| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
২. দুতিযপণ্ণাসকং
2. Dutiyapaṇṇāsakaṃ
(৬) ১. ব্রাহ্মণৰগ্গো
(6) 1. Brāhmaṇavaggo
১. পঠমদ্ৰেব্রাহ্মণসুত্তৰণ্ণনা
1. Paṭhamadvebrāhmaṇasuttavaṇṇanā
৫২. ব্রাহ্মণৰগ্গস্স পঠমে জিণ্ণাতি জরাজিণ্ণা। ৰুদ্ধাতি ৰযোৰুদ্ধা। মহল্লকাতি জাতিমহল্লকা। অদ্ধগতাতি তযো অদ্ধে অতিক্কন্তা। ৰযোঅনুপ্পত্তাতি ততিযং ৰযং অনুপ্পত্তা। যেন ভগৰা তেনুপসঙ্কমিংসূতি পুত্তদারে অত্তনো ৰচনং অকরোন্তে দিস্ৰা ‘‘সমণস্স গোতমস্স সন্তিকং গন্ত্ৰা নিয্যানিকমগ্গং গৰেসিস্সামা’’তি চিন্তেত্ৰা উপসঙ্কমিংসু। মযমস্সু, ভো গোতম, ব্রাহ্মণাতি; ভো গোতম, মযং ব্রাহ্মণা ন খত্তিযা নামচ্চা ন গহপতিকাতি ব্রাহ্মণভাৰং জানাপেত্ৰা জিণ্ণাতিআদিমাহংসু। অকতভীরুত্তাণাতি অকতভযপরিত্তাণা। অৰস্সযভূতং পতিট্ঠাকম্মং অম্হেহি ন কতন্তি দস্সেন্তি। তগ্ঘাতি একংসত্থে নিপাতো, সম্পটিচ্ছনত্থে ৰা। একন্তেন তুম্হে এৰরূপা, অহম্পি খো এতং সম্পটিচ্ছামীতি চ দস্সেতি। উপনীযতীতি উপসংহরীযতি। অযং হি জাতিযা জরং উপনীযতি, জরায ব্যাধিং, ব্যাধিনা মরণং, মরণেন পুন জাতিং। তেন ৰুত্তং – ‘‘উপনীযতী’’তি।
52. Brāhmaṇavaggassa paṭhame jiṇṇāti jarājiṇṇā. Vuddhāti vayovuddhā. Mahallakāti jātimahallakā. Addhagatāti tayo addhe atikkantā. Vayoanuppattāti tatiyaṃ vayaṃ anuppattā. Yena bhagavā tenupasaṅkamiṃsūti puttadāre attano vacanaṃ akaronte disvā ‘‘samaṇassa gotamassa santikaṃ gantvā niyyānikamaggaṃ gavesissāmā’’ti cintetvā upasaṅkamiṃsu. Mayamassu, bho gotama, brāhmaṇāti; bho gotama, mayaṃ brāhmaṇā na khattiyā nāmaccā na gahapatikāti brāhmaṇabhāvaṃ jānāpetvā jiṇṇātiādimāhaṃsu. Akatabhīruttāṇāti akatabhayaparittāṇā. Avassayabhūtaṃ patiṭṭhākammaṃ amhehi na katanti dassenti. Tagghāti ekaṃsatthe nipāto, sampaṭicchanatthe vā. Ekantena tumhe evarūpā, ahampi kho etaṃ sampaṭicchāmīti ca dasseti. Upanīyatīti upasaṃharīyati. Ayaṃ hi jātiyā jaraṃ upanīyati, jarāya byādhiṃ, byādhinā maraṇaṃ, maraṇena puna jātiṃ. Tena vuttaṃ – ‘‘upanīyatī’’ti.
ইদানি যস্মা তে ব্রাহ্মণা মহল্লকত্তা পব্বজিত্ৰাপি ৰত্তং পূরেতুং ন সক্খিস্সন্তি, তস্মা নে পঞ্চসু সীলেসু পতিট্ঠাপেন্তো ভগৰা যোধ কাযেন সংযমোতিআদিমাহ। তত্থ কাযেন সংযমোতি কাযদ্ৰারেন সংৰরো। সেসেসুপি এসেৰ নযো। তং তস্স পেতস্সাতি তং পুঞ্ঞং তস্স পরলোকং গতস্স তাযনট্ঠেন তাণং, নিলীযনট্ঠেন লেণং, পতিট্ঠানট্ঠেন দীপো, অৰস্সযনট্ঠেন সরণং, উত্তমগতিৰসেন পরাযণঞ্চ হোতীতি দস্সেতি। গাথা উত্তানত্থাযেৰ। এৰং তে ব্রাহ্মণা তথাগতেন পঞ্চসু সীলেসু সমাদপিতা যাৰজীৰং পঞ্চ সীলানি রক্খিত্ৰা সগ্গে নিব্বত্তিংসু।
Idāni yasmā te brāhmaṇā mahallakattā pabbajitvāpi vattaṃ pūretuṃ na sakkhissanti, tasmā ne pañcasu sīlesu patiṭṭhāpento bhagavā yodha kāyena saṃyamotiādimāha. Tattha kāyena saṃyamoti kāyadvārena saṃvaro. Sesesupi eseva nayo. Taṃ tassa petassāti taṃ puññaṃ tassa paralokaṃ gatassa tāyanaṭṭhena tāṇaṃ, nilīyanaṭṭhena leṇaṃ, patiṭṭhānaṭṭhena dīpo, avassayanaṭṭhena saraṇaṃ, uttamagativasena parāyaṇañca hotīti dasseti. Gāthā uttānatthāyeva. Evaṃ te brāhmaṇā tathāgatena pañcasu sīlesu samādapitā yāvajīvaṃ pañca sīlāni rakkhitvā sagge nibbattiṃsu.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. পঠমদ্ৰেব্রাহ্মণসুত্তং • 1. Paṭhamadvebrāhmaṇasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১. পঠমদ্ৰেব্রাহ্মণসুত্তৰণ্ণনা • 1. Paṭhamadvebrāhmaṇasuttavaṇṇanā
