| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(8) 3. யோதா⁴ஜீவவக்³கோ³
(8) 3. Yodhājīvavaggo
1-2. பட²மசேதோவிமுத்திப²லஸுத்தாதி³வண்ணனா
1-2. Paṭhamacetovimuttiphalasuttādivaṇṇanā
71-72. ததியஸ்ஸ பட²மே அவிஜ்ஜாபலிக⁴ந்தி எத்த² அவிஜ்ஜாதி வட்டமூலிகா அவிஜ்ஜா, அயங் பசுரஜனேஹி உக்கி²பிதுங் அஸக்குணெய்யபா⁴வதோ து³க்கி²பனட்டே²ன நிப்³பா³னத்³வாரப்பவேஸவிப³ந்த⁴னேன ச ‘‘பலிகோ⁴ வியாதி பலிகோ⁴’’தி வுச்சதி. தேனேஸ தஸ்ஸா உக்கி²த்தத்தா ‘‘உக்கி²த்தபலிகோ⁴’’தி வுத்தோ. புனப்³ப⁴வஸ்ஸ கரணஸீலோ, புனப்³ப⁴வங் வா ப²லங் அரஹதீதி போனோப⁴விகா, புனப்³ப⁴வதா³யிகாதி அத்தோ². ஜாதிஸங்ஸாரோதி ஜாயனவஸேன சேவ ஸங்ஸரணவஸேன ச ஏவங்லத்³த⁴னாமானங் புனப்³ப⁴வக்க²ந்தா⁴னங் பச்சயோ கம்மாபி⁴ஸங்கா²ரோ. ஜாதிஸங்ஸாரோதி ஹி ப²லூபசாரேன காரணங் வுத்தங். தஞ்ஹி புனப்புனங் உப்பத்திகாரணவஸேன பரிக்கி²பித்வா டி²தத்தா ‘‘பரிகா²’’தி வுச்சதி ஸந்தானஸ்ஸ பரிக்கி²பனதோ. தேனேஸ தஸ்ஸ ஸங்கிண்ணத்தா விகிண்ணத்தா ஸப்³ப³ஸோ கி²த்தத்தா வினாஸிதத்தா ‘‘ஸங்கிண்ணபரிகோ²’’தி வுத்தோ.
71-72. Tatiyassa paṭhame avijjāpalighanti ettha avijjāti vaṭṭamūlikā avijjā, ayaṃ pacurajanehi ukkhipituṃ asakkuṇeyyabhāvato dukkhipanaṭṭhena nibbānadvārappavesavibandhanena ca ‘‘paligho viyāti paligho’’ti vuccati. Tenesa tassā ukkhittattā ‘‘ukkhittapaligho’’ti vutto. Punabbhavassa karaṇasīlo, punabbhavaṃ vā phalaṃ arahatīti ponobhavikā, punabbhavadāyikāti attho. Jātisaṃsāroti jāyanavasena ceva saṃsaraṇavasena ca evaṃladdhanāmānaṃ punabbhavakkhandhānaṃ paccayo kammābhisaṅkhāro. Jātisaṃsāroti hi phalūpacārena kāraṇaṃ vuttaṃ. Tañhi punappunaṃ uppattikāraṇavasena parikkhipitvā ṭhitattā ‘‘parikhā’’ti vuccati santānassa parikkhipanato. Tenesa tassa saṃkiṇṇattā vikiṇṇattā sabbaso khittattā vināsitattā ‘‘saṃkiṇṇaparikho’’ti vutto.
தண்ஹாஸங்கா²தந்தி எத்த² தண்ஹாதி வட்டமூலிகா தண்ஹா. அயஞ்ஹி க³ம்பீ⁴ரானுக³தட்டே²ன ‘‘ஏஸிகா’’தி வுச்சதி. லுஞ்சித்வா உத்³த⁴ரித்வா. ஓரம்பா⁴கி³யானீதி ஓரம்பா⁴க³ஜனகானி காமப⁴வே உபபத்திபச்சயானி காமராக³ஸங்யோஜனாதீ³னி. ஏதானி ஹி கவாடங் விய நக³ரத்³வாரங் சித்தங் பித³ஹித்வா டி²தத்தா ‘‘அக்³க³ளா’’தி வுச்சந்தி. தேனேஸ தேஸங் நிக்³க³தத்தா பி⁴ன்னத்தா ‘‘நிரக்³க³ளோ’’தி வுத்தோதி. அக்³க³மக்³கே³ன பன்னோ அபசிதோ மானத்³த⁴ஜோ ஏதஸ்ஸாதி பன்னத்³த⁴ஜோ. பன்னபா⁴ரோதி க²ந்த⁴பா⁴ரகிலேஸபா⁴ரஅபி⁴ஸங்கா²ரபா⁴ரா ஓரோபிதா அஸ்ஸாதி பன்னபா⁴ரோ. விஸங்யுத்தோதி சதூஹி யோகே³ஹி ஸப்³ப³கிலேஸேஹி ச விஸங்யுத்தோ. அஸ்மிமானோதி ரூபே அஸ்மீதி மானோ, வேத³னாய, ஸஞ்ஞாய, ஸங்கா²ரேஸு, விஞ்ஞாணே அஸ்மிமானோ. எத்த² ஹி பஞ்சபி க²ந்தே⁴ அவிஸேஸதோ ‘‘அஸ்மீ’’தி க³ஹெத்வா பவத்தமானோ அஸ்மிமானோதி அதி⁴ப்பேதோ.
Taṇhāsaṅkhātanti ettha taṇhāti vaṭṭamūlikā taṇhā. Ayañhi gambhīrānugataṭṭhena ‘‘esikā’’ti vuccati. Luñcitvā uddharitvā. Orambhāgiyānīti orambhāgajanakāni kāmabhave upapattipaccayāni kāmarāgasaṃyojanādīni. Etāni hi kavāṭaṃ viya nagaradvāraṃ cittaṃ pidahitvā ṭhitattā ‘‘aggaḷā’’ti vuccanti. Tenesa tesaṃ niggatattā bhinnattā ‘‘niraggaḷo’’ti vuttoti. Aggamaggena panno apacito mānaddhajo etassāti pannaddhajo. Pannabhāroti khandhabhārakilesabhāraabhisaṅkhārabhārā oropitā assāti pannabhāro. Visaṃyuttoti catūhi yogehi sabbakilesehi ca visaṃyutto. Asmimānoti rūpe asmīti māno, vedanāya, saññāya, saṅkhāresu, viññāṇe asmimāno. Ettha hi pañcapi khandhe avisesato ‘‘asmī’’ti gahetvā pavattamāno asmimānoti adhippeto.
நக³ரத்³வாரஸ்ஸ பரிஸ்ஸயபடிபா³ஹனத்த²ஞ்சேவ ஸோத⁴னத்த²ஞ்ச உபோ⁴ஸு பஸ்ஸேஸு ஏஸிகாத²ம்பே⁴ நிக²ணித்வா ட²பேதீதி ஆஹ ‘‘நக³ரத்³வாரே உஸ்ஸாபிதே ஏஸிகாத²ம்பே⁴’’தி. பாகாரவித்³த⁴ங்ஸனேனேவ பரிகா²பூ⁴மிஸமகரணங் ஹோதீதி ஆஹ ‘‘பாகாரங் பி⁴ந்தி³த்வா பரிக²ங் விகிரித்வா’’தி. ‘‘ஏவ’’ந்திஆதி³ உபமாஸங்ஸந்த³னங். ஸந்தோ ஸங்விஜ்ஜமானோ காயோ த⁴ம்மஸமூஹோதி ஸக்காயோ, உபாதா³னக்க²ந்த⁴பஞ்சகங். த்³வத்திங்ஸகம்மகாரணா து³க்க²க்க²ந்தே⁴ ஆக³தது³க்கா²னி. அக்கி²ரோக³ஸீஸரோகா³த³யோ. அட்ட²னவுதி ரோகா³, ராஜப⁴யாதீ³னி பஞ்சவீஸதிமஹாப⁴யானி. து³தியங் உத்தானமேவ.
Nagaradvārassa parissayapaṭibāhanatthañceva sodhanatthañca ubhosu passesu esikāthambhe nikhaṇitvā ṭhapetīti āha ‘‘nagaradvāre ussāpite esikāthambhe’’ti. Pākāraviddhaṃsaneneva parikhābhūmisamakaraṇaṃ hotīti āha ‘‘pākāraṃ bhinditvā parikhaṃ vikiritvā’’ti. ‘‘Eva’’ntiādi upamāsaṃsandanaṃ. Santo saṃvijjamāno kāyo dhammasamūhoti sakkāyo, upādānakkhandhapañcakaṃ. Dvattiṃsakammakāraṇā dukkhakkhandhe āgatadukkhāni. Akkhirogasīsarogādayo. Aṭṭhanavuti rogā, rājabhayādīni pañcavīsatimahābhayāni. Dutiyaṃ uttānameva.
பட²மசேதோவிமுத்திப²லஸுத்தாதி³வண்ணனா நிட்டி²தா.
Paṭhamacetovimuttiphalasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. பட²மசேதோவிமுத்திப²லஸுத்தங் • 1. Paṭhamacetovimuttiphalasuttaṃ
2. து³தியசேதோவிமுத்திப²லஸுத்தங் • 2. Dutiyacetovimuttiphalasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
1. பட²மசேதோவிமுத்திப²லஸுத்தவண்ணனா • 1. Paṭhamacetovimuttiphalasuttavaṇṇanā
2. து³தியசேதோவிமுத்திப²லஸுத்தவண்ணனா • 2. Dutiyacetovimuttiphalasuttavaṇṇanā
