| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. து³தியபண்ணாஸகங்
2. Dutiyapaṇṇāsakaṃ
(6) 1. ப்³ராஹ்மணவக்³கோ³
(6) 1. Brāhmaṇavaggo
1. பட²மத்³வெப்³ராஹ்மணஸுத்தவண்ணனா
1. Paṭhamadvebrāhmaṇasuttavaṇṇanā
52. ப்³ராஹ்மணவக்³க³ஸ்ஸ பட²மே ஜிண்ணாதி ஜராஜிண்ணா. வுத்³தா⁴தி வயோவுத்³தா⁴. மஹல்லகாதி ஜாதிமஹல்லகா. அத்³த⁴க³தாதி தயோ அத்³தே⁴ அதிக்கந்தா. வயோஅனுப்பத்தாதி ததியங் வயங் அனுப்பத்தா. யேன ப⁴க³வா தேனுபஸங்கமிங்ஸூதி புத்ததா³ரே அத்தனோ வசனங் அகரொந்தே தி³ஸ்வா ‘‘ஸமணஸ்ஸ கோ³தமஸ்ஸ ஸந்திகங் க³ந்த்வா நிய்யானிகமக்³க³ங் க³வேஸிஸ்ஸாமா’’தி சிந்தெத்வா உபஸங்கமிங்ஸு. மயமஸ்ஸு, போ⁴ கோ³தம, ப்³ராஹ்மணாதி; போ⁴ கோ³தம, மயங் ப்³ராஹ்மணா ந க²த்தியா நாமச்சா ந க³ஹபதிகாதி ப்³ராஹ்மணபா⁴வங் ஜானாபெத்வா ஜிண்ணாதிஆதி³மாஹங்ஸு. அகதபீ⁴ருத்தாணாதி அகதப⁴யபரித்தாணா. அவஸ்ஸயபூ⁴தங் பதிட்டா²கம்மங் அம்ஹேஹி ந கதந்தி த³ஸ்ஸெந்தி. தக்³கா⁴தி ஏகங்ஸத்தே² நிபாதோ, ஸம்படிச்ச²னத்தே² வா. ஏகந்தேன தும்ஹே ஏவரூபா, அஹம்பி கோ² ஏதங் ஸம்படிச்சா²மீதி ச த³ஸ்ஸேதி. உபனீயதீதி உபஸங்ஹரீயதி. அயங் ஹி ஜாதியா ஜரங் உபனீயதி, ஜராய ப்³யாதி⁴ங், ப்³யாதி⁴னா மரணங், மரணேன புன ஜாதிங். தேன வுத்தங் – ‘‘உபனீயதீ’’தி.
52. Brāhmaṇavaggassa paṭhame jiṇṇāti jarājiṇṇā. Vuddhāti vayovuddhā. Mahallakāti jātimahallakā. Addhagatāti tayo addhe atikkantā. Vayoanuppattāti tatiyaṃ vayaṃ anuppattā. Yena bhagavā tenupasaṅkamiṃsūti puttadāre attano vacanaṃ akaronte disvā ‘‘samaṇassa gotamassa santikaṃ gantvā niyyānikamaggaṃ gavesissāmā’’ti cintetvā upasaṅkamiṃsu. Mayamassu, bho gotama, brāhmaṇāti; bho gotama, mayaṃ brāhmaṇā na khattiyā nāmaccā na gahapatikāti brāhmaṇabhāvaṃ jānāpetvā jiṇṇātiādimāhaṃsu. Akatabhīruttāṇāti akatabhayaparittāṇā. Avassayabhūtaṃ patiṭṭhākammaṃ amhehi na katanti dassenti. Tagghāti ekaṃsatthe nipāto, sampaṭicchanatthe vā. Ekantena tumhe evarūpā, ahampi kho etaṃ sampaṭicchāmīti ca dasseti. Upanīyatīti upasaṃharīyati. Ayaṃ hi jātiyā jaraṃ upanīyati, jarāya byādhiṃ, byādhinā maraṇaṃ, maraṇena puna jātiṃ. Tena vuttaṃ – ‘‘upanīyatī’’ti.
இதா³னி யஸ்மா தே ப்³ராஹ்மணா மஹல்லகத்தா பப்³ப³ஜித்வாபி வத்தங் பூரேதுங் ந ஸக்கி²ஸ்ஸந்தி, தஸ்மா நே பஞ்சஸு ஸீலேஸு பதிட்டா²பெந்தோ ப⁴க³வா யோத⁴ காயேன ஸங்யமோதிஆதி³மாஹ. தத்த² காயேன ஸங்யமோதி காயத்³வாரேன ஸங்வரோ. ஸேஸேஸுபி ஏஸேவ நயோ. தங் தஸ்ஸ பேதஸ்ஸாதி தங் புஞ்ஞங் தஸ்ஸ பரலோகங் க³தஸ்ஸ தாயனட்டே²ன தாணங், நிலீயனட்டே²ன லேணங், பதிட்டா²னட்டே²ன தீ³போ, அவஸ்ஸயனட்டே²ன ஸரணங், உத்தமக³திவஸேன பராயணஞ்ச ஹோதீதி த³ஸ்ஸேதி. கா³தா² உத்தானத்தா²யேவ. ஏவங் தே ப்³ராஹ்மணா ததா²க³தேன பஞ்சஸு ஸீலேஸு ஸமாத³பிதா யாவஜீவங் பஞ்ச ஸீலானி ரக்கி²த்வா ஸக்³கே³ நிப்³ப³த்திங்ஸு.
Idāni yasmā te brāhmaṇā mahallakattā pabbajitvāpi vattaṃ pūretuṃ na sakkhissanti, tasmā ne pañcasu sīlesu patiṭṭhāpento bhagavā yodha kāyena saṃyamotiādimāha. Tattha kāyena saṃyamoti kāyadvārena saṃvaro. Sesesupi eseva nayo. Taṃ tassa petassāti taṃ puññaṃ tassa paralokaṃ gatassa tāyanaṭṭhena tāṇaṃ, nilīyanaṭṭhena leṇaṃ, patiṭṭhānaṭṭhena dīpo, avassayanaṭṭhena saraṇaṃ, uttamagativasena parāyaṇañca hotīti dasseti. Gāthā uttānatthāyeva. Evaṃ te brāhmaṇā tathāgatena pañcasu sīlesu samādapitā yāvajīvaṃ pañca sīlāni rakkhitvā sagge nibbattiṃsu.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. பட²மத்³வெப்³ராஹ்மணஸுத்தங் • 1. Paṭhamadvebrāhmaṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. பட²மத்³வெப்³ராஹ்மணஸுத்தவண்ணனா • 1. Paṭhamadvebrāhmaṇasuttavaṇṇanā
