| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. பட²மதா⁴ரணஸுத்தங்
5. Paṭhamadhāraṇasuttaṃ
1085. ‘‘தா⁴ரேத² நோ தும்ஹே, பி⁴க்க²வே, மயா சத்தாரி அரியஸச்சானி தே³ஸிதானீ’’தி? ஏவங் வுத்தே அஞ்ஞதரோ பி⁴க்கு² ப⁴க³வந்தங் ஏதத³வோச – ‘‘அஹங் கோ², ப⁴ந்தே, தா⁴ரேமி ப⁴க³வதா சத்தாரி அரியஸச்சானி தே³ஸிதானீ’’தி. ‘‘யதா² கத²ங் பன த்வங், பி⁴க்கு², தா⁴ரேஸி மயா சத்தாரி அரியஸச்சானி தே³ஸிதானீ’’தி? ‘‘து³க்க²ங் க்²வாஹங், ப⁴ந்தே, ப⁴க³வதா பட²மங் அரியஸச்சங் தே³ஸிதங் தா⁴ரேமி; து³க்க²ஸமுத³யங் க்²வாஹங், ப⁴ந்தே, ப⁴க³வதா து³தியங் அரியஸச்சங் தே³ஸிதங் தா⁴ரேமி; து³க்க²னிரோத⁴ங் க்²வாஹங், ப⁴ந்தே, ப⁴க³வதா ததியங் அரியஸச்சங் தே³ஸிதங் தா⁴ரேமி; து³க்க²னிரோத⁴கா³மினிங் படிபத³ங் க்²வாஹங், ப⁴ந்தே, ப⁴க³வதா சதுத்த²ங் அரியஸச்சங் தே³ஸிதங் தா⁴ரேமி. ஏவங் க்²வாஹங், ப⁴ந்தே, தா⁴ரேமி ப⁴க³வதா சத்தாரி அரியஸச்சானி தே³ஸிதானீ’’தி.
1085. ‘‘Dhāretha no tumhe, bhikkhave, mayā cattāri ariyasaccāni desitānī’’ti? Evaṃ vutte aññataro bhikkhu bhagavantaṃ etadavoca – ‘‘ahaṃ kho, bhante, dhāremi bhagavatā cattāri ariyasaccāni desitānī’’ti. ‘‘Yathā kathaṃ pana tvaṃ, bhikkhu, dhāresi mayā cattāri ariyasaccāni desitānī’’ti? ‘‘Dukkhaṃ khvāhaṃ, bhante, bhagavatā paṭhamaṃ ariyasaccaṃ desitaṃ dhāremi; dukkhasamudayaṃ khvāhaṃ, bhante, bhagavatā dutiyaṃ ariyasaccaṃ desitaṃ dhāremi; dukkhanirodhaṃ khvāhaṃ, bhante, bhagavatā tatiyaṃ ariyasaccaṃ desitaṃ dhāremi; dukkhanirodhagāminiṃ paṭipadaṃ khvāhaṃ, bhante, bhagavatā catutthaṃ ariyasaccaṃ desitaṃ dhāremi. Evaṃ khvāhaṃ, bhante, dhāremi bhagavatā cattāri ariyasaccāni desitānī’’ti.
‘‘ஸாது⁴ ஸாது⁴, பி⁴க்கு²! ஸாது⁴ கோ² த்வங், பி⁴க்கு², தா⁴ரேஸி மயா சத்தாரி அரியஸச்சானி தே³ஸிதானீதி. து³க்க²ங் கோ², பி⁴க்கு², மயா பட²மங் அரியஸச்சங் தே³ஸிதங், ததா² நங் தா⁴ரேஹி; து³க்க²ஸமுத³யங் 1 கோ², பி⁴க்கு², மயா து³தியங் அரியஸச்சங் தே³ஸிதங், ததா² நங் தா⁴ரேஹி; து³க்க²னிரோத⁴ங் 2 கோ², பி⁴க்கு², மயா ததியங் அரியஸச்சங் தே³ஸிதங், ததா² நங் தா⁴ரேஹி; து³க்க²னிரோத⁴கா³மினீ படிபதா³ 3 கோ², பி⁴க்கு², மயா சதுத்த²ங் அரியஸச்சங் தே³ஸிதங், ததா² நங் தா⁴ரேஹி. ஏவங் கோ², பி⁴க்கு², தா⁴ரேஹி மயா சத்தாரி அரியஸச்சானி தே³ஸிதானீதி.
‘‘Sādhu sādhu, bhikkhu! Sādhu kho tvaṃ, bhikkhu, dhāresi mayā cattāri ariyasaccāni desitānīti. Dukkhaṃ kho, bhikkhu, mayā paṭhamaṃ ariyasaccaṃ desitaṃ, tathā naṃ dhārehi; dukkhasamudayaṃ 4 kho, bhikkhu, mayā dutiyaṃ ariyasaccaṃ desitaṃ, tathā naṃ dhārehi; dukkhanirodhaṃ 5 kho, bhikkhu, mayā tatiyaṃ ariyasaccaṃ desitaṃ, tathā naṃ dhārehi; dukkhanirodhagāminī paṭipadā 6 kho, bhikkhu, mayā catutthaṃ ariyasaccaṃ desitaṃ, tathā naṃ dhārehi. Evaṃ kho, bhikkhu, dhārehi mayā cattāri ariyasaccāni desitānīti.
‘‘தஸ்மாதிஹ , பி⁴க்கு², ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. பஞ்சமங்.
‘‘Tasmātiha , bhikkhu, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Pañcamaṃ.
Footnotes:
