| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
(14) 4. රාජවග්‌ගො
(14) 4. Rājavaggo
1. පඨමචක්‌කානුවත්‌තනසුත්‌තං
1. Paṭhamacakkānuvattanasuttaṃ
‘‘කතමෙහි පඤ්‌චහි? ඉධ, භික්‌ඛවෙ, රාජා චක්‌කවත්‌තී අත්‌ථඤ්‌ඤූ ච හොති, ධම්‌මඤ්‌ඤූ ච, මත්‌තඤ්‌ඤූ ච, කාලඤ්‌ඤූ ච, පරිසඤ්‌ඤූ ච. ඉමෙහි ඛො, භික්‌ඛවෙ, පඤ්‌චහි අඞ්‌ගෙහි සමන්‌නාගතො රාජා චක්‌කවත්‌තී ධම්‌මෙනෙව චක්‌කං පවත්‌තෙති; තං හොති චක්‌කං අප්‌පටිවත්‌තියං කෙනචි මනුස්‌සභූතෙන පච්‌චත්‌ථිකෙන පාණිනා.
‘‘Katamehi pañcahi? Idha, bhikkhave, rājā cakkavattī atthaññū ca hoti, dhammaññū ca, mattaññū ca, kālaññū ca, parisaññū ca. Imehi kho, bhikkhave, pañcahi aṅgehi samannāgato rājā cakkavattī dhammeneva cakkaṃ pavatteti; taṃ hoti cakkaṃ appaṭivattiyaṃ kenaci manussabhūtena paccatthikena pāṇinā.
‘‘එවමෙවං ඛො, භික්‌ඛවෙ, පඤ්‌චහි ධම්‌මෙහි සමන්‌නාගතො තථාගතො අරහං සම්‌මාසම්‌බුද්‌ධො ධම්‌මෙනෙව අනුත්‌තරං ධම්‌මචක්‌කං පවත්‌තෙති; තං හොති චක්‌කං අප්‌පටිවත්‌තියං සමණෙන වා බ්‍රාහ්‌මණෙන වා දෙවෙන වා මාරෙන වා බ්‍රහ්‌මුනා වා කෙනචි වා ලොකස්‌මිං.
‘‘Evamevaṃ kho, bhikkhave, pañcahi dhammehi samannāgato tathāgato arahaṃ sammāsambuddho dhammeneva anuttaraṃ dhammacakkaṃ pavatteti; taṃ hoti cakkaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasmiṃ.
‘‘කතමෙහි පඤ්‌චහි? ඉධ, භික්‌ඛවෙ, තථාගතො අරහං සම්‌මාසම්‌බුද්‌ධො අත්‌ථඤ්‌ඤූ, ධම්‌මඤ්‌ඤූ, මත්‌තඤ්‌ඤූ, කාලඤ්‌ඤූ, පරිසඤ්‌ඤූ. ඉමෙහි ඛො, භික්‌ඛවෙ, පඤ්‌චහි ධම්‌මෙහි සමන්‌නාගතො තථාගතො අරහං සම්‌මාසම්‌බුද්‌ධො ධම්‌මෙනෙව අනුත්‌තරං ධම්‌මචක්‌කං පවත්‌තෙති; තං හොති ධම්‌මචක්‌කං අප්‌පටිවත්‌තියං සමණෙන වා බ්‍රාහ්‌මණෙන වා දෙවෙන වා මාරෙන වා බ්‍රහ්‌මුනා වා කෙනචි වා ලොකස්‌මි’’න්‌ති. පඨමං.
‘‘Katamehi pañcahi? Idha, bhikkhave, tathāgato arahaṃ sammāsambuddho atthaññū, dhammaññū, mattaññū, kālaññū, parisaññū. Imehi kho, bhikkhave, pañcahi dhammehi samannāgato tathāgato arahaṃ sammāsambuddho dhammeneva anuttaraṃ dhammacakkaṃ pavatteti; taṃ hoti dhammacakkaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasmi’’nti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1. පඨමචක්‌කානුවත්‌තනසුත්‌තවණ්‌ණනා • 1. Paṭhamacakkānuvattanasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. පඨමචක්‌කානුවත්‌තනසුත්‌තවණ්‌ණනා • 1. Paṭhamacakkānuvattanasuttavaṇṇanā
