| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
அகுஸலபத³ங்
Akusalapadaṃ
த⁴ம்முத்³தே³ஸவாரகதா²
Dhammuddesavārakathā
பட²மசித்தங்
Paṭhamacittaṃ
365. இதா³னி அகுஸலத⁴ம்மபத³ங் பா⁴ஜெத்வா த³ஸ்ஸேதுங் கதமே த⁴ம்மா அகுஸலாதிஆதி³ ஆரத்³த⁴ங். தத்த² த⁴ம்மவவத்தா²னாதி³வாரப்பபே⁴தோ³ ச ஹெட்டா² ஆக³தானங் பதா³னங் அத்த²வினிச்ச²யோ ச ஹெட்டா² வுத்தனயேனேவ வேதி³தப்³போ³. தத்த² தத்த² பன விஸேஸமத்தமேவ வண்ணயிஸ்ஸாம. தத்த² ஸமயவவத்தா²னே தாவ யஸ்மா, குஸலஸ்ஸ விய, அகுஸலஸ்ஸ பூ⁴மிபே⁴தோ³ நத்தி², தஸ்மா ஏகந்தங் காமாவசரம்பி ஸமானங் ஏதங் ‘காமாவசர’ந்தி ந வுத்தங். தி³ட்டி²க³தஸம்பயுத்தந்தி எத்த² தி³ட்டி² ஏவ தி³ட்டி²க³தங் ‘கூ³த²க³தங் முத்தக³த’ந்திஆதீ³னி (அ॰ நி॰ 9.11) விய. க³ந்தப்³பா³பா⁴வதோ வா தி³ட்டி²யா க³தமத்தமேவேதந்திபி தி³ட்டி²க³தங். தேன ஸம்பயுத்தங் தி³ட்டி²க³தஸம்பயுத்தங்.
365. Idāni akusaladhammapadaṃ bhājetvā dassetuṃ katame dhammā akusalātiādi āraddhaṃ. Tattha dhammavavatthānādivārappabhedo ca heṭṭhā āgatānaṃ padānaṃ atthavinicchayo ca heṭṭhā vuttanayeneva veditabbo. Tattha tattha pana visesamattameva vaṇṇayissāma. Tattha samayavavatthāne tāva yasmā, kusalassa viya, akusalassa bhūmibhedo natthi, tasmā ekantaṃ kāmāvacarampi samānaṃ etaṃ ‘kāmāvacara’nti na vuttaṃ. Diṭṭhigatasampayuttanti ettha diṭṭhi eva diṭṭhigataṃ ‘gūthagataṃ muttagata’ntiādīni (a. ni. 9.11) viya. Gantabbābhāvato vā diṭṭhiyā gatamattamevetantipi diṭṭhigataṃ. Tena sampayuttaṃ diṭṭhigatasampayuttaṃ.
தத்த² அஸத்³த⁴ம்மஸவனங், அகல்யாணமித்ததா, அரியானங் அத³ஸ்ஸனகாமதாதீ³னி அயோனிஸோ மனஸிகாரோதி ஏவமாதீ³ஹி காரணேஹி இமஸ்ஸ தி³ட்டி²க³தஸங்கா²தஸ்ஸ மிச்சா²த³ஸ்ஸனஸ்ஸ உப்பத்தி வேதி³தப்³பா³. யே ஹி ஏதே தி³ட்டி²வாத³படிஸங்யுத்தா அஸத்³த⁴ம்மா தேஸங் ப³ஹுமானபுப்³ப³ங்க³மேன அதிக்கந்தமஜ்ஜ²த்தேன உபபரிக்கா²ரஹிதேன ஸவனேன, யே ச தி³ட்டி²விபன்னா அகல்யாணமித்தா தங்ஸம்பவங்கதாஸங்கா²தாய அகல்யாணமித்ததாய, பு³த்³தா⁴தீ³னங் அரியானஞ்சேவ ஸப்புரிஸானஞ்ச அத³ஸ்ஸனகாமதாய சதுஸதிபட்டா²னாதி³பே⁴தே³ அரியத⁴ம்மே அகோவித³த்தேன பாதிமொக்க²ஸங்வரஇந்த்³ரியஸங்வரஸதிஸங்வரஞாணஸங்வரபஹானஸங்வரப்பபே⁴தே³ அரியத⁴ம்மே சேவ ஸப்புரிஸத⁴ம்மே ச ஸங்வரபே⁴த³ஸங்கா²தேன அவினயேன தேஹேவ காரணேஹி பரிபா⁴விதேன அயோனிஸோ மனஸிகாரேன கோதூஹலமங்க³லாதி³பஸுததாய ச ஏதங் உப்பஜ்ஜதீதி வேதி³தப்³ப³ங். அஸங்கா²ரபா⁴வோ பனஸ்ஸ சித்தஸ்ஸ ஹெட்டா² வுத்தனயேனேவ வேதி³தப்³போ³.
Tattha asaddhammasavanaṃ, akalyāṇamittatā, ariyānaṃ adassanakāmatādīni ayoniso manasikāroti evamādīhi kāraṇehi imassa diṭṭhigatasaṅkhātassa micchādassanassa uppatti veditabbā. Ye hi ete diṭṭhivādapaṭisaṃyuttā asaddhammā tesaṃ bahumānapubbaṅgamena atikkantamajjhattena upaparikkhārahitena savanena, ye ca diṭṭhivipannā akalyāṇamittā taṃsampavaṅkatāsaṅkhātāya akalyāṇamittatāya, buddhādīnaṃ ariyānañceva sappurisānañca adassanakāmatāya catusatipaṭṭhānādibhede ariyadhamme akovidattena pātimokkhasaṃvaraindriyasaṃvarasatisaṃvarañāṇasaṃvarapahānasaṃvarappabhede ariyadhamme ceva sappurisadhamme ca saṃvarabhedasaṅkhātena avinayena teheva kāraṇehi paribhāvitena ayoniso manasikārena kotūhalamaṅgalādipasutatāya ca etaṃ uppajjatīti veditabbaṃ. Asaṅkhārabhāvo panassa cittassa heṭṭhā vuttanayeneva veditabbo.
த⁴ம்முத்³தே³ஸவாரே ப²ஸ்ஸோதி அகுஸலசித்தஸஹஜாதோ ப²ஸ்ஸோ. வேத³னாதீ³ஸுபி ஏஸேவ நயோ. இதி அகுஸலமத்தமேவ ஏதேஸங் புரிமேஹி விஸேஸோ.
Dhammuddesavāre phassoti akusalacittasahajāto phasso. Vedanādīsupi eseva nayo. Iti akusalamattameva etesaṃ purimehi viseso.
சித்தஸ்ஸேகக்³க³தா ஹோதீதி பாணாதிபாதாதீ³ஸுபி அவிக்கி²த்தபா⁴வேன சித்தஸ்ஸ ஏகக்³க³தா ஹோதி. மனுஸ்ஸா ஹி சித்தங் ஸமாத³ஹித்வா அவிக்கி²த்தா ஹுத்வா அவிரஜ்ஜ²மானானி ஸத்தா²னி பாணஸரீரேஸு நிபாதெந்தி, ஸுஸமாஹிதா பரேஸங் ஸந்தகங் ஹரந்தி, ஏகரஸேன சித்தேன மிச்சா²சாரங் ஆபஜ்ஜந்தி. ஏவங் அகுஸலப்பவத்தியம்பி சித்தஸ்ஸ ஏகக்³க³தா ஹோதி.
Cittassekaggatā hotīti pāṇātipātādīsupi avikkhittabhāvena cittassa ekaggatā hoti. Manussā hi cittaṃ samādahitvā avikkhittā hutvā avirajjhamānāni satthāni pāṇasarīresu nipātenti, susamāhitā paresaṃ santakaṃ haranti, ekarasena cittena micchācāraṃ āpajjanti. Evaṃ akusalappavattiyampi cittassa ekaggatā hoti.
மிச்சா²தி³ட்டீ²தி அயாதா²வதி³ட்டி², விரஜ்ஜி²த்வா க³ஹணதோ வா விததா² தி³ட்டி² மிச்சா²தி³ட்டி². அனத்தா²வஹத்தா பண்டி³தேஹி ஜிகு³ச்சி²தா தி³ட்டீ²திபி மிச்சா²தி³ட்டி². மிச்சா²ஸங்கப்பாதீ³ஸுபி ஏஸேவ நயோ. அபிச மிச்சா² பஸ்ஸந்தி தாய, ஸயங் வா மிச்சா² பஸ்ஸதி, மிச்சா²த³ஸ்ஸனமத்தமேவ வா ஏஸாதி மிச்சா²தி³ட்டி². ஸா அயோனிஸோ அபி⁴னிவேஸலக்க²ணா, பராமாஸரஸா, மிச்சா²பி⁴னிவேஸபச்சுபட்டா²னா, அரியானங் அத³ஸ்ஸனகாமதாதி³பத³ட்டா²னா; பரமங் வஜ்ஜந்தி த³ட்ட²ப்³பா³. மிச்சா²ஸங்கப்பாதீ³ஸு ‘மிச்சா²’தி பத³மத்தமேவ விஸேஸோ. ஸேஸங் குஸலாதி⁴காரே வுத்தனயேனேவ வேதி³தப்³ப³ங்.
Micchādiṭṭhīti ayāthāvadiṭṭhi, virajjhitvā gahaṇato vā vitathā diṭṭhi micchādiṭṭhi. Anatthāvahattā paṇḍitehi jigucchitā diṭṭhītipi micchādiṭṭhi. Micchāsaṅkappādīsupi eseva nayo. Apica micchā passanti tāya, sayaṃ vā micchā passati, micchādassanamattameva vā esāti micchādiṭṭhi. Sā ayoniso abhinivesalakkhaṇā, parāmāsarasā, micchābhinivesapaccupaṭṭhānā, ariyānaṃ adassanakāmatādipadaṭṭhānā; paramaṃ vajjanti daṭṭhabbā. Micchāsaṅkappādīsu ‘micchā’ti padamattameva viseso. Sesaṃ kusalādhikāre vuttanayeneva veditabbaṃ.
அஹிரிகப³லங் அனொத்தப்பப³லந்தி எத்த² ப³லத்தோ² நித்³தே³ஸவாரே ஆவி ப⁴விஸ்ஸதி. இதரேஸு பன – ந ஹிரியதீதி அஹிரிகோ. அஹிரிகஸ்ஸ பா⁴வோ அஹிரிகங். ந ஒத்தப்பங் அனொத்தப்பங். தேஸு அஹிரிகங் காயது³ச்சரிதாதீ³ஹி அஜிகு³ச்ச²னலக்க²ணங், அலஜ்ஜாலக்க²ணங் வா. அனொத்தப்பங் தேஹேவ அஸாரஜ்ஜனலக்க²ணங் அனுத்தாஸனலக்க²ணங் வா. அஹிரிகமேவ ப³லங் அஹிரிகப³லங். அனொத்தப்பமேவ ப³லங் அனொத்தப்பப³லங். அயமெத்த² ஸங்கே²பத்தோ². வித்தா²ரோ பன ஹெட்டா² வுத்தபடிபக்க²வஸேன வேதி³தப்³போ³.
Ahirikabalaṃanottappabalanti ettha balattho niddesavāre āvi bhavissati. Itaresu pana – na hiriyatīti ahiriko. Ahirikassa bhāvo ahirikaṃ. Na ottappaṃ anottappaṃ. Tesu ahirikaṃ kāyaduccaritādīhi ajigucchanalakkhaṇaṃ, alajjālakkhaṇaṃ vā. Anottappaṃ teheva asārajjanalakkhaṇaṃ anuttāsanalakkhaṇaṃ vā. Ahirikameva balaṃ ahirikabalaṃ. Anottappameva balaṃ anottappabalaṃ. Ayamettha saṅkhepattho. Vitthāro pana heṭṭhā vuttapaṭipakkhavasena veditabbo.
லுப்³ப⁴ந்தி தேன, ஸயங் வா லுப்³ப⁴தி, லுப்³ப⁴னமத்தமேவ வா தந்தி லோபோ⁴. முய்ஹந்தி தேன, ஸயங் வா முய்ஹதி, முய்ஹனமத்தமேவ வா தந்தி மோஹோ. தேஸு லோபோ⁴ ஆரம்மணக்³க³ஹணலக்க²ணோ மக்கடாலேபோ விய, அபி⁴ஸங்க³ரஸோ தத்தகபாலே கி²த்தமங்ஸபேஸி விய, அபரிச்சாக³பச்சுபட்டா²னோ தேலஞ்ஜனராகோ³ விய, ஸங்யோஜனியத⁴ம்மேஸு அஸ்ஸாத³த³ஸ்ஸனபத³ட்டா²னோ. ஸோ தண்ஹானதீ³பா⁴வேன வட்³ட⁴மானோ, ஸீக⁴ஸோதா நதீ³ விய மஹாஸமுத்³த³ங், அபாயமேவ க³ஹெத்வா க³ச்ச²தீதி த³ட்ட²ப்³போ³.
Lubbhanti tena, sayaṃ vā lubbhati, lubbhanamattameva vā tanti lobho. Muyhanti tena, sayaṃ vā muyhati, muyhanamattameva vā tanti moho. Tesu lobho ārammaṇaggahaṇalakkhaṇo makkaṭālepo viya, abhisaṅgaraso tattakapāle khittamaṃsapesi viya, apariccāgapaccupaṭṭhāno telañjanarāgo viya, saṃyojaniyadhammesu assādadassanapadaṭṭhāno. So taṇhānadībhāvena vaḍḍhamāno, sīghasotā nadī viya mahāsamuddaṃ, apāyameva gahetvā gacchatīti daṭṭhabbo.
மோஹோ சித்தஸ்ஸ அந்த⁴பா⁴வலக்க²ணோ அஞ்ஞாணலக்க²ணோ வா, அஸம்படிவேத⁴ரஸோ ஆரம்மணஸபா⁴வச்சா²த³னரஸோ வா, அஸம்மாபடிபத்திபச்சுபட்டா²னோ அந்த⁴காரபச்சுபட்டா²னோ வா, அயோனிஸோமனஸிகாரபத³ட்டா²னோ. ஸப்³பா³குஸலானங் மூலந்தி த³ட்ட²ப்³போ³.
Moho cittassa andhabhāvalakkhaṇo aññāṇalakkhaṇo vā, asampaṭivedharaso ārammaṇasabhāvacchādanaraso vā, asammāpaṭipattipaccupaṭṭhāno andhakārapaccupaṭṭhāno vā, ayonisomanasikārapadaṭṭhāno. Sabbākusalānaṃ mūlanti daṭṭhabbo.
அபி⁴ஜ்ஜா²யந்தி தாய, ஸயங் வா அபி⁴ஜ்ஜா²யதி, அபி⁴ஜ்ஜா²யனமத்தமேவ வா ஏஸாதி அபி⁴ஜ்ஜா². ஸா பரஸம்பத்தீனங் ஸககரணஇச்சா²லக்க²ணா, தேனாகாரேன ஏஸனபா⁴வரஸா, பரஸம்பத்தி-அபி⁴முக²பா⁴வபச்சுபட்டா²னா, பரஸம்பத்தீஸு அபி⁴ரதிபத³ட்டா²னா. பரஸம்பத்திஅபி⁴முகா² ஏவ ஹி ஸா உபட்ட²ஹதி. தாஸு ச அபி⁴ரதியா ஸதி பவத்ததி, பரஸம்பத்தீஸு சேதஸோ ஹத்த²ப்பஸாரோவியாதி த³ட்ட²ப்³பா³.
Abhijjhāyanti tāya, sayaṃ vā abhijjhāyati, abhijjhāyanamattameva vā esāti abhijjhā. Sā parasampattīnaṃ sakakaraṇaicchālakkhaṇā, tenākārena esanabhāvarasā, parasampatti-abhimukhabhāvapaccupaṭṭhānā, parasampattīsu abhiratipadaṭṭhānā. Parasampattiabhimukhā eva hi sā upaṭṭhahati. Tāsu ca abhiratiyā sati pavattati, parasampattīsu cetaso hatthappasāroviyāti daṭṭhabbā.
ஸமதோ² ஹோதீதிஆதீ³ஸு அஞ்ஞேஸு கிச்சேஸு விக்கே²பஸமனதோ ஸமதோ². அகுஸலப்பவத்தியங் சித்தங் பக்³க³ண்ஹாதீதி பக்³கா³ஹோ. ந விக்கி²பதீதி அவிக்கே²போ.
Samatho hotītiādīsu aññesu kiccesu vikkhepasamanato samatho. Akusalappavattiyaṃ cittaṃ paggaṇhātīti paggāho. Na vikkhipatīti avikkhepo.
இமஸ்மிங் சித்தே ஸத்³தா⁴, ஸதி, பஞ்ஞா, ச² யுக³ளகானீதி இமே த⁴ம்மா ந க³ஹிதா. கஸ்மா? அஸ்ஸத்³தி⁴யசித்தே பஸாதோ³ நாம நத்தி². தஸ்மா தாவ ஸத்³தா⁴ ந க³ஹிதா. கிங் பன தி³ட்டி²க³திகா அத்தனோ அத்தனோ ஸத்தா²ரானங் ந ஸத்³த³ஹந்தீதி? ஸத்³த³ஹந்தி. ஸா பன ஸத்³தா⁴ நாம ந ஹோதி, வசனஸம்படிச்ச²னமத்தமேவேதங். அத்த²தோ அனுபபரிக்கா² வா ஹோதி, தி³ட்டி² வா. அஸதியசித்தே பன ஸதி நத்தீ²தி ந க³ஹிதா. கிங் தி³ட்டி²க³திகா அத்தனா கதகம்மங் ந ஸரந்தீதி? ஸரந்தி. ஸா பன ஸதி நாம ந ஹோதி. கேவலங் தேனாகாரேன அகுஸலசித்தப்பவத்தி. தஸ்மா ஸதி ந க³ஹிதா. அத² கஸ்மா ‘‘மிச்சா²ஸதீ’’தி (தீ³॰ நி॰ 3.333; ஸங்॰ நி॰ 5.1) ஸுத்தந்தே வுத்தா? ஸா பன அகுஸலக்க²ந்தா⁴னங் ஸதிவிரஹிதத்தா ஸதிபடிபக்க²த்தா ச மிச்சா²மக்³க³மிச்ச²த்தானங் பூரணத்த²ங் தத்த² பரியாயேன தே³ஸனா கதா. நிப்பரியாயேன பனேஸா நத்தி². தஸ்மா ந க³ஹிதா. அந்த⁴பா³லசித்தே பன பஞ்ஞா நத்தீ²தி ந க³ஹிதா. கிங் தி³ட்டி²க³திகானங் வஞ்சனாபஞ்ஞா நத்தீ²தி? அத்தி². ந பனேஸா பஞ்ஞா, மாயா நாமேஸா ஹோதி. ஸா அத்த²தோ தண்ஹாவ. இத³ங் பன சித்தங் ஸத³ரத²ங் க³ருகங் பா⁴ரியங் கக்க²ளங் த²த்³த⁴ங் அகம்மஞ்ஞங் கி³லானங் வங்கங் குடிலங். தஸ்மா பஸ்ஸத்³தா⁴தீ³னி ச² யுக³ளகானி ந க³ஹிதானி.
Imasmiṃ citte saddhā, sati, paññā, cha yugaḷakānīti ime dhammā na gahitā. Kasmā? Assaddhiyacitte pasādo nāma natthi. Tasmā tāva saddhā na gahitā. Kiṃ pana diṭṭhigatikā attano attano satthārānaṃ na saddahantīti? Saddahanti. Sā pana saddhā nāma na hoti, vacanasampaṭicchanamattamevetaṃ. Atthato anupaparikkhā vā hoti, diṭṭhi vā. Asatiyacitte pana sati natthīti na gahitā. Kiṃ diṭṭhigatikā attanā katakammaṃ na sarantīti? Saranti. Sā pana sati nāma na hoti. Kevalaṃ tenākārena akusalacittappavatti. Tasmā sati na gahitā. Atha kasmā ‘‘micchāsatī’’ti (dī. ni. 3.333; saṃ. ni. 5.1) suttante vuttā? Sā pana akusalakkhandhānaṃ sativirahitattā satipaṭipakkhattā ca micchāmaggamicchattānaṃ pūraṇatthaṃ tattha pariyāyena desanā katā. Nippariyāyena panesā natthi. Tasmā na gahitā. Andhabālacitte pana paññā natthīti na gahitā. Kiṃ diṭṭhigatikānaṃ vañcanāpaññā natthīti? Atthi. Na panesā paññā, māyā nāmesā hoti. Sā atthato taṇhāva. Idaṃ pana cittaṃ sadarathaṃ garukaṃ bhāriyaṃ kakkhaḷaṃ thaddhaṃ akammaññaṃ gilānaṃ vaṅkaṃ kuṭilaṃ. Tasmā passaddhādīni cha yugaḷakāni na gahitāni.
எத்தாவதா பத³படிபாடியா சித்தங்க³வஸேன பாளிஆருள்ஹானி த்³வத்திங்ஸ பதா³னி த³ஸ்ஸெத்வா இதா³னி யேவாபனகத⁴ம்மே த³ஸ்ஸேதுங் யே வா பன தஸ்மிங் ஸமயேதிஆதி³மாஹ. தத்த² ஸப்³பே³ஸுபி அகுஸலசித்தேஸு ச²ந்தோ³ அதி⁴மொக்கோ² மனஸிகாரோ மானோ இஸ்ஸா மச்ச²ரியங் தி²னங் மித்³த⁴ங் உத்³த⁴ச்சங் குக்குச்சந்தி இமே த³ஸேவ யேவாபனகா ஹொந்தி த⁴ம்மா, ஸுத்தாக³தா, ஸுத்தபதே³ஸு தி³ஸ்ஸரேதி வுத்தா. இமஸ்மிங் பன சித்தே ச²ந்தோ³ அதி⁴மொக்கோ² மனஸிகாரோ உத்³த⁴ச்சந்தி இமே அபண்ணகங்க³ஸங்கா²தா சத்தாரோவ யேவாபனகா ஹொந்தி.
Ettāvatā padapaṭipāṭiyā cittaṅgavasena pāḷiāruḷhāni dvattiṃsa padāni dassetvā idāni yevāpanakadhamme dassetuṃ ye vā pana tasmiṃ samayetiādimāha. Tattha sabbesupi akusalacittesu chando adhimokkho manasikāro māno issā macchariyaṃ thinaṃ middhaṃ uddhaccaṃ kukkuccanti ime daseva yevāpanakā honti dhammā, suttāgatā, suttapadesu dissareti vuttā. Imasmiṃ pana citte chando adhimokkho manasikāro uddhaccanti ime apaṇṇakaṅgasaṅkhātā cattārova yevāpanakā honti.
தத்த² ச²ந்தா³த³யோ ஹெட்டா² வுத்தனயேனேவ வேதி³தப்³பா³. கேவலஞ்ஹி தே குஸலா, இமே அகுஸலா. இதரங் பன உத்³த⁴தஸ்ஸ பா⁴வோ ‘உத்³த⁴ச்சங்’. தங் சேதஸோ அவூபஸமலக்க²ணங் வாதாபி⁴கா⁴தசலஜலங் விய, அனவட்டா²னரஸங் வாதாபி⁴கா⁴தசலத⁴ஜபடாகா விய, ப⁴ந்தத்தபச்சுபட்டா²னங் பாஸாணாபி⁴கா⁴தஸமுத்³த⁴தப⁴ஸ்மா விய, சேதஸோ அவூபஸமே அயோனிஸோமனஸிகாரபத³ட்டா²னங். சித்தவிக்கே²போதி த³ட்ட²ப்³ப³ங்.
Tattha chandādayo heṭṭhā vuttanayeneva veditabbā. Kevalañhi te kusalā, ime akusalā. Itaraṃ pana uddhatassa bhāvo ‘uddhaccaṃ’. Taṃ cetaso avūpasamalakkhaṇaṃ vātābhighātacalajalaṃ viya, anavaṭṭhānarasaṃ vātābhighātacaladhajapaṭākā viya, bhantattapaccupaṭṭhānaṃ pāsāṇābhighātasamuddhatabhasmā viya, cetaso avūpasame ayonisomanasikārapadaṭṭhānaṃ. Cittavikkhepoti daṭṭhabbaṃ.
இதி ப²ஸ்ஸாதீ³னி த்³வத்திங்ஸ, யேவாபனகவஸேன வுத்தானி சத்தாரீதி ஸப்³பா³னிபி இமஸ்மிங் த⁴ம்முத்³தே³ஸவாரே ச²த்திங்ஸ த⁴ம்மபதா³னி ப⁴வந்தி. சத்தாரி அபண்ணகங்கா³னி ஹாபெத்வா பாளியங் ஆக³தானி த்³வத்திங்ஸமேவ. அக்³க³ஹிதக்³க³ஹணேன பனெத்த² ப²ஸ்ஸபஞ்சகங், விதக்கோ விசாரோ பீதி சித்தஸ்ஸேகக்³க³தா வீரியிந்த்³ரியங் ஜீவிதிந்த்³ரியங் மிச்சா²தி³ட்டி² அஹிரிகங் அனொத்தப்பங் லோபோ⁴ மோஹோதி ஸோளஸ த⁴ம்மா ஹொந்தி.
Iti phassādīni dvattiṃsa, yevāpanakavasena vuttāni cattārīti sabbānipi imasmiṃ dhammuddesavāre chattiṃsa dhammapadāni bhavanti. Cattāri apaṇṇakaṅgāni hāpetvā pāḷiyaṃ āgatāni dvattiṃsameva. Aggahitaggahaṇena panettha phassapañcakaṃ, vitakko vicāro pīti cittassekaggatā vīriyindriyaṃ jīvitindriyaṃ micchādiṭṭhi ahirikaṃ anottappaṃ lobho mohoti soḷasa dhammā honti.
தேஸு ஸோளஸஸு ஸத்த த⁴ம்மா அவிப⁴த்திகா நவ ஸவிப⁴த்திகா ஹொந்தி. கதமே ஸத்த? ப²ஸ்ஸோ ஸஞ்ஞா சேதனா விசாரோ பீதி ஜீவிதிந்த்³ரியங் மோஹோதி இமே ஸத்த அவிப⁴த்திகா. வேத³னா சித்தங் விதக்கோ சித்தஸ்ஸேகக்³க³தா வீரியிந்த்³ரியங் மிச்சா²தி³ட்டி² அஹிரிகங் அனொத்தப்பங் லோபோ⁴தி இமே நவ ஸவிப⁴த்திகா.
Tesu soḷasasu satta dhammā avibhattikā nava savibhattikā honti. Katame satta? Phasso saññā cetanā vicāro pīti jīvitindriyaṃ mohoti ime satta avibhattikā. Vedanā cittaṃ vitakko cittassekaggatā vīriyindriyaṃ micchādiṭṭhi ahirikaṃ anottappaṃ lobhoti ime nava savibhattikā.
தேஸு ச² த⁴ம்மா த்³வீஸு டா²னேஸு விப⁴த்தா, ஏகோ தீஸு, ஏகோ சதூஸு, ஏகோ ச²ஸு. கத²ங்? சித்தங் விதக்கோ மிச்சா²தி³ட்டி² அஹிரிகங் அனொத்தப்பங் லோபோ⁴தி இமே ச² த்³வீஸு டா²னேஸு விப⁴த்தா. தேஸு ஹி சித்தங் தாவ ப²ஸ்ஸபஞ்சகங் பத்வா சித்தங் ஹோதீதி வுத்தங், இந்த்³ரியானி பத்வா மனிந்த்³ரியந்தி. விதக்கோ ஜா²னங்கா³னி பத்வா விதக்கோ ஹோதீதி வுத்தோ, மக்³க³ங்கா³னி பத்வா மிச்சா²ஸங்கப்போதி. மிச்சா²தி³ட்டி² மக்³க³ங்கே³ஸுபி கம்மபதே²ஸுபி மிச்சா²தி³ட்டி²யேவ. அஹிரிகங் ப³லானி பத்வா அஹிரிகப³லங் ஹோதீதி வுத்தங், லோகனாஸகது³கங் பத்வா அஹிரிகந்தி. அனொத்தப்பேபி ஏஸேவ நயோ. லோபோ⁴ மூலங் பத்வா லோபோ⁴ ஹோதீதி வுத்தோ. கம்மபத²ங் பத்வா அபி⁴ஜ்ஜா²தி. இமே ச² த்³வீஸு டா²னேஸு விப⁴த்தா.
Tesu cha dhammā dvīsu ṭhānesu vibhattā, eko tīsu, eko catūsu, eko chasu. Kathaṃ? Cittaṃ vitakko micchādiṭṭhi ahirikaṃ anottappaṃ lobhoti ime cha dvīsu ṭhānesu vibhattā. Tesu hi cittaṃ tāva phassapañcakaṃ patvā cittaṃ hotīti vuttaṃ, indriyāni patvā manindriyanti. Vitakko jhānaṅgāni patvā vitakko hotīti vutto, maggaṅgāni patvā micchāsaṅkappoti. Micchādiṭṭhi maggaṅgesupi kammapathesupi micchādiṭṭhiyeva. Ahirikaṃ balāni patvā ahirikabalaṃ hotīti vuttaṃ, lokanāsakadukaṃ patvā ahirikanti. Anottappepi eseva nayo. Lobho mūlaṃ patvā lobho hotīti vutto. Kammapathaṃ patvā abhijjhāti. Ime cha dvīsu ṭhānesu vibhattā.
வேத³னா பன ப²ஸ்ஸபஞ்சகங் பத்வா வேத³னா ஹோதீதி வுத்தா, ஜா²னங்கா³னி பத்வா ஸுக²ந்தி, இந்த்³ரியானி பத்வா ஸோமனஸ்ஸிந்த்³ரியந்தி. ஏவங் ஏகோவ த⁴ம்மோ தீஸு டா²னேஸு விப⁴த்தோ.
Vedanā pana phassapañcakaṃ patvā vedanā hotīti vuttā, jhānaṅgāni patvā sukhanti, indriyāni patvā somanassindriyanti. Evaṃ ekova dhammo tīsu ṭhānesu vibhatto.
வீரியங் பன இந்த்³ரியானி பத்வா வீரியிந்த்³ரியங் ஹோதீதி வுத்தங், மக்³க³ங்கா³னி பத்வா மிச்சா²வாயாமோ ஹோதீதி, ப³லானி பத்வா வீரியப³லந்தி, பிட்டி²து³கங் பத்வா பக்³கா³ஹோ ஹோதீதி. ஏவங் அயங் ஏகோ த⁴ம்மோ சதூஸு டா²னேஸு விப⁴த்தோ.
Vīriyaṃ pana indriyāni patvā vīriyindriyaṃ hotīti vuttaṃ, maggaṅgāni patvā micchāvāyāmo hotīti, balāni patvā vīriyabalanti, piṭṭhidukaṃ patvā paggāho hotīti. Evaṃ ayaṃ eko dhammo catūsu ṭhānesu vibhatto.
ஸமாதி⁴ பன ஜா²னங்கா³னி பத்வா சித்தஸ்ஸேகக்³க³தா ஹோதீதி வுத்தோ, இந்த்³ரியானி பத்வா ஸமாதி⁴ந்த்³ரியந்தி, மக்³க³ங்கா³னி பத்வா மிச்சா²ஸமாதீ⁴தி, ப³லானி பத்வா ஸமாதி⁴ப³லந்தி, பிட்டி²து³கங் பத்வா து³தியது³கே ஏககவஸேனேவ ஸமதோ²தி , ததியே அவிக்கே²போதி. ஏவமயங் ஏகோ த⁴ம்மோ ச²ஸு டா²னேஸு விப⁴த்தோ.
Samādhi pana jhānaṅgāni patvā cittassekaggatā hotīti vutto, indriyāni patvā samādhindriyanti, maggaṅgāni patvā micchāsamādhīti, balāni patvā samādhibalanti, piṭṭhidukaṃ patvā dutiyaduke ekakavaseneva samathoti , tatiye avikkhepoti. Evamayaṃ eko dhammo chasu ṭhānesu vibhatto.
ஸப்³பே³பி பனேதே த⁴ம்மா ப²ஸ்ஸபஞ்சகவஸேன ஜா²னங்க³வஸேன இந்த்³ரியவஸேன மக்³க³ங்க³வஸேன ப³லவஸேன மூலவஸேன கம்மபத²வஸேன லோகனாஸகவஸேன பிட்டி²து³கவஸேனாதி நவ ராஸயோ ஹொந்தி. தத்த² யங் வத்தப்³ப³ங் தங் பட²மகுஸலசித்தனித்³தே³ஸே வுத்தமேவாதி.
Sabbepi panete dhammā phassapañcakavasena jhānaṅgavasena indriyavasena maggaṅgavasena balavasena mūlavasena kammapathavasena lokanāsakavasena piṭṭhidukavasenāti nava rāsayo honti. Tattha yaṃ vattabbaṃ taṃ paṭhamakusalacittaniddese vuttamevāti.
த⁴ம்முத்³தே³ஸவாரகதா² நிட்டி²தா.
Dhammuddesavārakathā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / த்³வாத³ஸ அகுஸலானி • Dvādasa akusalāni
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / பட²மசித்தகதா²வண்ணனா • Paṭhamacittakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / பட²மசித்தவண்ணனா • Paṭhamacittavaṇṇanā
