| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. পঠমধারণসুত্তং
5. Paṭhamadhāraṇasuttaṃ
১০৮৫. ‘‘ধারেথ নো তুম্হে, ভিক্খৰে, মযা চত্তারি অরিযসচ্চানি দেসিতানী’’তি? এৰং ৰুত্তে অঞ্ঞতরো ভিক্খু ভগৰন্তং এতদৰোচ – ‘‘অহং খো, ভন্তে, ধারেমি ভগৰতা চত্তারি অরিযসচ্চানি দেসিতানী’’তি। ‘‘যথা কথং পন ত্ৰং, ভিক্খু, ধারেসি মযা চত্তারি অরিযসচ্চানি দেসিতানী’’তি? ‘‘দুক্খং খ্ৰাহং, ভন্তে, ভগৰতা পঠমং অরিযসচ্চং দেসিতং ধারেমি; দুক্খসমুদযং খ্ৰাহং, ভন্তে, ভগৰতা দুতিযং অরিযসচ্চং দেসিতং ধারেমি; দুক্খনিরোধং খ্ৰাহং, ভন্তে, ভগৰতা ততিযং অরিযসচ্চং দেসিতং ধারেমি; দুক্খনিরোধগামিনিং পটিপদং খ্ৰাহং, ভন্তে, ভগৰতা চতুত্থং অরিযসচ্চং দেসিতং ধারেমি। এৰং খ্ৰাহং, ভন্তে, ধারেমি ভগৰতা চত্তারি অরিযসচ্চানি দেসিতানী’’তি।
1085. ‘‘Dhāretha no tumhe, bhikkhave, mayā cattāri ariyasaccāni desitānī’’ti? Evaṃ vutte aññataro bhikkhu bhagavantaṃ etadavoca – ‘‘ahaṃ kho, bhante, dhāremi bhagavatā cattāri ariyasaccāni desitānī’’ti. ‘‘Yathā kathaṃ pana tvaṃ, bhikkhu, dhāresi mayā cattāri ariyasaccāni desitānī’’ti? ‘‘Dukkhaṃ khvāhaṃ, bhante, bhagavatā paṭhamaṃ ariyasaccaṃ desitaṃ dhāremi; dukkhasamudayaṃ khvāhaṃ, bhante, bhagavatā dutiyaṃ ariyasaccaṃ desitaṃ dhāremi; dukkhanirodhaṃ khvāhaṃ, bhante, bhagavatā tatiyaṃ ariyasaccaṃ desitaṃ dhāremi; dukkhanirodhagāminiṃ paṭipadaṃ khvāhaṃ, bhante, bhagavatā catutthaṃ ariyasaccaṃ desitaṃ dhāremi. Evaṃ khvāhaṃ, bhante, dhāremi bhagavatā cattāri ariyasaccāni desitānī’’ti.
‘‘সাধু সাধু, ভিক্খু! সাধু খো ত্ৰং, ভিক্খু, ধারেসি মযা চত্তারি অরিযসচ্চানি দেসিতানীতি। দুক্খং খো, ভিক্খু, মযা পঠমং অরিযসচ্চং দেসিতং, তথা নং ধারেহি; দুক্খসমুদযং 1 খো, ভিক্খু, মযা দুতিযং অরিযসচ্চং দেসিতং, তথা নং ধারেহি; দুক্খনিরোধং 2 খো, ভিক্খু, মযা ততিযং অরিযসচ্চং দেসিতং, তথা নং ধারেহি; দুক্খনিরোধগামিনী পটিপদা 3 খো, ভিক্খু, মযা চতুত্থং অরিযসচ্চং দেসিতং, তথা নং ধারেহি। এৰং খো, ভিক্খু, ধারেহি মযা চত্তারি অরিযসচ্চানি দেসিতানীতি।
‘‘Sādhu sādhu, bhikkhu! Sādhu kho tvaṃ, bhikkhu, dhāresi mayā cattāri ariyasaccāni desitānīti. Dukkhaṃ kho, bhikkhu, mayā paṭhamaṃ ariyasaccaṃ desitaṃ, tathā naṃ dhārehi; dukkhasamudayaṃ 4 kho, bhikkhu, mayā dutiyaṃ ariyasaccaṃ desitaṃ, tathā naṃ dhārehi; dukkhanirodhaṃ 5 kho, bhikkhu, mayā tatiyaṃ ariyasaccaṃ desitaṃ, tathā naṃ dhārehi; dukkhanirodhagāminī paṭipadā 6 kho, bhikkhu, mayā catutthaṃ ariyasaccaṃ desitaṃ, tathā naṃ dhārehi. Evaṃ kho, bhikkhu, dhārehi mayā cattāri ariyasaccāni desitānīti.
‘‘তস্মাতিহ , ভিক্খু, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। পঞ্চমং।
‘‘Tasmātiha , bhikkhu, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Pañcamaṃ.
Footnotes:
