| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
4. දානවග්‌ගො
4. Dānavaggo
1. පඨමදානසුත්‌තවණ්‌ණනා
1. Paṭhamadānasuttavaṇṇanā
31. චතුත්‌ථස්‌ස පඨමෙ ආසජ්‌ජ දානං දෙතීති පත්‌වා දානං දෙති. ආගතං දිස්‌වා තං මුහුත්‌තංයෙව නිසීදාපෙත්‌වා සක්‌කාරං කත්‌වා දානං දෙති, දස්‌සාමීති න කිලමෙති. භයාති ‘‘අයං අදායකො අකාරකො’’ති ගරහභයා, අපායභයා වා. අදාසි මෙති මය්‌හං පුබ්‌බෙ එස ඉදං නාම අදාසීති දෙති. දස්‌සති මෙති අනාගතෙ ඉදං නාම දස්‌සතීති දෙති. සාහු දානන්‌ති දානං නාම සාධු සුන්‌දරං බුද්‌ධාදීහි පණ්‌ඩිතෙහි පසත්‌ථන්‌ති දෙති. චිත්‌තාලඞ්‌කාරචිත්‌තපරික්‌ඛාරත්‌ථං දානං දෙතීති සමථවිපස්‌සනාචිත්‌තස්‌ස අලඞ්‌කාරත්‌ථඤ්‌චෙව පරික්‌ඛාරත්‌ථඤ්‌ච දෙති. දානඤ්‌හි චිත්‌තං මුදුං කරොති. යෙන ලද්‌ධො, සො ‘‘ලද්‌ධං මෙ’’ති මුදුචිත්‌තො හොති. යෙන දින්‌නං, සොපි ‘‘දින්‌නං මයා’’ති මුදුචිත්‌තො හොති. ඉති උභින්‌නං චිත්‌තං මුදුං කරොති. තෙනෙව ‘‘අදන්‌තදමන’’න්‌ති වුච්‌චති. යථාහ –
31. Catutthassa paṭhame āsajja dānaṃ detīti patvā dānaṃ deti. Āgataṃ disvā taṃ muhuttaṃyeva nisīdāpetvā sakkāraṃ katvā dānaṃ deti, dassāmīti na kilameti. Bhayāti ‘‘ayaṃ adāyako akārako’’ti garahabhayā, apāyabhayā vā. Adāsimeti mayhaṃ pubbe esa idaṃ nāma adāsīti deti. Dassati meti anāgate idaṃ nāma dassatīti deti. Sāhu dānanti dānaṃ nāma sādhu sundaraṃ buddhādīhi paṇḍitehi pasatthanti deti. Cittālaṅkāracittaparikkhāratthaṃ dānaṃ detīti samathavipassanācittassa alaṅkāratthañceva parikkhāratthañca deti. Dānañhi cittaṃ muduṃ karoti. Yena laddho, so ‘‘laddhaṃ me’’ti muducitto hoti. Yena dinnaṃ, sopi ‘‘dinnaṃ mayā’’ti muducitto hoti. Iti ubhinnaṃ cittaṃ muduṃ karoti. Teneva ‘‘adantadamana’’nti vuccati. Yathāha –
‘‘අදන්‌තදමනං දානං, අදානං දන්‌තදූසකං;
‘‘Adantadamanaṃ dānaṃ, adānaṃ dantadūsakaṃ;
දානෙන පියවාචාය, උන්‌නමන්‌ති නමන්‌ති චා’’ති.
Dānena piyavācāya, unnamanti namanti cā’’ti.
ඉමෙසු පන අට්‌ඨසු දානෙසු චිත්‌තාලඞ්‌කාරදානමෙව උත්‌තමන්‌ති.
Imesu pana aṭṭhasu dānesu cittālaṅkāradānameva uttamanti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. පඨමදානසුත්‌තං • 1. Paṭhamadānasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-4. පඨමදානසුත්‌තාදිවණ්‌ණනා • 1-4. Paṭhamadānasuttādivaṇṇanā
