| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၂. ဒုတိယပဏ္ဏာသကံ
2. Dutiyapaṇṇāsakaṃ
(၆) ၁. ဗ္ရာဟ္မဏဝဂ္ဂော
(6) 1. Brāhmaṇavaggo
၁. ပဌမဒ္ဝေဗ္ရာဟ္မဏသုတ္တဝဏ္ဏနာ
1. Paṭhamadvebrāhmaṇasuttavaṇṇanā
၅၂. ဗ္ရာဟ္မဏဝဂ္ဂသ္သ ပဌမေ ဇရာဇိဏ္ဏာတိ ဇရာဝသေန ဇိဏ္ဏာ, န ဗ္ယာဓိအာဒီနံ ဝသေန ဇိဏ္ဏသဒိသတ္တာ ဇိဏ္ဏာ။ ဝယောဝုဒ္ဓာတိ ဝယသော ဝုဒ္ဓိပ္ပတ္တိယာ ဝုဒ္ဓာ, န သီလာဒိဝုဒ္ဓိယာ။ ဇာတိမဟလ္လကာတိ ဇာတိယာ မဟန္တတာယ စိရရတ္တညုတာယ ဇာတိမဟလ္လကာ။ တယော အဒ္ဓေ အတိက္ကန္တာတိ ပဌမော, မဇ္ဈိမော, ပစ္ဆိမောတိ တယော အဒ္ဓေ အတီတာ။ တတိယံ ဝယံ အနုပ္ပတ္တာတိ တတော ဧဝ ပစ္ဆိမံ ဝယံ အနုပ္ပတ္တာ။ အကတဘယပရိတ္တာဏာတိ ဧတ္ထ ဘယပရိတ္တာဏန္တိ ဒုဂ္ဂတိဘယတော ပရိတ္တာယကံ ပုညံ, တံ အကတံ ဧတေဟီတိ အကတဘယပရိတ္တာဏာ။ ပတိဋ္ဌာကမ္မန္တိ သုဂတိသင္ခာတပ္ပတိဋ္ဌာဝဟံ ကမ္မံ။ ဥပသံဟရီယတီတိ သမ္ပာပီယတိ။ ‘‘ဥပနီယတီ’’တိ ဝုတ္တံ, ကိံ ကေန ဥပနီယတီတိ အာဟ ‘‘အယဉ္ဟိ ဇာတိယာ ဇရံ ဥပနီယတီ’’တိအာဒိ။ အယန္တိ လောကော။ ဇာတော န ဇာတဘာဝေနေဝ တိဋ္ဌတိ, အထ ခော တတော ပရံ ဇရံ ပာပီယတိ, ဇရာယ ဗ္ယာဓိံ ပာပီယတိ။ ဧဝံ ပရတော ပရံ ဒုက္ခမေဝ ဥပနီယတိ။
52. Brāhmaṇavaggassa paṭhame jarājiṇṇāti jarāvasena jiṇṇā, na byādhiādīnaṃ vasena jiṇṇasadisattā jiṇṇā. Vayovuddhāti vayaso vuddhippattiyā vuddhā, na sīlādivuddhiyā. Jātimahallakāti jātiyā mahantatāya cirarattaññutāya jātimahallakā. Tayo addhe atikkantāti paṭhamo, majjhimo, pacchimoti tayo addhe atītā. Tatiyaṃ vayaṃ anuppattāti tato eva pacchimaṃ vayaṃ anuppattā. Akatabhayaparittāṇāti ettha bhayaparittāṇanti duggatibhayato parittāyakaṃ puññaṃ, taṃ akataṃ etehīti akatabhayaparittāṇā. Patiṭṭhākammanti sugatisaṅkhātappatiṭṭhāvahaṃ kammaṃ. Upasaṃharīyatīti sampāpīyati. ‘‘Upanīyatī’’ti vuttaṃ, kiṃ kena upanīyatīti āha ‘‘ayañhi jātiyā jaraṃ upanīyatī’’tiādi. Ayanti loko. Jāto na jātabhāveneva tiṭṭhati, atha kho tato paraṃ jaraṃ pāpīyati, jarāya byādhiṃ pāpīyati. Evaṃ parato paraṃ dukkhameva upanīyati.
တာယနဋ္ဌေနာတိ ရက္ခနဋ္ဌေန။ နိလီယနဋ္ဌေနာတိ နိလီနဋ္ဌာနဘာဝေန။ ပတိဋ္ဌာနဋ္ဌေနာတိ ပတိဋ္ဌာနဘာဝေန။ အဝသ္သယနဋ္ဌေနာတိ အဝသ္သယိတဗ္ဗဘာဝေန။ ဥတ္တမဂတိဝသေနာတိ ပရမဂတိဘာဝေန။
Tāyanaṭṭhenāti rakkhanaṭṭhena. Nilīyanaṭṭhenāti nilīnaṭṭhānabhāvena. Patiṭṭhānaṭṭhenāti patiṭṭhānabhāvena. Avassayanaṭṭhenāti avassayitabbabhāvena. Uttamagativasenāti paramagatibhāvena.
ပဌမဒ္ဝေဗ္ရာဟ္မဏသုတ္တဝဏ္ဏနာ နိဋ္ဌိတာ။
Paṭhamadvebrāhmaṇasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. ပဌမဒ္ဝေဗ္ရာဟ္မဏသုတ္တံ • 1. Paṭhamadvebrāhmaṇasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁. ပဌမဒ္ဝေဗ္ရာဟ္မဏသုတ္တဝဏ္ဏနာ • 1. Paṭhamadvebrāhmaṇasuttavaṇṇanā
