| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. පඨමඡිග්‌ගළයුගසුත්‌තං
7. Paṭhamachiggaḷayugasuttaṃ
1117. ‘‘සෙය්‍යථාපි, භික්‌ඛවෙ, පුරිසො මහාසමුද්‌දෙ එකච්‌ඡිග්‌ගළං යුගං පක්‌ඛිපෙය්‍ය. තත්‍රාපිස්‌ස කාණො කච්‌ඡපො. සො වස්‌සසතස්‌ස වස්‌සසතස්‌ස අච්‌චයෙන සකිං සකිං උම්‌මුජ්‌ජෙය්‍ය. තං කිං මඤ්‌ඤථ, භික්‌ඛවෙ, අපි නු ඛො කාණො කච්‌ඡපො වස්‌සසතස්‌ස වස්‌සසතස්‌ස අච්‌චයෙන සකිං සකිං උම්‌මුජ්‌ජන්‌තො අමුස්‌මිං එකච්‌ඡිග්‌ගළෙ යුගෙ ගීවං පවෙසෙය්‍යා’’ති? ‘‘යදි නූන, භන්‌තෙ, කදාචි කරහචි දීඝස්‌ස අද්‌ධුනො අච්‌චයෙනා’’ති.
1117. ‘‘Seyyathāpi, bhikkhave, puriso mahāsamudde ekacchiggaḷaṃ yugaṃ pakkhipeyya. Tatrāpissa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Yadi nūna, bhante, kadāci karahaci dīghassa addhuno accayenā’’ti.
‘‘ඛිප්‌පතරං ඛො සො, භික්‌ඛවෙ, කාණො කච්‌ඡපො වස්‌සසතස්‌ස වස්‌සසතස්‌ස අච්‌චයෙන සකිං සකිං උම්‌මුජ්‌ජන්‌තො අමුස්‌මිං එකච්‌ඡිග්‌ගළෙ යුගෙ ගීවං පවෙසෙය්‍ය, න ත්‌වෙවාහං, භික්‌ඛවෙ, සකිං විනිපාතගතෙන බාලෙන 1 මනුස්‌සත්‌තං වදාමි’’.
‘‘Khippataraṃ kho so, bhikkhave, kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyya, na tvevāhaṃ, bhikkhave, sakiṃ vinipātagatena bālena 2 manussattaṃ vadāmi’’.
තං කිස්‌ස හෙතු? න හෙත්‌ථ, භික්‌ඛවෙ, අත්‌ථි ධම්‌මචරියා, සමචරියා, කුසලකිරියා, පුඤ්‌ඤකිරියා. අඤ්‌ඤමඤ්‌ඤඛාදිකා එත්‌ථ, භික්‌ඛවෙ, වත්‌තති දුබ්‌බලඛාදිකා. තං කිස්‌ස හෙතු? අදිට්‌ඨත්‌තා, භික්‌ඛවෙ, චතුන්‌නං අරියසච්‌චානං. කතමෙසං චතුන්‌නං? දුක්‌ඛස්‌ස අරියසච්‌චස්‌ස…පෙ.… දුක්‌ඛනිරොධගාමිනියා පටිපදාය අරියසච්‌චස්‌ස.
Taṃ kissa hetu? Na hettha, bhikkhave, atthi dhammacariyā, samacariyā, kusalakiriyā, puññakiriyā. Aññamaññakhādikā ettha, bhikkhave, vattati dubbalakhādikā. Taṃ kissa hetu? Adiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘තස්‌මාතිහ, භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. සත්‌තමං.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Sattamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. පඨමඡිග්‌ගළයුගසුත්‌තවණ්‌ණනා • 7. Paṭhamachiggaḷayugasuttavaṇṇanā
