| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯-১০. পঠমদ্ৰযসুত্তাদিৰণ্ণনা
9-10. Paṭhamadvayasuttādivaṇṇanā
৯২-৯৩. দ্ৰযন্তি দুকং। পাল়িযং আমেডিতলোপেন নিদ্দেসোতি আহ ‘‘দ্ৰে দ্ৰে কোট্ঠাসে’’তি। এৰমেতন্তি এৰং অনিচ্চাদিভাৰেন এতং চক্খুরূপঞ্চাতি দ্ৰযং। চলতীতি অনৰট্ঠানেন পচলতি। ব্যথতীতি জরায মরণেন চ পৰেধতি। হেতু চেৰ উপ্পত্তিনিমিত্তত্তা। সহগতীতি সহপ্পৰত্তি, তায গহেতব্বত্তা ‘‘সঙ্গতী’’তি ফস্সো ৰুত্তো। এস নযো সেসপদদ্ৰযেপি। যস্মা চ সংগচ্ছমানধম্মৰিমুত্তা সঙ্গতি নাম নত্থি, তথা সন্নিপাতসমৰাযা, তেসং ৰসেন নিব্বত্তো ফস্সো তথা ৰুচ্চতীতি। তেনাহ ‘‘ইমিনা’’তিআদি।
92-93.Dvayanti dukaṃ. Pāḷiyaṃ āmeḍitalopena niddesoti āha ‘‘dve dve koṭṭhāse’’ti. Evametanti evaṃ aniccādibhāvena etaṃ cakkhurūpañcāti dvayaṃ. Calatīti anavaṭṭhānena pacalati. Byathatīti jarāya maraṇena ca pavedhati. Hetu ceva uppattinimittattā. Sahagatīti sahappavatti, tāya gahetabbattā ‘‘saṅgatī’’ti phasso vutto. Esa nayo sesapadadvayepi. Yasmā ca saṃgacchamānadhammavimuttā saṅgati nāma natthi, tathā sannipātasamavāyā, tesaṃ vasena nibbatto phasso tathā vuccatīti. Tenāha ‘‘iminā’’tiādi.
ৰত্থূতি চক্খু নিস্সযপচ্চযাদিভাৰেন। আরম্মণন্তি রূপং আরম্মণপচ্চযাদিভাৰেন। সহজাতা তযো খন্ধা ৰেদনাদযো, তে সহজাতাদিপচ্চযভাৰেন। অযং হেতূতি অযং তিৰিধো হেতূ। ফস্সেনাতিআদীসু অযং সঙ্খেপত্থো – যস্মা রূপারম্মণে ফস্সে অত্তনো ফুসনকিচ্চং করোন্তে এৰং ৰেদনা অনুভৰনকিচ্চং, সঞ্ঞা সঞ্জাননকিচ্চং করোতি, তস্মা ‘‘ফস্সেন ফুট্ঠমেৰা’’তিআদিৰুত্তমেৰ অত্থং ইদানি পুগ্গলাধিট্ঠানেন দস্সেতুং ‘‘ফুট্ঠো’’তিআদি ৰুত্তং। পঞ্চেৰ খন্ধা ভগৰতা সমতিংসায আকারেহি ৰুত্তা। কস্মাতি আহ ‘‘কথ’’ন্তিআদি। রুক্খসাখাসু রুক্খৰোহারো ৰিয একেকধম্মেপি খন্ধৰোহারো হোতিযেৰ। তেনাহ ভগৰা – ‘‘ৰিঞ্ঞাণং ৰিঞ্ঞাণক্খন্ধো’’তি (যম॰ খন্ধযমক ২)।
Vatthūti cakkhu nissayapaccayādibhāvena. Ārammaṇanti rūpaṃ ārammaṇapaccayādibhāvena. Sahajātā tayo khandhā vedanādayo, te sahajātādipaccayabhāvena. Ayaṃ hetūti ayaṃ tividho hetū. Phassenātiādīsu ayaṃ saṅkhepattho – yasmā rūpārammaṇe phasse attano phusanakiccaṃ karonte evaṃ vedanā anubhavanakiccaṃ, saññā sañjānanakiccaṃ karoti, tasmā ‘‘phassena phuṭṭhamevā’’tiādivuttameva atthaṃ idāni puggalādhiṭṭhānena dassetuṃ ‘‘phuṭṭho’’tiādi vuttaṃ. Pañceva khandhā bhagavatā samatiṃsāya ākārehi vuttā. Kasmāti āha ‘‘katha’’ntiādi. Rukkhasākhāsu rukkhavohāro viya ekekadhammepi khandhavohāro hotiyeva. Tenāha bhagavā – ‘‘viññāṇaṃ viññāṇakkhandho’’ti (yama. khandhayamaka 2).
পঠমদ্ৰযসুত্তাদিৰণ্ণনা নিট্ঠিতা।
Paṭhamadvayasuttādivaṇṇanā niṭṭhitā.
ছন্নৰগ্গৰণ্ণনা নিট্ঠিতা।
Channavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
৯. পঠমদ্ৰযসুত্তং • 9. Paṭhamadvayasuttaṃ
১০. দুতিযদ্ৰযসুত্তং • 10. Dutiyadvayasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯-১০. পঠমদ্ৰযসুত্তাদিৰণ্ণনা • 9-10. Paṭhamadvayasuttādivaṇṇanā
