| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. পঠমছিগ্গল়যুগসুত্তং
7. Paṭhamachiggaḷayugasuttaṃ
১১১৭. ‘‘সেয্যথাপি, ভিক্খৰে, পুরিসো মহাসমুদ্দে একচ্ছিগ্গল়ং যুগং পক্খিপেয্য। তত্রাপিস্স কাণো কচ্ছপো। সো ৰস্সসতস্স ৰস্সসতস্স অচ্চযেন সকিং সকিং উম্মুজ্জেয্য। তং কিং মঞ্ঞথ, ভিক্খৰে, অপি নু খো কাণো কচ্ছপো ৰস্সসতস্স ৰস্সসতস্স অচ্চযেন সকিং সকিং উম্মুজ্জন্তো অমুস্মিং একচ্ছিগ্গল়ে যুগে গীৰং পৰেসেয্যা’’তি? ‘‘যদি নূন, ভন্তে, কদাচি করহচি দীঘস্স অদ্ধুনো অচ্চযেনা’’তি।
1117. ‘‘Seyyathāpi, bhikkhave, puriso mahāsamudde ekacchiggaḷaṃ yugaṃ pakkhipeyya. Tatrāpissa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Yadi nūna, bhante, kadāci karahaci dīghassa addhuno accayenā’’ti.
‘‘খিপ্পতরং খো সো, ভিক্খৰে, কাণো কচ্ছপো ৰস্সসতস্স ৰস্সসতস্স অচ্চযেন সকিং সকিং উম্মুজ্জন্তো অমুস্মিং একচ্ছিগ্গল়ে যুগে গীৰং পৰেসেয্য, ন ত্ৰেৰাহং, ভিক্খৰে, সকিং ৰিনিপাতগতেন বালেন 1 মনুস্সত্তং ৰদামি’’।
‘‘Khippataraṃ kho so, bhikkhave, kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyya, na tvevāhaṃ, bhikkhave, sakiṃ vinipātagatena bālena 2 manussattaṃ vadāmi’’.
তং কিস্স হেতু? ন হেত্থ, ভিক্খৰে, অত্থি ধম্মচরিযা, সমচরিযা, কুসলকিরিযা, পুঞ্ঞকিরিযা। অঞ্ঞমঞ্ঞখাদিকা এত্থ, ভিক্খৰে, ৰত্ততি দুব্বলখাদিকা। তং কিস্স হেতু? অদিট্ঠত্তা, ভিক্খৰে, চতুন্নং অরিযসচ্চানং। কতমেসং চতুন্নং? দুক্খস্স অরিযসচ্চস্স…পে॰… দুক্খনিরোধগামিনিযা পটিপদায অরিযসচ্চস্স।
Taṃ kissa hetu? Na hettha, bhikkhave, atthi dhammacariyā, samacariyā, kusalakiriyā, puññakiriyā. Aññamaññakhādikā ettha, bhikkhave, vattati dubbalakhādikā. Taṃ kissa hetu? Adiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। সত্তমং।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. পঠমছিগ্গল়যুগসুত্তৰণ্ণনা • 7. Paṭhamachiggaḷayugasuttavaṇṇanā
