| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
9. батамад̣̇аб̣б̣асуд̇д̇аван̣н̣анаа
9. Paṭhamadabbasuttavaṇṇanā
79. навамз ааяасмаад̇и бияаважанам̣. д̣̇аб̣б̣од̇и д̇асса т̇зрасса наамам̣. маллабуд̇д̇од̇и малларааж̇асса буд̇д̇о. со хи ааяасмаа бад̣̇умуд̇д̇арасса бхаг̇авад̇о баад̣̇амуулз гад̇аабхинийхааро габбасад̇асахассам̣ убажид̇абун̃н̃асан̃жаяо амхаагам̣ бхаг̇авад̇о гаалз малларааж̇асса д̣̇звигаа гужчияам̣ ниб̣б̣ад̇д̇о гад̇аад̇хигаарад̇д̇аа ж̇аад̇ияаа сад̇д̇авассигагаалзязва маад̇аабид̇аро убасан̇гамид̇ваа баб̣б̣аж̇ж̇ам̣ яаажи. д̇з жа ‘‘баб̣б̣аж̇ид̇вааби аажаарам̣ д̇аава сигкад̇у, сажз д̇ам̣ наабхирамиссад̇и, ид̇хзва ааг̇амиссад̇ий’’д̇и ануж̇ааним̣су. со сад̇т̇аарам̣ убасан̇гамид̇ваа баб̣б̣аж̇ж̇ам̣ яаажи. сад̇т̇аабисса убаниссаяасамбад̇д̇им̣ ологзд̇ваа баб̣б̣аж̇ж̇ам̣ ануж̇аани. д̇асса баб̣б̣аж̇ж̇аасамаяз д̣̇иннаоваад̣̇зна бхавад̇д̇аяам̣ аад̣̇ид̇д̇ам̣ вияа убадтааси. со вибассанам̣ бадтабзд̇ваа кураг̇г̇зязва арахад̇д̇ам̣ баабун̣и. яам̣гин̃жи саавагзна бад̇д̇аб̣б̣ам̣, ‘‘д̇иссо виж̇ж̇аа жад̇ассо бадисамбхид̣̇аа чал̣абхин̃н̃аа нава логуд̇д̇арад̇хаммаа’’д̇и звамаад̣̇игам̣ саб̣б̣ам̣ ад̇хиг̇анд̇ваа асийд̇ияаа махаасаавагзсу аб̣бханд̇аро ахоси. вуд̇д̇ан̃хзд̇ам̣ д̇зна ааяасмад̇аа –
79. Navame āyasmāti piyavacanaṃ. Dabboti tassa therassa nāmaṃ. Mallaputtoti mallarājassa putto. So hi āyasmā padumuttarassa bhagavato pādamūle katābhinīhāro kappasatasahassaṃ upacitapuññasañcayo amhākaṃ bhagavato kāle mallarājassa devikā kucchiyaṃ nibbatto katādhikārattā jātiyā sattavassikakāleyeva mātāpitaro upasaṅkamitvā pabbajjaṃ yāci. Te ca ‘‘pabbajitvāpi ācāraṃ tāva sikkhatu, sace taṃ nābhiramissati, idheva āgamissatī’’ti anujāniṃsu. So satthāraṃ upasaṅkamitvā pabbajjaṃ yāci. Satthāpissa upanissayasampattiṃ oloketvā pabbajjaṃ anujāni. Tassa pabbajjāsamaye dinnaovādena bhavattayaṃ ādittaṃ viya upaṭṭhāsi. So vipassanaṃ paṭṭhapetvā khuraggeyeva arahattaṃ pāpuṇi. Yaṃkiñci sāvakena pattabbaṃ, ‘‘tisso vijjā catasso paṭisambhidā chaḷabhiññā nava lokuttaradhammā’’ti evamādikaṃ sabbaṃ adhigantvā asītiyā mahāsāvakesu abbhantaro ahosi. Vuttañhetaṃ tena āyasmatā –
‘‘маяаа ко ж̇аад̇ияаа сад̇д̇авассзна арахад̇д̇ам̣ сажчигад̇ам̣, яам̣гин̃жи саавагзна бад̇д̇аб̣б̣ам̣, саб̣б̣ам̣ д̇ам̣ ануббад̇д̇ам̣ маяаа’’д̇иаад̣̇и (баараа. 380).
‘‘Mayā kho jātiyā sattavassena arahattaṃ sacchikataṃ, yaṃkiñci sāvakena pattabbaṃ, sabbaṃ taṃ anuppattaṃ mayā’’tiādi (pārā. 380).
язна бхаг̇аваа д̇знубасан̇гамийд̇и со гирааяасмаа згад̣̇ивасам̣ рааж̇аг̇ахз бин̣д̣ааяа жарид̇ваа бажчаабхад̇д̇ам̣ бин̣д̣абаад̇аббадигганд̇о бхаг̇авад̇о вад̇д̇ам̣ д̣̇ассзд̇ваа д̣̇иваадтаанам̣ г̇анд̇ваа уд̣̇агагумбхад̇о уд̣̇агам̣ г̇ахзд̇ваа баад̣̇з багкаалзд̇ваа г̇ад̇д̇аани сийд̇им̣ гад̇ваа жаммагкан̣д̣ам̣ бан̃н̃аабзд̇ваа нисинно гаалабарижчзд̣̇ам̣ гад̇ваа самаабад̇д̇им̣ самаабаж̇ж̇и. ат̇ааяасмаа яат̇аагаалабарижчзд̣̇ам̣ самаабад̇д̇ид̇о вудтахид̇ваа ад̇д̇ано ааяусан̇каарз ологзси. д̇асса д̇з баригкийн̣аа гад̇ибаяамухуд̇д̇игаа убадтахим̣су. со жинд̇зси – ‘‘на ко мзд̇ам̣ бад̇ируубам̣, яамахам̣ сад̇т̇у анаарожзд̇ваа саб̣рахмажаарийхи жа авид̣̇ид̇о ид̇ха яат̇аанисиннова бариниб̣б̣ааяиссаами. яам̣нуунаахам̣ сад̇т̇аарам̣ убасан̇гамид̇ваа бариниб̣б̣аанам̣ ануж̇аанаабзд̇ваа сад̇т̇у вад̇д̇ам̣ д̣̇ассзд̇ваа саасанасса нияяаанигабхаавад̣̇ассанад̇т̇ам̣ маяхам̣ ид̣̇д̇хаанубхаавам̣ вибхаавзнд̇о аагаасз нисийд̣̇ид̇ваа д̇зж̇од̇хаад̇ум̣ самаабаж̇ж̇ид̇ваа бариниб̣б̣ааязяяам̣. звам̣ санд̇з яз маяи ассад̣̇д̇хаа аббасаннаа, д̇зсамби басаад̣̇о уббаж̇ж̇иссад̇и, д̇ад̣̇асса д̇зсам̣ д̣̇ийгхарад̇д̇ам̣ хид̇ааяа сукааяаа’’д̇и. зван̃жа со ааяасмаа жинд̇зд̇ваа бхаг̇аванд̇ам̣ убасан̇гамид̇ваа саб̣б̣ам̣ д̇ам̣ д̇ат̇зва агааси. д̇зна вуд̇д̇ам̣ – ‘‘ат̇а ко ааяасмаа д̣̇аб̣б̣о маллабуд̇д̇о язна бхаг̇аваа д̇знубасан̇гамий’’д̇иаад̣̇и.
Yena bhagavā tenupasaṅkamīti so kirāyasmā ekadivasaṃ rājagahe piṇḍāya caritvā pacchābhattaṃ piṇḍapātappaṭikkanto bhagavato vattaṃ dassetvā divāṭṭhānaṃ gantvā udakakumbhato udakaṃ gahetvā pāde pakkhāletvā gattāni sītiṃ katvā cammakkhaṇḍaṃ paññāpetvā nisinno kālaparicchedaṃ katvā samāpattiṃ samāpajji. Athāyasmā yathākālaparicchedaṃ samāpattito vuṭṭhahitvā attano āyusaṅkhāre olokesi. Tassa te parikkhīṇā katipayamuhuttikā upaṭṭhahiṃsu. So cintesi – ‘‘na kho metaṃ patirūpaṃ, yamahaṃ satthu anārocetvā sabrahmacārīhi ca avidito idha yathānisinnova parinibbāyissāmi. Yaṃnūnāhaṃ satthāraṃ upasaṅkamitvā parinibbānaṃ anujānāpetvā satthu vattaṃ dassetvā sāsanassa niyyānikabhāvadassanatthaṃ mayhaṃ iddhānubhāvaṃ vibhāvento ākāse nisīditvā tejodhātuṃ samāpajjitvā parinibbāyeyyaṃ. Evaṃ sante ye mayi assaddhā appasannā, tesampi pasādo uppajjissati, tadassa tesaṃ dīgharattaṃ hitāya sukhāyā’’ti. Evañca so āyasmā cintetvā bhagavantaṃ upasaṅkamitvā sabbaṃ taṃ tatheva akāsi. Tena vuttaṃ – ‘‘atha kho āyasmā dabbo mallaputto yena bhagavā tenupasaṅkamī’’tiādi.
д̇ад̇т̇а бариниб̣б̣аанагаало мзд̇и ‘‘бхаг̇аваа маяхам̣ анубаад̣̇исзсааяа ниб̣б̣аанад̇хаад̇уяаа бариниб̣б̣аанагаало убадтид̇о, д̇амахам̣ бхаг̇авад̇о аарожзд̇ваа бариниб̣б̣ааяид̇угаамомхий’’д̇и д̣̇ассзд̇и. гзжи банааху ‘‘на д̇аава т̇зро ж̇ин̣н̣о, на жа г̇илаано, бариниб̣б̣аанааяа жа сад̇т̇аарам̣ аабужчад̇и, гим̣ д̇ад̇т̇а гааран̣ам̣? ‘мзд̇д̇ияабхуумаж̇агаа бхигкуу буб̣б̣з мам̣ амуулагзна баарааж̇игзна ануд̣̇д̇хам̣сзсум̣, д̇асмим̣ ад̇хигаран̣з вуубасанд̇зби аггосанд̇иязва. д̇зсам̣ сад̣̇д̣̇ахид̇ваа ан̃н̃зби бут̇уж̇ж̇анаа маяи аг̇ааравам̣ барибхаван̃жа гаронд̇и. иман̃жа д̣̇угкабхаарам̣ нирад̇т̇агам̣ вахид̇ваа гим̣ баяож̇анам̣, д̇асмаахам̣ ид̣̇аанзва бариниб̣б̣ааяиссаамий’д̇и саннидтаанам̣ гад̇ваа сад̇т̇аарам̣ аабужчий’’д̇и. д̇ам̣ агааран̣ам̣. на хи кийн̣аасаваа абаригкийн̣з ааяусан̇каарз барзсам̣ убаваад̣̇аад̣̇ибхаязна бариниб̣б̣аанааяа жзд̇знд̇и гхадаяанд̇и вааяаманд̇и, на жа барзсам̣ басам̣саад̣̇ихзд̇у жирам̣ д̇идтанд̇и, ат̇а ко сарасзнзва ад̇д̇ано ааяусан̇каарасса баригкаяам̣ ааг̇амзнд̇и. яат̇ааха –
Tattha parinibbānakālo meti ‘‘bhagavā mayhaṃ anupādisesāya nibbānadhātuyā parinibbānakālo upaṭṭhito, tamahaṃ bhagavato ārocetvā parinibbāyitukāmomhī’’ti dasseti. Keci panāhu ‘‘na tāva thero jiṇṇo, na ca gilāno, parinibbānāya ca satthāraṃ āpucchati, kiṃ tattha kāraṇaṃ? ‘Mettiyabhūmajakā bhikkhū pubbe maṃ amūlakena pārājikena anuddhaṃsesuṃ, tasmiṃ adhikaraṇe vūpasantepi akkosantiyeva. Tesaṃ saddahitvā aññepi puthujjanā mayi agāravaṃ paribhavañca karonti. Imañca dukkhabhāraṃ niratthakaṃ vahitvā kiṃ payojanaṃ, tasmāhaṃ idāneva parinibbāyissāmī’ti sanniṭṭhānaṃ katvā satthāraṃ āpucchī’’ti. Taṃ akāraṇaṃ. Na hi khīṇāsavā aparikkhīṇe āyusaṅkhāre paresaṃ upavādādibhayena parinibbānāya cetenti ghaṭayanti vāyamanti, na ca paresaṃ pasaṃsādihetu ciraṃ tiṭṭhanti, atha kho saraseneva attano āyusaṅkhārassa parikkhayaṃ āgamenti. Yathāha –
‘‘наабхиган̇каами маран̣ам̣, наабхиган̇каами ж̇ийвид̇ам̣;
‘‘Nābhikaṅkhāmi maraṇaṃ, nābhikaṅkhāmi jīvitaṃ;
гаалан̃жа бадиган̇каами, ниб̣б̣исам̣ бхад̇аго яат̇аа’’д̇и. (т̇зраг̇аа. 196, 606; ми. ба. 2.2.4) –
Kālañca paṭikaṅkhāmi, nibbisaṃ bhatako yathā’’ti. (theragā. 196, 606; mi. pa. 2.2.4) –
бхаг̇аваабисса ааяусан̇каарам̣ ологзд̇ваа баригкийн̣абхаавам̣ н̃ад̇ваа ‘‘яассад̣̇аани д̇вам̣, д̣̇аб̣б̣а, гаалам̣ ман̃н̃асий’’д̇и ааха.
Bhagavāpissa āyusaṅkhāraṃ oloketvā parikkhīṇabhāvaṃ ñatvā ‘‘yassadāni tvaṃ, dabba, kālaṃ maññasī’’ti āha.
взхаасам̣ аб̣бхуг̇г̇анд̇ваад̇и аагаасам̣ абхиуг̇г̇анд̇ваа, взхаасам̣ г̇анд̇ваад̇и ад̇т̇о. абхисад̣̇д̣̇аяог̇зна хи ид̣̇ам̣ убаяог̇аважанам̣, ад̇т̇о бана бхуммавасзна взд̣̇ид̇аб̣б̣о. взхаасам̣ аб̣бхуг̇г̇анд̇ваа гим̣ агаасийд̇и ааха – ‘‘аагаасз анд̇алигкз баллан̇гзна нисийд̣̇ид̇ваа’’д̇иаад̣̇и. д̇ад̇т̇а д̇зж̇од̇хаад̇ум̣ самаабаж̇ж̇ид̇ваад̇и д̇зж̇огасин̣ажад̇уд̇т̇аж̇жхаанасамаабад̇д̇им̣ самаабаж̇ж̇ид̇ваа. т̇зро хи д̇ад̣̇аа бхаг̇аванд̇ам̣ ванд̣̇ид̇ваа д̇игкад̇д̇ум̣ бад̣̇агкин̣ам̣ гад̇ваа згаманд̇ам̣ тид̇о ‘‘бхаг̇аваа габбасад̇асахассам̣ д̇умхзхи сад̣̇д̇хим̣ д̇ад̇т̇а д̇ад̇т̇а васанд̇о бун̃н̃аани гаронд̇о имамзвад̇т̇ам̣ санд̇хааяа агаасим̣, свааяамад̇т̇о аж̇ж̇а мад̇т̇агам̣ бад̇д̇о, ид̣̇ам̣ бажчимад̣̇ассана’’нд̇и ааха. яз д̇ад̇т̇а бут̇уж̇ж̇анабхигкуу сод̇аабаннасагад̣̇ааг̇аамино жа, д̇зсу згажжаанам̣ маханд̇ам̣ гаарун̃н̃ам̣ ахоси, згажжз аарод̣̇анаббад̇д̇аа ахзсум̣. ат̇асса бхаг̇аваа жид̇д̇аажаарам̣ н̃ад̇ваа ‘‘д̇зна хи, д̣̇аб̣б̣а, маяхам̣ бхигкусан̇гхасса жа ид̣̇д̇хибаадихаарияам̣ д̣̇ассзхий’’д̇и ааха. д̇аавад̣̇зва саб̣б̣о бхигкусан̇гхо саннибад̇и. ат̇ааяасмаа д̣̇аб̣б̣о ‘‘згоби худ̇ваа б̣ахуд̇хаа ход̇ий’’д̇иаад̣̇инаа (бади. ма. 1.102; д̣̇ий. ни. 1.484) наязна ааг̇ад̇аани саавагасаад̇хааран̣аани саб̣б̣аани баадихаарияаани д̣̇ассзд̇ваа буна жа бхаг̇аванд̇ам̣ ванд̣̇ид̇ваа аагаасам̣ аб̣бхуг̇г̇анд̇ваа аагаасз бат̇авим̣ нимминид̇ваа д̇ад̇т̇а баллан̇гзна нисинно д̇зж̇огасин̣асамаабад̇д̇ияаа баригаммам̣ гад̇ваа самаабад̇д̇им̣ самаабаж̇ж̇ид̇ваа вудтааяа сарийрам̣ ааваж̇ж̇ид̇ваа буна самаабад̇д̇им̣ самаабаж̇ж̇ид̇ваа сарийражхаабанад̇зж̇од̇хаад̇ум̣ ад̇хидтахид̇ваа бариниб̣б̣ааяи. саха ад̇хидтаанзна саб̣б̣о гааяо аг̇г̇инаа аад̣̇ид̇д̇о ахоси. кан̣знзва жа со аг̇г̇и габбавудтаанаг̇г̇и вияа ан̣умад̇д̇амби сан̇каараг̇ад̇ам̣ масимад̇д̇амби д̇ад̇т̇а гин̃жи анавасзсзнд̇о ад̇хидтаанаб̣алзна жхаабзд̇ваа ниб̣б̣ааяи. д̇зна вуд̇д̇ам̣ – ‘‘ат̇а ко ааяасмаа д̣̇аб̣б̣о маллабуд̇д̇о’’д̇иаад̣̇и. д̇ад̇т̇а вудтахид̇ваа бариниб̣б̣ааяийд̇и ид̣̇д̇хижид̇д̇ад̇о вудтахид̇ваа бхаван̇г̇ажид̇д̇зна бариниб̣б̣ааяи.
Vehāsaṃabbhuggantvāti ākāsaṃ abhiuggantvā, vehāsaṃ gantvāti attho. Abhisaddayogena hi idaṃ upayogavacanaṃ, attho pana bhummavasena veditabbo. Vehāsaṃ abbhuggantvā kiṃ akāsīti āha – ‘‘ākāse antalikkhe pallaṅkena nisīditvā’’tiādi. Tattha tejodhātuṃ samāpajjitvāti tejokasiṇacatutthajjhānasamāpattiṃ samāpajjitvā. Thero hi tadā bhagavantaṃ vanditvā tikkhattuṃ padakkhiṇaṃ katvā ekamantaṃ ṭhito ‘‘bhagavā kappasatasahassaṃ tumhehi saddhiṃ tattha tattha vasanto puññāni karonto imamevatthaṃ sandhāya akāsiṃ, svāyamattho ajja matthakaṃ patto, idaṃ pacchimadassana’’nti āha. Ye tattha puthujjanabhikkhū sotāpannasakadāgāmino ca, tesu ekaccānaṃ mahantaṃ kāruññaṃ ahosi, ekacce ārodanappattā ahesuṃ. Athassa bhagavā cittācāraṃ ñatvā ‘‘tena hi, dabba, mayhaṃ bhikkhusaṅghassa ca iddhipāṭihāriyaṃ dassehī’’ti āha. Tāvadeva sabbo bhikkhusaṅgho sannipati. Athāyasmā dabbo ‘‘ekopi hutvā bahudhā hotī’’tiādinā (paṭi. ma. 1.102; dī. ni. 1.484) nayena āgatāni sāvakasādhāraṇāni sabbāni pāṭihāriyāni dassetvā puna ca bhagavantaṃ vanditvā ākāsaṃ abbhuggantvā ākāse pathaviṃ nimminitvā tattha pallaṅkena nisinno tejokasiṇasamāpattiyā parikammaṃ katvā samāpattiṃ samāpajjitvā vuṭṭhāya sarīraṃ āvajjitvā puna samāpattiṃ samāpajjitvā sarīrajhāpanatejodhātuṃ adhiṭṭhahitvā parinibbāyi. Saha adhiṭṭhānena sabbo kāyo agginā āditto ahosi. Khaṇeneva ca so aggi kappavuṭṭhānaggi viya aṇumattampi saṅkhāragataṃ masimattampi tattha kiñci anavasesento adhiṭṭhānabalena jhāpetvā nibbāyi. Tena vuttaṃ – ‘‘atha kho āyasmā dabbo mallaputto’’tiādi. Tattha vuṭṭhahitvā parinibbāyīti iddhicittato vuṭṭhahitvā bhavaṅgacittena parinibbāyi.
жхааяамаанассаад̇и ж̇аалияамаанасса. д̣аяхамаанассаад̇и д̇ассзва взважанам̣. ат̇а ваа жхааяамаанассаад̇и ж̇аалаабавад̇д̇игкан̣ам̣ санд̇хааяа вуд̇д̇ам̣, д̣аяхамаанассаад̇и вийд̇ажжид̇ан̇г̇аарагкан̣ам̣. чааригаад̇и бхасмам̣. масийд̇и гаж̇ж̇алам̣. на бан̃н̃ааяид̇т̇аад̇и на бассид̇т̇а, ад̇хидтаанаб̣алзна саб̣б̣ам̣ кан̣знзва анд̇арад̇хааяид̇т̇аад̇и ад̇т̇о. гасмаа бана т̇зро уд̇д̇аримануссад̇хаммам̣ ид̣̇д̇хибаадихаарияам̣ д̣̇ассзси, нану бхаг̇авад̇аа ид̣̇д̇хибаадихаарияагаран̣ам̣ бадигкид̇д̇анд̇и ? на жод̣̇зд̇аб̣б̣амзд̇ам̣ г̇ихийнам̣ саммукаа баадихаарияагаран̣асса бадигкид̇д̇ад̇д̇аа. д̇ан̃жа ко вигуб̣б̣анавасзна, на банзвам̣ ад̇хидтаанавасзна. аяам̣ банааяасмаа д̇хаммасааминаа аан̣ад̇д̇ова баадихаарияам̣ д̣̇ассзси.
Jhāyamānassāti jāliyamānassa. Ḍayhamānassāti tasseva vevacanaṃ. Atha vā jhāyamānassāti jālāpavattikkhaṇaṃ sandhāya vuttaṃ, ḍayhamānassāti vītaccitaṅgārakkhaṇaṃ. Chārikāti bhasmaṃ. Masīti kajjalaṃ. Na paññāyitthāti na passittha, adhiṭṭhānabalena sabbaṃ khaṇeneva antaradhāyitthāti attho. Kasmā pana thero uttarimanussadhammaṃ iddhipāṭihāriyaṃ dassesi, nanu bhagavatā iddhipāṭihāriyakaraṇaṃ paṭikkhittanti ? Na codetabbametaṃ gihīnaṃ sammukhā pāṭihāriyakaraṇassa paṭikkhittattā. Tañca kho vikubbanavasena, na panevaṃ adhiṭṭhānavasena. Ayaṃ panāyasmā dhammasāminā āṇattova pāṭihāriyaṃ dassesi.
зд̇амад̇т̇ам̣ вид̣̇ид̇ваад̇и зд̇ам̣ ааяасмад̇о д̣̇аб̣б̣асса маллабуд̇д̇асса анубаад̣̇аабариниб̣б̣аанам̣ саб̣б̣аагаарад̇о вид̣̇ид̇ваа д̇ад̣̇ад̇т̇абарид̣̇ийбанам̣ имам̣ уд̣̇аанам̣ уд̣̇аанзси.
Etamatthaṃ viditvāti etaṃ āyasmato dabbassa mallaputtassa anupādāparinibbānaṃ sabbākārato viditvā tadatthaparidīpanaṃ imaṃ udānaṃ udānesi.
д̇ад̇т̇а абхзд̣̇и гааяод̇и саб̣б̣о бхууд̇убаад̣̇ааяабабхзд̣̇о жад̇усанд̇ад̇ируубагааяо бхиж̇ж̇и, анавасзсад̇о д̣аяхи, анд̇арад̇хааяи, ануббад̇д̇ид̇хаммад̇ам̣ аабаж̇ж̇и. нирод̇хи сан̃н̃аад̇и руубааяад̇анаад̣̇иг̇ожарад̇ааяа руубасан̃н̃аад̣̇ибхзд̣̇аа саб̣б̣ааби сан̃н̃аа аббадисанд̇хигзна нирод̇хзна нируж̇жхи. взд̣̇анаа сийд̇ибхавим̣су саб̣б̣аад̇и вибаагавзд̣̇анаа гирияавзд̣̇анаад̇и саб̣б̣ааби взд̣̇анаа аббадисанд̇хиганирод̇хзна нируд̣̇д̇хад̇д̇аа ан̣умад̇д̇амби взд̣̇анаад̣̇арат̇асса абхаавад̇о сийд̇ибхууд̇аа ахзсум̣, гусалаагусалавзд̣̇анаа бана арахад̇д̇апалагкан̣зязва нирод̇хам̣ г̇ад̇аа. ‘‘сийд̇ирахим̣суу’’д̇иби батанд̇и, санд̇аа нируд̣̇д̇хаа ахзсунд̇и ад̇т̇о. вуубасамим̣су сан̇каараад̇и вибаагагирияаббабхзд̣̇аа саб̣б̣зби пассаад̣̇аяо сан̇каарагканд̇хад̇хаммаа аббадисанд̇хиганирод̇хзнзва нируд̣̇д̇хад̇д̇аа висзсзна убасамим̣су. вин̃н̃аан̣ам̣ ад̇т̇амааг̇амаад̇и вин̃н̃аан̣амби вибаагагирияаббабхзд̣̇ам̣ саб̣б̣ам̣ аббадисанд̇хиганирод̇хзнзва ад̇т̇ам̣ винаасам̣ убажчзд̣̇ам̣ аг̇амаа аг̇ажчи.
Tattha abhedi kāyoti sabbo bhūtupādāyapabhedo catusantatirūpakāyo bhijji, anavasesato ḍayhi, antaradhāyi, anuppattidhammataṃ āpajji. Nirodhi saññāti rūpāyatanādigocaratāya rūpasaññādibhedā sabbāpi saññā appaṭisandhikena nirodhena nirujjhi. Vedanā sītibhaviṃsu sabbāti vipākavedanā kiriyavedanāti sabbāpi vedanā appaṭisandhikanirodhena niruddhattā aṇumattampi vedanādarathassa abhāvato sītibhūtā ahesuṃ, kusalākusalavedanā pana arahattaphalakkhaṇeyeva nirodhaṃ gatā. ‘‘Sītirahiṃsū’’tipi paṭhanti, santā niruddhā ahesunti attho. Vūpasamiṃsu saṅkhārāti vipākakiriyappabhedā sabbepi phassādayo saṅkhārakkhandhadhammā appaṭisandhikanirodheneva niruddhattā visesena upasamiṃsu. Viññāṇaṃ atthamāgamāti viññāṇampi vipākakiriyappabhedaṃ sabbaṃ appaṭisandhikanirodheneva atthaṃ vināsaṃ upacchedaṃ agamā agacchi.
ид̇и бхаг̇аваа ааяасмад̇о д̣̇аб̣б̣асса маллабуд̇д̇асса бан̃жаннамби канд̇хаанам̣ буб̣б̣зязва гилзсаабхисан̇каарубаад̣̇аанасса анавасзсад̇о нируд̣̇д̇хад̇д̇аа анубаад̣̇аано вияа ж̇аад̇авзд̣̇о аббадисанд̇хиганирод̇хзна нируд̣̇д̇хабхаавам̣ ниссааяа бийд̇ивзг̇ависсадтам̣ уд̣̇аанам̣ уд̣̇аанзсийд̇и.
Iti bhagavā āyasmato dabbassa mallaputtassa pañcannampi khandhānaṃ pubbeyeva kilesābhisaṅkhārupādānassa anavasesato niruddhattā anupādāno viya jātavedo appaṭisandhikanirodhena niruddhabhāvaṃ nissāya pītivegavissaṭṭhaṃ udānaṃ udānesīti.
навамасуд̇д̇аван̣н̣анаа нидтид̇аа.
Navamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 9. батамад̣̇аб̣б̣асуд̇д̇ам̣ • 9. Paṭhamadabbasuttaṃ
