| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. தா³னவக்³கோ³
4. Dānavaggo
1. பட²மதா³னஸுத்தவண்ணனா
1. Paṭhamadānasuttavaṇṇanā
31. சதுத்த²ஸ்ஸ பட²மே ஆஸஜ்ஜ தா³னங் தே³தீதி பத்வா தா³னங் தே³தி. ஆக³தங் தி³ஸ்வா தங் முஹுத்தங்யேவ நிஸீதா³பெத்வா ஸக்காரங் கத்வா தா³னங் தே³தி, த³ஸ்ஸாமீதி ந கிலமேதி. ப⁴யாதி ‘‘அயங் அதா³யகோ அகாரகோ’’தி க³ரஹப⁴யா, அபாயப⁴யா வா. அதா³ஸி மேதி மய்ஹங் புப்³பே³ ஏஸ இத³ங் நாம அதா³ஸீதி தே³தி. த³ஸ்ஸதி மேதி அனாக³தே இத³ங் நாம த³ஸ்ஸதீதி தே³தி. ஸாஹு தா³னந்தி தா³னங் நாம ஸாது⁴ ஸுந்த³ரங் பு³த்³தா⁴தீ³ஹி பண்டி³தேஹி பஸத்த²ந்தி தே³தி. சித்தாலங்காரசித்தபரிக்கா²ரத்த²ங் தா³னங் தே³தீதி ஸமத²விபஸ்ஸனாசித்தஸ்ஸ அலங்காரத்த²ஞ்சேவ பரிக்கா²ரத்த²ஞ்ச தே³தி. தா³னஞ்ஹி சித்தங் முது³ங் கரோதி. யேன லத்³தோ⁴, ஸோ ‘‘லத்³த⁴ங் மே’’தி முது³சித்தோ ஹோதி. யேன தி³ன்னங், ஸோபி ‘‘தி³ன்னங் மயா’’தி முது³சித்தோ ஹோதி. இதி உபி⁴ன்னங் சித்தங் முது³ங் கரோதி. தேனேவ ‘‘அத³ந்தத³மன’’ந்தி வுச்சதி. யதா²ஹ –
31. Catutthassa paṭhame āsajja dānaṃ detīti patvā dānaṃ deti. Āgataṃ disvā taṃ muhuttaṃyeva nisīdāpetvā sakkāraṃ katvā dānaṃ deti, dassāmīti na kilameti. Bhayāti ‘‘ayaṃ adāyako akārako’’ti garahabhayā, apāyabhayā vā. Adāsimeti mayhaṃ pubbe esa idaṃ nāma adāsīti deti. Dassati meti anāgate idaṃ nāma dassatīti deti. Sāhu dānanti dānaṃ nāma sādhu sundaraṃ buddhādīhi paṇḍitehi pasatthanti deti. Cittālaṅkāracittaparikkhāratthaṃ dānaṃ detīti samathavipassanācittassa alaṅkāratthañceva parikkhāratthañca deti. Dānañhi cittaṃ muduṃ karoti. Yena laddho, so ‘‘laddhaṃ me’’ti muducitto hoti. Yena dinnaṃ, sopi ‘‘dinnaṃ mayā’’ti muducitto hoti. Iti ubhinnaṃ cittaṃ muduṃ karoti. Teneva ‘‘adantadamana’’nti vuccati. Yathāha –
‘‘அத³ந்தத³மனங் தா³னங், அதா³னங் த³ந்ததூ³ஸகங்;
‘‘Adantadamanaṃ dānaṃ, adānaṃ dantadūsakaṃ;
தா³னேன பியவாசாய, உன்னமந்தி நமந்தி சா’’தி.
Dānena piyavācāya, unnamanti namanti cā’’ti.
இமேஸு பன அட்ட²ஸு தா³னேஸு சித்தாலங்காரதா³னமேவ உத்தமந்தி.
Imesu pana aṭṭhasu dānesu cittālaṅkāradānameva uttamanti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. பட²மதா³னஸுத்தங் • 1. Paṭhamadānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-4. பட²மதா³னஸுத்தாதி³வண்ணனா • 1-4. Paṭhamadānasuttādivaṇṇanā
