| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(14) 4. ராஜவக்³கோ³
(14) 4. Rājavaggo
1. பட²மசக்கானுவத்தனஸுத்தவண்ணனா
1. Paṭhamacakkānuvattanasuttavaṇṇanā
131. சதுத்த²ஸ்ஸ பட²மே அத்த²ஞ்ஞூதி ஹிதஞ்ஞூ. ஹிதபரியாயோ ஹெத்த² அத்த²-ஸத்³தோ³ ‘‘அத்தத்தோ² பரத்தோ²’’திஆதீ³ஸு (மஹானி॰ 69; சூளனி॰ மோக⁴ராஜமாணவபுச்சா²னித்³தே³ஸோ 85; படி॰ ம॰ 3.5) விய. யஸ்மா சேஸ பரேஸங் ஹிதங் ஜானந்தோ தே அத்தனி ரஞ்ஜேதி, தஸ்மா வுத்தங் ‘‘ரஞ்ஜிதுங் ஜானாதீ’’தி. த³ண்டே³தி அபராதா⁴னுரூபே த³ண்ட³னே. ப³லம்ஹீதி ப³லகாயே. பஞ்ச அத்தே²தி அத்தத்தோ², பரத்தோ², உப⁴யத்தோ², தி³ட்ட²த⁴ம்மிகோ அத்தோ², ஸம்பராயிகோ அத்தோ²தி ஏவங் பஞ்சப்பபே⁴தே³ அத்தே². சத்தாரோ த⁴ம்மேதி சதுஸச்சத⁴ம்மே, காமரூபாரூபலோகுத்தரபே⁴தே³ வா சத்தாரோ த⁴ம்மே. படிக்³க³ஹணபரிபோ⁴க³மத்தஞ்ஞுதாய ஏவ பரியேஸனவிஸ்ஸஜ்ஜனமத்தஞ்ஞுதாபி போ³தி⁴தா ஹொந்தீதி ‘‘படிக்³க³ஹணபரிபோ⁴க³மத்தங் ஜானாதி’’இச்சேவ வுத்தங்.
131. Catutthassa paṭhame atthaññūti hitaññū. Hitapariyāyo hettha attha-saddo ‘‘attattho parattho’’tiādīsu (mahāni. 69; cūḷani. mogharājamāṇavapucchāniddeso 85; paṭi. ma. 3.5) viya. Yasmā cesa paresaṃ hitaṃ jānanto te attani rañjeti, tasmā vuttaṃ ‘‘rañjituṃ jānātī’’ti. Daṇḍeti aparādhānurūpe daṇḍane. Balamhīti balakāye. Pañca attheti attattho, parattho, ubhayattho, diṭṭhadhammiko attho, samparāyiko atthoti evaṃ pañcappabhede atthe. Cattāro dhammeti catusaccadhamme, kāmarūpārūpalokuttarabhede vā cattāro dhamme. Paṭiggahaṇaparibhogamattaññutāya eva pariyesanavissajjanamattaññutāpi bodhitā hontīti ‘‘paṭiggahaṇaparibhogamattaṃ jānāti’’icceva vuttaṃ.
உத்தரதி அதிக்கமதி, அபி⁴ப⁴வதீதி வா உத்தரங், நத்தி² எத்த² உத்தரந்தி அனுத்தரங். அனதிஸயங், அப்படிபா⁴க³ங் வா அனேகாஸு தே³வமனுஸ்ஸபரிஸாஸு அனேகஸதக்க²த்துங் தேஸங் அரியஸச்சப்படிவேத⁴ஸம்பாத³னவஸேன பவத்தா ப⁴க³வதோ த⁴ம்மதே³ஸனா த⁴ம்மசக்கங். அபிச ஸப்³ப³பட²மங் அஞ்ஞாதகொண்ட³ஞ்ஞப்பமுகா²ய அட்டா²ரஸபரிஸக³ணாய ப்³ரஹ்மகோடியா சதுஸச்சஸ்ஸ படிவேத⁴விதா⁴யினீ யா த⁴ம்மதே³ஸனா, தஸ்ஸா ஸாதிஸயா த⁴ம்மசக்கஸமஞ்ஞா. தத்த² ஸதிபட்டா²னாதித⁴ம்மோ ஏவ பவத்தனட்டே²ன சக்கந்தி த⁴ம்மசக்கங். சக்கந்தி வா ஆணா த⁴ம்மதோ அனபேதத்தா, த⁴ம்மஞ்ச தங் சக்கஞ்சாதி த⁴ம்மசக்கங். த⁴ம்மேன ஞாயேன சக்கந்திபி த⁴ம்மசக்கங். யதா²ஹ ‘‘த⁴ம்மஞ்ச பவத்தேதி சக்கஞ்சாதி த⁴ம்மசக்கங், சக்கஞ்ச பவத்தேதி த⁴ம்மஞ்சாதி த⁴ம்மசக்கங், த⁴ம்மேன பவத்தேதீதி த⁴ம்மசக்க’’ந்திஆதி³ (படி॰ ம॰ 2.40-41). அப்படிவத்தியந்தி த⁴ம்மிஸ்ஸரஸ்ஸ ப⁴க³வதோ ஸம்மாஸம்பு³த்³த⁴ஸ்ஸ த⁴ம்மசக்கஸ்ஸ அனுத்தரபா⁴வதோ அப்படிஸேத⁴னீயங். கேஹி பன அப்படிவத்தியந்தி ஆஹ – ‘‘ஸமணேன வா’’திஆதி³. தத்த² ஸமணேனாதி பப்³ப³ஜ்ஜங் உபக³தேன. ப்³ராஹ்மணேனாதி ஜாதிப்³ராஹ்மணேன. ஸாஸனபரமத்த²ஸமணப்³ராஹ்மணானஞ்ஹி படிலோமசித்தங்யேவ நத்தி². தே³வேனாதி காமாவசரதே³வேன. கேனசீதி யேன கேனசி அவஸிட்ட²பாரிஸஜ்ஜேன. எத்தாவதா அட்ட²ன்னம்பி பரிஸானங் அனவஸேஸபரியாதா³னங் த³ட்ட²ப்³ப³ங். லோகஸ்மிந்தி ஸத்தலோகே.
Uttarati atikkamati, abhibhavatīti vā uttaraṃ, natthi ettha uttaranti anuttaraṃ. Anatisayaṃ, appaṭibhāgaṃ vā anekāsu devamanussaparisāsu anekasatakkhattuṃ tesaṃ ariyasaccappaṭivedhasampādanavasena pavattā bhagavato dhammadesanā dhammacakkaṃ. Apica sabbapaṭhamaṃ aññātakoṇḍaññappamukhāya aṭṭhārasaparisagaṇāya brahmakoṭiyā catusaccassa paṭivedhavidhāyinī yā dhammadesanā, tassā sātisayā dhammacakkasamaññā. Tattha satipaṭṭhānātidhammo eva pavattanaṭṭhena cakkanti dhammacakkaṃ. Cakkanti vā āṇā dhammato anapetattā, dhammañca taṃ cakkañcāti dhammacakkaṃ. Dhammena ñāyena cakkantipi dhammacakkaṃ. Yathāha ‘‘dhammañca pavatteti cakkañcāti dhammacakkaṃ, cakkañca pavatteti dhammañcāti dhammacakkaṃ, dhammena pavattetīti dhammacakka’’ntiādi (paṭi. ma. 2.40-41). Appaṭivattiyanti dhammissarassa bhagavato sammāsambuddhassa dhammacakkassa anuttarabhāvato appaṭisedhanīyaṃ. Kehi pana appaṭivattiyanti āha – ‘‘samaṇena vā’’tiādi. Tattha samaṇenāti pabbajjaṃ upagatena. Brāhmaṇenāti jātibrāhmaṇena. Sāsanaparamatthasamaṇabrāhmaṇānañhi paṭilomacittaṃyeva natthi. Devenāti kāmāvacaradevena. Kenacīti yena kenaci avasiṭṭhapārisajjena. Ettāvatā aṭṭhannampi parisānaṃ anavasesapariyādānaṃ daṭṭhabbaṃ. Lokasminti sattaloke.
பட²மசக்கானுவத்தனஸுத்தவண்ணனா நிட்டி²தா.
Paṭhamacakkānuvattanasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. பட²மசக்கானுவத்தனஸுத்தங் • 1. Paṭhamacakkānuvattanasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. பட²மசக்கானுவத்தனஸுத்தவண்ணனா • 1. Paṭhamacakkānuvattanasuttavaṇṇanā
