| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੯-੧੦. ਪਠਮਦ੍વਯਸੁਤ੍ਤਾਦਿવਣ੍ਣਨਾ
9-10. Paṭhamadvayasuttādivaṇṇanā
੯੨-੯੩. ਨવਮੇ ਦ੍વਯਨ੍ਤਿ ਦ੍વੇ ਦ੍વੇ ਕੋਟ੍ਠਾਸੇ। ਦਸਮੇ ਇਤ੍ਥੇਤਂ ਦ੍વਯਨ੍ਤਿ ਏવਮੇਤਂ ਦ੍વਯਂ। ਚਲਞ੍ਚੇવ ਬ੍ਯਥਞ੍ਚਾਤਿ ਅਤ੍ਤਨੋ ਸਭਾવੇਨ ਅਸਣ੍ਠਹਨਤੋ ਚਲਤਿ ਚੇવ ਬ੍ਯਥਤਿ ਚ। ਯੋਪਿ ਹੇਤੁ ਯੋਪਿ ਪਚ੍ਚਯੋਤਿ ਚਕ੍ਖੁવਿਞ੍ਞਾਣਸ੍ਸ વਤ੍ਥਾਰਮ੍ਮਣਂ ਹੇਤੁ ਚੇવ ਪਚ੍ਚਯੋ ਚ। ਕੁਤੋ ਨਿਚ੍ਚਂ ਭવਿਸ੍ਸਤੀਤਿ ਕੇਨ ਕਾਰਣੇਨ ਨਿਚ੍ਚਂ ਭવਿਸ੍ਸਤਿ। ਯਥਾ ਪਨ ਦਾਸਸ੍ਸ ਦਾਸਿਯਾ ਕੁਚ੍ਛਿਸ੍ਮਿਂ ਜਾਤੋ ਪੁਤ੍ਤੋ ਪਰੋવ ਦਾਸੋ ਹੋਤਿ, ਏવਂ ਅਨਿਚ੍ਚਮੇવ ਹੋਤੀਤਿ ਅਤ੍ਥੋ। ਸਙ੍ਗਤੀਤਿ ਸਹਗਤਿ। ਸਨ੍ਨਿਪਾਤੋਤਿ ਏਕਤੋ ਸਨ੍ਨਿਪਤਨਂ। ਸਮવਾਯੋਤਿ ਏਕਤੋ ਸਮਾਗਮੋ। ਅਯਂ વੁਚ੍ਚਤਿ ਚਕ੍ਖੁਸਮ੍ਫਸ੍ਸੋਤਿ ਇਮਿਨਾ ਸਙ੍ਗਤਿਸਨ੍ਨਿਪਾਤਸਮવਾਯਸਙ੍ਖਾਤੇਨ ਪਚ੍ਚਯੇਨ ਉਪ੍ਪਨ੍ਨਤ੍ਤਾ ਪਚ੍ਚਯਨਾਮੇਨੇવ ਸਙ੍ਗਤਿ ਸਨ੍ਨਿਪਾਤੋ ਸਮવਾਯੋਤਿ ਅਯਂ વੁਚ੍ਚਤਿ ਚਕ੍ਖੁਸਮ੍ਫਸ੍ਸੋ।
92-93. Navame dvayanti dve dve koṭṭhāse. Dasame itthetaṃ dvayanti evametaṃ dvayaṃ. Calañceva byathañcāti attano sabhāvena asaṇṭhahanato calati ceva byathati ca. Yopi hetu yopi paccayoti cakkhuviññāṇassa vatthārammaṇaṃ hetu ceva paccayo ca. Kuto niccaṃ bhavissatīti kena kāraṇena niccaṃ bhavissati. Yathā pana dāsassa dāsiyā kucchismiṃ jāto putto parova dāso hoti, evaṃ aniccameva hotīti attho. Saṅgatīti sahagati. Sannipātoti ekato sannipatanaṃ. Samavāyoti ekato samāgamo. Ayaṃ vuccati cakkhusamphassoti iminā saṅgatisannipātasamavāyasaṅkhātena paccayena uppannattā paccayanāmeneva saṅgati sannipāto samavāyoti ayaṃ vuccati cakkhusamphasso.
ਸੋਪਿ ਹੇਤੂਤਿ ਫਸ੍ਸਸ੍ਸ વਤ੍ਥੁ ਆਰਮ੍ਮਣਂ ਸਹਜਾਤਾ ਤਯੋ ਖਨ੍ਧਾਤਿ ਅਯਂ ਹੇਤੁ। ਫੁਟ੍ਠੋਤਿ ਉਪਯੋਗਤ੍ਥੇ ਪਚ੍ਚਤ੍ਤਂ, ਫਸ੍ਸੇਨ ਫੁਟ੍ਠਮੇવ ਗੋਚਰਂ વੇਦਨਾ વੇਦੇਤਿ, ਚੇਤਨਾ ਚੇਤੇਤਿ, ਸਞ੍ਞਾ ਸਞ੍ਜਾਨਾਤੀਤਿ ਅਤ੍ਥੋ। ਫੁਟ੍ਠੋਤਿ વਾ ਫਸ੍ਸਸਮਙ੍ਗੀਪੁਗ੍ਗਲੋ , ਫਸ੍ਸੇਨ ਫੁਟ੍ਠਾਰਮ੍ਮਣਮੇવ વੇਦਨਾਦੀਹਿ વੇਦੇਤਿ ਚੇਤੇਤਿ ਸਞ੍ਜਾਨਾਤੀਤਿਪਿ વੁਤ੍ਤਂ ਹੋਤਿ। ਇਤਿ ਇਮਸ੍ਮਿਂ ਸੁਤ੍ਤੇ ਸਮਤਿਂਸਕ੍ਖਨ੍ਧਾ ਕਥਿਤਾ ਹੋਨ੍ਤਿ। ਕਥਂ? ਚਕ੍ਖੁਦ੍વਾਰੇ ਤਾવ વਤ੍ਥੁ ਚੇવ ਆਰਮ੍ਮਣਞ੍ਚ ਰੂਪਕ੍ਖਨ੍ਧੋ, ਫੁਟ੍ਠੋ વੇਦੇਤੀਤਿ વੇਦਨਾਕ੍ਖਨ੍ਧੋ, ਚੇਤੇਤੀਤਿ ਸਙ੍ਖਾਰਕ੍ਖਨ੍ਧੋ, ਸਞ੍ਜਾਨਾਤੀਤਿ ਸਞ੍ਞਾਕ੍ਖਨ੍ਧੋ, વਿਜਾਨਾਤੀਤਿ વਿਞ੍ਞਾਣਕ੍ਖਨ੍ਧੋਤਿ। ਸੇਸਦ੍વਾਰੇਸੁਪਿ ਏਸੇવ ਨਯੋ। ਮਨੋਦ੍વਾਰੇਪਿ ਹਿ વਤ੍ਥੁਰੂਪਂ ਏਕਨ੍ਤਤੋ ਰੂਪਕ੍ਖਨ੍ਧੋ, ਰੂਪੇ ਪਨ ਆਰਮ੍ਮਣੇ ਸਤਿ ਆਰਮ੍ਮਣਮ੍ਪਿ ਰੂਪਕ੍ਖਨ੍ਧੋਤਿ ਛ ਪਞ੍ਚਕਾਤਿਂਸ ਹੋਨ੍ਤਿ। ਸਙ੍ਖੇਪੇਨ ਪਨੇਤੇ ਛਸੁਪਿ ਦ੍વਾਰੇਸੁ ਪਞ੍ਚੇવ ਖਨ੍ਧਾਤਿ ਸਪਚ੍ਚਯੇ ਪਞ੍ਚਕ੍ਖਨ੍ਧੇ ਅਨਿਚ੍ਚਾਤਿ વਿਤ੍ਥਾਰੇਤ੍વਾ વੁਚ੍ਚਮਾਨੇ ਬੁਜ੍ਝਨਕਾਨਂ ਅਜ੍ਝਾਸਯੇਨ ਇਦਂ ਸੁਤ੍ਤਂ ਦੇਸਿਤਨ੍ਤਿ।
Sopi hetūti phassassa vatthu ārammaṇaṃ sahajātā tayo khandhāti ayaṃ hetu. Phuṭṭhoti upayogatthe paccattaṃ, phassena phuṭṭhameva gocaraṃ vedanā vedeti, cetanā ceteti, saññā sañjānātīti attho. Phuṭṭhoti vā phassasamaṅgīpuggalo , phassena phuṭṭhārammaṇameva vedanādīhi vedeti ceteti sañjānātītipi vuttaṃ hoti. Iti imasmiṃ sutte samatiṃsakkhandhā kathitā honti. Kathaṃ? Cakkhudvāre tāva vatthu ceva ārammaṇañca rūpakkhandho, phuṭṭho vedetīti vedanākkhandho, cetetīti saṅkhārakkhandho, sañjānātīti saññākkhandho, vijānātīti viññāṇakkhandhoti. Sesadvāresupi eseva nayo. Manodvārepi hi vatthurūpaṃ ekantato rūpakkhandho, rūpe pana ārammaṇe sati ārammaṇampi rūpakkhandhoti cha pañcakātiṃsa honti. Saṅkhepena panete chasupi dvāresu pañceva khandhāti sapaccaye pañcakkhandhe aniccāti vitthāretvā vuccamāne bujjhanakānaṃ ajjhāsayena idaṃ suttaṃ desitanti.
ਛਨ੍ਨવਗ੍ਗੋ ਨવਮੋ।
Channavaggo navamo.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya
੯. ਪਠਮਦ੍વਯਸੁਤ੍ਤਂ • 9. Paṭhamadvayasuttaṃ
੧੦. ਦੁਤਿਯਦ੍વਯਸੁਤ੍ਤਂ • 10. Dutiyadvayasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੯-੧੦. ਪਠਮਦ੍વਯਸੁਤ੍ਤਾਦਿવਣ੍ਣਨਾ • 9-10. Paṭhamadvayasuttādivaṇṇanā
