| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༧. པཋམཚིགྒལ༹ཡུགསུཏྟཾ
7. Paṭhamachiggaḷayugasuttaṃ
༡༡༡༧. ‘‘སེཡྻཐཱཔི, བྷིཀྑཝེ, པུརིསོ མཧཱསམུདྡེ ཨེཀཙྪིགྒལ༹ཾ ཡུགཾ པཀྑིཔེཡྻ། ཏཏྲཱཔིསྶ ཀཱཎོ ཀཙྪཔོ། སོ ཝསྶསཏསྶ ཝསྶསཏསྶ ཨཙྩཡེན སཀིཾ སཀིཾ ཨུམྨུཛྫེཡྻ། ཏཾ ཀིཾ མཉྙཐ, བྷིཀྑཝེ, ཨཔི ནུ ཁོ ཀཱཎོ ཀཙྪཔོ ཝསྶསཏསྶ ཝསྶསཏསྶ ཨཙྩཡེན སཀིཾ སཀིཾ ཨུམྨུཛྫནྟོ ཨམུསྨིཾ ཨེཀཙྪིགྒལེ༹ ཡུགེ གཱིཝཾ པཝེསེཡྻཱ’’ཏི? ‘‘ཡདི ནཱུན, བྷནྟེ, ཀདཱཙི ཀརཧཙི དཱིགྷསྶ ཨདྡྷུནོ ཨཙྩཡེནཱ’’ཏི།
1117. ‘‘Seyyathāpi, bhikkhave, puriso mahāsamudde ekacchiggaḷaṃ yugaṃ pakkhipeyya. Tatrāpissa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Yadi nūna, bhante, kadāci karahaci dīghassa addhuno accayenā’’ti.
‘‘ཁིཔྤཏརཾ ཁོ སོ, བྷིཀྑཝེ, ཀཱཎོ ཀཙྪཔོ ཝསྶསཏསྶ ཝསྶསཏསྶ ཨཙྩཡེན སཀིཾ སཀིཾ ཨུམྨུཛྫནྟོ ཨམུསྨིཾ ཨེཀཙྪིགྒལེ༹ ཡུགེ གཱིཝཾ པཝེསེཡྻ, ན ཏྭེཝཱཧཾ, བྷིཀྑཝེ, སཀིཾ ཝིནིཔཱཏགཏེན བཱལེན 1 མནུསྶཏྟཾ ཝདཱམི’’།
‘‘Khippataraṃ kho so, bhikkhave, kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyya, na tvevāhaṃ, bhikkhave, sakiṃ vinipātagatena bālena 2 manussattaṃ vadāmi’’.
ཏཾ ཀིསྶ ཧེཏུ? ན ཧེཏྠ, བྷིཀྑཝེ, ཨཏྠི དྷམྨཙརིཡཱ, སམཙརིཡཱ, ཀུསལཀིརིཡཱ, པུཉྙཀིརིཡཱ། ཨཉྙམཉྙཁཱདིཀཱ ཨེཏྠ, བྷིཀྑཝེ, ཝཏྟཏི དུབྦལཁཱདིཀཱ། ཏཾ ཀིསྶ ཧེཏུ? ཨདིཊྛཏྟཱ, བྷིཀྑཝེ, ཙཏུནྣཾ ཨརིཡསཙྩཱནཾ། ཀཏམེསཾ ཙཏུནྣཾ? དུཀྑསྶ ཨརིཡསཙྩསྶ…པེ॰… དུཀྑནིརོདྷགཱམིནིཡཱ པཊིཔདཱཡ ཨརིཡསཙྩསྶ།
Taṃ kissa hetu? Na hettha, bhikkhave, atthi dhammacariyā, samacariyā, kusalakiriyā, puññakiriyā. Aññamaññakhādikā ettha, bhikkhave, vattati dubbalakhādikā. Taṃ kissa hetu? Adiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘ཏསྨཱཏིཧ, བྷིཀྑཝེ, ‘ཨིདཾ དུཀྑ’ནྟི ཡོགོ ཀརཎཱིཡོ…པེ॰… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡོགོ ཀརཎཱིཡོ’’ཏི། སཏྟམཾ།
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Sattamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༧. པཋམཚིགྒལ༹ཡུགསུཏྟཝཎྞནཱ • 7. Paṭhamachiggaḷayugasuttavaṇṇanā
