| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၂. ဒုတိယပဏ္ဏာသကံ
2. Dutiyapaṇṇāsakaṃ
(၆) ၁. ဗ္ရာဟ္မဏဝဂ္ဂော
(6) 1. Brāhmaṇavaggo
၁. ပဌမဒ္ဝေဗ္ရာဟ္မဏသုတ္တဝဏ္ဏနာ
1. Paṭhamadvebrāhmaṇasuttavaṇṇanā
၅၂. ဗ္ရာဟ္မဏဝဂ္ဂသ္သ ပဌမေ ဇိဏ္ဏာတိ ဇရာဇိဏ္ဏာ။ ဝုဒ္ဓာတိ ဝယောဝုဒ္ဓာ။ မဟလ္လကာတိ ဇာတိမဟလ္လကာ။ အဒ္ဓဂတာတိ တယော အဒ္ဓေ အတိက္ကန္တာ။ ဝယောအနုပ္ပတ္တာတိ တတိယံ ဝယံ အနုပ္ပတ္တာ။ ယေန ဘဂဝာ တေနုပသင္ကမိံသူတိ ပုတ္တဒာရေ အတ္တနော ဝစနံ အကရောန္တေ ဒိသ္ဝာ ‘‘သမဏသ္သ ဂောတမသ္သ သန္တိကံ ဂန္တ္ဝာ နိယ္ယာနိကမဂ္ဂံ ဂဝေသိသ္သာမာ’’တိ စိန္တေတ္ဝာ ဥပသင္ကမိံသု။ မယမသ္သု, ဘော ဂောတမ, ဗ္ရာဟ္မဏာတိ; ဘော ဂောတမ, မယံ ဗ္ရာဟ္မဏာ န ခတ္တိယာ နာမစ္စာ န ဂဟပတိကာတိ ဗ္ရာဟ္မဏဘာဝံ ဇာနာပေတ္ဝာ ဇိဏ္ဏာတိအာဒိမာဟံသု။ အကတဘီရုတ္တာဏာတိ အကတဘယပရိတ္တာဏာ။ အဝသ္သယဘူတံ ပတိဋ္ဌာကမ္မံ အမ္ဟေဟိ န ကတန္တိ ဒသ္သေန္တိ။ တဂ္ဃာတိ ဧကံသတ္ထေ နိပာတော, သမ္ပဋိစ္ဆနတ္ထေ ဝာ။ ဧကန္တေန တုမ္ဟေ ဧဝရူပာ, အဟမ္ပိ ခော ဧတံ သမ္ပဋိစ္ဆာမီတိ စ ဒသ္သေတိ။ ဥပနီယတီတိ ဥပသံဟရီယတိ။ အယံ ဟိ ဇာတိယာ ဇရံ ဥပနီယတိ, ဇရာယ ဗ္ယာဓိံ, ဗ္ယာဓိနာ မရဏံ, မရဏေန ပုန ဇာတိံ။ တေန ဝုတ္တံ – ‘‘ဥပနီယတီ’’တိ။
52. Brāhmaṇavaggassa paṭhame jiṇṇāti jarājiṇṇā. Vuddhāti vayovuddhā. Mahallakāti jātimahallakā. Addhagatāti tayo addhe atikkantā. Vayoanuppattāti tatiyaṃ vayaṃ anuppattā. Yena bhagavā tenupasaṅkamiṃsūti puttadāre attano vacanaṃ akaronte disvā ‘‘samaṇassa gotamassa santikaṃ gantvā niyyānikamaggaṃ gavesissāmā’’ti cintetvā upasaṅkamiṃsu. Mayamassu, bho gotama, brāhmaṇāti; bho gotama, mayaṃ brāhmaṇā na khattiyā nāmaccā na gahapatikāti brāhmaṇabhāvaṃ jānāpetvā jiṇṇātiādimāhaṃsu. Akatabhīruttāṇāti akatabhayaparittāṇā. Avassayabhūtaṃ patiṭṭhākammaṃ amhehi na katanti dassenti. Tagghāti ekaṃsatthe nipāto, sampaṭicchanatthe vā. Ekantena tumhe evarūpā, ahampi kho etaṃ sampaṭicchāmīti ca dasseti. Upanīyatīti upasaṃharīyati. Ayaṃ hi jātiyā jaraṃ upanīyati, jarāya byādhiṃ, byādhinā maraṇaṃ, maraṇena puna jātiṃ. Tena vuttaṃ – ‘‘upanīyatī’’ti.
ဣဒာနိ ယသ္မာ တေ ဗ္ရာဟ္မဏာ မဟလ္လကတ္တာ ပဗ္ဗဇိတ္ဝာပိ ဝတ္တံ ပူရေတုံ န သက္ခိသ္သန္တိ, တသ္မာ နေ ပဉ္စသု သီလေသု ပတိဋ္ဌာပေန္တော ဘဂဝာ ယောဓ ကာယေန သံယမောတိအာဒိမာဟ။ တတ္ထ ကာယေန သံယမောတိ ကာယဒ္ဝာရေန သံဝရော။ သေသေသုပိ ဧသေဝ နယော။ တံ တသ္သ ပေတသ္သာတိ တံ ပုညံ တသ္သ ပရလောကံ ဂတသ္သ တာယနဋ္ဌေန တာဏံ, နိလီယနဋ္ဌေန လေဏံ, ပတိဋ္ဌာနဋ္ဌေန ဒီပော, အဝသ္သယနဋ္ဌေန သရဏံ, ဥတ္တမဂတိဝသေန ပရာယဏဉ္စ ဟောတီတိ ဒသ္သေတိ။ ဂာထာ ဥတ္တာနတ္ထာယေဝ။ ဧဝံ တေ ဗ္ရာဟ္မဏာ တထာဂတေန ပဉ္စသု သီလေသု သမာဒပိတာ ယာဝဇီဝံ ပဉ္စ သီလာနိ ရက္ခိတ္ဝာ သဂ္ဂေ နိဗ္ဗတ္တိံသု။
Idāni yasmā te brāhmaṇā mahallakattā pabbajitvāpi vattaṃ pūretuṃ na sakkhissanti, tasmā ne pañcasu sīlesu patiṭṭhāpento bhagavā yodha kāyena saṃyamotiādimāha. Tattha kāyena saṃyamoti kāyadvārena saṃvaro. Sesesupi eseva nayo. Taṃ tassa petassāti taṃ puññaṃ tassa paralokaṃ gatassa tāyanaṭṭhena tāṇaṃ, nilīyanaṭṭhena leṇaṃ, patiṭṭhānaṭṭhena dīpo, avassayanaṭṭhena saraṇaṃ, uttamagativasena parāyaṇañca hotīti dasseti. Gāthā uttānatthāyeva. Evaṃ te brāhmaṇā tathāgatena pañcasu sīlesu samādapitā yāvajīvaṃ pañca sīlāni rakkhitvā sagge nibbattiṃsu.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. ပဌမဒ္ဝေဗ္ရာဟ္မဏသုတ္တံ • 1. Paṭhamadvebrāhmaṇasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. ပဌမဒ္ဝေဗ္ရာဟ္မဏသုတ္တဝဏ္ဏနာ • 1. Paṭhamadvebrāhmaṇasuttavaṇṇanā
