| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. தா³னவக்³கோ³
4. Dānavaggo
1-4. பட²மதா³னஸுத்தாதி³வண்ணனா
1-4. Paṭhamadānasuttādivaṇṇanā
31-34. சதுத்த²ஸ்ஸ பட²மே ஆஸஜ்ஜாதி யஸ்ஸ தே³தி, தஸ்ஸ ஆக³மனஹேது தேன ஸமாக³மனிமித்தங். ப⁴யாதி ப⁴யஹேது. நனு ப⁴யங் நாம லத்³த⁴காமதாராகா³த³யோ விய சேதனாய அவிஸுத்³தி⁴கரங், தங் கஸ்மா இத⁴ க³ஹிதந்தி? நயித³ங் தாதி³ஸங் வோஹாரப⁴யாதி³ங் ஸந்தா⁴ய வுத்தந்தி த³ஸ்ஸேதுங் ‘‘அயங் அதா³யகோ அகாரகோ’’திஆதி³ வுத்தங். அதா³ஸி மேதி யங் புப்³பே³ கதங் உபகாரங் சிந்தெத்வா தீ³யதி, தங் ஸந்தா⁴ய வுத்தங். த³ஸ்ஸதி மேதி பச்சுபகாராஸீஸாய யங் தீ³யதி, தங் ஸந்தா⁴ய வத³தி. ஸாஹு தா³னந்தி தா³னங் நாமேதங் பண்டி³தபஞ்ஞத்தந்தி ஸாது⁴ஸமாசாரே ட²த்வா தே³தி. அலங்காரத்த²ந்தி உபஸோப⁴னத்த²ங். தா³னஞ்ஹி த³த்வா தங் பச்சவெக்க²ந்தஸ்ஸ பாமோஜ்ஜபீதிஸோமனஸ்ஸாத³யோ உப்பஜ்ஜந்தி, லோப⁴தோ³ஸஇஸ்ஸாமச்சே²ராத³யோபி விதூ³ரீ ப⁴வந்தி. இதா³னி தா³னங் அனுகூலத⁴ம்மபரிப்³ரூஹனேன பச்சனீகத⁴ம்மவிதூ³ரீகரணேன ச பா⁴வனாசித்தஸ்ஸ உபஸோப⁴னாய ச பரிக்கா²ராய ச ஹோதீதி ‘‘அலங்காரத்த²ஞ்சேவ பரிக்கா²ரத்த²ஞ்ச தே³தீ’’தி வுத்தங். தேனாஹ ‘‘தா³னஞ்ஹி சித்தங் முது³ங் கரோதீ’’திஆதி³. முது³சித்தோ ஹோதி லத்³தா⁴ தா³யகே ‘‘இமினா மய்ஹங் ஸங்க³ஹோ கதோ’’தி, தா³தாபி லத்³த⁴ரி. தேன வுத்தங் ‘‘உபி⁴ன்னம்பி சித்தங் முது³ங் கரோதீ’’தி.
31-34. Catutthassa paṭhame āsajjāti yassa deti, tassa āgamanahetu tena samāgamanimittaṃ. Bhayāti bhayahetu. Nanu bhayaṃ nāma laddhakāmatārāgādayo viya cetanāya avisuddhikaraṃ, taṃ kasmā idha gahitanti? Nayidaṃ tādisaṃ vohārabhayādiṃ sandhāya vuttanti dassetuṃ ‘‘ayaṃ adāyako akārako’’tiādi vuttaṃ. Adāsi meti yaṃ pubbe kataṃ upakāraṃ cintetvā dīyati, taṃ sandhāya vuttaṃ. Dassati meti paccupakārāsīsāya yaṃ dīyati, taṃ sandhāya vadati. Sāhu dānanti dānaṃ nāmetaṃ paṇḍitapaññattanti sādhusamācāre ṭhatvā deti. Alaṅkāratthanti upasobhanatthaṃ. Dānañhi datvā taṃ paccavekkhantassa pāmojjapītisomanassādayo uppajjanti, lobhadosaissāmaccherādayopi vidūrī bhavanti. Idāni dānaṃ anukūladhammaparibrūhanena paccanīkadhammavidūrīkaraṇena ca bhāvanācittassa upasobhanāya ca parikkhārāya ca hotīti ‘‘alaṅkāratthañceva parikkhāratthañca detī’’ti vuttaṃ. Tenāha ‘‘dānañhi cittaṃ muduṃ karotī’’tiādi. Muducitto hoti laddhā dāyake ‘‘iminā mayhaṃ saṅgaho kato’’ti, dātāpi laddhari. Tena vuttaṃ ‘‘ubhinnampi cittaṃ muduṃ karotī’’ti.
அத³ந்தத³மனந்தி அத³ந்தா அனஸ்ஸவாபிஸ்ஸ தா³னேன த³ந்தா அஸ்ஸவா ஹொந்தி, வஸே வத்தந்தி. அதா³னங் த³ந்ததூ³ஸகந்தி அதா³னங் புப்³பே³ த³ந்தானங் அஸ்ஸவானம்பி விகா⁴துப்பாத³னேன சித்தங் தூ³ஸேதி. உன்னமந்தி தா³யகா பியங்வதா³ ச பரேஸங் க³ருசித்தீகாரட்டா²னதாய. நமந்திபடிக்³கா³ஹகா தா³னேன பியவாசாய ச லத்³த⁴ஸங்க³ஹாஸங்கா³ஹகானங்.
Adantadamananti adantā anassavāpissa dānena dantā assavā honti, vase vattanti. Adānaṃ dantadūsakanti adānaṃ pubbe dantānaṃ assavānampi vighātuppādanena cittaṃ dūseti. Unnamanti dāyakā piyaṃvadā ca paresaṃ garucittīkāraṭṭhānatāya. Namantipaṭiggāhakā dānena piyavācāya ca laddhasaṅgahāsaṅgāhakānaṃ.
சித்தாலங்காரதா³னமேவ உத்தமங் அனுபக்கிலிட்ட²தாய ஸுபரிஸுத்³த⁴தாய கு³ணவிஸேஸபச்சயதாய ச. து³தியாதீ³னி உத்தானத்தா²னேவ.
Cittālaṅkāradānameva uttamaṃ anupakkiliṭṭhatāya suparisuddhatāya guṇavisesapaccayatāya ca. Dutiyādīni uttānatthāneva.
பட²மதா³னஸுத்தாதி³வண்ணனா நிட்டி²தா.
Paṭhamadānasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. பட²மதா³னஸுத்தங் • 1. Paṭhamadānasuttaṃ
2. து³தியதா³னஸுத்தங் • 2. Dutiyadānasuttaṃ
3. தா³னவத்து²ஸுத்தங் • 3. Dānavatthusuttaṃ
4. கெ²த்தஸுத்தங் • 4. Khettasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
1. பட²மதா³னஸுத்தவண்ணனா • 1. Paṭhamadānasuttavaṇṇanā
2. து³தியதா³னஸுத்தவண்ணனா • 2. Dutiyadānasuttavaṇṇanā
3. தா³னவத்து²ஸுத்தவண்ணனா • 3. Dānavatthusuttavaṇṇanā
4. கெ²த்தஸுத்தவண்ணனா • 4. Khettasuttavaṇṇanā
