| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. பட²மசி²க்³க³ளயுக³ஸுத்தங்
7. Paṭhamachiggaḷayugasuttaṃ
1117. ‘‘ஸெய்யதா²பி, பி⁴க்க²வே, புரிஸோ மஹாஸமுத்³தே³ ஏகச்சி²க்³க³ளங் யுக³ங் பக்கி²பெய்ய. தத்ராபிஸ்ஸ காணோ கச்ச²போ. ஸோ வஸ்ஸஸதஸ்ஸ வஸ்ஸஸதஸ்ஸ அச்சயேன ஸகிங் ஸகிங் உம்முஜ்ஜெய்ய. தங் கிங் மஞ்ஞத², பி⁴க்க²வே, அபி நு கோ² காணோ கச்ச²போ வஸ்ஸஸதஸ்ஸ வஸ்ஸஸதஸ்ஸ அச்சயேன ஸகிங் ஸகிங் உம்முஜ்ஜந்தோ அமுஸ்மிங் ஏகச்சி²க்³க³ளே யுகே³ கீ³வங் பவேஸெய்யா’’தி? ‘‘யதி³ நூன, ப⁴ந்தே, கதா³சி கரஹசி தீ³க⁴ஸ்ஸ அத்³து⁴னோ அச்சயேனா’’தி.
1117. ‘‘Seyyathāpi, bhikkhave, puriso mahāsamudde ekacchiggaḷaṃ yugaṃ pakkhipeyya. Tatrāpissa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Yadi nūna, bhante, kadāci karahaci dīghassa addhuno accayenā’’ti.
‘‘கி²ப்பதரங் கோ² ஸோ, பி⁴க்க²வே, காணோ கச்ச²போ வஸ்ஸஸதஸ்ஸ வஸ்ஸஸதஸ்ஸ அச்சயேன ஸகிங் ஸகிங் உம்முஜ்ஜந்தோ அமுஸ்மிங் ஏகச்சி²க்³க³ளே யுகே³ கீ³வங் பவேஸெய்ய, ந த்வேவாஹங், பி⁴க்க²வே, ஸகிங் வினிபாதக³தேன பா³லேன 1 மனுஸ்ஸத்தங் வதா³மி’’.
‘‘Khippataraṃ kho so, bhikkhave, kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyya, na tvevāhaṃ, bhikkhave, sakiṃ vinipātagatena bālena 2 manussattaṃ vadāmi’’.
தங் கிஸ்ஸ ஹேது? ந ஹெத்த², பி⁴க்க²வே, அத்தி² த⁴ம்மசரியா, ஸமசரியா, குஸலகிரியா, புஞ்ஞகிரியா. அஞ்ஞமஞ்ஞகா²தி³கா எத்த², பி⁴க்க²வே, வத்ததி து³ப்³ப³லகா²தி³கா. தங் கிஸ்ஸ ஹேது? அதி³ட்ட²த்தா, பி⁴க்க²வே, சதுன்னங் அரியஸச்சானங். கதமேஸங் சதுன்னங்? து³க்க²ஸ்ஸ அரியஸச்சஸ்ஸ…பே॰… து³க்க²னிரோத⁴கா³மினியா படிபதா³ய அரியஸச்சஸ்ஸ.
Taṃ kissa hetu? Na hettha, bhikkhave, atthi dhammacariyā, samacariyā, kusalakiriyā, puññakiriyā. Aññamaññakhādikā ettha, bhikkhave, vattati dubbalakhādikā. Taṃ kissa hetu? Adiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. ஸத்தமங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. பட²மசி²க்³க³ளயுக³ஸுத்தவண்ணனா • 7. Paṭhamachiggaḷayugasuttavaṇṇanā
