| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
(၁၄) ၄. ရာဇဝဂ္ဂော
(14) 4. Rājavaggo
၁. ပဌမစက္ကာနုဝတ္တနသုတ္တဝဏ္ဏနာ
1. Paṭhamacakkānuvattanasuttavaṇṇanā
၁၃၁. စတုတ္ထသ္သ ပဌမေ ဓမ္မေနာတိ ဒသကုသလဓမ္မေန။ စက္ကန္တိ အာဏာစက္ကံ။ အတ္ထညူတိ ရဇ္ဇတ္ထံ ဇာနာတိ။ ဓမ္မညူတိ ပဝေဏိဓမ္မံ ဇာနာတိ။ မတ္တညူတိ ဒဏ္ဍေ ဝာ ဗလမ္ဟိ ဝာ ပမာဏံ ဇာနာတိ။ ကာလညူတိ ရဇ္ဇသုခာနုဘဝနကာလံ, ဝိနိစ္ဆယကရဏကာလံ, ဇနပဒစာရိကာကာလဉ္စ ဇာနာတိ။ ပရိသညူတိ အယံ ပရိသာ ခတ္တိယပရိသာ, အယံ ဗ္ရာဟ္မဏဝေသ္သသုဒ္ဒသမဏပရိသာတိ ဇာနာတိ။
131. Catutthassa paṭhame dhammenāti dasakusaladhammena. Cakkanti āṇācakkaṃ. Atthaññūti rajjatthaṃ jānāti. Dhammaññūti paveṇidhammaṃ jānāti. Mattaññūti daṇḍe vā balamhi vā pamāṇaṃ jānāti. Kālaññūti rajjasukhānubhavanakālaṃ, vinicchayakaraṇakālaṃ, janapadacārikākālañca jānāti. Parisaññūti ayaṃ parisā khattiyaparisā, ayaṃ brāhmaṇavessasuddasamaṇaparisāti jānāti.
တထာဂတဝာရေ အတ္ထညူတိ ပဉ္စ အတ္ထေ ဇာနာတိ။ ဓမ္မညူတိ စတ္တာရော ဓမ္မေ ဇာနာတိ။ မတ္တညူတိ စတူသု ပစ္စယေသု ပဋိဂ္ဂဟဏပရိဘောဂမတ္တံ ဇာနာတိ။ ကာလညူတိ အယံ ကာလော ပဋိသလ္လီနသ္သ, အယံ သမာပတ္တိယာ, အယံ ဓမ္မဒေသနာယ, အယံ ဇနပဒစာရိကာယာတိ ဧဝံ ကာလံ ဇာနာတိ။ ပရိသညူတိ အယံ ပရိသာ ခတ္တိယပရိသာ။ပေ.။ အယံ သမဏပရိသာတိ ဇာနာတိ။ အနုတ္တရန္တိ နဝဟိ လောကုတ္တရဓမ္မေဟိ အနုတ္တရံ။ ဓမ္မစက္ကန္တိ သေဋ္ဌစက္ကံ။
Tathāgatavāre atthaññūti pañca atthe jānāti. Dhammaññūti cattāro dhamme jānāti. Mattaññūti catūsu paccayesu paṭiggahaṇaparibhogamattaṃ jānāti. Kālaññūti ayaṃ kālo paṭisallīnassa, ayaṃ samāpattiyā, ayaṃ dhammadesanāya, ayaṃ janapadacārikāyāti evaṃ kālaṃ jānāti. Parisaññūti ayaṃ parisā khattiyaparisā…pe… ayaṃ samaṇaparisāti jānāti. Anuttaranti navahi lokuttaradhammehi anuttaraṃ. Dhammacakkanti seṭṭhacakkaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. ပဌမစက္ကာနုဝတ္တနသုတ္တံ • 1. Paṭhamacakkānuvattanasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. ပဌမစက္ကာနုဝတ္တနသုတ္တဝဏ္ဏနာ • 1. Paṭhamacakkānuvattanasuttavaṇṇanā
