| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. பட²மத⁴ம்மவிஹாரீஸுத்தவண்ணனா
3. Paṭhamadhammavihārīsuttavaṇṇanā
73. ததியே தி³வஸங் அதினாமேதீதி தி³வஸங் அதிக்காமேதி. ரிஞ்சதி படிஸல்லானந்தி ஏகீபா⁴வங் விஸ்ஸஜ்ஜேதி. தே³ஸேதீதி கதே²தி பகாஸேதி. த⁴ம்மபஞ்ஞத்தியாதி த⁴ம்மஸ்ஸ பஞ்ஞாபனாய. த⁴ம்மங் பரியாபுணாதீதி நவங்க³வஸேன சதுஸச்சத⁴ம்மங் பரியாபுணாதி வளஞ்ஜேதி கதே²தி. ந ரிஞ்சதி படிஸல்லானந்தி ஏகீபா⁴வங் ந விஸ்ஸஜ்ஜேதி. அனுயுஞ்ஜதி அஜ்ஜ²த்தங் சேதோஸமத²ந்தி நியகஜ்ஜ²த்தே சித்தஸமாதி⁴ங் ஆஸேவதி பா⁴வேதி, ஸமத²கம்மட்டா²னே யுத்தப்பயுத்தோ ஹோதி.
73. Tatiye divasaṃ atināmetīti divasaṃ atikkāmeti. Riñcati paṭisallānanti ekībhāvaṃ vissajjeti. Desetīti katheti pakāseti. Dhammapaññattiyāti dhammassa paññāpanāya. Dhammaṃpariyāpuṇātīti navaṅgavasena catusaccadhammaṃ pariyāpuṇāti vaḷañjeti katheti. Na riñcati paṭisallānanti ekībhāvaṃ na vissajjeti. Anuyuñjati ajjhattaṃ cetosamathanti niyakajjhatte cittasamādhiṃ āsevati bhāveti, samathakammaṭṭhāne yuttappayutto hoti.
ஹிதேஸினாதி ஹிதங் ஏஸந்தேன. அனுகம்பகேனாதி அனுகம்பமானேன. அனுகம்பங் உபாதா³யாதி அனுகம்பங் சித்தேன பரிக்³க³ஹெத்வா, படிச்சாதிபி வுத்தங் ஹோதி. கதங் வோ தங் மயாதி தங் மயா இமே பஞ்ச புக்³க³லே தே³ஸெந்தேன தும்ஹாகங் கதங். எத்தகமேவ ஹி அனுகம்பகஸ்ஸ ஸத்து² கிச்சங் யதி³த³ங் அவிபரீதத⁴ம்மதே³ஸனா, இதோ பரங் பன படிபத்தி நாம ஸாவகானங் கிச்சங். தேனாஹ – ஏதானி பி⁴க்கு² ருக்க²மூலானி…பே॰… அம்ஹாகங் அனுஸாஸனீதி. தத்த² ச ருக்க²மூலானீதி இமினா ருக்க²மூலஸேனாஸனங் த³ஸ்ஸேதி. ஸுஞ்ஞாகா³ரானீதி இமினா ஜனவிவித்தட்டா²னங். உப⁴யேனாபி ச யோகா³னுரூபங் ஸேனாஸனமாசிக்க²தி, தா³யஜ்ஜங் நிய்யாதேதி. ஜா²யதா²தி ஆரம்மணூபனிஜ்ஜா²னேன அட்ட²திங்ஸாரம்மணானி, லக்க²ணூபனிஜ்ஜா²னேன ச அனிச்சாதி³தோ க²ந்தா⁴யதனாதீ³னி உபனிஜ்ஜா²யத², ஸமத²ஞ்ச விபஸ்ஸனஞ்ச வட்³டே⁴தா²தி வுத்தங் ஹோதி. மா பமாத³த்தா²தி மா பமஜ்ஜித்த². மா பச்சா² விப்படிஸாரினோ அஹுவத்தா²தி யே ஹி புப்³பே³ த³ஹரகாலே ஆரொக்³யகாலே ஸத்தஸப்பாயாதி³ஸம்பத்திகாலே ஸத்து² ஸம்முகீ²பா⁴வகாலே ச யோனிஸோமனஸிகாரவிரஹிதா ரத்திந்தி³வங் மங்குலப⁴த்தா ஹுத்வா ஸெய்யஸுக²மித்³த⁴ஸுக²மனுயுத்தா பமஜ்ஜந்தி, தே பச்சா² ஜராகாலே ரோக³காலே மரணகாலே விபத்திகாலே ஸத்து² பரினிப்³பா³னகாலே ச தங் புப்³பே³ பமாத³விஹாரங் அனுஸ்ஸரந்தா ஸப்படிஸந்தி⁴காலகிரியஞ்ச பா⁴ரியங் ஸம்பஸ்ஸமானா விப்படிஸாரினோ ஹொந்தி. தும்ஹே பன தாதி³ஸா மா அஹுவத்தா²தி ஏதமத்த²ங் த³ஸ்ஸெந்தோ ஆஹ – ‘‘மா பச்சா² விப்படிஸாரினோ அஹுவத்தா²’’தி. அயங் வோ அம்ஹாகங் அனுஸாஸனீதி அயங் அம்ஹாகங் ஸந்திகா ‘‘ஜா²யத² மா பமாத³த்தா²’’தி தும்ஹாகங் அனுஸாஸனீ, ஓவாதோ³தி வுத்தங் ஹோதி.
Hitesināti hitaṃ esantena. Anukampakenāti anukampamānena. Anukampaṃ upādāyāti anukampaṃ cittena pariggahetvā, paṭiccātipi vuttaṃ hoti. Kataṃ vo taṃ mayāti taṃ mayā ime pañca puggale desentena tumhākaṃ kataṃ. Ettakameva hi anukampakassa satthu kiccaṃ yadidaṃ aviparītadhammadesanā, ito paraṃ pana paṭipatti nāma sāvakānaṃ kiccaṃ. Tenāha – etāni bhikkhu rukkhamūlāni…pe… amhākaṃ anusāsanīti. Tattha ca rukkhamūlānīti iminā rukkhamūlasenāsanaṃ dasseti. Suññāgārānīti iminā janavivittaṭṭhānaṃ. Ubhayenāpi ca yogānurūpaṃ senāsanamācikkhati, dāyajjaṃ niyyāteti. Jhāyathāti ārammaṇūpanijjhānena aṭṭhatiṃsārammaṇāni, lakkhaṇūpanijjhānena ca aniccādito khandhāyatanādīni upanijjhāyatha, samathañca vipassanañca vaḍḍhethāti vuttaṃ hoti. Mā pamādatthāti mā pamajjittha. Mā pacchā vippaṭisārino ahuvatthāti ye hi pubbe daharakāle ārogyakāle sattasappāyādisampattikāle satthu sammukhībhāvakāle ca yonisomanasikāravirahitā rattindivaṃ maṅkulabhattā hutvā seyyasukhamiddhasukhamanuyuttā pamajjanti, te pacchā jarākāle rogakāle maraṇakāle vipattikāle satthu parinibbānakāle ca taṃ pubbe pamādavihāraṃ anussarantā sappaṭisandhikālakiriyañca bhāriyaṃ sampassamānā vippaṭisārino honti. Tumhe pana tādisā mā ahuvatthāti etamatthaṃ dassento āha – ‘‘mā pacchā vippaṭisārino ahuvatthā’’ti. Ayaṃ vo amhākaṃ anusāsanīti ayaṃ amhākaṃ santikā ‘‘jhāyatha mā pamādatthā’’ti tumhākaṃ anusāsanī, ovādoti vuttaṃ hoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. பட²மத⁴ம்மவிஹாரீஸுத்தங் • 3. Paṭhamadhammavihārīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-4. பட²மத⁴ம்மவிஹாரீஸுத்தாதி³வண்ணனா • 3-4. Paṭhamadhammavihārīsuttādivaṇṇanā
