| Library / Tipiṭaka / திபிடக • Tipiṭaka / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā |
அகுஸலபத³ங்
Akusalapadaṃ
த⁴ம்முத்³தே³ஸவாரோ
Dhammuddesavāro
பட²மசித்தகதா²வண்ணனா
Paṭhamacittakathāvaṇṇanā
365. குஸலே வுத்தனயங் அனுக³ந்த்வா யதா²னுரூபங் வேதி³தப்³ப³தாய ‘‘வுத்தனயேனா’’தி ஆஹ. க³ந்தப்³பா³பா⁴வதோதி பு³ஜ்ஜி²தப்³பா³பா⁴வதோ. தி³ட்டி²யா க³தமத்தந்தி தி³ட்டி²யா க³திமத்தங் க³ஹணமத்தங். ஆஸன்னகாரணத்தா அயோனிஸோமனஸிகாரஸ்ஸ விஸுங் க³ஹணங் ஏகந்தகாரணத்தா ச. ஸதிஸங்வரோதி இத⁴ ஸீதாதீ³ஹி பு²ட்ட²ஸ்ஸ அப்பமஜ்ஜனங் க²மனங் த³ட்ட²ப்³ப³ங். பஹானஸங்வரோதி வீரியஸங்வரோ.
365. Kusale vuttanayaṃ anugantvā yathānurūpaṃ veditabbatāya ‘‘vuttanayenā’’ti āha. Gantabbābhāvatoti bujjhitabbābhāvato. Diṭṭhiyā gatamattanti diṭṭhiyā gatimattaṃ gahaṇamattaṃ. Āsannakāraṇattā ayonisomanasikārassa visuṃ gahaṇaṃ ekantakāraṇattā ca. Satisaṃvaroti idha sītādīhi phuṭṭhassa appamajjanaṃ khamanaṃ daṭṭhabbaṃ. Pahānasaṃvaroti vīriyasaṃvaro.
அஸ்ஸாத³த³ஸ்ஸனந்தி அஸ்ஸாத³தி³ட்டி². ப²லட்டே²ன பச்சுபட்டா²னேன அஸம்மாபடிபத்திபச்சுபட்டா²னோமோஹோ, ஸம்மாபடிபத்திபடிபக்க²பா⁴வக்³க³ஹணாகாரோ வா. ஸப்³ப³ஸ்ஸ லோப⁴ஸ்ஸ அபி⁴ஜ்ஜா²பா⁴வே ஸதிபி விஸேஸயுத்தாய அபி⁴ஜ்ஜா²ய கம்மபத²ப்பத்தாய இது⁴ப்பஜ்ஜமானாய லக்க²ணாதி³ங் த³ஸ்ஸேதுங் ‘‘ஸா பரஸம்பத்தீன’’ந்திஆதி³மாஹ. அத்தனோ பரிணாமனஸ்ஸ புரேசாரிகா தண்ஹாபி⁴ரதி அபி⁴ரதி.
Assādadassananti assādadiṭṭhi. Phalaṭṭhena paccupaṭṭhānena asammāpaṭipattipaccupaṭṭhānomoho, sammāpaṭipattipaṭipakkhabhāvaggahaṇākāro vā. Sabbassa lobhassa abhijjhābhāve satipi visesayuttāya abhijjhāya kammapathappattāya idhuppajjamānāya lakkhaṇādiṃ dassetuṃ ‘‘sā parasampattīna’’ntiādimāha. Attano pariṇāmanassa purecārikā taṇhābhirati abhirati.
அனுபபரிக்கா² மோஹோ. மோஹவஸேன ஹி தி³ட்டி²வஸேன வா அவத்து²ஸ்மிங் ஸானுனயோ அதி⁴மொக்கோ² உப்பஜ்ஜதீதி. அஸதியசித்தேதி அஹிரிகாதீ³ஹி ஆரக்க²ரஹிதசித்தே. ஸதிரஹிதத்தா ஸதிபடிபக்க²த்தா சாதி ஏதேன ஸதிரஹிதா ஸதிபடிபக்கா² ச அகுஸலா க²ந்தா⁴ ஏவ மிச்சா²ஸதீதி த³ஸ்ஸேதி. தே பன உபனாஹாதி³ப்பவத்தியங் சிரகதாதி³ஸல்லக்க²ணே படுஸஞ்ஞாஸம்பயுத்தா த³ட்ட²ப்³பா³. ஸத³ரதா²தி³பா⁴வோ அவிஸேஸேன கிலேஸஸம்பயோக³தோ வுத்தோ லஹுதாதி³ஏகந்தபடிபக்கா²னங் தி²னமித்³தா⁴தீ³னங் கேஸஞ்சி இத⁴ அபா⁴வா. அவூபஸமோதி அஸன்னிஸின்னஸப்³பா⁴வமாஹ. அனவட்டா²னரஸந்தி சலனகிச்சங். சேதஸோ அவூபஸமேதி நிப்பா²தே³தப்³பே³ பயோஜனே பு⁴ம்மங், அவூபஸமபச்சயபூ⁴தங் ஆரம்மணங் வா ‘‘அவூபஸமோ’’தி வுத்தங்.
Anupaparikkhā moho. Mohavasena hi diṭṭhivasena vā avatthusmiṃ sānunayo adhimokkho uppajjatīti. Asatiyacitteti ahirikādīhi ārakkharahitacitte. Satirahitattā satipaṭipakkhattā cāti etena satirahitā satipaṭipakkhā ca akusalā khandhā eva micchāsatīti dasseti. Te pana upanāhādippavattiyaṃ cirakatādisallakkhaṇe paṭusaññāsampayuttā daṭṭhabbā. Sadarathādibhāvo avisesena kilesasampayogato vutto lahutādiekantapaṭipakkhānaṃ thinamiddhādīnaṃ kesañci idha abhāvā. Avūpasamoti asannisinnasabbhāvamāha. Anavaṭṭhānarasanti calanakiccaṃ. Cetaso avūpasameti nipphādetabbe payojane bhummaṃ, avūpasamapaccayabhūtaṃ ārammaṇaṃ vā ‘‘avūpasamo’’ti vuttaṃ.
த⁴ம்முத்³தே³ஸவாரகதா²வண்ணனா நிட்டி²தா.
Dhammuddesavārakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / த்³வாத³ஸ அகுஸலானி • Dvādasa akusalāni
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā / பட²மசித்தங் • Paṭhamacittaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / பட²மசித்தவண்ணனா • Paṭhamacittavaṇṇanā
