| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
២. ទុតិយបណ្ណាសកំ
2. Dutiyapaṇṇāsakaṃ
(៦) ១. ព្រាហ្មណវគ្គោ
(6) 1. Brāhmaṇavaggo
១. បឋមទ្វេព្រាហ្មណសុត្តវណ្ណនា
1. Paṭhamadvebrāhmaṇasuttavaṇṇanā
៥២. ព្រាហ្មណវគ្គស្ស បឋមេ ជិណ្ណាតិ ជរាជិណ្ណា។ វុទ្ធាតិ វយោវុទ្ធា។ មហល្លកាតិ ជាតិមហល្លកា។ អទ្ធគតាតិ តយោ អទ្ធេ អតិក្កន្តា។ វយោអនុប្បត្តាតិ តតិយំ វយំ អនុប្បត្តា។ យេន ភគវា តេនុបសង្កមិំសូតិ បុត្តទារេ អត្តនោ វចនំ អករោន្តេ ទិស្វា ‘‘សមណស្ស គោតមស្ស សន្តិកំ គន្ត្វា និយ្យានិកមគ្គំ គវេសិស្សាមា’’តិ ចិន្តេត្វា ឧបសង្កមិំសុ។ មយមស្សុ, ភោ គោតម, ព្រាហ្មណាតិ; ភោ គោតម, មយំ ព្រាហ្មណា ន ខត្តិយា នាមច្ចា ន គហបតិកាតិ ព្រាហ្មណភាវំ ជានាបេត្វា ជិណ្ណាតិអាទិមាហំសុ។ អកតភីរុត្តាណាតិ អកតភយបរិត្តាណា។ អវស្សយភូតំ បតិដ្ឋាកម្មំ អម្ហេហិ ន កតន្តិ ទស្សេន្តិ។ តគ្ឃាតិ ឯកំសត្ថេ និបាតោ, សម្បដិច្ឆនត្ថេ វា។ ឯកន្តេន តុម្ហេ ឯវរូបា, អហម្បិ ខោ ឯតំ សម្បដិច្ឆាមីតិ ច ទស្សេតិ។ ឧបនីយតីតិ ឧបសំហរីយតិ។ អយំ ហិ ជាតិយា ជរំ ឧបនីយតិ, ជរាយ ព្យាធិំ, ព្យាធិនា មរណំ, មរណេន បុន ជាតិំ។ តេន វុត្តំ – ‘‘ឧបនីយតី’’តិ។
52. Brāhmaṇavaggassa paṭhame jiṇṇāti jarājiṇṇā. Vuddhāti vayovuddhā. Mahallakāti jātimahallakā. Addhagatāti tayo addhe atikkantā. Vayoanuppattāti tatiyaṃ vayaṃ anuppattā. Yena bhagavā tenupasaṅkamiṃsūti puttadāre attano vacanaṃ akaronte disvā ‘‘samaṇassa gotamassa santikaṃ gantvā niyyānikamaggaṃ gavesissāmā’’ti cintetvā upasaṅkamiṃsu. Mayamassu, bho gotama, brāhmaṇāti; bho gotama, mayaṃ brāhmaṇā na khattiyā nāmaccā na gahapatikāti brāhmaṇabhāvaṃ jānāpetvā jiṇṇātiādimāhaṃsu. Akatabhīruttāṇāti akatabhayaparittāṇā. Avassayabhūtaṃ patiṭṭhākammaṃ amhehi na katanti dassenti. Tagghāti ekaṃsatthe nipāto, sampaṭicchanatthe vā. Ekantena tumhe evarūpā, ahampi kho etaṃ sampaṭicchāmīti ca dasseti. Upanīyatīti upasaṃharīyati. Ayaṃ hi jātiyā jaraṃ upanīyati, jarāya byādhiṃ, byādhinā maraṇaṃ, maraṇena puna jātiṃ. Tena vuttaṃ – ‘‘upanīyatī’’ti.
ឥទានិ យស្មា តេ ព្រាហ្មណា មហល្លកត្តា បព្ពជិត្វាបិ វត្តំ បូរេតុំ ន សក្ខិស្សន្តិ, តស្មា នេ បញ្ចសុ សីលេសុ បតិដ្ឋាបេន្តោ ភគវា យោធ កាយេន សំយមោតិអាទិមាហ។ តត្ថ កាយេន សំយមោតិ កាយទ្វារេន សំវរោ។ សេសេសុបិ ឯសេវ នយោ។ តំ តស្ស បេតស្សាតិ តំ បុញ្ញំ តស្ស បរលោកំ គតស្ស តាយនដ្ឋេន តាណំ, និលីយនដ្ឋេន លេណំ, បតិដ្ឋានដ្ឋេន ទីបោ, អវស្សយនដ្ឋេន សរណំ, ឧត្តមគតិវសេន បរាយណញ្ច ហោតីតិ ទស្សេតិ។ គាថា ឧត្តានត្ថាយេវ។ ឯវំ តេ ព្រាហ្មណា តថាគតេន បញ្ចសុ សីលេសុ សមាទបិតា យាវជីវំ បញ្ច សីលានិ រក្ខិត្វា សគ្គេ និព្ពត្តិំសុ។
Idāni yasmā te brāhmaṇā mahallakattā pabbajitvāpi vattaṃ pūretuṃ na sakkhissanti, tasmā ne pañcasu sīlesu patiṭṭhāpento bhagavā yodha kāyena saṃyamotiādimāha. Tattha kāyena saṃyamoti kāyadvārena saṃvaro. Sesesupi eseva nayo. Taṃ tassa petassāti taṃ puññaṃ tassa paralokaṃ gatassa tāyanaṭṭhena tāṇaṃ, nilīyanaṭṭhena leṇaṃ, patiṭṭhānaṭṭhena dīpo, avassayanaṭṭhena saraṇaṃ, uttamagativasena parāyaṇañca hotīti dasseti. Gāthā uttānatthāyeva. Evaṃ te brāhmaṇā tathāgatena pañcasu sīlesu samādapitā yāvajīvaṃ pañca sīlāni rakkhitvā sagge nibbattiṃsu.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១. បឋមទ្វេព្រាហ្មណសុត្តំ • 1. Paṭhamadvebrāhmaṇasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១. បឋមទ្វេព្រាហ្មណសុត្តវណ្ណនា • 1. Paṭhamadvebrāhmaṇasuttavaṇṇanā
