| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
2. දුතියපණ්‌ණාසකං
2. Dutiyapaṇṇāsakaṃ
(6) 1. බ්‍රාහ්‌මණවග්‌ගො
(6) 1. Brāhmaṇavaggo
1. පඨමද්‌වෙබ්‍රාහ්‌මණසුත්‌තවණ්‌ණනා
1. Paṭhamadvebrāhmaṇasuttavaṇṇanā
52. බ්‍රාහ්‌මණවග්‌ගස්‌ස පඨමෙ ජරාජිණ්‌ණාති ජරාවසෙන ජිණ්‌ණා, න බ්‍යාධිආදීනං වසෙන ජිණ්‌ණසදිසත්‌තා ජිණ්‌ණා. වයොවුද්‌ධාති වයසො වුද්‌ධිප්‌පත්‌තියා වුද්‌ධා, න සීලාදිවුද්‌ධියා. ජාතිමහල්‌ලකාති ජාතියා මහන්‌තතාය චිරරත්‌තඤ්‌ඤුතාය ජාතිමහල්‌ලකා. තයො අද්‌ධෙ අතික්‌කන්‌තාති පඨමො, මජ්‌ඣිමො, පච්‌ඡිමොති තයො අද්‌ධෙ අතීතා. තතියං වයං අනුප්‌පත්‌තාති තතො එව පච්‌ඡිමං වයං අනුප්‌පත්‌තා. අකතභයපරිත්‌තාණාති එත්‌ථ භයපරිත්‌තාණන්‌ති දුග්‌ගතිභයතො පරිත්‌තායකං පුඤ්‌ඤං, තං අකතං එතෙහීති අකතභයපරිත්‌තාණා. පතිට්‌ඨාකම්‌මන්‌ති සුගතිසඞ්‌ඛාතප්‌පතිට්‌ඨාවහං කම්‌මං. උපසංහරීයතීති සම්‌පාපීයති. ‘‘උපනීයතී’’ති වුත්‌තං, කිං කෙන උපනීයතීති ආහ ‘‘අයඤ්‌හි ජාතියා ජරං උපනීයතී’’තිආදි. අයන්‌ති ලොකො. ජාතො න ජාතභාවෙනෙව තිට්‌ඨති, අථ ඛො තතො පරං ජරං පාපීයති, ජරාය බ්‍යාධිං පාපීයති. එවං පරතො පරං දුක්‌ඛමෙව උපනීයති.
52. Brāhmaṇavaggassa paṭhame jarājiṇṇāti jarāvasena jiṇṇā, na byādhiādīnaṃ vasena jiṇṇasadisattā jiṇṇā. Vayovuddhāti vayaso vuddhippattiyā vuddhā, na sīlādivuddhiyā. Jātimahallakāti jātiyā mahantatāya cirarattaññutāya jātimahallakā. Tayo addhe atikkantāti paṭhamo, majjhimo, pacchimoti tayo addhe atītā. Tatiyaṃ vayaṃ anuppattāti tato eva pacchimaṃ vayaṃ anuppattā. Akatabhayaparittāṇāti ettha bhayaparittāṇanti duggatibhayato parittāyakaṃ puññaṃ, taṃ akataṃ etehīti akatabhayaparittāṇā. Patiṭṭhākammanti sugatisaṅkhātappatiṭṭhāvahaṃ kammaṃ. Upasaṃharīyatīti sampāpīyati. ‘‘Upanīyatī’’ti vuttaṃ, kiṃ kena upanīyatīti āha ‘‘ayañhi jātiyā jaraṃ upanīyatī’’tiādi. Ayanti loko. Jāto na jātabhāveneva tiṭṭhati, atha kho tato paraṃ jaraṃ pāpīyati, jarāya byādhiṃ pāpīyati. Evaṃ parato paraṃ dukkhameva upanīyati.
තායනට්‌ඨෙනාති රක්‌ඛනට්‌ඨෙන. නිලීයනට්‌ඨෙනාති නිලීනට්‌ඨානභාවෙන. පතිට්‌ඨානට්‌ඨෙනාති පතිට්‌ඨානභාවෙන. අවස්‌සයනට්‌ඨෙනාති අවස්‌සයිතබ්‌බභාවෙන. උත්‌තමගතිවසෙනාති පරමගතිභාවෙන.
Tāyanaṭṭhenāti rakkhanaṭṭhena. Nilīyanaṭṭhenāti nilīnaṭṭhānabhāvena. Patiṭṭhānaṭṭhenāti patiṭṭhānabhāvena. Avassayanaṭṭhenāti avassayitabbabhāvena. Uttamagativasenāti paramagatibhāvena.
පඨමද්‌වෙබ්‍රාහ්‌මණසුත්‌තවණ්‌ණනා නිට්‌ඨිතා.
Paṭhamadvebrāhmaṇasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. පඨමද්‌වෙබ්‍රාහ්‌මණසුත්‌තං • 1. Paṭhamadvebrāhmaṇasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1. පඨමද්‌වෙබ්‍රාහ්‌මණසුත්‌තවණ්‌ණනා • 1. Paṭhamadvebrāhmaṇasuttavaṇṇanā
