདཊྛཱནཾ། ཨཱཡཏནལཀྑཎཾ སལཱ༹ཡཏནཾ, དསྶནཱདིརསཾ, ཝཏྠུདྭཱརབྷཱཝཔཙྩུཔཊྛཱནཾ, ནཱམརཱུཔཔདཊྛཱནཾ། ཕུསནལཀྑཎོ ཕསྶོ, སངྒྷཊྚནརསོ, སངྒཏིཔཙྩུཔཊྛཱནོ, སལཱ༹ཡཏནཔདཊྛཱནོ། ཨནུབྷཝནལཀྑཎཱ ཝེདནཱ, ཝིསཡརསསམྦྷོགརསཱ, སུཁདུཀྑཔཙྩུཔཊྛཱནཱ, ཕསྶཔདཊྛཱནཱ། ཧེཏུབྷཱཝལཀྑཎཱ ཏཎྷཱ, ཨབྷིནནྡནརསཱ, ཨཏིཏྟིབྷཱཝཔཙྩུཔཊྛཱནཱ, ཝེདནཱཔདཊྛཱནཱ། གཧཎལཀྑཎཾ ཨུཔཱདཱནཾ, ཨམུཉྩནརསཾ, ཏཎྷཱདལ༹ྷཏྟདིཊྛིཔཙྩུཔཊྛཱནཾ, ཏཎྷཱཔདཊྛཱནཾ། ཀམྨཀམྨཕལལཀྑཎོ བྷཝོ, བྷཝནབྷཱཝནརསོ, ཀུསལཱཀུསལཱབྱཱཀཏཔཙྩུཔཊྛཱནོ, ཨུཔཱདཱནཔདཊྛཱནོ། ཏཏྠ ཏཏྠ བྷཝེ པཋམཱབྷིནིབྦཏྟིལཀྑཎཱ ཛཱཏི, ནིཡྻཱཏནརསཱ, ཨཏཱིཏབྷཝཏོ ཨིདྷུཔྤནྣཔཙྩུཔཊྛཱནཱ, དུཀྑཝིཙིཏྟཏཱཔཙྩུཔཊྛཱནཱ ཝཱ། ཁནྡྷཔརིཔཱཀལཀྑཎཱ ཛརཱ, མརཎཱུཔནཡནརསཱ, ཡོབྦནཝིནཱསཔཙྩུཔཊྛཱནཱ། ཙུཏིལཀྑཎཾ མརཎཾ , ཝིསཾཡོགརསཾ, གཏིཝིཔྤཝཱསཔཙྩུཔཊྛཱནཾ། ཨནྟོནིཛ྄ཛྷཱནལཀྑཎོ སོཀོ, ཙེཏསོ ནིཛ྄ཛྷཱནརསོ, ཨནུསོཙནཔཙྩུཔཊྛཱནོ། ལཱལཔྤནལཀྑཎོ པརིདེཝོ, གུཎདོསཔརིཀིཏྟནརསོ, སམྦྷམཔཙྩུཔཊྛཱནོ། ཀཱཡཔཱིལ༹ནལཀྑཎཾ དུཀྑཾ, དུཔྤཉྙཱནཾ དོམནསྶཀརཎརསཾ, ཀཱཡིཀཱབཱདྷཔཙྩུཔཊྛཱནཾ། ཙིཏྟཔཱིལ༹ནལཀྑཎཾ དོམནསྶཾ, མནོཝིགྷཱཏནརསཾ, མཱནསབྱཱདྷིཔཙྩུཔཊྛཱནཾ། ཙིཏྟཔརིདཧནལཀྑཎོ ཨུཔཱཡཱསོ, ནིཏྠུནནརསོ, ཝིསཱདཔཙྩུཔཊྛཱནོ། ཨེཝམེཏེ ཨཝིཛྫཱདཡོ ལཀྑཎཱདིཏོཔི ཝེདིཏབྦཱཏི། ཨཡམེཏྠ སངྑེཔོ, ཝིཏྠཱརོ པན སབྦཱཀཱརསམྤནྣཾ ཝིནིཙྪཡཾ ཨིཙྪནྟེན སམྨོཧཝིནོདནིཡཱ (ཝིབྷ॰ ཨཊྛ॰ ༢༢༥) ཝིབྷངྒཊྛཀཐཱཡ གཧེཏབྦོ།

    Tattha aññāṇalakkhaṇā avijjā, sammohanarasā, chādanapaccupaṭṭhānā, āsavapadaṭṭhānā. Abhisaṅkharaṇalakkhaṇā saṅkhārā, āyūhanarasā, saṃvidahanapaccupaṭṭhānā, avijjāpadaṭṭhānā. Vijānanalakkhaṇaṃ viññāṇaṃ, pubbaṅgamarasaṃ, paṭisandhipaccupaṭṭhānaṃ, saṅkhārapadaṭṭhānaṃ, vatthārammaṇapadaṭṭhānaṃ vā. Namanalakkhaṇaṃ nāmaṃ, sampayogarasaṃ, avinibbhogapaccupaṭṭhānaṃ, viññāṇapadaṭṭhānaṃ. Ruppanalakkhaṇaṃ rūpaṃ, vikiraṇarasaṃ, appaheyyabhāvapaccupaṭṭhānaṃ, viññāṇapadaṭṭhānaṃ. Āyatanalakkhaṇaṃ saḷāyatanaṃ, dassanādirasaṃ, vatthudvārabhāvapaccupaṭṭhānaṃ, nāmarūpapadaṭṭhānaṃ. Phusanalakkhaṇo phasso, saṅghaṭṭanaraso, saṅgatipaccupaṭṭhāno, saḷāyatanapadaṭṭhāno. Anubhavanalakkhaṇā vedanā, visayarasasambhogarasā, sukhadukkhapaccupaṭṭhānā, phassapadaṭṭhānā. Hetubhāvalakkhaṇā taṇhā, abhinandanarasā, atittibhāvapaccupaṭṭhānā, vedanāpadaṭṭhānā. Gahaṇalakkhaṇaṃ upādānaṃ, amuñcanarasaṃ, taṇhādaḷhattadiṭṭhipaccupaṭṭhānaṃ, taṇhāpadaṭṭhānaṃ. Kammakammaphalalakkhaṇo bhavo, bhavanabhāvanaraso, kusalākusalābyākatapaccupaṭṭhāno, upādānapadaṭṭhāno. Tattha tattha bhave paṭhamābhinibbattilakkhaṇā jāti, niyyātanarasā, atītabhavato idhuppannapaccupaṭṭhānā, dukkhavicittatāpaccupaṭṭhānā vā. Khandhaparipākalakkhaṇā jarā, maraṇūpanayanarasā, yobbanavināsapaccupaṭṭhānā. Cutilakkhaṇaṃ maraṇaṃ , visaṃyogarasaṃ, gativippavāsapaccupaṭṭhānaṃ. Antonijjhānalakkhaṇo soko, cetaso nijjhānaraso, anusocanapaccupaṭṭhāno. Lālappanalakkhaṇo paridevo, guṇadosaparikittanaraso, sambhamapaccupaṭṭhāno. Kāyapīḷanalakkhaṇaṃ dukkhaṃ, duppaññānaṃ domanassakaraṇarasaṃ, kāyikābādhapaccupaṭṭhānaṃ. Cittapīḷanalakkhaṇaṃ domanassaṃ, manovighātanarasaṃ, mānasabyādhipaccupaṭṭhānaṃ. Cittaparidahanalakkhaṇo upāyāso, nitthunanaraso, visādapaccupaṭṭhāno. Evamete avijjādayo lakkhaṇāditopi veditabbāti. Ayamettha saṅkhepo, vitthāro pana sabbākārasampannaṃ vinicchayaṃ icchantena sammohavinodaniyā (vibha. aṭṭha. 225) vibhaṅgaṭṭhakathāya gahetabbo.

    ཨེཝནྟི ནིདྡིཊྛསྶ ནིདསྶནཾ, ཏེན ཨཝིཛྫཱདཱིཧེཝ ཀཱརཎེཧི, ན ཨིསྶརནིམྨཱནཱདཱིཧཱིཏི དསྶེཏི། ཨེཏསྶཱཏི ཡཐཱཝུཏྟསྶ། ཀེཝལསྶཱཏི ཨསམྨིསྶསྶ སཀལསྶ ཝཱ། དུཀྑཀྑནྡྷསྶཱཏི དུཀྑསམཱུཧསྶ, ན སཏྟསྶ, ནཱཔི ཛཱིཝསྶ, ནཱཔི སུབྷསུཁཱདཱིནཾ། སམུདཡོ ཧོཏཱིཏི ནིབྦཏྟི སམྦྷཝཏི།

    Evanti niddiṭṭhassa nidassanaṃ, tena avijjādīheva kāraṇehi, na issaranimmānādīhīti dasseti. Etassāti yathāvuttassa. Kevalassāti asammissassa sakalassa vā. Dukkhakkhandhassāti dukkhasamūhassa, na sattassa, nāpi jīvassa, nāpi subhasukhādīnaṃ. Samudayo hotīti nibbatti sambhavati.

    ཨེཏམཏྠཾ ཝིདིཏྭཱཏི ཡྭཱཡཾ ཨཝིཛྫཱདིཝསེན སངྑཱརཱདིཀསྶ དུཀྑཀྑནྡྷསྶ སམུདཡོ ཧོཏཱིཏི ཝུཏྟོ, སབྦཱཀཱརེན ཨེཏམཏྠཾ ཝིདིཏྭཱ། ཏཱཡཾ ཝེལཱཡནྟི ཏཱཡཾ ཏསྶ ཨཏྠསྶ ཝིདིཏཝེལཱཡཾ། ཨིམཾ ཨུདཱནཾ ཨུདཱནེསཱིཏི ཨིམཾ ཏསྨིཾ ཨཏྠེ ཝིདིཏེ ཧེཏུནོ ཙ ཧེཏུསམུཔྤནྣདྷམྨསྶ ཙ པཛཱནནཱཡ ཨཱནུབྷཱཝདཱིཔཀཾ ‘‘ཡདཱ ཧཝེ པཱཏུབྷཝནྟཱི’’ཏིཨཱདིཀཾ སོམནསྶསམྤཡུཏྟཉཱཎསམུཊྛཱནཾ ཨུདཱནཾ ཨུདཱནེསི, ཨཏྟམནཝཱཙཾ ནིཙྪཱརེསཱིཏི ཝུཏྟཾ ཧོཏི།

    Etamatthaṃviditvāti yvāyaṃ avijjādivasena saṅkhārādikassa dukkhakkhandhassa samudayo hotīti vutto, sabbākārena etamatthaṃ viditvā. Tāyaṃ velāyanti tāyaṃ tassa atthassa viditavelāyaṃ. Imaṃ udānaṃ udānesīti imaṃ tasmiṃ atthe vidite hetuno ca hetusamuppannadhammassa ca pajānanāya ānubhāvadīpakaṃ ‘‘yadā have pātubhavantī’’tiādikaṃ somanassasampayuttañāṇasamuṭṭhānaṃ udānaṃ udānesi, attamanavācaṃ nicchāresīti vuttaṃ hoti.

    ཏསྶཏྠོ – ཡདཱཏི ཡསྨིཾ ཀཱལེ། ཧཝེཏི བྱཏྟནྟི ཨིམསྨིཾ ཨཏྠེ ནིཔཱཏོ། ཀེཙི པན ‘‘ཧཝེཏི ཨཱཧཝེ ཡུདྡྷེ’’ཏི ཨཏྠཾ ཝདནྟི, ‘‘ཡོདྷེཐ མཱརཾ པཉྙཱཝུདྷེནཱ’’ཏི (དྷ॰ པ॰ ༤༠) ཝཙནཏོ ཀིལེསམཱརེན ཡུཛ྄ཛྷནསམཡེཏི ཏེསཾ ཨདྷིཔྤཱཡོ། པཱཏུབྷཝནྟཱིཏི ཨུཔྤཛྫནྟི། དྷམྨཱཏི ཨནུལོམཔཙྩཡཱཀཱརཔཊིཝེདྷསཱདྷཀཱ བོདྷིཔཀྑིཡདྷམྨཱ། ཨཐ ཝཱ པཱཏུབྷཝནྟཱིཏི པཀཱསེནྟི, ཨབྷིསམཡཝསེན བྱཏྟཱ པཱཀཊཱ ཧོནྟི། དྷམྨཱཏི ཙཏུཨརིཡསཙྩདྷམྨཱ, ཨཱཏཱཔོ ཝུཙྩཏི ཀིལེསསནྟཱཔནཊྛེན ཝཱིརིཡཾ། ཨཱཏཱཔིནོཏི སམྨཔྤདྷཱནཝཱིརིཡཝཏོ། ཛྷཱཡཏོཏི ཨཱརམྨཎཱུཔནིཛ྄ཛྷཱནེན ལཀྑཎཱུཔནིཛ྄ཛྷཱནེན ཛྷཱཡནྟསྶ། བྲཱཧྨཎསྶཱཏི བཱཧིཏཔཱཔསྶ ཁཱིཎཱསཝསྶ། ཨཐསྶ ཀངྑཱ ཝཔཡནྟི སབྦཱཏི ཨཐསྶ ཨེཝཾ པཱཏུབྷཱུཏདྷམྨསྶ ཡཱ ཨེཏཱ ‘‘ཀོ ནུ ཁོ, བྷནྟེ, ཕུསཏཱིཏི། ནོ ཀལློ པཉྷོཏི བྷགཝཱ ཨཝོཙཱ’’ཏིཨཱདིནཱ (སཾ॰ ནི॰ ༢.༡༢) ནཡེན, ‘‘ཀཏམཾ ནུ ཁོ, བྷནྟེ, ཛརཱམརཎཾ, ཀསྶ ཙ པནིདཾ ཛརཱམརཎནྟི། ནོ ཀལློ པཉྷོཏི བྷགཝཱ ཨཝོཙཱ’’ཏིཨཱདིནཱ (སཾ॰ ནི॰ ༢.༣༥) ནཡེན པཙྩཡཱཀཱརེ ཀངྑཱ ཝུཏྟཱ, ཡཱ ཙ པཙྩཡཱཀཱརསྶེཝ ཨཔྤཊིཝིདྡྷཏྟཱ ‘‘ཨཧོསིཾ ནུ ཁོ ཨཧཾ ཨཏཱིཏམདྡྷཱན’’ནྟིཨཱདིནཱ (མ॰ ནི॰ ༡.༡༨; སཾ॰ ནི॰ ༢.༢༠) སོལ༹ས ཀངྑཱ ཨཱགཏཱ། ཏཱ སབྦཱ ཝཔཡནྟི ཨཔགཙྪནྟི ནིརུཛ྄ཛྷནྟི། ཀསྨཱ? ཡཏོ པཛཱནཱཏི སཧེཏུདྷམྨཾ, ཡསྨཱ ཨཝིཛྫཱདིཀེན ཧེཏུནཱ སཧེཏུཀཾ ཨིམཾ སངྑཱརཱདིཀཾ ཀེཝལཾ དུཀྑཀྑནྡྷདྷམྨཾ པཛཱནཱཏི ཨཉྙཱསི པཊིཝིཛ྄ཛྷཱིཏི།

    Tassattho – yadāti yasmiṃ kāle. Haveti byattanti imasmiṃ atthe nipāto. Keci pana ‘‘haveti āhave yuddhe’’ti atthaṃ vadanti, ‘‘yodhetha māraṃ paññāvudhenā’’ti (dha. pa. 40) vacanato kilesamārena yujjhanasamayeti tesaṃ adhippāyo. Pātubhavantīti uppajjanti. Dhammāti anulomapaccayākārapaṭivedhasādhakā bodhipakkhiyadhammā. Atha vā pātubhavantīti pakāsenti, abhisamayavasena byattā pākaṭā honti. Dhammāti catuariyasaccadhammā, ātāpo vuccati kilesasantāpanaṭṭhena vīriyaṃ. Ātāpinoti sammappadhānavīriyavato. Jhāyatoti ārammaṇūpanijjhānena lakkhaṇūpanijjhānena jhāyantassa. Brāhmaṇassāti bāhitapāpassa khīṇāsavassa. Athassa kaṅkhā vapayanti sabbāti athassa evaṃ pātubhūtadhammassa yā etā ‘‘ko nu kho, bhante, phusatīti. No kallo pañhoti bhagavā avocā’’tiādinā (saṃ. ni. 2.12) nayena, ‘‘katamaṃ nu kho, bhante, jarāmaraṇaṃ, kassa ca panidaṃ jarāmaraṇanti. No kallo pañhoti bhagavā avocā’’tiādinā (saṃ. ni. 2.35) nayena paccayākāre kaṅkhā vuttā, yā ca paccayākārasseva appaṭividdhattā ‘‘ahosiṃ nu kho ahaṃ atītamaddhāna’’ntiādinā (ma. ni. 1.18; saṃ. ni. 2.20) soḷasa kaṅkhā āgatā. Tā sabbā vapayanti apagacchanti nirujjhanti. Kasmā? Yato pajānāti sahetudhammaṃ, yasmā avijjādikena hetunā sahetukaṃ imaṃ saṅkhārādikaṃ kevalaṃ dukkhakkhandhadhammaṃ pajānāti aññāsi paṭivijjhīti.

    ཀདཱ པནསྶ བོདྷིཔཀྑིཡདྷམྨཱ ཙཏུསཙྩདྷམྨཱ ཝཱ པཱཏུབྷཝནྟི ཨུཔྤཛྫནྟི པཀཱསེནྟི ཝཱ? ཝིཔསྶནཱམགྒཉཱཎེསུ ། ཏཏྠ ཝིཔསྶནཱཉཱཎསམྤཡུཏྟཱ སཏིཨཱདཡོ ཝིཔསྶནཱཉཱཎཉྩ ཡཐཱརཧཾ ཨཏྟནོ ཝིསཡེསུ ཏདངྒཔྤཧཱནཝསེན སུབྷསཉྙཱདིཀེ པཛཧནྟཱ ཀཱཡཱནུཔསྶནཱདིཝསེན ཝིསུཾ ཝིསུཾ ཨུཔྤཛྫནྟི, མགྒཀྑཎེ པན ཏེ ནིབྦཱནམཱལམྦིཏྭཱ སམུཙྪེདཝསེན པཊིཔཀྑེ པཛཧནྟཱ ཙཏཱུསུཔི ཨརིཡསཙྩེསུ ཨསམྨོཧཔྤཊིཝེདྷསཱདྷནཝསེན སཀིདེཝ ཨུཔྤཛྫནྟི། ཨེཝཾ ཏཱཝེཏྠ བོདྷིཔཀྑིཡདྷམྨཱནཾ ཨུཔྤཛྫནཊྛེན པཱཏུབྷཱཝོ ཝེདིཏབྦོ།

    Kadā panassa bodhipakkhiyadhammā catusaccadhammā vā pātubhavanti uppajjanti pakāsenti vā? Vipassanāmaggañāṇesu . Tattha vipassanāñāṇasampayuttā satiādayo vipassanāñāṇañca yathārahaṃ attano visayesu tadaṅgappahānavasena subhasaññādike pajahantā kāyānupassanādivasena visuṃ visuṃ uppajjanti, maggakkhaṇe pana te nibbānamālambitvā samucchedavasena paṭipakkhe pajahantā catūsupi ariyasaccesu asammohappaṭivedhasādhanavasena sakideva uppajjanti. Evaṃ tāvettha bodhipakkhiyadhammānaṃ uppajjanaṭṭhena pātubhāvo veditabbo.

    ཨརིཡསཙྩདྷམྨཱནཾ པན ལོཀིཡཱནཾ ཝིཔསྶནཱཀྑཎེ ཝིཔསྶནཱཡ ཨཱརམྨཎཀརཎཝསེན, ལོཀུཏྟརཱནཾ ཏདདྷིམུཏྟཏཱཝསེན, མགྒཀྑཎེ ནིརོདྷསཙྩསྶ ཨཱརམྨཎཱབྷིསམཡཝསེན, སབྦེསམྤི ཀིཙྩཱབྷིསམཡཝསེན པཱཀཊབྷཱཝཏོ པཀཱསནཊྛེན པཱཏུབྷཱཝོ ཝེདིཏབྦོ།

    Ariyasaccadhammānaṃ pana lokiyānaṃ vipassanākkhaṇe vipassanāya ārammaṇakaraṇavasena, lokuttarānaṃ tadadhimuttatāvasena, maggakkhaṇe nirodhasaccassa ārammaṇābhisamayavasena, sabbesampi kiccābhisamayavasena pākaṭabhāvato pakāsanaṭṭhena pātubhāvo veditabbo.

    ཨིཏི བྷགཝཱ སཏིཔི སབྦཱཀཱརེན སབྦདྷམྨཱནཾ ཨཏྟནོ ཉཱཎསྶ པཱཀཊབྷཱཝེ པཊིཙྩསམུཔྤཱདམུཁེན ཝིཔསྶནཱབྷིནིཝེསསྶ ཀཏཏྟཱ ནིཔུཎགམྦྷཱིརསུདུདྡསཏཱཡ པཙྩཡཱཀཱརསྶ ཏཾ པཙྩཝེཀྑིཏྭཱ ཨུཔྤནྣབལཝསོམནསྶོ པཊིཔཀྑསམུཙྪེདཝིབྷཱཝནེན སདྡྷིཾ ཨཏྟནོ ཏདབྷིསམཡཱནུབྷཱཝདཱིཔཀམེཝེཏྠ ཨུདཱནཾ ཨུདཱནེསཱིཏི།

    Iti bhagavā satipi sabbākārena sabbadhammānaṃ attano ñāṇassa pākaṭabhāve paṭiccasamuppādamukhena vipassanābhinivesassa katattā nipuṇagambhīrasududdasatāya paccayākārassa taṃ paccavekkhitvā uppannabalavasomanasso paṭipakkhasamucchedavibhāvanena saddhiṃ attano tadabhisamayānubhāvadīpakamevettha udānaṃ udānesīti.

    ཨཡམྤི ཨུདཱནོ ཝུཏྟོ བྷགཝཏཱ ཨིཏི མེ སུཏནྟི ཨཡཾ པཱལི༹ ཀེསུཙིཡེཝ པོཏྠཀེསུ དིསྶཏི། ཏཏྠ ཨཡམྤཱིཏི པིསདྡོ ‘‘ཨིདམྤི བུདྡྷེ རཏནཾ པཎཱིཏཾ, ཨཡམྤི པཱརཱཛིཀོ ཧོཏཱི’’ཏིཨཱདཱིསུ ཝིཡ སམྤིཎྜནཏྠོ, ཏེན ཨུཔརིམཾ སམྤིཎྜེཏི། ཝུཏྟོཏི ཨཡཾ ཝུཏྟསདྡོ ཀེསོཧཱརཎཝཔྤནཝཱཔསམཱིཀརཎཛཱིཝིཏཝུཏྟིཔམུཏྟབྷཱཝཔཱཝཙནབྷཱཝེན པཝཏྟན ཨཛ྄ཛྷེནཀཐནཱདཱིསུ དིསྶཏི། ཏཐཱ ཧེས ‘‘ཀཱཔཊིཀོ མཱཎཝོ དཧརོ ཝུཏྟསིརོ’’ཏིཨཱདཱིསུ (མ॰ ནི॰ ༢.༤༢༦) ཀེསོཧཱརཎེ ཨཱགཏོ།

    Ayampiudāno vutto bhagavatā iti me sutanti ayaṃ pāḷi kesuciyeva potthakesu dissati. Tattha ayampīti pisaddo ‘‘idampi buddhe ratanaṃ paṇītaṃ, ayampi pārājiko hotī’’tiādīsu viya sampiṇḍanattho, tena uparimaṃ sampiṇḍeti. Vuttoti ayaṃ vuttasaddo kesohāraṇavappanavāpasamīkaraṇajīvitavuttipamuttabhāvapāvacanabhāvena pavattana ajjhenakathanādīsu dissati. Tathā hesa ‘‘kāpaṭiko māṇavo daharo vuttasiro’’tiādīsu (ma. ni. 2.426) kesohāraṇe āgato.

    ‘‘གཱཝོ ཏསྶ པཛཱཡནྟི, ཁེཏྟེ ཝུཏྟཾ ཝིརཱུཧཏི།

    ‘‘Gāvo tassa pajāyanti, khette vuttaṃ virūhati;

    ཝུཏྟཱནཾ ཕལམསྣཱཏི, ཡོ མིཏྟཱནཾ ན དུབྦྷཏཱི’’ཏི༎ –

    Vuttānaṃ phalamasnāti, yo mittānaṃ na dubbhatī’’ti. –

    ཨཱདཱིསུ (ཛཱ॰ ༢.༢༢.༡༩) ཝཔྤནེ། ‘‘ནོ ཙ ཁོ པཊིཝུཏྟ’’ནྟིཨཱདཱིསུ (པཱརཱ॰ ༢༨༩) ཨཊྛདཎྜཀཱདཱིཧི ཝཱཔསམཱིཀརཎེ། ‘‘པནྣལོམོ པརདཏྟཝུཏྟོ མིགབྷཱུཏེན ཙེཏསཱ ཝིཧརཱམཱི’’ཏིཨཱདཱིསུ (ཙཱུལ༹ཝ॰ ༣༣༢) ཛཱིཝིཏཝུཏྟིཡཾ། ‘‘པཎྜུཔལཱསོ བནྡྷནཱ པཝུཏྟོ ཨབྷབྦོ ཧརིཏཏྟཱཡཱ’’ཏིཨཱདཱིསུ (པཱརཱ॰ ༩༢) བནྡྷནཏོ པམུཏྟབྷཱཝེ། ‘‘གཱིཏཾ ཝུཏྟཾ སམཱིཧིཏ’’ནྟིཨཱདཱིསུ (དཱི॰ ནི॰ ༡.༢༨༥) པཱཝཙནབྷཱཝེན པཝཏྟིཏེ། ‘‘ཝུཏྟོ པཱརཱཡཎོ’’ཏིཨཱདཱིསུ ཨཛ྄ཛྷེནེ། ‘‘ཝུཏྟཾ ཁོ པནེཏཾ བྷགཝཏཱ ‘དྷམྨདཱཡཱདཱ མེ, བྷིཀྑཝེ, བྷཝཐ, མཱ ཨཱམིསདཱཡཱདཱ’’’ཏིཨཱདཱིསུ (མ॰ ནི॰ ༡.༣༠) ཀཐནེ། ཨིདྷཱཔི ཀཐནེ ཨེཝ དཊྛབྦོ, ཏེན ཨཡམྤི ཨུདཱནོ བྷཱསིཏོཏི ཨཏྠོ། ཨིཏཱིཏི ཨེཝཾ། མེ སུཏནྟི པདདྭཡསྶ ཨཏྠོ ནིདཱནཝཎྞནཱཡཾ སབྦཱཀཱརཏོ ཝུཏྟོཡེཝ། པུབྦེ ‘‘ཨེཝཾ མེ སུཏ’’ནྟི ནིདཱནཝསེན ཝུཏྟོཡེཝ ཧི ཨཏྠོ ཨིདྷ ནིགམནཝསེན ‘‘ཨིཏི མེ སུཏ’’ནྟི པུན ཝུཏྟོ། ཝུཏྟསྶེཝ ཧི ཨཏྠསྶ པུན ཝཙནཾ ནིགམནནྟི། ཨིཏིསདྡསྶ ཨཏྠུདྡྷཱརོ ཨེཝཾ-སདྡེན སམཱནཏྠཏཱཡ ‘‘ཨེཝཾ མེ སུཏ’’ནྟི ཨེཏྠ ཝིཡ, ཨཏྠཡོཛནཱ ཙ ཨིཏིཝུཏྟཀཝཎྞནཱཡ ཨམྷེཧི པཀཱསིཏཱཡེཝཱཏི ཏཏྠ ཝུཏྟནཡེནེཝ ཝེདིཏབྦོཏི།

    Ādīsu (jā. 2.22.19) vappane. ‘‘No ca kho paṭivutta’’ntiādīsu (pārā. 289) aṭṭhadaṇḍakādīhi vāpasamīkaraṇe. ‘‘Pannalomo paradattavutto migabhūtena cetasā viharāmī’’tiādīsu (cūḷava. 332) jīvitavuttiyaṃ. ‘‘Paṇḍupalāso bandhanā pavutto abhabbo haritattāyā’’tiādīsu (pārā. 92) bandhanato pamuttabhāve. ‘‘Gītaṃ vuttaṃ samīhita’’ntiādīsu (dī. ni. 1.285) pāvacanabhāvena pavattite. ‘‘Vutto pārāyaṇo’’tiādīsu ajjhene. ‘‘Vuttaṃ kho panetaṃ bhagavatā ‘dhammadāyādā me, bhikkhave, bhavatha, mā āmisadāyādā’’’tiādīsu (ma. ni. 1.30) kathane. Idhāpi kathane eva daṭṭhabbo, tena ayampi udāno bhāsitoti attho. Itīti evaṃ. Me sutanti padadvayassa attho nidānavaṇṇanāyaṃ sabbākārato vuttoyeva. Pubbe ‘‘evaṃ me suta’’nti nidānavasena vuttoyeva hi attho idha nigamanavasena ‘‘iti me suta’’nti puna vutto. Vuttasseva hi atthassa puna vacanaṃ nigamananti. Itisaddassa atthuddhāro evaṃ-saddena samānatthatāya ‘‘evaṃ me suta’’nti ettha viya, atthayojanā ca itivuttakavaṇṇanāya amhehi pakāsitāyevāti tattha vuttanayeneva veditabboti.

    པརམཏྠདཱིཔནིཡཱ ཁུདྡཀནིཀཱཡཊྛཀཐཱཡ

    Paramatthadīpaniyā khuddakanikāyaṭṭhakathāya

    ཨུདཱནསཾཝཎྞནཱཔཋམབོདྷིསུཏྟཝཎྞནཱ ནིཊྛིཏཱ།

    Udānasaṃvaṇṇanāpaṭhamabodhisuttavaṇṇanā niṭṭhitā.




    Next: ༢. དུཏིཡབོདྷིསུཏྟཝཎྞནཱ • 2. Dutiyabodhisuttavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨུདཱནཔཱལི༹ • Udānapāḷi / ༡. པཋམབོདྷིསུཏྟཾ • 1. Paṭhamabodhisuttaṃ


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact