| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. பட²மதே³வசாரிகஸுத்தங்
8. Paṭhamadevacārikasuttaṃ
1014. ஸாவத்தி²னிதா³னங். அத² கோ² ஆயஸ்மா மஹாமொக்³க³ல்லானோ – ஸெய்யதா²பி நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய, ஏவமேவ – ஜேதவனே அந்தரஹிதோ தே³வேஸு தாவதிங்ஸேஸு பாதுரஹோஸி. அத² கோ² ஸம்ப³ஹுலா தாவதிங்ஸகாயிகா தே³வதாயோ யேனாயஸ்மா மஹாமொக்³க³ல்லானோ தேனுபஸங்கமிங்ஸு; உபஸங்கமித்வா ஆயஸ்மந்தங் மஹாமொக்³க³ல்லானங் அபி⁴வாதெ³த்வா ஏகமந்தங் அட்ட²ங்ஸு. ஏகமந்தங் டி²தா கோ² தா தே³வதாயோ ஆயஸ்மா மஹாமொக்³க³ல்லானோ ஏதத³வோச –
1014. Sāvatthinidānaṃ. Atha kho āyasmā mahāmoggallāno – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evameva – jetavane antarahito devesu tāvatiṃsesu pāturahosi. Atha kho sambahulā tāvatiṃsakāyikā devatāyo yenāyasmā mahāmoggallāno tenupasaṅkamiṃsu; upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhaṃsu. Ekamantaṃ ṭhitā kho tā devatāyo āyasmā mahāmoggallāno etadavoca –
‘‘ஸாது⁴ கோ², ஆவுஸோ, பு³த்³தே⁴ அவேச்சப்பஸாதே³ன ஸமன்னாக³மனங் ஹோதி – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. பு³த்³தே⁴ அவேச்சப்பஸாதே³ன ஸமன்னாக³மனஹேது கோ², ஆவுஸோ, ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி. ஸாது⁴ கோ², ஆவுஸோ, த⁴ம்மே…பே॰… ஸங்கே⁴…பே॰… ஸாது⁴ கோ², ஆவுஸோ, அரியகந்தேஹி ஸீலேஹி ஸமன்னாக³மனங் ஹோதி அக²ண்டே³ஹி…பே॰… ஸமாதி⁴ஸங்வத்தனிகேஹி. அரியகந்தேஹி ஸீலேஹி ஸமன்னாக³மனஹேது கோ², ஆவுஸோ, ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தீ’’தி.
‘‘Sādhu kho, āvuso, buddhe aveccappasādena samannāgamanaṃ hoti – itipi so bhagavā…pe… satthā devamanussānaṃ buddho bhagavāti. Buddhe aveccappasādena samannāgamanahetu kho, āvuso, evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. Sādhu kho, āvuso, dhamme…pe… saṅghe…pe… sādhu kho, āvuso, ariyakantehi sīlehi samannāgamanaṃ hoti akhaṇḍehi…pe… samādhisaṃvattanikehi. Ariyakantehi sīlehi samannāgamanahetu kho, āvuso, evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī’’ti.
‘‘ஸாது⁴ கோ², மாரிஸ மொக்³க³ல்லான, பு³த்³தே⁴ அவேச்சப்பஸாதே³ன ஸமன்னாக³மனங் ஹோதி – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. பு³த்³தே⁴ அவேச்சப்பஸாதே³ன ஸமன்னாக³மனஹேது கோ², மாரிஸ மொக்³க³ல்லான, ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி. ஸாது⁴ கோ², மாரிஸ மொக்³க³ல்லான, த⁴ம்மே…பே॰… ஸங்கே⁴…பே॰… அரியகந்தேஹி ஸீலேஹி ஸமன்னாக³மனங் ஹோதி அக²ண்டே³ஹி…பே॰… ஸமாதி⁴ஸங்வத்தனிகேஹி. அரியகந்தேஹி ஸீலேஹி ஸமன்னாக³மனஹேது கோ², மாரிஸ மொக்³க³ல்லான, ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தீ’’தி. அட்ட²மங்.
‘‘Sādhu kho, mārisa moggallāna, buddhe aveccappasādena samannāgamanaṃ hoti – itipi so bhagavā…pe… satthā devamanussānaṃ buddho bhagavāti. Buddhe aveccappasādena samannāgamanahetu kho, mārisa moggallāna, evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. Sādhu kho, mārisa moggallāna, dhamme…pe… saṅghe…pe… ariyakantehi sīlehi samannāgamanaṃ hoti akhaṇḍehi…pe… samādhisaṃvattanikehi. Ariyakantehi sīlehi samannāgamanahetu kho, mārisa moggallāna, evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī’’ti. Aṭṭhamaṃ.
